Lɔgɔ Sabba 8
8
Lɔga Ushurronɛa :Maa Dhittɛa Ba
1Na Tumu ɛsɛdhu lɔga Nɔa ko ga kɛginyaa ɛlla gonggulɔ toye kumulɔng. Na kuyɛy ngɔyɔ na ɛbbɛgu na ma ushurto halɛ halɛ. 2Na maa dhuguninyana ba toye ko guya bɔɔ dhɔttana na assannana lamu :Tumu na aru. 3Na maa ɛlla bay ushurto halɛ halɛ ko bhee ungo anɛ 150 na te muchugi. 4Na bɛrgu issabbayɔ unga ku tɔmmɔn ko issabbay, gonggul koo chilu kutuloa kènno Arara konnɔ tundɔ. 5Na ma ushurto halɛ halɛ. Na bɛrgu tɔmmɔnɔ unga ku dhɔnɛ kutulo sabbi kargiyɛ.
6Na Nɔa tɛu ungo zugo ramman na owo bhurbhura bere ghendɛsɛna gonggul. 7Na ibha rakkoy na egu bhɔ. Na rakkoy banu na tɔu ko bhee ma ushurronɛ. 8Na koo ibha yikkay na egu bhɔ na kok na katagɛ bhɛa kako ma dha bɔɔ ushurtoyɛa. 9Na yikkay tɔu na nɔng dha bere ma ngani a mɛri na bhee ihonɛ bay garu. Na waga chɔɔ bhɛa ihɛa Nɔa. Na nɔng ittonu siyɔ bhɔ na yikkay tɛa siya nɛnɛ na yagu gonggulɔ toye. 10Na saniu ungo issabbay na ibha yikkay na egu bhɔ sɛgɛn. 11Na jhayny waga. Na hunaa wokkonoye, sɔgɔya bhallogiya girariny dhaa ngani kedhdhana na lɔgɔna tugɔ. Na Nɔa tagu hunde dha bare ma te muchugiye. 12Na saniu ungo issabbay sɛgɛn na ibha yikkaya bɔɔ gina na egu bhɔ. Na ogo na sɛgɛn ngani ngawokkonoo.
13Na bɛrgu dhɔnɛgiye unga ku sabba hunaa oynyaa Nɔa anna 601ye, ma garayɛ. Na nɔng owo gheru na gɔnyu ba. Na aru hunde dha bɔɔ dhɔrɔguye. 14Na bɛrgu rammanɔ unga ku hirkon ko issabbay ma gara na ba dhɔrɔgu kak.
15Na Tumu sɛɛsɛ Nɔa, 16“Inye ko tɛriya nunu ko erroa gunyu ko mɛrɛyaa gunyu bhonda gonggulɔ. 17Na ibha ngakɛginyaya ɛllo ko inye kari lɔmmɛ basseyte, shɔa ko kɛginyaa bibiyo ko ga silolnɛna bay bay ko ga chicho chicho gen kumulɔng, na obhoniseo gonggulɔ na kɛbhɛldɛ bay na kete mɛri.”
18Na Nɔa ko zuga gɛnyɛ bhonda. 19Na ko yɔk kɛginyaa ɛlla gonggulɔ toye kumulɔng bhonda doriyo doriyo.
Lɔga Nɔa Uddulɛsɛna Tumu Go
20Na koo Nɔa echɛɛsɛ Tumu ngawu na ibha kɛginyaa ridhing ngalɔmmɛayo ko shɔaa ridhing ngalɔmmɛayo gen doriyo doriyo na uddulɛsɛ Tumu. 21Na Tumu sabhu henua ahaa kuddulɛsɛna bo ɔngɔna hur hur na ɛsɛdhu lɔgɔ hinisɔ na seu, “Na chɔɔ ko hunde hiri a nganda lɔmmana kuhuyamo erimo ko bhee kɔɛ na jagarɛ anɛ buye, ngakalda wurtɔ hunde ɛddɛana lɔgɔye, ba sɛgɛn ngakɔchɔrio dhul. Na ko yɔk ahaa lɔmmɛa bassey ngadamita sɛgɛn ngakidhiiyo.
22Na mɛa ko bhee ba ngani ihɛ,
Kolea dugayny ko na kusuninɛnɛa,
Lalney ko awurney,
Asanday ko su,
Bar ko kali ale ngagarsɛo.”
Nke Ahọpụtara Ugbu A:
Lɔgɔ Sabba 8: SUQ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©2023 Suri Translation Project which is a project of the Ethiopian Evangelical Church Mekane Yesus