মথি 3
3
রিঃঙুক মাঙ্গালা পিইসা যোহন তাঃরা হঃপ্রাচা
(মার্ক ১:১-৮; লূক ৩:১-১৭; যোহন ১:১৯-২৮)
1নক্কা রিঃঙুক মাঙ্গালা পিইসা যোহনচা যিহুদিয়া সিলিই প্রাং আঃরামা লাঃরো দিঃ চাঃগা প্ররো তাঃরা হঃপ্রালিইরি, 2“অর আপ্রই মলুক কেকিফি আক্রংগা গংখাংফুং নেংঙেংদচা আঃপামা রকব্যা।”
3দিঃ যোহন আক্রংলিলাগো য়ুউরো রিসিক যিশাইয় প্রলিরিচাগা,
সিলিই প্রাং আঃরামা লুঃউ তয়ক অঃরো প্রলিইরি,
“নাংরো ফোরা লেংগু থুওয়ংগে;
ফোরা লেংগু প্রব্রং প্যাংগে।”
4যোহনচা কুলুঃউক আম্যুইং আওয়ে ওয়েতি অর য়াংসুউ খাঃমা সিরিই খুগ্রুবেং হিকলিরি। যোহনচা তঃগা পুশ্যিনেংশ্যিনা পিঃরি চাঃ নিংরি। 5যিরূশালেম, হিকচা যিহুদিয়া অর যর্দন খ্যং নেংবুনেংবা লুঃউরোচা য়াং অাখিংমা যোহনবাদুঃ লাঃগেলিইরি। 6দিঃ লুঃউরোচা যাখা কুঃ আপ্রইকো আঃমা খেংগেরি, য়াংখা যোহনচা যর্দন খ্যংমা য়াংসুউরোগু রিঃঙুক মাঙ্গালাগো পিইলিরি। 7নক্কা যোহন ম্রাংলিরি আম্যা ফরীশীরোনা সদ্দূকীরোচা রিঃঙুক মাঙ্গালাগো য়ুউফু আতুওয়ক যোহনবাদুঃ লাঃগেতি। যোহন য়াংসুউরোগু প্রলিইরি, “ম্রিং আচৈংরো থাওরা ফুরাগা ডেং লাঃচাগা ব্রিই রুওয়েফু কিজু দিঃ পৈঞ্যাগো নাংরোগু যাসুউ পিইরিলি? 8কংরি নাংরো আপ্রইকা চিই হ্লিগেব্যা, য়াংচা আক্যুওগো লঃগামা প্রাগে। 9নাংরোচা অব্রাহাম আচৈং দিঃচা কুঃরো চিইমা মেম্হেকেকি। ঙা নাংরোগো প্রচাগা, থাওরা ফোরাচা দিঃ ক্যকলুংরোগা অব্রাহাম অাচৈং লুকনৈংরি। 10সুরাংমা পকছিং থুউরো হিকরিব্যা। যা আপাংমা আকং আসিই মিসিইলি, য়াংচাগো খুওয়েরো মিং থিফুব্যা। 11চিই হ্লিগেব্যাছুরো ঙা নাংরোগো রিইমা রিঙুক মাঙ্গালা পিইরি য়িগিলি ঙাঃ নক্কা যাসুউ লাঃরিলি য়াংসুউচা ঙাঃ থাক গুনস্যাং। ঙা য়াংসুউমা ফেনেইং রুওয়কফু তয়ং থমেতেং। য়াংসুউচা সেংস্যাংস ওয়িইঞেংনা মিং মাঙ্গালাগো পিইমি। 12য়াংসুউ আলাকমা চাইংগো হিকরি অর য়াংসুউ কুঃ চাবাগো সেসেং প্যাংফু আঃরাগো য়াংসুউ সেসেং প্যাংমি। য়াংসুউচা কুঃ চাবা ছেংহ্রিইগো পুকমা খেং থাঃমি য়িগিলি যা মিংচা তাখালি মিসিই, য়াং মিংমা গুয়েংগো তবলৈফু।”
আস্যাং যীশু রিঙুক মাঙ্গালা য়ুউচা
(মার্ক ১:৯-১১; লূক ৩:২১,২২)
13য়াং আখিংমা যীশুচা রিঙুক মাঙ্গালা য়ুউফু আতুওয়ক গালীলগা যর্দন খ্যংনা যোহনবাদুঃ লাঃলিইরি। 14য়িগিলি যোহনচা য়াংসুউগো দিঃ চাঃগাগো মপ্রগিছুলো হেংলিইরি, “ঙুরোরা কুবাংগা রিঙুক মাঙ্গালা য়ুউফু থতেংরি; ক্রিগি কুবাংচা ঙাবাদুঃ লাঃরি!”
15য়াংখা যীশুচা য়াংসুউগো প্রলিইরি, “য়িগিলি এখক দিঃপুয়েং ফ্রইপেচিই, আক্রংগা থাওরা ফোরা ছেংদাগো দিঃপুয়েং প্রিজুংজিইফু তেংরি।” য়াংখা যোহনচা লাক খেংলিইরি।
16রিঃঙুক মাঙ্গালা য়ুউব্রিনক যীশু রিইগা পঃরি খ্যাং খ্যাং য়াংসুউ হ্রিইগা গংখাং ফুংচা কুয়ি লাঃখারি। থাওরা ফোরা ওয়িইঞেংচা খঃ আরুক ছাংরো কুঃবাদুঃ লাঃচাগো ম্রাংলিইরি। 17য়াং আতৈং গংখাং ফুংগা চাগাঃ প্রঃচা আসাইংগো ক্রাঃলিরে, “দিঃসুউ ঙামা আখ্য সাঃ ফ্রইতি, দিঃসু আথাকমা ঙা ওয়াইং ম্রকতে।”
Nke Ahọpụtara Ugbu A:
মথি 3: BBSRMZ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye