লূক 17
17
আপ্রইইনা আক্যুং আক্রংলিলাগো য়ুউরো সুয়েংসাং পিচাঃ
(মথি ১৮:৬,৭,২১,২২; মার্ক ৯:৪২)
1যীশু কো তিবিরোগো প্রলিইরি, “আপ্রই লেংদুঃ য়ুউ লাঃফু কিজু আথুও-আঙাং ফ্রইফু। য়জংছুগি য়াং লুঃউচা সিইবেচি, যাসুউগা নিংরো, য়াং আথুও-আঙাংচা লাঃরিলি! 2দিঃ আশ্যিরোগা তয়ককো খ্যাংসুমুছু আপ্রই লেংদুঃ য়ুউ লাঃরিছুগি, য়াংখা য়ুউ লাঃসা লৈফাংমা ক্যকলুংগ্রিই তুলুং ছুইরো ম্রইমা খ্যালৈকি, য়াংসুউ আতুওয়ক কংগং কংফু।” 3“নাংরোলি সিদিরেকে। নাক ঞিং নাককো ছেংগ্যাংফাক লুকরো আপ্রই লুককি য়াংসুউগো হক লঃ। য়জংছুগি য়াংসুউ কো আপ্রইকা চিই হ্লিরিছুগি, য়াংখা য়াংসুউগো খুওয়ং রুওয়েলৈ। 4ছুগি তারাক আতুুওয়ংমা য়াংসুউ নাককো খঃনঃপ্রেং ছেংগ্যাংফাক প্যাংলো আপ্রই লুককি; খঃনঃপ্রেং লাঃরো প্রগি, ‘ঙা দিঃ আপ্রইকা চিই হ্লিব্রিব্যা, য়জংছুগি য়াংসুউগো খুওয়ং রুওয়েরাফু।”
5য়াং তিছিনৈয়ক তেমেংদচা ফোরাস্যাংগো প্রগেরি, “ঙারোমা আক্যুংগো অর আম্যা প্যাংলো পিই।”
6ফোরাচা প্রলিইরি, “রিজিই পুয়েং মিগিলি নাংরোমা আক্যুং হিকরিছুগি, নাংরো দিঃ গুয়েংবাংগো প্রনৈংমি, ‘আম্রনা পলো ম্রমা লাঃলো ছক; য়াংখা আপাংচা নাংরো চাঃগাগো নাথংমি।
7“তুওয়কফুচাগা, নাংরোমা ক্যুয়েং তয়কচা লং হ্ল্যরি মুহুককি সাংফছুয়িই ক্যংরি। যাখা য়াং ক্যুয়েংচা ছুয়িইক্যংরাগা লাঃফু, য়াংখা কো ইংস্যাংচা য়াংসুউগো দিঃচা প্রফু লঃ, ‘আয়াং লাঃরো নাং চাঃফু থৈং’? 8মুহুককিলি, য়জং মঃপ্রব্রি-প্রফুচাগা, ‘ঙা চাঃফুচাগো য়াং, অর ঙা মন্হক তৈংঅং চাঃরি-সকতিলি, য়াল্হক তৈংঅং, খাঃমা আওয়ে তাদাং রঃরো, ঙাগো প্রুজু। য়াংনক নাং চাঃ-সক।’ 9য়াং ক্যুয়েংচা, ইংস্যাং চাঃগাগো কৈরিকিজু, ইংস্যাংচা কিজু তাংফু চাঃগা লঃ? 10য়াংপুয়েং তেথেং থাওরা ফুরা ঈ আলুং অলুককো লুকপ্রিনক নাংরো প্রগেতিচাগা, ‘ঙারোচা, আঃফু মিহিকরি ক্যুয়েং, যাচা লুক থঃতিলি, ঙারো সাসাক য়াংচারা লুককেতিব্যা।’”
আঃনুংগে ছিয়ককো কেইংমাজিলিরি।
11যীরুশালেংদুঃ লাঃরিখা যীশুচা শমরীয়ানা গালীল আথিগা ওয়ংরো লাঃলিইরি। 12-13য়াংখা রুওয়া তুওয়াদুঃ ওয়ংখা যীশুচা আনুংগে ছিয়ককো ম্রাংলিরি। য়াংসুউরোচা আওয়িগা রেঃরো অঃ প্রগেলিরি, “যীশু, ফুরা, ঙারোগো মিত্তা থাঃবা।”
14য়াং সানাসিরোগো ম্রাংরো যীশু প্রলিরি, “নাংরো য়েঃ পুরোহিতরোমা লাঃরো রঃগাগো ক্রিগেখি।”
য়াংসুউরো লাঃরি লেংমা কেইংমাগেলি। 15-16য়াংসুউরো আতুওয়ংমা তয়ক যাখা কো রঃগা কেইংমাচাগো ম্রাংলিরি, য়াংখা য়াংসুউ অঃরো থাওরা ফুরাগো খিংম্যুয়েংরো প্রেং লাঃলিইরি অর যীশু আখ্রিঃমা ওয়েরো যীশুগো কিজু তাংলিরি। য়াংসুউ হিকলিরি শমরিয়া প্রিনিগা লুঃউ।
17য়াংখা যীশু প্রলিইরি, “ছিয়কচুং মকংলি লঃ? য়জংছুগি অরকুয়কনা যামালিঃ? 18থাওরা ফুরাগো খিম্যুয়েংফু কিজু, দিঃ নেংঙেংখ্রা লুঃউ আপি অরতয়কলি প্রেং মাঃলালি লঃ?”
19য়াংনক যীশু য়াং লুঃউগো প্রলিরি, “থাঃরো লাঃলি। নাং ক্যুংরিকিজু আকং ফ্রইরি।”
থাওরা ফুরাস্যাং নেংঙেংদ লাঃফু আক্রংলিলাগো সুয়েংসাং পিইচা
(মথি ২৪:২৩-২৮,৩৭-৪১; মার্ক ১৩:২১-২৩)
20লৈগায়ক ফরিশি যীশুগো মিংগেলিরি, যাখা থাওরা ফুরা ঈ নেংঙেংদ লাঃফুলিঃ। আফ্রিমা যীশু প্রলিরি, থাওরা ফুরা ঈ নেংঙেংদ লাঃফুখা, তুখুউলি লাকখানা মাঃম্রাংমুঃ। 21তয়কলি মপ্রমুহুক, “ক্রি, ‘থাওরা ফুরা ঈ নেংঙেংদচা দিঃমা-হুকমা আক্রংগা কুবাংরো আথিইমারা থাওরা ফুরা ঈ নেংঙেংদ হিরি।”
22য়াংনক যীশু কো তিবিরোগো প্রলিরি, জং রাক লাঃমি যাখা নাংরো মনুসাওয়া সাঃ হিরিখা রাক তারাককো তংদালিঃমি য়িগিলি নাংরো মাঃরামুঃ। 23লুঃউরোচা নাংরোগো প্রঃমি, ‘দিঃমা ক্রি-হুকমা ক্রি।’ প্রাংগা মথুওয়ককি মুহুককিলি য়াংসুউরো নক্কা মলৈকি। 24সেয়েক প্রাককি যাপুয়েং গংখাংব্রাং তেগেংগা তেগেং লালাং ফ্রইতিলি, মনুসাওয়া সাঃ লাঃখালি য়াং পুয়েং ফ্রইফু। 25য়জংছুগি পাথামা মনুসাওয়া সাঃচা কংগং ওয়িদানা খেংরাফু। য়াংচা মুহুকিলি দিঃ খঃমা লুঃউরোচা য়াংসুউগো লাক মেখেংগে মুহুক। 26“নোহ আখিংখা যাপুয়েং ফ্রলিরিলি, মনুসাওয়া সাঃ আখিংখালি য়াংপুয়েং ফ্রইফু। 27নোহ সাংফমা মাতাকখাং হ্রিইগা অর ধঃ লাঃরো আলুং লুঃউরোগো মেঃসে হ্রিইগাতয়ং লুঃউরোচা চাঃগেতি-সককেতি অর মাঃয়া নেজেকেতি-পেজেকেতি। 28অর লোট আখিংমা যাপুয়েং ফ্রইলিরি, য়াংপুয়েং ফ্রইফু। য়াং আখিংমা লুঃউরোচা চাঃগেতি-সককেতি, রংগেতি-ওয়িগেতি, চৈকেতি-পুয়ুগেতি অর ইং-য়াঃ লূককেলিরি। 29য়জংছুগি যাখা লোট সদোমগো বৈরো লাঃলিইরি, য়াংনিক গংখাংগা মিংনা আচুনেংফুয়ি মুঃওয়ারো আলুং লুঃউগো সেঃবলৈতি। 30যানি মনুসাওয়া সাঃ কোদৈং প্রাফুলি, য়াংনিক দিঃপুয়েং ফ্রইফু।
31“য়াং রাকনি যাসুউ ইংখংমা হিফু য়াংসুউ ইংগা ওয়েছেং য়ুফু কিজু অকতু মাঃসাককি। য়াংপুয়েং তেথেং খ্রেংমা যাসু হিফুলি, য়াংসুউ প্রেং মাঃলাগি। 32লোট মিঃয়া যাপুয়েং ফ্রইরিলি, তুওয়করো ক্রি। 33যাসুউমুছু কো আসাককো কিছিফু ক্রেংগি, য়াংসুউ কোক তিম্রিজ আসাককো মাঃরা ফ্রইফু। অর যাসুউমুছু কো আসাক প্যককি, য়াংসুউ কোক তিম্রিজ আসাককো কিছিনৈংফু। 34ঙা নাংরোগো প্ররি, য়াং ঞিইনিক, তেখেমাঃ নৈয়ক ওয়িই হিফু, তয়ককো য়ুউ লাঃফু অর তয়ককো বৈখাফু। 35-36য়াংখা মিকমা নৈয়কচা আতু ক্রিছুংমা চুঃবা থংগেমি, তয়ককো য়ুফু অরতয়ককো বৈখাফু।”
37তিবিরোচা প্রগেলিরি, “আস্যাং, যামালি?”
যীশু আফ্রি পিলিরি, “আঃসিই অকং যামা হিকরিলি, য়াংদেমা লাংদা ক্যারি।”
Nke Ahọpụtara Ugbu A:
লূক 17: BBSRMZ
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
