Qooccanchi Kitaaba 1
1
Qooccanchi Aganna
1Luwwi hundiinsim gaassaa Waa'i iimanee uullaa qooccukko. 2Ee ammane uulli mat luwwim bee'anee duuha'i la'isoobee'anee hee'ukko. Gambabbaakkoo tuunsim xillaalli wo'i woronne hee'ukko; Waa'i Ayyaanim wo'i hanenne chabbaa hee'ukko.
3 #
2Qor 4:6
Waa'im «Caakki ihona» yukko. Caakkim ihukko. 4Waa'im caakki eran ihukkisa moo'ukko; caakkam tuunsiinsi annanni issukko. 5Waa'im caakka «Balla» yaa weeshukko; tuunsom «Hiimo» yukko. Hiimukkom soodukkom oohim luxxi balli hee'ukko.
6 #
2Phex 3:5
Ee lasage Waa'i «Wo'o iimii aadii annanni issaa woroonii hanaanii egedoo luwwi ihona» yukko. 7Ixxim ee luwwa issukko; oo luwwim ixxeensi woroon yoo wo'oo ixxeensi hanaan yoo wo'oo annanni issukko; ee'isam ihukko. 8Waa'im ee luwwa «Iimane» yaa weeshukko; hiimukkom soodukkom oohim la'm balli hee'ukko.
9Ee lasage Waa'i «Uulli siidamoo'isina iimaniinsi woroon yoo wo'i mat beyyonne wixxihona» yukko. Ee'isam ihukko. 10Waa'im wo'bee'i beyyo «Uulla» yaa weeshukko; odim wixxaa yoo wo'om «Dambalaqa» yaa weeshukko; oo issu luwwi hundim eran ihukkisa moo'ukko. 11Odim Waa'i «Uulli annanni ihaakkoo sire'i hundam mutisona; sire'i hurbaataa mishoo haqqaa ixxuwwi sire'isanne mutisona» yukko; ee'isam ihukko. 12Ee'isinne annanni annanni ihaakkoo sire'i hundam sire'i hurbaataa mishoo haqqaa ixxuwwi sire'isinnem uulli mutisukko; Waa'im ookki eran ihukkisa moo'ukko. 13Hiimukkom soodukkom oohim saxxi balli hee'ukko.
14Ee lasage Waa'i «Ballaa hiimoo annanni issoo'isina caakkuwwi iimanenne ikhonai ixxuwwim ayyaammuwwa, agannuwwaa hiinchuwwaa la'issona. 15Uullina caakka uwweena iimanenne caakkuwwi ikkona» yukko. Ee'isam ihukko. 16Ee'isinne Waa'i lam lob caakkuwwa qooccukko; eelliinchoo ballina aganaa hiimina caakkissamisa issukko; odim boollaankam qooccukko. 17Waa'im ixxuwwi uullina caakka uwwitamisina iimanenne ikkamisa issukko. 18Ixxuwwim hiimonnee ballannee caakkissamisinaa tuunsom caakkiinsi annanni issitamisinaa malaayye uwwukko; Waa'im ookki danaam ihukkisa moo'ukko. 19Hiimukkom soodukkom oohim soo'l balli hee'ukko.
20Ee lasage Waa'i «Wo'i woronne annanni annanni fooraam luwwi hee'ona; cii'im uulliinsi hanaan yoo iima'n hafachchanne bararona» yukko. 21Ee'isinne Waa'i wo'i woro'l lob moochchuwwa, mikmikoo fooraam luwwaa bararoo cii'aa ixxuwwi sire'isam qooccukko. Waa'im oo hundim danaam ihukkisa moo'ukko. 22Waa'im ixxuwwina «Dut ikkehe fikkaannehe dambalaq wo'onnem wo'mmehe; cii'im uullanne fikkaannona» yukko. 23Hiimukkom soodukkom oohim onti balli hee'ukko.
24Ee lasage Waa'i «Uulli fooraam luwwi hundam ixxuwwi shumo'isam diinatee moochchaa mikmikoo biqinne shuroo qooccanchaa hundam lobokaa hoffokaa fissona» yukko. Oo hundim ixxi yukkisam ihukko. 25Waa'im uulli moochcha; fooraam diinatee mikmikoo qooccanchaa ixxuwwi shumo'isinnem qooccukko; Waa'im ookki danaam ihukkisa moo'ukko.
26 #
1Qor 11:7
Ee lasage Waa'i «Manna ni hagarannee ni kobi'llatonnee qooccinona; ixxuwwim wo'i woronne hee'oo qurxumme'e, iimanenne bararoo cii'a, fooraam diinatee uullanne mikmikoo qooccanchaa ee'isam uullaa hundam gassitona» yukko.
27 #
Qoc 5:1,2 #
Mat 19:4; Mar 10:6 Ee bikkina Waa'i ixxi hagaranne
manna qooccukko;
ixxi hagaranne qooccu mannam
goonchoo meentichchoo issaa qooccukko.
28Waa'im manna «Dut ikkehe, fikkaannehe, uullannem wo'mmehee uullam gassehee; Dambalaq qurxumme'e, iima'n cii'aa uullanne mikmikoo fooraam luwwaa hundam gassehe» yukko. 29Odim Waa'i mannina «Ki'nnuwwina hurbaat ihoo'isina sire'i yoo mutoo luwwaa sire'i yoo haqqi mishshuwwaa hundam ki'nnuwwina hurbaat ihona uwwaammo. 30Ee'isam uullanne yoo moochchinaa cii'inaa uullanne mikmikoo fooraam luwwi hundinam mutaa latoo luwwi hundim hurbaat ihona uwwaammo» yukko; ee'isam ihukko. 31Waa'im qooccu luwwi hundam moo'ukko; oohim lobakata eran hee'ukko; hiimukkom soodukkomoohim loh balli hee'ukko.
Nke Ahọpụtara Ugbu A:
Qooccanchi Kitaaba 1: KeesKita
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye