Luk 11
11
Jisɔs akpene Ateb Njɔ
(Mat 6:9-13; 7:7-11)
1Ofo bibi Jisɔs ajɔ a akag njɔ ka ekpeghe mfo. Ngara sa akanna, nsɔgba wiwi atɔɛ, “Ntaa, kpene warr sa akag njɔ, nasi Jɔn akpene asɔgba ɛyɛ.”
2Atɔ mbɔ, “Ɛkpanna kag njɔ, rag si:
“ ‘Nsɛ,
nɔngɔ nogogho ɛjɔ ɛkɛ mbeng ɛya,
nɔngɔ oton ɛba ɛba.
3Kɛ warr jɛ ɛnɛghɛ kpere ofo.
4Tamsighi warr ka abibi afɛ ɛyɛrɛɛ,
si warr ɛmatamesighi anɛ ba ane warr ebibi.
Ka fene warr ekigbɔ ka nagara.’ ”
5Ka atɔ mbɔ, “Arenasi okpe ntɛ, ka omo ka nnuenokon ɔmɔ tɔɛ, ‘Ntɛ, kpɛnnɛm mgba brɛk ɛsa; 6atebsi ntɛ waa aru ya nɛjɛn aba ka jaji mkpem ji nkiɛ.’ 7Ka ntɛ wɛ yɔ akpɛ ga ka nkɛbɛ, ‘Kim fegheayɔ. Mmagbanga mbu, abɔ baa anɔng ga nanaa ka ntefeghe. Mmam ntam nkia jaji.’ 8Ntɔ war, ɛjɔgasi amam atam akia brɛk atebsi ntɛ wɛ yɔ, ka ateb arigɔ nakara nsɔn afeɛ atam akia ji asɛbɛ.
9“Ka ntɔ war: Bɔmmɔ sa akɛ war kɛ; sɛb sɛ ɛyɛyɛ; kar si mbu eribiribi. 10Kpere nnɛ ya abɔmmɔ atabataba; nnɛ ya asɛb ayɛyɛ; ka nnɛ ya akar ka mbu eribiribi.
11“Bagha nsɛ yɔ yi mmɔ wɛ abɔmmɛ nnya alab, akiɛ nnyɔ? 12Sɛ abɔmmɛ eji nkɔk, akiɛ ɛnang? 13War ba ebebbeb, enyi sa ɛkɛ abɔ brɛ anɔba mbe, kafanga nsɔjɛrɛ ya are ka bɔsɔ arighi kɛ anɛ ba abɔmmɔ Mbara Nɛfɛb!”
Jisɔs atɔngɔ si nsam ɛyɛ ariru ka mfo a nnam
(Mat 12:22-30; Mak 3:20-27)
14Jisɔs ayighi ebibi etughu ka biji nnɛ ya arijɔ arag nono. Ngara yi ebibi etughu eru, munnu ya arijɔ arag nono arag, ɛbɔngɔ biji ɛkpɔ mbɔ. 15Ka bantingi arag, “Ka mbeng Bɛlsɛbɔb, Nton a abibi atughu, yiyɛyi ya ayighi abibi atughu.” 16Bantingi agarɛ si ane ejo ndenge ya aru ka bɔsɔ yi ɛtɔngɔ si Ɔsɔwɔ ya atoɛ.
17Jisɔs agbɛrɛgbɛrɛ nkana mbɔ ka atɔ mbɔ: “Kpere oton bi erifɔ mkpa ayamayama, ka kpere nju yi arifɔ mkpa agbɔghɔgbɔ. 18Ka nnam arinafɔ mkpa, nɔyɔ mbɔ enenang eyimi? Ndag na atebsi ɛkana si nkɔ nɔyɔ ka mfo Bɛlsɛbɔb nkama abibi atughu. 19Munu nkamana abibi atughu ka mbeng a Bɛlsɛbɔb, bagha mbeng yi ya anɛ ɛbrɛ akɔghɔ akama mbɔ? Nɔngɔ mbɔ ajɔ bakpegha banaa ɛbrɛ. 20Ka arenasi nkama abibi atughu ka mbeng Ɔsɔwɔ, erusi oton Ɔsɔwɔ ɛmaba ɛtɔb war.
21“Ngara yi nkora biji a munnu, amotongo biji na mbe nɔyɔ ababa nju ɛyɛ, anyaju anamam ayu mbe ɛbɛ. 22Ka nnɛ yɔntingi ya akora agɛ, aba na ama alɔg ama nanɛ atabɛ mbe nɔyɔ bi yɛ akonoekpo afɛnɛ aton mbe ɛbɛ amo na bi.
23“Nnɛ ya arikpa nanaa are nnɛ ujing waa, ka nnɛ ya arimtɔb atongo, asamasama.
Baba si ebibi etughu ɛmama ɛfɛnɛ
(Mat 12:43-45)
24“Ngara yi ebibi etughu ɛmannaru ka biji nnɛ, emogho ka nyo a mfo asɛbɛ esiayɔ ka arina yɛ. Ka aragsi, ‘nfɛnɛ ka nju yi ntamsighi.’ 25Ngara yi ebibi etughu esi, ɛyɛ amɛ fɛngɛ nju afɔ atongo mfo. 26Ka amakɔ abibi atughu asimma yantingi ya abeb agɛ yɛfɔnɔ, amanam ajɔ fa. Nekpen ni munnu yɔ ɛfan ebeb ɛga ni eyoghoyogho.”
27Si Jisɔs ajɔ arag mbe bi, manka wiwi ka ɛbɔngɔ ji arag, “Ɔsɔwɔ anara nnaja ya awɛn na afɛnɛ afena.”
28Akpɛ, “Nɔngɔ ɛnara nayɛ ɛjɔ ɛkɛ anɛ ba ayog nono Ɔsɔwɔ afɛnɛ ane na.”
Ndenga Jona
(Mat 12:38-42)
29Si ɛbɔngɔ ɛfanga, Jisɔs arag, “Eying jifa ebebbeb. Abɔmmɔ ndenge ɛkpɔgisi ejo, ka ndenge yayi arem erising ya Jona. 30Si Jona ajɔ ndenge akɛ anɛ ba Ninifɛ, nayɔ Mmɔ a Munnu atamajɔ akɛ eying jifa. 31Nton a manka ka ɛka Sɛba ayimi na anɛ ba eying jifa ka ofo banaa atɔngɔ mbɔ si arima nene, atebsi aru ka ndaba mba ɛka amakɔ ɛwag ka mfo a Sɔlɔmɔn, ka munu nnɛ ya afang aga Sɔlɔmɔn are fa. 32Anɛ ba Ninifɛ ayimi na anɛ ba eying jifa ka ofo banaa atɔngɔ mbɔ si arima nene, anɛ ba Ninifɛ ayanga nekpen ka ngara yi ayog nono Ɔsɔwɔ ni Jona atɔ mbɔ, munu nnɛ ya afang aga Jona are fa.
Ɔmɔnɔ Biji
(Mat 5:15; 6:22,23)
33“Nnɛ wawi arem ya amɔnɔ ɔmɔnɔ abar ka mfo bi nnɛ arighi yɛ, sɛ akɔ nsɛ akongo. Erising akono ka mfo bi anɛ wɔɔ ayɛ, sɔng kpere nnɛ ya anam ayɛ ɛfɔngɔ. 34Amar ɛyɛrɛ ya are ɔmɔnɔ biji ɛbrɛ. Ka amar ɛyɛrɛ anɔbna, biji ɛbrɛ wɔɔ ɛjɔ ɛfɔngɔ. Ka amar ɛyɛrɛ arinanɔb, biji ɛbrɛ wɔɔ ɛjɔ ka ejighi. 35Nɔngɔ ɛjɔ si, ɛfɔngɔ ji ere a ka biji ejighi sang. 36Ka, biji ɛbrɛ wɔɔ ɛjɔ na ɛfɔngɔ, ekpeghe jaji erigbɔ ejighi, biji wɔɔ ɛjɔ ɛfɔngɔ, nasi ɔmɔnɔ ɛyagha na ka biji ɛbrɛ.”
Jisɔs atuu Bafarisi na bekpena ejighi ɔtɔng
(Mat 23:1-36; Mak 12:38-40)
37Ngara yi Jisɔs ama rag wɔɔ, nnɛ a Farisi abengɛ sa ama anɛ ejonɛnɛghɛ nanɛ; anam ama jɔ sa anɛ ejonɛnɛghɛ. 38Ka biji ɛkpɔ nnɛ a Farisi, yi Jisɔs arigbɔmba asu abɔ ka anɛ ejonɛnɛghɛ.
39Ka Ntaa atɔɛ. “Munu, war Bafarisi ɛsɛnnɛ njam a mkpogho na mgbanggbang, nna ga ason na abibi na ɛbara nkɔng. 40Ka war adɛmmɛ anɛ! Nnɛ ya ane njam sang ane nna? 41Kɔ ji ekpe ɛkɛ akpak, sɔng kpere ejo ɛfɔ ɛkɛ war.
42“Esiyiri akɛ war Bafarisi, atebsi ɛrɛghɛ ɛkɛ Ɔsɔwɔ ejo jiji ka ɛbɔngɔ wobo ka akokomo mbe bi eru ka ɛgbɛ, nasi nnyan, abakpara na agu ɛtɛn nɛkɛ mbe biga nasi eyima ka ɛdɛdɛghɛ na nɔkɔrɔ Ɔsɔwɔ. Ma kpene mbe bi wɔɔ jaji ekisa.
43“Esiyiri akɛ war Bafarisi, atebsi atakpa nji akɔr war ka buju mfa Jus na nakagha ka kpere mfo bi emo.
44“Esiyiri akɛ war Bafarisi, atebsi ere nasi anam, ya anɛ ayanga aramagbɛrɛ sa anam ya.”
45Mgbɛra ejighi wiwi akpɛ Jisɔs, “Nkpekpene, si ɔrag mbe bifa, yo otogho warr to titi.”
46Jisɔs akpɛ, “War ba ɛgbɛra ejighi, esiyiri akɛ war, atebsi ɛkɛ anɛ nɔsɔn ni arighima asɔn, warafɔnɔ ɛmam ɛkɔ nnyighibɔ yiyi ɛtɔb mbɔ.
47“Esiyiri akɛ war, atebsi esii anam abono Ɔsɔwɔ, ya akuansisi ɛyɛrɛ ayon mbɔ. 48Yɛ ɛtɔngɔ si ɛmatama ka ji akuansisi ɛyɛrɛ ane; ayon abono Ɔsɔwɔ ka war esii anam a mbɔ. 49Ateb abibi mbɔ, Ɔsɔwɔ ka ɛwag ɛjɛ arag, ‘Nto abono Ɔsɔwɔ na afɔsil nkɛ anɛ ba Isɛrɛl, bamɔng ayonyon bamɔng ane mbɔ niyiri.’ 50Erusi Ɔsɔwɔ afe eying jifa ka abono ɛyɛ ya ayon, tɔɔngɔ ka ɛjamannab eying, 51jam ka anɔng Ebɛl sii ka anɔng sakaria, ya ayon ka etingting ekpom na mfɔ a mfo bi ere ka nna nju Ɔsɔwɔ. Ntɔ war ɛdɛdɛghɛ, mfe eying jifa ka mbe bi wɔɔ.
52“Esiyiri akɛ war ba ɛgbɛra ejighi, atebsi ɛmagbanga mba yi anɛ ka asing agbɛrɛ Ɔsɔwɔ. Warafɔnɔ erising fa ɛgbɛrɛ Ɔsɔwɔ, ɛfɛnɛ ɛgbanga anɛ ba ka agbɛrɛ Ɔsɔwɔ.”
53Ngara yi Jisɔs atam asighi mbɔ, Bafarisi na ba ekpena ejighi agɔngɛ nafaba nkoronkoro na abɔmmɔ ya asaghɛ nete, 54ɛyagha arikɛ sɔng abɔbɛ ka ja amanna rag.
Nke Ahọpụtara Ugbu A:
Luk 11: NDD Nta
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
©️2022 Luke Initiative for Scripture Translation