markus 5
5
asa 5
yecu gwudi ḏiŋeroma kwiji gweḏi jaḏarin
mṯ. 8:28-34, lk. 8:26-39
1gwune nalmuri nalṯɩmi kɩməmu elo geḏi ḏɩrawe kamɩrɩgen yeḏi lijaḏarin. 2gwune nuduḏa kwu murkab ganu nan gwiji weləḏa ganu cou gwun gwuwiḏi kalo geḏi nil gwun gwəṯi ḏiŋeroma. 3gwaṯɩje kalo geḏi nil. na gwiji gwate gwun gwəṯi ŋɩma gwuŋaki ajirɩjir ye no, 4na ŋwamon ŋwutu na gwaṯɩlgaki jalbaja je na ajirɩjir ye, natuḏa ajirɩjiro ganu na jalbaja nulakɩra ganu jɩtijɩti di de. gwiji gwate gwəṯi ŋɩma gwuḏami no. 5bubruṯ gilio na anyine gwaṯɩje ŋwurgwom elo na kalo geḏi nil naṯuəri gwula. naṯuḏɩrṯini aŋɩna nanu nyɩdol nye. 6gwune aŋəḏu yecuŋ uro ŋɩnəwei, nueneḏe nuiḏi gi jei ganu lugwun. 7nuəri gwula gwubuḏo nueicɩno, a gwar i gwada ŋa yecu, ŋaɽe ŋeḏi elo gwun gwolenelo? nyi gwaŋərɩmi elo gwe aṯɩŋwigwurṯimɩnio no. 8gi gwune gweicuno, tuḏi kwiji ganu, ŋa gwun gwiro ḏiŋerom. 9nueicɩno, ŋa gwan əḏi? nueicɩno, jiri jinyi jutu ganu, anutu. 10nuɽoṯəḏɩjo yecuŋ gworki nuarno late lulireije kamɩrɩgen no. 11na juḏur jutu jijo gɩṯo lɩrgwoma nanu jiṯi ga, 12na ḏiŋerom wei uməḏɩjo naleicɩno, wəjije anəḏi gi juḏur ganu. 13na yecu ouwɩrico nalwele. na ḏiŋerom tu naləḏi gi juḏur ganu, na juḏur abɩre nalriḏe lɩrgwoma nanu, nalouṯaḏe gi ḏɩrawe nalḏɩreḏe. na juḏur jaro alɩb gwuttən ca. 14na laɽa leḏi juḏur nalabɩre naluməḏɩjo liji leḏi amɩrɩgen yono na kalo gun guɽeico ga. na ləmɩnyo wele lutu lar laŋu ŋuɽuna ŋun ŋɩmila. 15nalwila ḏi yecu nalaŋu gwiji gwun gwəṯi ḏiŋeroma gwijiga nukani nujiga muma, na luŋa naldonye. 16na liji lun laŋəḏi ŋuɽuna, naluməḏɩjo ŋuɽuna ŋun ŋɩmila kwiji gwun gwəṯi ḏiŋeroma, na gi juḏur. 17nalɽoṯəḏɩjo gworki gwele gi ḏiɽil deḏi amɩrɩgen ŋagin. 18na gwune naləḏi kwu murkab ganu, na gwiji gwun gwəṯi ḏiŋeroma nuuməḏɩjo nuarno gwalgwele. 19gwate ma yecu ouwɩrico no, numɩni eicɩno, wiḏi dunu lugwuŋa na gi liji luŋa ŋaluməḏɩjo ŋuɽuna ŋun ŋɩmal gwele gwun gwiro elo ape lugwuŋa ŋino ŋe. 20nuwele nuar gwumə gi jɩmɩrɩgen jun jiro di ŋuɽuna ŋun ŋapɩlo yecu lugwun, na wei nalobaga ṯuṯ.
idiɽo gi ḏaiya ḏeḏi ŋaɽe ŋeḏi yairus, na ḏiŋiriḏa nanu ḏeḏi gwa gwun gwaṯarṯo ŋuwəno
mṯ. 9:18-26, lk. 8:40-56
21na gwune na yecu aɽuwa murkab gwe mɩna kɩməmu ŋiro kaja, na liji aɽuwaḏa ldu lugwun lutu; na ŋu gwijo ḏɩrawe nanu. 22na gwele gwete wila gweḏi dunu gweḏi elo gwun gwan yaŋɩrus, gwune nuaŋu nuiḏi ŋwara ganu lugwun, 23nuɽoṯəḏɩjo gworki nueicɩno, ŋaɽe ŋinyi ŋun ŋiro gwa ŋo gɩṯo ŋar ŋai; wila gwudo ŋangele di elo ŋundone kaja numiḏe. 24nalgwele na liji lutu nalgwujane, nalupi nanu.
25na gwa gwete je gwaṯarṯo ŋuwəno jɩḏilio di na gwuttən; 26naṯuiḏe ŋɩdi ŋe ŋun ŋutu ŋwakim ŋwutu, nuḏoḏeice ŋɩdio ŋuŋun wei, nate nudone kaja no naṯumɩni aŋɩnu yuŋun iṯane ganu. 27gwune nudiŋɩni yecu gwe, nuwila gi ḏuɽo ganu nuḏɩmumi giria guŋun. 28nuarno, ḏa nyi maḏɩmumi jiria juŋun kuwei nyi gwiŋir nanu. 29na cou na ŋuwən ḏuḏɩni nulɩŋini ganu miŋir nanu. 30na yecu lɩŋini ganu ŋɩma ŋumədu lugwun, nuwɩrla ganu kɩlɩgi ganu nueicɩno, əḏi gwiro ḏɩmumu jiria ji? 31na calɩmis juŋun wɩrlijo ŋuɽuna naleicɩno, ŋa gwaŋəḏi liji lutu lun lupiaŋa nanu namɩni arno, əḏi gwiro gwiḏɩmumaŋa nanu? 32nunŋalaḏe lun luɽeico ga nuarno gwunaŋu gwun gwarro dino. 33gwune na gwa aŋu ŋuɽuna ŋun ŋɩmaje lugwun, nuḏonye bucu nuubəga, nuwila nuiḏi ŋwara ganu lugwun, nuuməḏɩjo ŋuɽuna wei ŋun ŋiro gwerkwe. 34nueicɩno, gwa, ḏɩməṯo ḏuŋa ḏimaŋaŋele muma. wiḏi ŋiŋir nanu gi ḏumə ḏuŋa.
35gwore gwuməḏɩjo gwa, na liji kworo wila leḏi gwele gweḏi dunu gweḏi elo naleicɩno, ŋaɽe ŋuŋa ŋɩmai. gwudaro gəko na gereja mualɩm galo j 36gwune na yecu diŋɩni ŋuɽuna ŋeno nunŋələḏəṯini ganu nueico gwelɩnya gweḏi dunu gweḏi elo no, ŋaḏonyɩḏa no namɩni əmɩnyi. 37na gwate mouwɩrico gwete algwuwele no nalmɩni wele buṯrus gwe, na yagub, na megin gweḏi yagub gwun gwan yuwana. 38nal wila kwu dunu gweḏi gwele gweḏi dunu gweḏi elo nalbuje ŋuɽuna ŋɩmaniḏo ganu na liji əri gwula gworki. 39gwune nuəḏi nuleicɩno, gwudaro gəko na nyarre dino na nyəri gwula? ŋaɽe ŋate ŋɩmai no namɩni ŋiḏɩro. 40nalaki jumo; gwune nuldio wei, nugwulo babaŋ gweḏi ŋaɽe na nana gwuŋun na lun lɩwiḏile, naləḏi kalo gun gɩḏɩrɩne ŋaɽe. 41numəṯo ŋaɽe gi ḏi nueicɩno, talita kumi, ŋuɽun ŋeno ŋarno, ŋaɽe ŋinyi, diɽu. 42na ŋaɽe diɽi nuwele, na ŋu ŋəṯi jɩḏilio di na gwuttən. na cou nalobaga gworki. 43nuluməḏɩjo ŋuɽuna ŋɩbɩɽe nuarno ŋate ŋal gwiji diŋɩni gwetɩdo no, nuluməḏɩjo alḏəḏə ŋɩdio ŋe ḏiṯa.
Nke Ahọpụtara Ugbu A:
markus 5: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.