markus 3
3
asa 3
ḏɩmiḏa ḏeḏi ḏi ḏun ḏiḏeḏo elo
mṯ. 12:9-14, lk. 6:6-11
1na yecu əḏi kwu dunu gweḏi elo mɩna, na gwiji je gwun gwoḏeḏo ḏi elo. 2nanŋalaḏe ḏa maro gwuŋele muma gi lamon le sabiṯ kani alicɩgi, 3nueico gwiji gwun gwoḏeḏo ḏi elo no, diɽu ŋaḏuḏɩni kɩlɩgi ganu. 4nuluməḏɩjo nuleicɩno, nyalarno gwiŋir gi lamon le sabiṯ ilape ŋuɽuna ŋiŋir i ŋuɽuna ŋɩki i ilmiḏi i ilɽinye a? nalje nyɩkwom. 5nunŋalaḏe gwuɽi ganu, gwɩni ḏugwore gi gwune dugwor dagin dɩbɩɽe, nuuməḏɩjo gwiji nueicɩno, wali ḏi ganu. nuwali ḏi ganu na ḏi ḏuŋun nuaɽuwaḏe muma. 6na lɩbarɩsi tu kɩluḏo cou naluməḏəṯelo lijiŋale leḏi ərudus galakwe gwalɽinye.
7nan yecuŋa walane nalwele calɩmis je juŋun di ḏɩrawe, na liji wila lutu lugwun leḏi jɩmɩrɩŋen jun jan jalil na yauḏia, 8na urucəlim na aḏumiya, na liji lun laṯɩje gi ḏuɽo ganu ḏeḏi ḏɩrawe ḏun ḏan urdun, na leḏi sur na saida, gwune ḏiŋɩnilo ŋuɽuna ŋun ŋaṯularre. 9nuuməḏɩjo calɩmis juŋun nuarno gwalgelijo murkab gwun gwɩti gɩṯo ŋau elo gi gwune liji lutu jo gwirgwogwɩnyejɩlo. 10gi gwune limulmiḏi lutu kəbe nalupi nanu lun leḏeḏo nanu lar ludɩmumini nanu. 11na ḏiŋerom gwune nalaŋu naliḏi gi jei ganu lugwun kɩɽelo nalərəjo gwula, naleicɩno, ŋa gwiro ŋaɽe ŋeḏi elo. 12nuluməḏɩjo ŋuɽuna ŋɩbɩɽe nuarno late gwalaŋiḏi no.
yecu gwuməṯi duwəjo dun diro di na gwuttən
mṯ. 10:1-4, lk. 6:12-16
13nuabo gi lɩrgwom elo nuləmɩḏe lun lɩbunyulo, nalwila lugwun. 14nulməṯo di na gwuttən naṯɩlɩje naṯulwəje naṯɩluməḏɩjo liji. 15nulḏəḏə ŋelɩnya ŋeḏi gela liji muma lun leḏeḏo nanu nalti ḏiŋeroma. 16nudəḏə simianŋ jiri jan buṯrus, 17na yagub, ŋaɽe ŋeḏi jebəḏi, na yuwana megin gweḏi yagub, nulḏəḏə jiri jan bunajis jun jarno ləṯigirɩṯɩnyini, 18na anḏarawus, na bilibus, na barṯalmawus, na maṯa, na ṯoma, na yagub ŋaɽe ŋeḏi alba, na ṯaḏawus, na simian gweḏi kanan, 19na yauḏa iskariyuṯi, gwun gwiḏəḏi yecuŋ liji.
yecu wɩrli ŋuɽuna ga ŋan dapa ŋɩru diŋeleja uwə seiṯan gwe
mṯ. 12:22-37, lk. 11:14-23; 12:10
naləḏi kwu dunu. 20nalaɽuwaḏa ldu mɩna lutu kəbe na yecuŋa liji le luŋun nate naləṯi ŋɩma leʼe gia no. 21na gwune na lɩmegin diŋɩni nalwele lugwun gwalməṯo, gi gwune gweicɩno ŋu gwiro ḏiŋerom. 22na jalgaṯɩm jun jugwulu urucəlim nalarno ŋu gwəṯi bilsibul, gwaṯiti ḏiŋeroma ŋɩma ŋe ŋeḏi gwele gweḏi ḏiŋerom. 23nuləmɩḏa nuluməḏɩjo ŋuɽuna ŋun ŋɩlɩbo, nuleicɩno, seiṯan gwəṯi ŋɩma gweti seiṯanŋ galakwe? 24na ḏa ŋele ŋɩmakenyɩḏiḏi ganu, ŋaṯe ŋəṯi ŋɩma ŋajaḏaṯa no; 25na ḏa liji leḏi dunu gwetɩdo lɩmakenyɩḏiḏi ganu, late ləṯi ŋɩma ləṯijaḏaṯa no; 26na ḏa seiṯan madiɽi gwumakiḏiḏi kenyeḏɩlo ganu gwate gwəṯi ŋɩma gwajaḏaṯa no; namɩni gwaje gwete. 27na gwiji gwate gwun gwəṯi ŋɩma gwəḏi kwu dunu gweḏi gwiji gwun gwubɩɽe nanu ŋwape ŋɩdio ŋuŋun no na ḏa gwate makaii gwiji gwun gwubɩɽe nanu gwerre no, na gwaɽe ŋɩdio ŋuŋun. 28gwerkwe ganu, nyi gweiceijɩno, ŋuɽun wei ŋun ŋɩki ŋuniḏuḏɩjo liji ganu na ḏɩḏenɩdia ḏun ḏaṯɩlḏenɩḏi; 29namɩni gwun gwaḏene gwuɽɩwə gwun gwɩpiḏo pɽul na ŋuɽun ŋuŋun ŋate ŋalɩnḏuḏɩjo ganu ḏuṯ no; namɩni gwijəḏəṯi ŋuɽun ŋuŋun ŋun ŋɩki. 30nuarno dino nalarno ŋu gwəṯi ḏiŋeroma.
ŋɩmaga ŋun ŋiro gwerkwe
mṯ. 12:46-50, lk. 8:19-21
31na lɩmegin na nana gwuŋun nalwila, nalḏuḏɩni kɩluḏo nalwəje ŋuɽuna gwaləmɩḏa. 32na liji lutu lijilega nalwəɽeico galo naluməḏɩjo naleicɩno, eʼe nanaŋ gwuŋa na lɩmagalo lun liro ləmɩnyo na lun liro la lo kɩluḏo lɩbunyaŋa. 33nulwɩrlijo ŋuɽuna nuleicɩno, əḏi gwiro nana gwi na lɩmagəri? 34nuŋalaḏe gi liji lun luɽeico galo nuarno, eʼe nanaŋ gwinyi na lɩmagəri. 35gwun gwudujine ŋuɽuna ŋun ŋɩbunyɩlo elo gwiro magəri gwun gwiro gwəmɩnyo na gwun gwiro gwa na nana gwi.
Nke Ahọpụtara Ugbu A:
markus 3: OTR1966
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Nuba, Otoro New Testament
© British and Foreign Bible Society, 1966.