Genese 6
6
Meahaiapo haela ve mai heahaha
1Maria leipe: meahaiapo ita ita oaria ve, haela perehekai oaria leivahaeape, kai marita uku erape, 2Aualari ve Kaia ve apealula akoremari haela ve marita ovohae eavavahaeape, ere va maea mekaka iele, la hoa ere va ikivere marita uku uavila v'ila karape. 3Iehova mariape: “Arave Ove mea oaria haela i hareho mea oaria aea v'arekaea, ehovea ere ka aivau, aka ereve ovokake hoa va hitolo 120 hiki leikilai.” 4La hoa haela ehoaha uku meahaiapo apearoape. Kahara, Aualari ve akoremari haela ve marita koarape la hoa, aireaki ere va akoremari erape; la akoremari haela ehoaha leivahaeape, kai rare veveke avape haela.
5Iehova ovohae eavape, meahaiapo ureve haela va mai heahaha oaria kelavaroape, kai ereve iki ureve iki kekela heaha hiki kekelape. 6Laelave Iehova ikihairihairi leipe ehovea are meahaiapo ureve haela karikivahaeape; Are kai ikihuru le leipe. 7Iehova mariape: “Ara karikipe la haela ara meahaiapo ve oropape ve hai ka leikilai, haela kai animala, kai hai loalula eharu, kai akea ve la ori kara, ehovea ara erero karikivahaeape la horova ara ikihairihairi leive.” 8Aka Iehova Noa ve mai veveke ikivere leipe.
Noa vevaea kupe
9Noa ve huhuve ma:— Noa va mai ehoe haela, kai areve huhuve hoa mai veveke hiki leipe. Aeka, Noa i Aualari ila hareho loa vea velaripe. 10Noa akoremari ilehoila erape, Sema, Hamu i Iapeta ila.
11Meahaiapo haela kara Aualari oropa ve heaha leipe, kai mai heahaha oaria leivahaeape. 12Aualari meahaiapo eavape: iapai, meahaiapo va heaha hiki. Ehovea aivau haela oaria meahaiapo akea ve mai hahaeae leivahaeape. 13Kahara, Aualari Noa maeape: “Aivau haela oaria arave oropa ve karia leivahaeakilai, ehovea ereve mai heahaha oaria meahaiapo heloe le koape; Iapai, ara erero meahaiapo ila hoa haroapo hai ka leivahaeakilai. 14A va uvi ila vevaea kora veveke ve kukilai; a va la vevaea ureve lalava heairavaeakilai, a va areve ureve kai mahokaea ve kara pikuru pakara koakive. 15A va arero maria hahakive: areve heaikiapo va 450 feet, areve huraha va 75 feet, areve akea ve va 45 feet. 16A va vevaea ve harihu ura karikikive, areve heaikiapo 18 inches. Vevaea ve okiape, a va areve ukaki ve karikikive, areve lalava ve akea ve hoa ilehoila, aeva akea ve, aeva akea ve. 17Eavaki, Ara o iele meahaiapo ma haa eapapo aruraeakilai, aivau haela oaria hai ka leivahaeakilai, iki huavalula haela oaria, kaia ve ihau ve; meahaiapo akea ve eharu oaria apihaeakilai. 18Aka, Ara a v'ila arave mea oaria aeavila okoare arilai; a va la vevaea horeakilai; a, kai ave akoremari, kai ave uva, kai ave akoremari ve uavila, a i hareho hitakilai. 19Aivau ve ovokake apealula eharu oaria ve, a va orahoka orahoka hareho hareavi aihahaitakive, vevaea ureve; ere a i hareho ovokake ila apeakilai, mea i abu ila la. 20Ori ve hiru lahua oaria, loaloalula eharu ve hiru lahua lahua, kai loaloalula eharu oaria ve hiru kara, hiru oaria ve orahoka orahoka hiki aihahaitakive, kai a i hareho ovokake ila apeakive. 21Au larive la eapai oaria kara a v'aeaki; a va eapai lahua lahua korukaiavahaeakive, are kai ave eapai leikilai, kai ere oaria ve eapai kara.” 22Noa laria leipe; Aualari arero maeape la eharu oaria are hovea hovea leivahaeape.
Nke Ahọpụtara Ugbu A:
Genese 6: ORO
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Published by the British and Foreign Bible Society 1963-1972