Luk 23
23
Jisu Pilạt samaṅre
(Mathae 27.1,2,11-14; Mark 15.1-5; Johan 18.28-38)
1Unre ona bạisiren sanamko do beretʼente Romren disạm cakʼlaoyicʼ Pilạt ṭhen Jisuko idikedea. 2Onko do noa menkate Jisu upạrte lạlisaeko ehopʼena, “Alele ńelakadea, nui hoṛ do aleren hoṛko raj upạrteye bhiṅgṛạuetʼkoa. Uni do maharaj khajna emae lạgitʼe baronetʼkoa ar acʼge Mạsi ar mitʼṭen raje ńumogokʼ kana.”
3Pilạt do Jisui kulikedea, “Am do cetʼ Jihudikoren raj kanam?”
Jisui menkeda, “Am do ṭhikgem meneda.”
4Unre Pilạt do maraṅ naekeko ar sanam hoṛkoe metatʼkoa, “Iń do nui hoṛakʼ jãhãn dosge bạń ńametʼtaea.”
5Menkhan onko do artetʼ ãṭ aṛaṅte memenko ehopʼena, “Jihudi Prodes reakʼ sanam jaegareye cetʼ akokante hoṛkoe ạulạuetʼkoa. Uni do Gạlil khon ehopʼkate ńitokʼ do nonḍeye hecʼakana.”
Jisu Herod samaṅre
6Noa katha ańjomkate Pilạt doe kuliyana, Jisu do Gạlil Prodesren hoṛ kanae se baṅa. 7Ado Jisu Herodakʼ Prodesren kanae menteye baḍaeketʼ khan Pilạt do Herod ṭhene kolkadea. Un jokhecʼ Herod hõ Jerusalemregeye tahẽkana. 8Herod do Jisui ńelkede khan ạḍiye rạskạyena. Uni do Jisu reaṅ ạḍi utạr kathae ańjomakatʼ tahẽkana, ar ḍher din khon uni ńele lạgitʼe monejoṅkan tahẽkana. Ar Herod doe asokʼkan tahẽkana, Jisu do jãhãn hahaṛa kạmiye udukʼaea. 9Uni do Jisu ḍhere kulikedea, menkhan Jisu do cetʼge bae roṛ ruạṛadea. 10Unre maraṅ naekeko ar sostor baḍaeko do onḍe teṅgokate ãṭ aṛaṅte hohowate Jisu dusiyeko ehopʼena. 11Unre Herod do Jisui henostakedea are siṛogadea, ar uniren sipạhiko hõko onkawadea. Ona tayom uni do ṭhosok kicricʼe horokʼadete Pilạt ṭhene kol ruạṛkadea. 12Noa lahare Herod ar Pilạt talare bạiri tahẽkana, menkhan enhilokʼ khon unkin do arhõkin gateyena.
Jisu gujukʼ sạjạiye ńamketʼ
(Mathae 27.15-26; Mark 15.6-15; Johan 18.39—19.16)
13Unre Pilạt do maraṅ naekeko, mukhiyạko ar sanam hoṛko hoho jarwakateye metatʼkoa, 14“Ape do noa dusiyete iń ṭhenpe ạguakadea baṅma uni do raj upạrte hoṛkoe idiyetʼkoa. Menkhan iń do ape samaṅreń kuliakadea. Ar uni upạrte okako gohape emetʼkan ona reakʼ mitʼṭecʼte hõ dusireye paṛaokʼa mente jãhãn porman do bạń ńametʼtaea. 15Herod hõ uniyakʼ jãhãn dos bae ńamletʼtaea, ente uni do abo ṭhene kol ruạṛkedea. Arpe ńeletʼ kangea, gocʼ ocokʼ leka jãhãn bạṛicʼ kạmi hõ uni do bae kạmi akada. 16Onate sạjại kateń aṛakʼkaea.” 17Uni do noa iạteye menkeda ente bańcaokʼ porobre jaoge mitʼṭen kạidiye aṛakʼedekan tahẽkana.
18Menkhan hoṛko do mitʼ jomkaote hohowateko menkeda, “Uni do pharakeme, ar Barabba aṛakʼaleme.” 19Nui Barabba do nagraha bhitrire huhul ar khũn iạte hajotreye bhorao ocoakan tahẽkana. 20Pilạt do Jisu aṛageye menjoṅkan tahẽkante hoṛko arhõ inạ kathageye metatʼkoa. 21Menkhan onko do noa menkate hohoko dhurạuena, “Kuruskae me, kuruskae me.”
22Pilạt do tesar dhao arhõ hoṛkoe metatʼkoa, “Cedakʼ, nui do cetʼe dos akada? Iń do uniyakʼ jãhãn dosge bạń ńeletʼtaea, one onate gujukʼ sạjại iń emdaṛeke. Onate sạjại emkateń aṛakʼgotʼkaea.”
23Menkhan hoṛko do Jisu kuruskae lạgitʼ hohotegeko tahẽyena, ar mucạtʼre onkoakʼ hohoge sorosentakoa. Ar Pilạt do hoṛkoakʼ kathage manao lạgitʼe goṭakeda. 24Ado khũn ar hul iạte okoe do hajotreye bhorao ocoakan tahẽkan hoṛko do unigeko khojkedea; ar Pilạt hõ unigeye aṛakʼatʼkoa, 25ar Jisu do hoṛkoakʼ sana leka goje lạgitʼ onkoakʼ tireye jimạkadea.
Kurus cetanre Probhu Jisu
(Mathae 27.32-34; Mark 15.21-32; Johan 19.17-27)
26Ado Jisuko idiyedekan tahẽkanre Kureniren Simon ńutuman mitʼ hoṛ do ato secʼ khone oḍok hijukʼkan tahẽkana. Unre palṭonko do uniko sapʼpaṭetʼkedete tarenre kurusko ladeadea jemon Jisu tayomte onae gokʼ idi daṛeakʼ. 27Ar ạḍi utạr hoṛ do Jisuko pańja idiyede tahẽkana. Onko modre maejiuko hõko tahẽkana. Onko do koṛam ceṭakʼ ceṭakʼteko rakʼ homoretʼ tahẽkana. 28Jisu do onko secʼ ạcurenteye metatʼkoa, “E Jerusalemren hoponerako, iń lạgitʼ do alope raga. Ape do apnar lạgitʼ ar aperen gidrạko lạgitʼ rakʼjoṅpe, 29ente nonkan din daraekana unre hoṛkoko mena, ‘bhạgangeako bạńjhiko ar baṅ janam akatʼko kukhiko ar baṅ nunu akawatʼko toako do.’ 30#Hos 10.8; Sod 6.16 Unre hoṛko do maraṅ burukoko metakʼa, ‘De ale cetanre dhasaokʼpe,’ ar huḍiń buruko doko metakʼa, ‘De danaṅlepe.’ 31Dare hạriạ̃ṛ tahenregeko nonkayetʼ khan, enḍekhan dare rohoṛlenre do cetʼ jãhãnakʼ bako cekaea?”
32Palṭonko do barea dusi hoṛ hõ gocʼkin lạgitʼ Jisu soṅgeteko idiketʼkinạ. 33Ado khạpriko metakʼ jaegako seṭeren khan Jisu ar unkin banar dusi hoṛ hõko kurusketʼ kinạ, mitʼ hoṛ do Jisuakʼ jojomti secʼre ar eṭagicʼ do uniyakʼ leṅgati secʼre. 34#Ser 22.18 Unre Jisui menkeda, “E baba, ikạkakome, ente bako baḍaea cetʼko cekayeda mente.”
Onko do gulibãṭkate Jisuakʼ kicricʼko hạṭińana. 35#Ser 22.7 Ar hoṛko do teṅgokateko ńeńelkan tahẽkana. Khan sostor baḍaeko do Jisu siṛogadeteko menkeda, “Uni ma eṭakʼkoe bańcaoetʼko tahẽkan. Uni do Mạsi, Isorren bachaoicʼ kanae; enḍkhan acʼ baṛeye bańcaokʼma!” 36#Ser 69.21 Ar Palṭonko hõ uni siṛogaeko ehopʼena. Onko do Jisu sirkạ ńũ ocoye lạgitʼko idiyadea arko metadea, 37“Jihudikoren rajkan khanem, ma amte bańcaokʼme.”
38Ar uniyakʼ bohokʼ coṭre mitʼṭecʼ olakʼ tahẽkana, “Nui do Jihudikoren raj.”
39Ar okoekin dusi hoṛ kurusrekin aka ocoakan tahẽkan unkin modre mitʼ hoṛ do Jisu siṛogadeteye menkeda, “Amge baṅ Mạsi do? Enḍekhan ma am ar ạliń bańcao bonme.”
40Unre eṭagicʼ doe menkeda, “Am do cetʼ Isor bam botoraekana? Am hõ coṅ onkan sạjạigem ńametʼkan. 41Alaṅ ma lek reakʼ ar kạmi akatʼ lekage sạjại laṅ ńametʼkan, menkhan nui do cetʼ hõ bae dosakatʼa.” 42Tayomte uni doe menkeda, “E Jisu, amakʼ rajosṭirem ruạṛ hecʼlenre iń hõ disạyińme baṛe.”
43Jisu do uni roṛ ruạṛadeteye metadea, “Sạrigeń metamkana, am do teheńge Paradesrem iń tulujokʼa.”
Probhu Jisuakʼ gujukʼ
(Mathae 27.45-56; Mark 15.33-41; Johan 19.28-30)
44-45 #
Exo 26.31-33
Unre tikin khon tarasiń hạbicʼ siń cando do bae marsalleda ar goṭa disạm do ńutge tahẽyena. Ar Jerusalem mundil reakʼ orwal do tala talate oṛecʼente bar hạṭińena.
46 #
Ser 31.5
Jisu do ãṭ aṛaṅte hohowateye menkeda, “E Baba amakʼ tire ińakʼ jiwiń jimạyetʼkana.” Ar noae roṛketʼ khan jiwi oḍokentaea. 47Noa ńelte Romren subedar do Isor sarhaokedeteye menkeda, “Sạrige uni do bin dusạngeye tahẽkana.”
48Ar okoeko onḍeko jarwa akan tahẽkan onko do noa ghoṭna ńelte koṛam ceṭakʼ ceṭakʼte onḍe khonko ruạṛ calaoena. 49#Luk 8.2,3 Ar tinạkʼ do Jisuko oromakade tahẽkan ar Gạlil khon uni soṅgeteko hecʼlen sanamkoge sạṅgińre teṅgokate jotowakʼko ńeletʼkan tahẽkana.
Probhu, Jisuakʼ topa
(Mathae 27.57-61; Mark 15.42-47; Johan 19.38-42)
50Joseph ńutuman mitʼṭen bhage ar dhorom hoṛ do maraṅ bạisiren sosolhaicʼe tahẽkana. Uni do Arimạthiạko metakʼ Jihudikoakʼ mitʼṭecʼ atoren hoṛe tahẽkana. 51Uni do Jisu babotre bạisiren hoṛko tulucʼ bae mitʼmot daṛeada. Ente uni hõ Isorakʼ raj lạgitʼe koyokʼ hor akatʼ tahẽkana. 52Uni do Pilạt ṭhen senkate Jisuakʼ mạ̃ṛĩye koekeda. 53Ar kurus khon mạ̃ṛĩ pheḍkate kicricʼteye bedhaokeda ar dhirire kholao akatʼ mitʼṭecʼ topareye dohokada. Ona topare do okoege tishõ bako dohoakatʼko tahẽkana.
54Ona din do tahẽkana jirạukʼ mãhã reakʼ sapṛaokʼ din. Ar jirạukʼ mãhã do ehopʼ lạgidokʼkan tahẽkana. 55Ar Gạlil khon okoeko maejiu Jisu sãoteko hecʼlen tahẽkan onko do Joseph tayom tayomte senkate topa ar Jisuakʼ mạ̃ṛĩ cetʼleka dohoakana onako ńelkeda. 56#Exo 20.10; Bib 5.14 Ona tayom ruạṛ senkate uniyakʼ hoṛmore lạgitʼ mahkaokʼ sunum ar mosolako tearkeda. Ar ona tayom do Moseyakʼ hukum leka jirạukʼmãhã hilokʼ doko jirạuena.
Nke Ahọpụtara Ugbu A:
Luk 23: SBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Santali Bible © Bangladesh Bible Society, 2021.