Johan 9
9
Jirạukʼ mãhãre jonom kãṛã hoṛe bogeyede
1Ado horteye calakʼkan tahẽkan jokhecʼ Jisu do mitʼṭen kãṛã hoṛe ńel ńamkedea. Uni do janam khonge kãṛãgeye tahẽkana. 2Unre celako do Jisuko kulikedea, “E Probhu Isor, okoeye kạiletʼte nui do kãṛãgeye janamena? Nui se nuiren go-babakin?”
3Jisui roṛ ruạṛkeda, “Nui hõ bae kại akada, ar nuiren go-baba hõ baṅ. Noa do hoyakana jemon Isorakʼ kạmi uni hotete sodorokʼ. 4Okoeye kol akadiń, uniyakʼ do siń tahenrege kạmi hoyokʼ tabona. Ńindạ daraekana unre okoe hõ bako kạmi daṛeakʼa. 5#Mat 5.14; Jhn 8.12 Dhạrtire tinạkʼ din minạń iń do dhạrti reakʼ marsal kạnạń.”
6Ado noa menkate uni do otreye thokeda ar losotʼe benaokeda. Ar ona tayom do uniyakʼ mẽtʼre thopramadeteye metadea, 7“Do Siloam pukhrire senkate abokʼme.” Siloam reakʼ mane do kol ocoakan.
Uni hoṛ do senkateye apʼena ar ńeńele ehopʼen khane ruạṛ hecʼena. Noa ńelte aḍepaserenko ar okoe do kokoe hoṛ menteko ńellede onko sanamkogeko menkeda, 8nui do cetʼ uni hoṛ doe baṅkana, one okoe do duṛupʼkateye kokoekan tahẽkan?”
9Adomko doko menkeda, “Hẽ, nui hoṛ kangeae.” Arhõ adomko doko menkeda, “Nui do ńelokʼte uni lekanre hõe uni doe baṅkana.”
Menkhan uni hoṛ do acʼgeye menkeda, “Hẽ, uni kangeạń.” 10Adoko metadea, “Enḍekhan cekate amakʼ mẽtʼ do beṅgetʼentama?”
11Uni doe roṛ ruạṛkeda, “Jisu ńutuman hoṛ do losotʼ benaokate ińakʼ mẽtʼreye lagao ạdińa ar Siloam pukhrire senkate abokʼe metadińạ. Iń do calao kateń apʼen khan ńeńeliń ehopʼena.”
12Onko doko metadea, “Okare menaea uni hoṛ do?”
Uni doe menkeda, “Iń do bạń baḍaea.”
Phạrusiko bokʼge kạmi akatʼ reakʼ suṭhiko hataoetʼkan
13Ar uni kãṛã hoṛ do Phạrusiko ṭhenko idikedea. 14Jisu do oka hilokʼ losotʼ benaokate uni hoṛakʼ mẽtʼkine beṅgetʼ ocoketʼtae ona din do jirạukʼ mãhã tahẽkana. 15Onate Phạrusiko do arhõko kulikedea, “Am do cekatem ńeńelkana?”
Khange Phạrusikoe metatʼkoa, “Uni do ińakʼ mẽtʼkinre losotʼe lagao ạdińạ ariń apʼen khan ńeńeliń ehopʼena.”
16Noate Phạrusiko modren adomko doko menkeda, “Uni hoṛ do Isor ṭhen khon bae hecʼakana, ente uni do jirạukʼ mãhã hõ bae manaoeda.”
Eṭakʼ Phạrusiko doko menkeda, “Cekate mitʼṭen kại hoṛ do nonkan hahaṛawakʼe kạmi daṛekea?” Nonkate onko talare bhinạ bhini hoyena.
17Unre onko do arhõ uni hoṛko kuli dohṛakedea, “Am do uni reakʼ cetʼem menkea? Ente uni do amakʼ mẽtʼkine jhicʼ ocoakatʼtama.”
Uni doe menkeda, “Mitʼṭen nạbi kanae.”
18Menkhan Jihudi mukhiyạko do uniren go-baba ạuriko kulikin hạbicʼ bako pạtiạulena je, uni do jonom kãṛãye tahẽkana ar ńitokʼ doe ńeńelkana mente. 19Onko do uniren go-babako kuliketʼkinạ, “Nui do cetʼ abenren koṛa kanae one uni reaṅ ben menetʼkan uni do kãṛãgeye janamlena mente? Enḍekhan cekate ńitokʼ doe ńeńelkana?”
20Uniren go-babakin roṛ ruạṛatʼkoa, “Ạliń liń baḍaea nui do ạlińren koṛa kanae, ar kãṛãgeye janamlena. 21Menkhan cekate ńitokʼ doe ńeńelkana ona do bạliń baḍaea; ar okoe nuiyakʼ mẽtʼe beṅgetʼ ocoakatʼtae ona hõ bạliń baḍaea. Uni doe sẽṛãgea, unige kuliyepe. Uni do acʼ reaṅ acʼtegeye lại ocoge.”
22Uniren go-baba do Jihudi mukhiyạko botorte noa dokin menkeda, ente Jihudi mukhiyạko do laha khongeko goṭa ạguakatʼ tahẽkana je, jãhãege Jisu do Mạsi menteye aṅgoce uni doe biṭlạha ocokʼa. 23Onate uniren go-baba dokin menkeda, “Uni doe sẽṛãgea, unige kuliyepe.”
24Ado okoe kãṛãgeye tahẽkan mukhiyạko do arhõ dosar dhao hohowadeteko metadea, “Am do sạri katha roṛte Isorge sabasi emaeme. Alele baḍaea uni doe kại hoṛ kana.”
25Uniye roṛ ruạṛatʼkoa, “Kại hoṛ kanae se baṅ ona do bạń baḍaea; menkhan noań baḍaea, lahate iń do kãṛãgeń tahẽkana ar ńitokʼ doń ńeńelkana.”
26Mukhiyạko doko metadea, “Uni do cetʼe cekawatʼmea? Ar cekate mẽtʼ doe beṅgetʼ ocoketʼtama?”
27Uni hoṛ doe roṛ ruạṛatʼkoa, “Iń ma coṅ laharegeń lại akawatʼpe, menkhan ape do bape ańjomleda. Enḍekhan cedakʼ arhõ ańjom sanayetʼpea? Ape hõ cetʼ uniren cela hoyokʼ sanayetʼpea?”
28Onate mukhiyạko do ruhạtʼkedeteko metadea, “Am kanam uni hoṛren cela do, menkhan ale do Moseren cela kanale.”
29Alele baḍaea Isor do Moseye galmaraoade tahẽkana, menkhan uni hoṛ do oka khone hecʼakana ona do bale baḍaea.”
30Unre uniye roṛ ruạṛatʼkoa, “Onage tho hahaṛa do! Ape hõ bape baḍaea uni do oka khone hecʼakana menkhan uni do ińakʼ mẽtʼe beṅgetʼ ocoketʼtińạ.” 31Baḍaegea bon Isor do kại hoṛakʼ katha bae ańjoma. Menkhan jãhãege Isor sewa hoṛe hoyokʼ ar uniyakʼ sanalekae kạmi enḍekhan Isor do uniyakʼe ańjomtaea. 32Dhạrti sirjạu khon tis hõ baṅ ańjom akana jonom kãṛã hoṛakʼ mẽtʼ jãhãeye jhicʼ akatʼa mente. 33Uni do Isor ṭhen khon bae hecʼlen khan honaṅ cetʼge ohoe ceka daṛelea.”
34Khange mukhiyạko doko metadea, “Am ma kạirem janam akan ar alem cetʼale kana?” Noa menkate onko do somaj khonko oḍok gotʼkadea.
Jiu secʼte kãṛãko
35Ado Jisui ańjomkeda je, mukhiyạko do uni hoṛ bahreteko oḍok akadea. Tayomte Jisu do uni hoṛ sendra ńamkedeteye metadea, “Am do cetʼ Manwa Hoponrem pạtiạukʼ kana?”
36Uniye roṛ ruạṛkeda, “E Probhu, lạiyạńme uni doe okoe kana, jemon unireń pạtiạukʼ.”
37Jisu do uniye metadea, “Uni dom ńelakadegea, ar unige am sãoteye galmarao kana.”
38Unre uni hoṛe menkeda, “E Probhu Isor, iń doń pạtiạukʼ kangea.” Ar noa menkate Jisui sewawadea.
39Jisui menkeda, “Iń do dhạrtite bicạr lạgitʼ iń hecʼakana, jemon baṅ ńeńelkoko ńeńel ar okoeko ńeńelkan onko do kãṛãko hoyokʼ.”
40Adom Phạrusiko do Jisu sãoteko tahẽkana. Onko do noa katha ańjomte Jisuko metadea, “Enḍekhan ale hõ cetʼle kãṛãgea?”
41Jisui metatʼkoa, “Kãṛãpe tahen khan honaṅ kại do oho tahẽlen tapea. Menkhan apepe meneda ńeńel kangeale ar onatege apeakʼ kại do tahen kana.
Nke Ahọpụtara Ugbu A:
Johan 9: SBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Santali Bible © Bangladesh Bible Society, 2021.