Genesis 25
25
Abrahamren eṭakʼ bõsko
(1 Bõsbudạ 1.32,33)
1Abraham do Keṭura ńutuman armitʼṭen maejiue baplakedea. 2Uniyakʼ kukhire do nokoko janamlena Simran, Joksan, Medan, Midiạn, Jisbak ar Suah. 3Seba ar Dedan do Joksanren hoponkin tahẽkana. Asuriko, Letusiko ar Leumiko do Dedan bõsren hoṛ kanako. 4Ephah, Epher, Hanok, Abida, ar Eldah do Midiạnren hoponko tahẽkana. Noko joto do Ketuaren hopon ar uniren hoponkoren bõsko tahẽkana.
5Abraham do acʼakʼ sanam dhon sompotti Isahake em oṭoade tahẽkana. 6Uni do acʼren chuṭki erakoren hoponko hõ acʼ jiwetʼe tahenrege ḍhere danatʼkoa. Noko do Isahak sãote bae tahẽ ocowatʼkoa menkhan purub reakʼ mitʼṭecʼ disạmteye kolkatʼkoa.
Abemelek tulucʼ Isạhakakʼ bondobos
7Abrahamren do jotote mitʼsae eaegel mõṛẽ bochor jiwetʼe tahẽkana. 8Mitʼṭecʼ mońj ar suk jion khemao tayom ḍher umer paromkate uni doe gocʼena ar acʼren hapṛamko ṭhene calaoena. 9Mamre nagraha reakʼ purub secʼ Sohar hopon Ephronakʼ jumire Makpela reakʼ danderre acʼren hopon Isahak ar Ismael do unikin topakadea. 10#Gen 23.3-16Noa jumige uni do Hittiko ṭhen khone kiriń hataoleda. Ar nonḍege acʼren bạhu Sara ar acʼ hõe topa ocoakana. 11Abrahamakʼ gujukʼ tayom uniren hopon Isahak do Isorre bhoradea. Ar Isahak do Ber-lahae-roi ṭhen girobasokʼe ehopʼena.
Ismaelren bõsko
(1 Bõsbudạ 1.28-31)
12Sararen kạ̃ṛmĩ Misiri Hagarakʼ kukhire Abrahamren hopon Ismaelakʼ janam do hoylena. 13Ar noa do Ismael bõsrenkoakʼ ńutum kana: Janam lekate uniren hoponkoakʼ ńutum do hoyokʼ kana, pạhilre Nebayot, uni tayom do Kedar, Adbeyel, Mibsam, 14Misma, Duma, Masa, 15Hadad, Thema, Jetur, Naphis ar Kedma. 16Noko gelbar hopon do gelbar bõskoren sordarko tahẽkana. Onkoakʼ ńutum lekage atoko ar oneko ḍeralen reakʼ ńutum do doholena. 17Ismael do mitʼsae pegel eae bochor jiwetʼe tahẽkana. Ar ona tayom doe gocʼena ar acʼren hapṛamko ṭhene calaoena. 18Hạwila khon Sur hạbicʼ okaṭakʼ jaega tahẽkan onḍege uniren bõsko girobasokʼ kan tahẽkana. Ar ona ṭhạ̃i do Misor aṛe, Ạsurte calakʼ horre tahẽkana. Onkoren boeha Isahak bõsrenkoakʼ disạm sorrege onko doko tahẽkana.
Esau ar Jakobakʼ janam
19Noa do Abrahamren hopon Isahakakʼ jion reakʼ Itihas kana. Abrahamren hoponakʼ ńutum do Isahak tahẽkana. 20Isahak do pongel bochor umer tahẽkanre Rebekae baplaledea. Rebeka do Padan-Aram disạmren Aramiạ Bethuelren hoponera ar Aramiạ Labanren miserate tahẽkana. 21Isahakren bạhu do bạńhigeye tahẽkante Isahak do acʼren bạhu lạgitʼ Probhu Isor ṭhene koekeda. Probhu Isor do uniyakʼ koejoṅe ańjomkeda ar Rebeka doe bhạrti hoṛmoyena. 22Uniyakʼ kukhire jawa gidrạkin janamena ar unkin do ạkin talare kin ṭhela ṭhilikʼkan tahẽkana. Onate Rebekae menkeda, “Iń do cedakʼ nonka doń ạikạueda?” Ar ona baḍae lạgitʼ uni do Probhu Isor ṭhene kuliyana.
23 #
Rom 9.12
Probhu Isor do uniye metadea,
“Amakʼ kukhire barea jạtrenkoakʼ etohopʼ hoyakana,
janam khonge unkin do barea bõskin hoyokʼa.
Mitʼṭen khon eṭakʼicʼakʼ daṛe do ḍherokʼa,
ar maraṅicʼ do huḍińicʼren gutiye hoyokʼa.”
24Gidrạ janamokʼ oktere ńelena sạrige uniyakʼ kukhire jawa gidrạkin tahẽkana. 25Pạhilre okoeṭakʼ gidrại janamen uniyakʼ hoṛmo reakʼ roṅ do arakʼge tahẽkana ar hoṛmo do upʼte perecʼ tahẽkantaea. Onate uniyakʼ ńutum do Esau dohoyena (mane do “Upʼ ”). 26Ona tayom Esauakʼ iḍi sapʼakatʼ uniren boehae janamena. Onate uniyakʼ ńutum do Jakob dohoyena (metakʼme “Iḍi sapʼakatʼ”). Nukinkin janamokʼre Isahakakʼ umer do turui gel bochor tahẽkana.
Maraṅicʼ hoponakʼ ạidạri ạkhriń
27Nukin hoponkin harayen khan Esau do gạkhuṛ sikạriại hoyena. Ar bir pakaṛkore ạcur baṛaye ehopʼena, menkhan Jakob do mạ̃hirgeye tahẽkana. Uni do tạmbukore tahengeye kusiyena.
28Isahak do sendra jele kusiyakʼkan tahẽkante acʼren hopon Esau ạḍiye dulạṛede tahẽkana, menkhan Rebeka do Jakob bạ̃ṛtiye dulạṛkedea.
29Mitʼdin Jakob do dạle suṛạ akawan tahẽkana, ar un jokhecʼ Esau do sendra khone hecʼena. Ar ạḍiye laṅgayena. 30Uni do Jakobe metadea, “Iń do ạḍiń laṅga akana. Amakʼ ona arakʼ jinis khon thoṛa jom ocoạńme.” Noa katha iạte Esauakʼ armitʼṭen ńutum do Edom#25.30: Edom: Noa reakʼ Hebrew mane hõ“arakʼ.” hoyentaea (metakʼme “Arakʼ”).
31Jakobe menkeda, “Maraṅicʼ hopon lekate amakʼ okaṭakʼ ạidạri menakʼ ona teheń iń ṭhen ạkhrińme.”
32Esaue menkeda, “Ńelme, iń doń gujukʼ lạgidokʼ kana, ar maraṅicʼ hopon ạidạrite do cetʼ hoyokʼtińạ?”
33 #
Ibr 12.16
Jakobe menkeda, “Iń ṭhen lahare kiriạlenme.” Unre Esau doe kiriạyente maraṅicʼ hoponakʼ ạdạri do Jakob ṭhene ạkhrińkeda.
34Ar Jakob do noa tayom piṭhạ ar dạl suṛạ Esaue jom ocokedea, ar Esau do jom ńũkateye calaoena. Ar acʼakʼ maraṅ hoponakʼ ạidạri reakʼ do jãhãn damge bae ematʼa.
Nke Ahọpụtara Ugbu A:
Genesis 25: SBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Santali Bible © Bangladesh Bible Society, 2021.