যোহন 3
3
নুয়ো জর্ম
1ফরীশীগুনো ভিদিরে নীকদীম নাঙে যিহূদীগুনোর্ এক্কো নেতা এলঅ। 2একদিন রেদোত্ তে যীশু ইধু এইনে কলঅ, “মাষ্টরবাবু, মুই হবর্ পাং তুই এক্কো মাষ্টর্ ইজেবে গোজেনত্তুন্ এচ্চ্যস্, কিয়া তুই যেদক্কানি আমক্ অবার্ কাম্ গোজ্যস্, গোজেনে সমারে ন-থেলে কেঅ সিয়েনি গুরি ন-পারে।”
3যীশু নীকদীমরে কলঅ, “মুই তমারে ঘেচ্চেক্গুরি কঙর্, নুয়ো গুরিনে জর্ম ন-অলে কেঅ গোজেন রেজ্যগান চেই ন-পায়।”
4সেক্কে নীকদীম তারে কলঅ, “মানুচ্ বুড়ো ওই গেলে কিবাবোত্যে গুরি তার্ আরঅ জর্ম ওই পারে? দ্বিবার্ মা পেদত্ ফিরি যেইনে তে কি আরঅ জর্ম লোই পারে?”
5জোবত্ যীশু কলঅ, “মুই তরে ঘেচ্চেক্গুরি কঙর্, পানি আর পবিত্র আত্মাত্তুন্ জর্ম ন-অলে কনজনে গোজেন রেজ্যত্ সোমেই ন-পারে। 6মান্জ্যত্তুন্ যিবে জর্মায় সিবে মানুচ্, আর যিয়েন্ পবিত্র আত্মাত্তুন্ জর্মায় সিয়েন্ আত্মা। 7মুই যে তরে কলুং, তমাত্তুন্ নুয়ো গুরিনে জর্ম অনা দরকার্, ইয়েন্দোই আমক্ ন-অবা। 8বৈয়্যের্ যিন্দি মনে কয় সিন্দি বায়্ আর তুই তা রবুয়ো শুনোচ্, মাত্তর্ কুত্তুন্ এজে আর কুধু বা যায় সিয়েন তুই হবর্ ন-পাজ্। পবিত্র আত্মাত্তুন্ যিগুনোর্ জর্ম ওইয়্যে সিগুনোর্অ ঠিগ্ সেবাবোত্যে অয়।”
9নীকদীম যীশুরে পুযোর্ গুরিলো, “ইয়েন্ কেধোক্ক্যেন্ গুরি ওই পারে?”
10সেক্কে যীশু তারে কলঅ, তুই ইস্রায়েলীগুনোর্ মাষ্টর্ ওইনেয়ো কি ইয়েনি ন-বুঝোচ্? 11তরে ঘেচ্চ্যেক্গুরি কঙর্, আমি যিয়েন হবর্ পেই সিয়েনই কোই আর যিয়েন্ দেক্ক্যেই সে পৌইদ্যেনে সাক্ষি দিই, মাত্তর্ তুমি আমা সাক্ষিগানি এলাফেলা গরঅ। 12মুই তমা ইধু জগদ পৌইদ্যেনে কধা কলে যেক্কে বিশ্বেজ্ ন-গরঅ সেক্কে স্বর্গীয় পৌইদ্যেনে কধা কলে কেধোক্ক্যেন্ গুরি বিশ্বেজ্ গুরিবা?
13যে স্বর্গত্ থায় আর স্বর্গত্তুন্ লামি এচ্চ্যে সেই মান্জ্যপুয়োবো বাদে আর কনজনে স্বর্গত্ ন-উদোন্। 14মোশি যেবাবোত্যেগুরি ধূল্যেচর-চাগালাত্ সেই সাপ্পোরে অজলত্ তুল্ল্যে সেবাবোত্যেগুরি মান্জ্য পুয়োবোরেয়ো অজলত্ তুলো অবঅ, 15যেন যে কেঅ তা উগুরে বিশ্বেজ্ গরে তে উমর জিংকানি পায়।
16“গোজেনে মান্জ্যরে এদক্ কোচ্পেলদে যে, তার্ বানা এক্কোগুরি পুয়োরে তে দান্ গুরিলো, যেন যে কেঅ সেই পুয়োবো উগুরে বিশ্বেজ্ গরে তে ভস্ত ন-অয় মাত্তর্ উমর্অ জিংকানি পায়। 17গোজেনে মান্জ্যরে দুষি প্রমাণ গুরিবাত্যে তা পুয়োবোরে জগদত্ ন-পাধায়, বরং মান্জ্যে যেন পুয়োবোর্ মাধ্যমে পাপত্তুন্ উদ্ধোর্ পান্ সেনত্তে তে তারে পাধেয়্যে। 18যে সেই পুয়োবো উগুরে বিশ্বেজ্ গরে তার্ কনঅ বিচের্ ন-অয়, মাত্তর্ যে বিশ্বেজ্ ন-গরে তারে দুষি বিলি আগেত্তুন্ ধুরি ঠিগ্ গরা ওইয়্যে, কিয়া তে গোজেনর্ বানা এক্কোগুরি পুয়ো উগুরে বিশ্বেজ্ ন-গরে। 19তারে দুষি বিলি ঠিগ্ গরা ওইয়্যে কিয়া জগদত্ পহ্র এচ্চ্যে, মাত্তর্ মান্জ্যর্ কামানি ভান্ন্যেই বিলি মানুচ্ পহ্রত্তুন্ আন্ধাররে বেশ্ কোচ্পেইয়োন্। 20যে কেঅ অন্যেয় কাম্ গুরি থেলে তে পহ্রানরে ঘিনায়। তার্ অন্যেয় কামানি ফগদাং ওই পুড়িবো বিলি তে পহ্রঅ ইধু ন-এজে। 21মাত্তর্ যে সত্যর্ পধেদি আঢে তে পহ্রঅ ইধু এজে যেন তার্ কামানি যে গোজেনর্ আওজ্ মজিম্ গরা ওইয়্যে সিয়েনি ফগদাং পায়।”
যোহনর্ সাক্ষি
22ইয়েন পরেদি যীশু আর তা শিচ্চ্যগুনে যিহূদিয়া রেজ্যত্ গেলাক্। সিধু তে তা শিচ্চ্যগুনো সমারে কিজু দিন থেলঅ আর মানুচ্চুনোরে বাপ্তিষ্ম দিয়্যে ধুরিলো। 23শালীম নাঙে এক্কান্ আদাম ইধু ঐনোন বিলি এক্কান্ জাগাত্ সেক্কে যোহনেয়ো বাপ্তিষ্ম দের্, কিয়া সে জাগানত্ বোউত্ পানি এলঅ আর মানুচ্চুনেয়ো এইনে বাপ্তিষ্ম লদন্। 24সেক্কেয়ো যোহনরে জেল্খানাত্ বন্দী গরা ন-অয়।
25সে সময়োত্ ধর্মর্ সুদোম্ মজিম্ সিজি অনা পৌইদ্যেনে যোহন শিচ্চ্যগুনে এক্কো যিহূদী সমারে তর্কাতর্কি আরাম্ভ গোজ্যন্। 26পরেদি তারা যোহন ইধু এইনে কলাক্, “মাষ্টরবাবু, যিবে যর্দনর্ উই পারত্ তঅ সমারে এলঅ আর যিবে পৌইদ্যেনে তুই সাক্ষ্য দুয়োচ্, চাহ্, তে বাপ্তিষ্ম দের্ আর বেক্কুনে তা ইধু যাদন্।”
27ইয়েনর্ জোবত্ যোহনে কলঅ, “স্বর্গত্তুন্ দিয়্যে ন-অলে কারঅ পক্ষে কনঅ কিজু পানা সম্ভব্ নয়। 28তুমি মরে কধে শুন্ন্য, মুই মশীহ নয়, মাত্তর্ মরে তা আগেদি পাধা ওইয়্যে। 29যা আঢত্ ঝিবোরে দিয়্যে ওইয়্যে, তেয়ই জামেবো। জামেয় সমাজ্যেবো থিয়্যেইনে জামেয়র্ কধা শুনে আর তার্ রবুয়ো শুনিনে ভারী খুজী অয়। ঠিগ্ সেবাবোত্যেগুরি মর্ খুজীগান্ এচ্চ্যে পুরেল। 30তাত্তুন্ দাঙর্ ওই উদো পুড়িবো আর মত্তুন্ সুরি যা পুড়িবো।”
31যিবে উগুরেত্তুন্ এজে তে বেক্কুনো উগুরে। যিবে পিত্থিমীত্তুন্ এজে তে পিত্থিমীর, আর তে পিত্থিমীর কধা কয়। মাত্তর্ যে স্বর্গত্তুন্ এজে তেয়ই বেক্কুনো উগুরে। 32তে যিয়েন্ দেক্ক্যে আর শুন্ন্যে সিয়েনই সাক্ষ্য দে, মাত্তর্ কেঅ তার্ সাক্ষ্য মানি ন-লন্। 33যে তার্ সাক্ষ্য গ্রাজ্য গোজ্যে তে তারে দিইনে প্রমাণ গোজ্যে যে, গোজেনে যিয়েন্ কয় সিয়েন্ সত্য। 34গোজেনে যিবেরে পাধেয়্যে তে গোজেনর্ কধা কয়, কিয়া গোজেনে তারে পবিত্র আত্মা মাবি ন-দে। 35বাবে পুয়োরে কোচ্পায় আর তা আঢত্ বেক্কানি দিয়্যে। 36যে কেঅ পুয়োবো উগুরে বিশ্বেজ্ গরে তে সেক্কে উমর্অ জিংকানি পায়, মাত্তর্ যে পুয়োবোরে অমান্য গরে তে সেই জিংকানিগান্ কনদিন্অ ন-পেবঅ, বরং গোজেন রাগ্কান্ তা উগুরে থেবঅ।
Nke Ahọpụtara Ugbu A:
যোহন 3: CBT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Copyright © 2021 Bangladesh Bible Society