যোহন 10
10
প্রভু যীশুই আজল্ ভেড়া গরক্
1“মুই তমারে ঘেচ্চ্যেক্গুরি কঙর্, যে কেঅ ভেড়া-ঘর দুয়োরানদি ন-সুমিনে অন্য কিত্ত্যেদি সমায় তে চুর্ আর ডাগেত্। 2মাত্তর্ যে কেঅ দুয়োরানদি ভিদিরে যায় তেয়ই ভেড়াগুনোর্ গরক্। 3ভেড়া ঘরান্ যে চুগিদে তে সেই ভেড়া গরগ্কোরে দুয়োরান্ খুলি দে। ভেড়াগুনে তা ডাগনি শুনোন্, আর সেই ভেড়া গরগ্কো তা নিজো ভেড়াগুনোর্ নাঙানি ধুরি ডাগিনে বারেদি নেযায়। 4তা নিজোর্ বেক্ ভেড়াগুন্ নিগিলেবার্ পরেদি তে সিগুনোর্ আগে আগে যায়, আর ভেড়াগুন্ তা পিজে পিজে যান্ কিয়া সিগুনে তা ডাগনিগান্ হবর্ পান্। 5তারা কনদিন্অ নচিন্যে মান্জ্যর্ পিজেদি ন-যেবাক্ বরং তাত্তুন্ ধেই যেবাক্, কিয়া তারা অচেনা মান্জ্যর্ রঅ ন-চিনোন্।”
6সেই ফরীশীগুনোরে শিক্ষ্যে দিবাত্যে যীশু এ কধাগান্ কলঅ মাত্তর্ তে যে কি কোইয়্যে সিয়েন্ তারা ন-বুঝিলাক্। 7সেনত্তে যীশু আরঅ কলঅ, মুই তমারে ঘেচ্চ্যেক্ গুরি কঙর্, ভেড়াগুনোত্যে মুয়ই দুয়োরান্। 8মঅ আগেদি যিগুনে এচ্চ্যন্ তারা বেক্কুনে চুর্ আর ডাগেত্, মাত্তর্ ভেড়াগুনে সিগুনোর্ কধা ন-শুনোন্। 9মুয়ই দুয়োরান্। যুনি কেঅ মঅ মাধ্যমে ভিদিরেদি সমে সালে তে উদ্ধোর্ পেবঅ। তে ভিদিরে এবঅ আর বারেদি যেবঅ আর চরত্ হেবার্ জাগা পেবঅ। 10চুর্ এজে বানা চুর্, খুন্ আর বর্বাদ্ গুরিবাত্যে। মুই এচ্চ্যং যেন তারা জিংকানি পান্, আর সেই জিংকানিগান্ যেন ভর্পুনোং অয়।
11মুয়ই আজল্ ভেড়া গরক্। আজল্ ভেড়া গরক্কো তা ভেড়াগুনোত্তে নিজো পরাণান্ দে। 12-13যে বানা বেতন্ পেবাত্যে গরক্ কাম্ গরে তে নিজে গরক্ নয় আর ভেড়াগুন্অ তার্ নিজোর্ নয়। হোক্ক্যে বাঘ এত্তে দেগিলে তে ভেড়াগুন্ ফেলেইনে ধেই যায়, কিয়া তে বানা বেতন্ পেবাত্যে এ কামান্ গরে আর ভেড়াগুনোত্যে চিদেয়ো ন-গরে। হোক্ক্যে বাঘে তারারে ধুরি নেযায় আর ভেড়াগুন্ চেরোকিত্ত্যেদি ছিদি পরন্।
14-15“মুয়ই আজল্ ভেড়া গরক্। বাবা যেবাবোত্যে মরে হবর্ পায় আর মুই বাবারে চিনোং সেবাবোত্যেগুরি মুইয়ো মঅ ভেড়াগুনোরে চিনোং আর তারায়ো মরে চিনোন্। মুই মঅ ভেড়াগুনোত্যে মঅ পরাণান্ দুয়োঙর্। 16আরঅ ভেড়া মইধু আঘন্ যিগুন এ ঘরানর্ নয়; সিগুনোরেয়ো মত্তুন্ আনা পুরিবো। তারা মঅ ডাগনিগান্ শুনিবাক্, আর সিয়েনত্ এক্কো ভেড়া পাল আহ্ এক্কো গরক্ অবঅ। 17বাবা মরে ইয়েনত্যে কোচ্পায়, কিয়া মুই মঅ পরাণান্ দিম্ যেন সিগুন্ আরঅ ফিরেই নি পারং। 18কনজনে মঅ পরাণান্ মত্তুন্ লোই ন-যেবাক্, মাত্তর্ মুই নিজেই সিয়েন্ দিম। পরাণান্ দিবার্অ খেমতা মর্ আঘে। আরঅ পরাণান্ ফিরেই নেযেবার্ খেমতায়ো মর্ আঘে। এ কামান্ মুই মঅ বাবত্তুন্ পেইয়োং।”
19যীশুর্ এ কধাগানত্যে যিহূদীগুনো ভিদিরে আরঅ কধার্ অমিল্ দেগা দিলো। 20তারা ভিদিরেত্তুন্ ভালোক্জনে কলাক্, “তারে ভূদে পেইয়্যে, তে পাগল্; তুমি তা কধা কিত্ত্যে শুন্নো?”
21অন্যগুনে কলাক্, “মাত্তর্ ইবে দঅ ভূদে পেইয়্যে মান্জ্য ধোক্ক্যেন্ কধা নয়। ভূদে কি কানা মান্জ্যর্ চোগ্ মেলি দি পারে?”
প্রভু যীশুর্ দাবী
22ইয়েন পরেদি যিরূশালেমত্ উবোসনা-ঘর তুলোনার্ পরব্ এলঅ। সেক্কে জার্কাল্। 23যীশু উবোসনা-ঘর ভিদিরে শলোমন বারান্দাত্ ঘুরিনে বেড়ার্। 24সেক্কে যিহূদী নেতাগুনে যীশুর্ চেরোকিত্ত্যে থুবেইনে কলাক্, “আর কয়দিন তুই আমারে সন্দেহ ভিদিরে রাগেবে? যুনি তুই মশীহ ওই থাচ্ সালে গমেদালে আমারে কঅ।”
25যীশু জোবত্ কলঅ, “মুই দঅ তমারে কোইয়োং, মাত্তর্ তুমি বিশ্বেজ্ ন-গরঅ। মঅ বাব নাঙে মুই যেদক্কানি কাম্ গরং সিয়েনিয়ো মঅ পৌইদ্যেনে সাক্ষী দে। 26মাত্তর্ তুমি বিশ্বেজ্ ন-গরঅ, কিয়া তুমি মর্ ভেড়া নয়। 27মঅ ভেড়াগুন্ মঅ ডাগনি শুনোন্। মুই তারারে হবর্ পাং আর তারা মঅ পিযে পিযে যান্। 28মুই তারারে উমর্অ জিংকানি দুয়োং। তারা কনদিন্অ নাশ্ ন-অবাক্ আর কনজনে মঅ আঢত্তুন্ তারারে কাড়ি ন-নিবাক্। 29মঅ বাপ্পো, যিবে মরে সিগুন্ দিয়্যে, তে বেগত্তুন্ দাঙর্। কনজনে বাব আঢত্তুন্ কিজু কাড়ি নি ন-পারন্। 30মুই আর বাবা এক্।”
31সেক্কে যিহূদী নেতাগুনে তারে মারিবাত্যে আরঅ পাত্তর্ তুবেলাক্। 32যীশু তারারে কলঅ, “বাব উগুম্ মজিম্ বোউত্ গম্ গম্ কাম মুই তমারে দেগেয়োং। সিয়েনিত্তুন্ কন্ কামানত্তে তুমি মরে পাত্তর্ মারিবাত্তে চঅ?”
33নেতাগুনে জোবত্ কলাক্, “গম্ কামত্যে আমি তরে পাত্তর্ ন-মারিই, মাত্তর্ তুই গোজেন বিরুদ্ধে অগমান কধা কর্ ক্যেনে মারিই। মানুচ্ ওইনেয়ো তুই নিজোরে গোজেন বিলিনে দাবী গরর্।”
34যীশু কলঅ, “তমা আইন-কানুনোত্ কি লেগা নেই যে, ‘মুই কলুং, তুমি গোজেন ধোক্ক্যেন্’? 35গোজেন কধা যিগুনো ইধু এচ্চ্যে সিগুনোরে দঅ তে গোজেন ধোক্ক্যেন্ কোইয়্যে। পবিত্র বোইবোর্ কধানি কি বাদ্ দিয়্যে যায়? ন-পারে। 36সালে বাবা নিজো নাঙে যিগুনোরে যুদো গুরিলো আর জগদত্ পাধেই দিলো সিবে মুই যেক্কে কলুং, ‘মুই গোজেনর্ পুয়ো,’ সেক্কে তুমি কেধোক্ক্যেন্ গুরি কলা, ‘তুই গোজেন বিরুদ্ধে অগমানর্ কধা কর্’? 37মঅ বাবঅ কাম্ যুনি মুই ন-গরং সালে তুমি মরে বিশ্বেজ্ ন-গুরিবা। 38মাত্তর্ যুনি গরং সালে মরে বিশ্বেজ্ ন-গুরিলেয়ো মঅ কামানি অন্তত বিশ্বেজ্ গরঅ। সেক্কে তুমি কোই পারিবা আর বুঝি পারিবা যে, বাবা মঅ সমারে আঘে আর মুই বাবা সমারে আঘং।”
39সেক্কে যিহূদী নেতাগুনে আরঅ যীশুরে ধুরিবাত্তে চেলাক্, মাত্তর্ তে তারা আঢত্তুন্ ছুদি গেলঅ। 40ইয়েন পরেদি তে আরঅ যর্দন গাঙর্ উকুলে যেইনে থেলঅ। সিধু যোহনে পত্তম্ বাপ্তিষ্ম দিদো। 41বোউত্ মানুচ্ যীশু ইধু গেলাক্ আর কুয়ো-কি গরা ধুরিলাক্, “যোহনে কনঅ আমক্ অবার্ কাম্ ন-গরে সত্য, মাত্তর্ তো তে এ মানুচ্চো পৌইদ্যেনে যিয়েনি যিয়েনি কোইয়্যে সিয়েনি বেক্কানি সত্য।” 42আর সিধু বোউত্ মান্জ্যে যীশুরে বিশ্বেজ্ গুরিলাক্।
Nke Ahọpụtara Ugbu A:
যোহন 10: CBT
Mee ka ọ bụrụ isi
Kesaa
Lee anya n'etiti ihe abụọ
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Copyright © 2021 Bangladesh Bible Society