MATEU 13
13
Yeesu atib përim, anaamanaan nagur
(Mar 4.1-12; Lúk 8.4-10)
1Tsi unu umënts wun a Yeesu pëni ri kato, a na tsëp ee tsoar di kambaŋ bërëk. 2#Lúk 5.1-3A indënd bañaan fayul, a u tsuul a na gija kanawa tsoar, a bañaan bëlieng ruka tsi kambaŋ bërëk. 3A na tib bukul irim tsi ngëko ngëcumal, aja: “Nagur apën atsëp kagur; 4a bi nu gur bi, a u ka u yër wi tsi kambaŋ bëga, a ngëko-ngëyits bi ee re. 5A ulon yër tsi tsëko ilaak, tsan dëmbats tsi mboos; a u car amayi, par mboos rëmbats tsul. 6Maa ukatee unu, a bunu tër a u kay, par ibuul niajats umboose mak. 7A ulon yër tsi buwuul iyu; a buwuul iyu wiaka, a ba nëts. 8A ulon yër tsi tsëko mgiji, a u buk mbuk: ulon a buk këbuk useent, au ulon buk ngëntaaja paaj, au ulon buk ngëntaaja ngëwaants. 9Nan kai ibats iteeni, na teen!”
10A bafets kika awokul, a ba yeparul ajaul: “We ka wun kë ñakanaan bukul uñakan katib-irim?” 11A Yeesu yank bukul aja: “Par ind, nda wëla pëme ngi pësien batsi, ngandoots ngunk mea. Maa bukul, bu wëlaatsa pëme ngul. 12#Mat 25.29; Mar 4.25; Lúk 8.18; 19.26Par nan kai, nii wëlaa në rëmban mak. Maa nan kaatsi, nii caanaa ŋal wi na ka wi. 13Wul ka wun ndu n tib bukul irim, par bu koo teen, maa bu ri ka win; bu kë cikëndën, maa bu ri ka te, te bë ri ka me ko wi i pac wi. 14#Isa 6.9,10Unk, a përim pi Isaaya nayëlia car pi leents pibanaa tsi bukul; iink di pa ja run:
‘Tsi pëte, ndu te; maa kaats bi ndu ro bi a pëjënts ind;
tsi pëteen, ndu teen; maa kaats bi ndu ro bi a ndë win;
15par ngëwaas bañaan biki, atamb;
ibats bukul ka te uwar;
bë puman këkës,
pa përits win ni këkës bukul,
pa përits te ni ibats bukul,
pa përits jënts tsi ngëwaas bukul,
pa përits witsee tsi nji, ka yësan bukul.’
16 #
Lúk 10.23,24 Maa ind, ko wi nda naak wi! Par, nda win ni këkës ind, a nda te ni ibats ind. 17Mán leents ind ucär: Bayëlia bacumal, ni bañaan bamabal, bë ro ŋal pëwin ngi nda ci ngink tsi pëwin, maa bu winats; ni pëte ngi nda ci ngink tsi pëte, maa bu teets.
Yeesu aleents ko wi Ka tib përim pan naamanaanapi nagur, pac wi
(Mar 4.13-20; Lúk 8.11-15)
18Bi u ci bank, nda cikëndëni-e përim pa naamanaana pi nagur, ko wi pa pac wi. 19Utul u yër wunk tsi kambaŋ bëga, aci nan tei përim uleka Pësien, a meets ko wi pa pac wi, a nakaalam bi ee waj pul tsi uwaasul. 20A utul u yër wunk tsi tsëko ilaak, aci ban tee biki përim, a ba niiran pul ni ulílan, 21maa pul niajats këwas bukul te bërika jon; ubaandi unoor tsi undo përim, din bu ka wëtan uwak. 22A utul u yër wunk tsi buwuul iyu, aci ban te biki përim, maa gëtaag ubira ni karí përëmb umundu nëts përim a kaats bëkat. 23A utul u yër wunk tsi mgiji, aci ban tee kiki përim, a pa jënts bukul, a pa ka bëkat: ulon abuk këbuk useent, a ulon buk ngëntaaja paaj, a ulon buk ngëntaaja ngëwaants.”
Ka tib përim pan naamanaana pi umaani ni pëmaanamaan
24A Yeesu tib bukul pëlon përim kak, aja: “Pësien batsi anaam pi nints nan saali tsi mleempnaul. 25A bi bañaan ci bi tsi bëŋooy, a nabërul baandi ee saal pëmaanamaan di pëncuaf umaani, a na pën atsëp. 26Bi umaani wiakee bi, a uu bëban, a pëmaanamaan wiaka buts. 27A baleemp ajug kato bi ee jaul: ‘Ajug! Cits ink ucapi uwar wi m saal wun uleempnau-a? A pëmaanamaan bi pënëni tsum?’ 28A na ja bukul: ‘Aci nabër ro un ko umënts wun.’ A baleemp jaul: ‘M ŋal wund pëtsëp wund kee rët pul-a?’ 29A na pok bukul aja: ‘Man lënkar urët ind pëmaanamaan, ndë rëtand umaani. 30Nda wëtan pul pa wiaka tsëloole ni, te tsi kacët. Tsi uwal kacët, bacët ka jaa : Nda rëtan bërun pëmaanamaan ndë tan pul ka ro ibac, pii tëraa; maa ndë lueg umaani di kalëpats nji.’”
Ka tib përim pan naamanaana pi pëbuk bëmutaar
(Mar 4.30-34; Lúk 13.18-21)
31A na tib bukul pëlon përim kak, aja: “Pësien batsi, anaam pi pëbuk bëmutaar, pi ñaan jej pi a na saal tsi tsëkoul. 32Ci pun pëbuk pan pe pi pëtienkëts tsi mbuk bëlieng, maa ba yaa ba wiaka, bu pe mko karëmb, din bu ruka ci bucanganani, ngëko-ngëyits.”
Bëko-bëlëntsëtsaani
33A na tib bukul pëlon përim, aja: “Pësien batsi anaam pi bëko-bëlëntsëtsaani, bi ŋaats jej bi abofëlan ni ifale i niiba yi iniibi iwaants, aa i lëntsëtsëni bëlieng.”
Ko un ka wi Yeesu kë tib këtib irim
34Yeesu aja ko wan bëlieng indënd bañaan, atib këtib bukul irim; kaats ko wi na ja wi bukul a tibats këtib bukul irim. 35#Iya 78.2Unk, pa u ci bi nayëlia ja bi; iink di na ja run:
“Mán ñakanaan bukul koo tib këtib irim;
mán leents ngëko nga beka ngi ki umundu juund ki.”
Yeesu apac Ka tib përim pan naamanaana pi pëmaanamaan
36Din, a Yeesu wëtan bañaan, a na niaj kato. A bafetsul tsëp awokul, a ba jaul: “Pac wund-e përim pi m tib punk m naamanaan pëmaanamaan tsi tsëko uleemp.” 37A na yankës bukul aja: “Niints na saalunk uwar, ci-un Abuk ñaan-najin. 38A tsëko uleempul, ci umundu. A ucapi uwar, ci babuk Pësien. A pëmaanamaan, aci babuk Nacok. 39A nabër nan saalunk pul, ci Ujabël. A kacët, ci ubaar umundu; a bacët, ci ngëwaanju. 40Bi pëmaanamaan rëta bunk a pa gutsa di bërua, unk ri wii ci run tsi ubaar umundu. 41Abuk ñaan-najin, kee yëli ngëwaanjuul, ngë pënan tsi pësienul biki kan tsu biki bañaan ba yër tsi ngëjuban, ni biki kando biki ngëjuatsal, 42bu ka gutsa di bërua bëwiak, tsul tsi irug kë ci tsun, ni kañaam irumaj. 43Din, bamabal kë kul pi unu, di pësien Asin bukul. Nan kai ibats iteeni, na tean!
Bëka ban beka bi
44Pësien batsi anaam pi bëka ban beka bi di tsëlon tsëko; a ñaan bi win bul, a na bek bul. A na tsëp ni ulílan, a nee waap bëkaul bëlieng, a na weel tsëko tsëmënts tsun.
Ilaants iwar, in ka yi bëkat.
45Pësien batsi anaam buts ni nawaapalëtsa nan ci tsi pëtsas ilaants i wara yi; 46a bi nee win pëlaants pëloole, pëñatsal, a na pën ee waap ko wi na ka wi bëlieng, a na weel pul.
Ka tib përim pan naamanaana pi pëtseenk tsi babuets
47Pësien batsi akaka naam pi pëtseenk pan gutsa pi di bërëk, a pa mob ngëkoraar ngëtsëb bëlieng. 48A bi pa cum bi, a bábuets kë totar pul kambaŋ bërëk, pa bu ka tsoar ka rat nga wara ngunk, bu ka tsu ri itekal; a nga waraatsa ngunk bu ka guts ngul. 49Unk di wii roaa run tsi ubaar umundu. Ngëwaanju kee nga bi, ngii patsës ba waraatsa biki tsi pëncuaf bamabal, 50ngë guts ba waraatsa biki di bërua bëwiak, tsul tsi irug kë ci tsun, ni kañaam irumaj.
51Nda te aatsum ngëko ngi n ja ind ngank bëlieng-a?” A ba yankësul aja: “Ee-e.” 52A na ja bukul: “Wul ka wun, napican-ulua nan ci nafets ngëko pësien batsi, anaam pi nawiak kato nan pënanii ngëko ngëwalu ni ngëjon tsi bëkaul.”
Yeesu niiranaatsa di Nasaret
(Mar 6.1-6; Lúk 4.16-30)
53Bi Yeesu ba bi pëtib irim yan, a na pën tsul atsëp. 54A na band përaasaul pi na kusëna pi, a nuu jukan bañaan di kato-kajúki bukul aa ba pikra a bu kë ja: “Tsum tsi na pënanaani tsun bëlipal bi, ni ngëko bawitsa ngi? 55Namëntsi, cits iink abuk naliir nun-a? A aninul di ka jaka iink Maaria-a? A ban tsaar biki ni nul bayënts cits iink Jakob, ni Juse, ni Simon, ni Judas-a? 56A ban tsaar biki ni nul bakaats bëlieng bë cits iink ni inja-a? A tsum tsi na kaani tsun ngëko ngi bëlieng?” 57#Joŋ 4.44A na kaana ngëwaas bukul coka. Maa a Yeesu ja bukul: “Kaats tsi nayëlia rispitaaraatsa tsi, ucits ba tsi ucaakul ni di katoul.” 58A Yeesu roots bawitsa bucumal rul, undo bu kaats uwak.
Nke Ahọpụtara Ugbu A:
MATEU 13: KPKNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Le Nouveau Testament en langue Manjaku © Alliance Biblique du Sénégal, 2020.