MATEU 11
11
Joŋ-namijan ayël bafetsul batëb di Yeesu
(Lúk 7.18-35)
1Bi Yeesu ba bi pëleents irim yan bafetsul, untaaja bukun ni batëb, a na pën tsul, a nuu jukan, a nuu leentsand përim tsi iraasa bukul.
2A bi Joŋ ci bi di ukalabus, a na te ngëko ngi Këristu kë ro ngi; a na yël bafetsul bee ba yeparul ba jaul: 3“Wi ci-un nan kai pëbi-a? Ane wund ka lip nalon-a?” 4A Yeesu yank bukul aja: “Nda tsëpan ndii leents Joŋ ko wi nda ci wink tsi pëwin, ni wi nda ci wink tsi pëte: 5#Isa 35.5,6 Isa 61.1Bakuel akak koo win, a balab kë yandaar, a ba maak biki kantseul-kajankal kë jëntsana; a barika-te kë te, a bacäts kë natsee di pëcäts, a Upetsan-uwar leentsa baranj. 6Ñaan nan bitsee niaman uwak tsi nji, Ko wi na naak wi.”
Yeesu añakan uleka Joŋ-namijan
7Bi bafets Joŋ-namijan witsa bi, a Yeesu jot pëñakanaan bañaan uleka Joŋ, a nuu ja: “Wee nda ya wun pëteen di ulaalats? Pëjaam pi ufuts siints pi-a? 8A ba wee nda ya wun pëteen? Ñaan nan tiemee iŋi iwar-a? Batiema iŋi iwar, bë ciina di ito basien. 9Maa, wee nda ya wun pëteen kalon? Pëteen nayëlia a? Ee-e, nji man ja ind apar pëjaa nayëlia. 10#Mal 3.1Par, ujara namëntsi wi Bëpicanja wun: ‘Nji ka n wëtani ink nayëlia nji tsi bërunu; nul, ka yecës bëgau tsi bërunu.’ 11Man leents ind ucär: Tsi kabuk ki bakaats buk ki, nape Joŋ-namijan cits. Maa di pësien Nasien-batsi, nan pei pëci naties apeul. 12#Lúk 16.16Pëkuri tsi uwal Joŋ-namijan te inkri, uforsa ka niajëna wun pësien batsi; baka-uforsa ka yank bukun pul. 13Par bayëlia bëlieng, ni ulua-Moises, acar aleents uleka Pësien, te tsi uwal Joŋ. 14#Mal 3.23; Mat 17.10-13; Mar 9.11-13A uci nda ŋal pëniiran ko unjaka wi, Joŋ-namijan cii un Eliyas nan kai pëbi. 15Nan kai ibats iteeni, na tean! 16A naom ni ndu n naamanaan un bañaan ntsari? Bu naam pi upäts ban tsoar biki tsi kënjëkënts, a uja bandoon biki bu kë liar bacints bukul, 17koo ja: ‘Wund afutsar ind pëncänd, a nda kayats; a wund yar ind iya puum, a nda kaanats!’ 18Par, Joŋ abi, di ka riala a di ka raan, a u jaka: ‘Atsij ucaay.’ 19A Abuk ñaan-najin bi, a nuu riala, a nuu raan; a u jaka: ‘Namëntsi aci nawaamal, a na ci nakuj, a na fetsar ni bayep bëluk-uraasa, ni bajuban.’ Maa bëlipalul a pibanaa di bu umabar bërorul ngëko.”
Iraasa bañaan ba yaarats biki ibats
(Lúk 10.13-15)
20Din a Yeesu leentsar mak iraasa i na peena yi përo ngëkoul ngi bawitsa, par bañaan yul yaarats ibats; a na aja bukul: 21#Isa 23.1-18; Ese 26.1—28.26; Joe 4.4-8; Amo 1.9,10; Sak 9.2-4“Bëjoats tsi wi, Korasin! Bëjoats tsi wi, Betësaida! Par, ngëko bawitsa nga roa ngi tsi pëncuaf ind, do roa tsi Tiiru, ni tsi Sidon, ngë ro jon ba ki nga yaar ki ibats, tsi katiema ngësaaku, ni kagurar ufab. 22Wul ka wun ndu nja ind: Tsi Unu Kawat-pëleents, Tiiru ni Sidon ka pe ind pëpibana kayëk ipës. 23#Isa 14.13-15 Uju 19.24-28A wi, Kafarnaum, kë riangar te di batsi-a? Nin-a! Kë wela te di mcäts! Par, ngëko bawitsa ngan roa ngi tsi pëncuafu, do roa di Sodooma, Sodooma a bi ka ci te ntsari. 24#Mat 10.15; Lúk 10.12Unk, man ja ind: Wi Kafarnaum, tsi unu kawata-pëleents, Sodooma ka peu pëpibana kayëk ipëska.”
Bañaan ba noor biki ka naakësëna
(Lúk 10.21-22)
25Tsi uwal umënts wun, a Yeesu ja: “Man bëndanu, Paapa, Ajug batsi ni utsia. Par, m bek ngëko ngëmënts ngi, m lawan ngul bameko ni balipal, a m piban ngul upäts uties. 26Ee-e, Paapa, par ank di m ŋal run pëci. 27#Joŋ 3.35 Joŋ 1.18; 10.15Asin nji awëlin ngëko bëlieng. A ñaan meets Abuk, ucits ba Asin; a ñaan meets Asin, ucits ba Abuk, ni biki Abuk ŋal biki pëpiban bukul nul. 28Nda bili tsi nji, ind bëlieng ban yunts biki pëyunts pa dits pi, ka naakësan ind. 29#Jer 6.16Nda niirani pëkues nji, ndë júk tsi nji, par man tsëk a juab uwaas, din ngëlugum indind ka ci tsi pënaak. 30Par pëkues nji ritsats, a pëyunts nji raf.”
Nke Ahọpụtara Ugbu A:
MATEU 11: KPKNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Le Nouveau Testament en langue Manjaku © Alliance Biblique du Sénégal, 2020.