MAKUX 8
8
Yesux Tawx Pui Pon Rheng Ih Priex
(Mat 15:32-39)
1Daux bawg yam singaix an khankix, yam baox koe cub pui hun mai kix ang koe pa ih tidtix. Nawh Cao kok kawncau Nawh khankix ah nin, 2“Aux caux rhawm ka pui hun khankix, kheu hoik ot kix mai Aux loe ngaix mai ang koe pa ih tidtix heue. 3Phan Aux ploi kix ing ka nyiex kix, yam kawn cai rhawm kix, kix tak khrup rhawm hawt krax heue. Lheu khaing in, kix tix blah hoek khaing dee singai heue.” 4Kawncau Nawh khankix deeh pawk ah nin ka Nawh Cao, “Pon ti kieh pui khankix sak ka blah daux tiag yuh ka mawx?” 5Nawh Cao chawk kix ah nin, “Pex koe blah miex lon?” Kix deeh krai “Koe aliah lon heue.” 6Nawh Cao nhie pui hun khankix ngawm piang tiex, Nawh teei blah aliah lon an, khaix hoik yaogyaw bwanson, Nawh Cao sivit mai tawx ka kawncau Nawh khankix, kieh kix tawx ka pui khankix. Kix viex hu tawx ka pui hun khankix heue. 7Kax iak kawx koe ceeix. Khaix hoik nawb bwanson, kax an kawx, Nawh Cao nhie kix tawx ka pui khankix heue. 8Kix ih tom sak heue, kix khrawm pa lheu pa max pa phawng, koe aliah phliex heue. 9Kix pa hoik ih khankix dex koe pon rheng heue. Nawh Cao ploi pui khankix hu heue. 10Dom mawx dom an Nawh Cao laig ka daux reu, tau mai kawncau Nawh khankix mai hoek ka daux haktiex Dalamanutha heue.
Mhaing Nawh Jhi Mhai Daox Am
(Mat 16:1-4)
11Pharishie khankix lih hoek mai chawk lox ka Nawh Cao mai sawg ti kieh Nawh Cao jhi kix yaox mhai pa daox deng khaing raoma, sonsang cheuk ti yaox rhawm Nawh heue. 12Nawh Cao ngia daux khuan tix ah nin, “Yuh patix pui ju in sawg mhai pa daox deng? Aux krai lox tete ka pex, tak ang tawx mhai pa daox deng ka pui ju in tix ceu kawx heue.” 13Nawh Cao lih khaing kix, deeh laig ka daux reu mai hu plak toi rawm heue.
Susaix Pharishie Mai Herut
(Mat 16:5-12)
14Kix piawm ti viex blah hu, blah ang lai koe mai kix daux reu, lheu khaing tix lon khaing. 15Nawh Cao tawm lox ka kix ah nin, “Rien rhawm tix ka susaix Pharishie khankix mai susaix Herut heue.” 16Kix tix kaux lai tix kaux keud ti ah nin ka paox tix, “Mawh kheu ang koe blah heue.” 17Yesux tawng grawh grawng an, tom ah nin ka kix, “Yuh patix pex keud ti ah ka paox tix, kheu ang pex koe blah? Pex ang chix yaox ang chix tawng lie? Rhawm pex kawn kien lie? 18Pex koe ngai kawx, ang chix yaox lie? Pex koe yhaok kawx, ang chix mhong lie? Pex ang nyang doh keud kah lie? 19Yam sivit Aux blah phwan lon ti tawx ka pui phwan rheng, pex hoik pon ti khrawm pa max pa phawng miex phliex?” kix ah nin ka Nawh Cao, “Pon kao ra phliex heue.” 20“Yam sivit Aux blah aliah lon tawx ka pui pon rheng, pex pon ti khrawm pa max pa phawng miex phliex?” Kix baox ah nin ka Nawh Cao, “Pon aliah phliex heue.” 21Nawh Cao baox ah nin ka kix, “Pex ang nyang bax tawng lie?”
Yesux Pai Pui Dug Ngai
22Kix hoek ka veng Biesedax, mai pui viex pui pa dugngai tix kaux hoek ka Nawh Cao, kix khyox khaw ka Nawh Cao nhie Nawh teeh ka kaw an heue. 23Nawh Cao giex taix pui dug ngai an mai viex nawh lih hu plak praix veng, khaix hoik baig Nawh Cao rawm myia piang ngai nawh mai deuh taix tix piang nawh, Nawh Cao chawk ah nin ka kaw an, “Maix uik chix yaox tix ceu ceu lie?” 24Kaw an yaog ti jhak ah nin, “Aux yaox pui heue, kheu aux yaox kix awm khaox pa hu krax heue.” 25Nawh Cao baox deuh taix tix piang ngai kaw an mai nawh jhak mhawm mhawm mai nawh moi deeh chix yaox, tom nawh uik grum yaox kuceu sidawng heue. 26Nawh Cao ploi nawh ing ka nyiex nawh ah nin, “Paw vi laig ka daux yaong an mai paw vi krai ka pui tix kaux kawx ka daux yaong an heue.”
Kham Mawh Yesux Cao Khrit
(Mat 16:13-20; Luk 9:18-21)
27Yesux lih hu tau mai kawncau Nawh khankix mai laig ka daux yaong Kesarix Philipux khankix. Yam kawn hu krax Nawh Cao chawk ka kawncau Nawh khankix ah nin, “Pui khankix ah Aux mawh mawx?” 28Kix krai ka Nawh Cao ah nin, “Tix blah ah mawh Yohan cao cubcom, tix blah ah mawh Eliyax, tix blah ah mawh Cao jhai tix kaux kaux heue.” 29Nawh Cao baox ah nin ka kix, “Pex ah Aux mawh mawx?” Petrux pawk lox mai ah nin ka Nawh Cao, “Maix mawh Khrit heue.” 30Nawh Cao tawm lox ka kix, son ang kix sang krai grawng Nawh Cao ka pui tix kaux kawx heue.
Sang Kham Geu Tom Nie Mai Yum
(Mat 16:21-28; Luk 9:22-27)
31Nawh Cao jah ti gau ka kix, “Grawh grawng Kawn kawn pui tak sang kham geu tom nie ceu, tak kham geu pa tik vud kuad song khankix mai cao giex kaing li pa ting khankix, pui tiiem lai khankix, grawh grawng tak kham geu pa teei yum, khaix an loe singaix tak deeh kaoh im heue.” 32Nawh Cao krai ceu an sidawng heue. Petrux teei Nawh Cao hu mai ah ka Nawh heue. 33Nawh Cao hoik veeh mai yaox kawncau Nawh khankix, Nawh Cao ah ka Petrux yuh nin, “Satan eue, hu plak khaix Aux, kheu ang maix keud grawh grawng ceu pa dex dawd mai Siyiex, viang mawh nan maix keud grawh grawng ceu pa dex dawd mai kawn pui khaing.” 34Nawh Cao kok cub pui hun khankix mai kawncau Nawh khankix, hoek ka tix mai ah nin ka kix, “Phan pui tix kaux kaux mie ti hoek khaix Aux, kieh nawh thiang ti tik tokaux tix mai klawm khaox lhak tix mai hawt Aux heue. 35Mawh kheu pui mawx ang ah, pa simie ti taoh ju tokaux tix, tak sang som ju heue. Pui mawx ang ah pa som ju son Aux, son lox bwan gaux rhawm, tak pon ti taoh ju heue. 36Grawh grawng nawh, phan pui tix kaux kaux pon haktiex khawmuik mai som ju tokaux tix, sang koe bwanson yuh ka mawx? 37Kawn pui sang chix pon tawx ceu patix tideeh taoh khuan ju tix ka? 38Mawh kheu pui mawx ang ah, pa kaig kheu Aux mai gumlox Aux, ka daux bawg yam ju pui in, pa lud vao mai pa ting map, Kawn kawn pui kawx, tak sang kaig kheu nawh, yam Nawh viex min plakngai Keeing tix mai kawncau Siyiex pa singax hoek heue.”
Nke Ahọpụtara Ugbu A:
MAKUX 8: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012