MAKUX 4
4
Lox Tiag Grawng Rhuat Simie
(Mat 13:1-9; Luk 8:4-9)
1Nawh deeh jah ti sidiex gau dex praok rawm nhawng cub pui hun khrawm paox tix hoek ka Nawh Cao, kheu nan Nawh laig ngawm ka daux reu mai reu ot ka daux rawm nhawng mai cub pui hun ngawm piang tiex ka praok rawm nhawng heue. 2Nawh Cao sidiex gau kix tom nie ceu ka daux lox tiag mai Nawh ah nin ka kix ka daux lox sidiex gau Nawh. 3“Nghiet heue, jhak heue, pui rhuat simie hu ti rhuat simie heue. 4Yam rhuat nawh simie, simie tix blah cod ka dex krax mai sim khankix hoek sut ti ih simie khankix heue. 5Simie tix blah cod piang tiex dee koe simaox, dee ang tiex koe tom nie, simie an kuah dom mawx dom an, mawh kheu ang tiex raux tan. 6Yam hoik lih singaix, kied hax koek, kheu ang kix koe riah, kix kroh hu heue. 7Simie tix blah cod ka sinax pang kat mai pang kat an ting tom kheem gut kix, kix ang chix plix, plix heue. 8Simie tix blah cod ka dee mhawm tiex mai plix plix heue, kix ting mai piien tom pon tixngoe son, tixgliah son mai tix yieh son heue.” 9Nawh baox ah nin, “Kaw pa koe yhaok ti mhong, kieh nawh mhong heue.”
Teei Lox Tiag Sidiex
(Mat 13:10-17; Luk 8:9-10)
10Yam ot Nawh Cao nong nong, kix pa ot sivie siveng Nawh mai kawncau Nawh kao ra kaux khankix hoek mai chawk Nawh grawh grawng lox tiag khankix heue. 11Nawh Cao ah nin ka kix, “Hoik kieh pex tawng grawh grawng pa raux pa dex dawd mai Meung Siyiex, Viang mawh nan ka kix pa ot plak praix tak krai kuceu ka daux lox tiag heue. 12Mawh kheu nan viang kix yaox kawx, kix yaox mai ang yaox mai viang kix mhong kawx, kix mhong mai ang pon ti tawng, phan ang mawh nan ha kix kox deeh tieh hoek mai luan khaing phimap kix.”
Dee Bleeh Pui Rhuat Simie
(Mat 13:18-23; Luk 8:11-15)
13Nawh Cao baox ah nin ka kix, “Pex ang tawng lox tiag in lie? Phan mawh nan pex tak chix tawng lox tiag khawmuik yuh ka mawx? 14Pui pa rhuat simie kienie, rhuat gumlox bwan heue. 15Grawh grawng pa rhuat simie lox bwan dex krax mawh nin, yam hoik mhong kix gumlox, Satan hoek dom mawx dom an mai teei gumlox pa hoik rhuat ka daux kix heue. 16Grawh grawng pa rhuat simie dee haoh simaox mawh nin, yam hoik mhong kix lox bwan, kix gaux rhawm mai rieb ti teei dom mawx dom an, 17kix ang koe riah ka daux tokaux tix, kix kaux cong tivud khaing. Yam yaox kix krax tuktiak kheu lox bwan kix laux rhawm dom mawx dom an heue. 18Grawh grawng pa rhuat simie ka daux pang kat mawh nin, in mawh kix pa hoik mhong lox bwan, 19pa khi rhawm pa dex dawd mai haktiex mai pa chix pie lhen sinngao mai pa mie ti pon tang ceu khankix, kheem gut lox bwan tom ang chix plix, plix heue. 20Grawh grawng pa rhuat simie dee mhawm tiex mawh nin, mawh kix pa mhong gum lox bwan mai rieb ti teei mai plix plix tixngoe son mai tixgliah son mai tix yieh son heue.”
Kawk Ngu Pa Mox Greem Phliex
(Luk 8:16-18)
21Nawh Cao baox ah nin ka kix, “Viex kawk ngu sonsang sau greem phliex greem ku lie? Ang mawh sonsang deuh piang dee deuh kawk ngu lie? 22Mawh kheu pa hoik mox pa tak ang kieh sidawng ang koe tix ceu kawx, mai pa hoik yuh kieh glip pa tak ang plak kieh sidawng ang koe tix ceu kawx heue. 23Phan pui tix kaux kaux koe yhaok ti mhong, kieh nawh mhong heue.” 24Nawh Cao baox ah nin ka kix, “Grawh grawng pa hoik mhong pex rien rhawm tix kah, pex tong pex tiag ti tawx ka pui tang kaux miex ding, tak sang deeh tong deeh tiag ti tawx ka pex yuh nan heue. 25Mawh kheu kaw pa hoik koe, tak sang baox tawx ka nawh heue, kaw pa ang koe, viang pa hoik koe nawh kawx, tak sang deeh teei khaing nawh heue.”
Lox Tiag Grawng Kuah Simie
26Nawh Cao baox ah nin, “Meung Siyiex awm pui pa rhuat simie piang tiex. 27Nawh it ponsawm mai deeh kaoh ponngaix, grawh grawng simie an, kuah mai ting lhaong yuh ka mawx, nawh ang tawng heue. 28Haktiex chix kieh koe plix nong nong heue. Phao ka kieh koe gawng, koe lhax mai khaix an kieh koe sigiag mai khaix an kieh koe plix pa naog ka daux sigleem nawh heue. 29Yam hoik kaux plix, pui an teei sivawg, vawg dom mawx dom an, kheu bawg yam kaux hoik hoek heue.”
Lox Tiag Simie Taux Klaox
(Mat 13:31-32,34; Luk 13:18-19)
30Nawh Cao baox ah nin, “Meung Siyiex awm ceu patix? Ex tak teei lox tiag yuh ka mawx, krai grawh grawng nawh? 31Awm simie taux klaox tix mu, yam rhuat piang tiex, mawh ceu pa iak khaing simie kuceu khawmuik pa koe piang haktiex in heue. 32Viang mawh nan khaix hoik rhuat simie an, nawh kuah lih ting tom ting khaing num rib num riem khawmuik mai koe kak pa ting, tom sim raoma khankix pon ti ot tix laux lee greem veei nawh heue.” 33Nawh Cao teei lox tiag pa awm an tom nie, sidiex krai gumlox bwan ka kix, pa chix nghiet kix heue. 34Phan ang mawh ka daux lox tiag Nawh ang sidiex ang krai lox ka kix, viang mawh nan ka kawncau Nawh khankix, Nawh krai sidawng kuceu khawmuik dee ang pui ot heue.
Kieh Bhaung Mai Rawm Yawg Yien
(Mat 8:23-27; Luk 8:22-25)
35Daux singaix an yam ponbo Nawh Cao ah nin ka kix, “Ex hu plak toi rawm heue.” 36Kix prah cub pui hun mai kix viex Nawh Cao awm ot Nawh daux reu mai reu tang reu tix blah hu tau mai Nawh heue. 37Bhaung ting hoek ti phlu mai rawm pukpak chun ti laig daux reu tom naog heue. 38Tokaux Nawh Cao ot plak sidax reu, it piang mhawn gaong mai kix so Nawh siduad mai ah nin ka Nawh, “Sara Cao gau eue, Maix ang keud grawh grawng hoek ex krax laux lie” 39Nawh Cao kaoh mai ah ka bhaung mai Nawh ah nin ka rawm nhawng “Kieh nhim, yiien heue.” bhaung yiien mai rawm nhawng yawg tix heue. 40Nawh Cao baox ah nin ka kix, “Pex lhat yuh ka mawx? Pex ang nyang koe krax yum rhawm lie?” 41Kix die lhat kah mai tix kaux lai tix kaux ah nin ka paox tix, “Kaw in mawh mawx? viang bhaung mai rawm nhawng kawx nghiet lox Nawh heue.”
Nke Ahọpụtara Ugbu A:
MAKUX 4: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012