MAKUX 16
16
Yesux Deeh Kaoh Im
(Mat 28:1-8; Luk 24:1-12; Yo 20:1-10)
1Yam hoik luan ngaix twah, Marix Magadalax mai Marix miex Yakop mai Salom liag sidah bhawng, sonsang kraix ka Nawh Cao. 2Daux aliah ngaix, singaix tix, ponngawb cao cao, kix hu hoek ka simeeig yam hoik lih singaix heue. 3Kix ah nin ka paox tix, “Pui mawx tak sang plu plie simaox an khaing moing daux simeeig son ex.” 4Kix yaog ti jhak mai yaox simaox an hoik plu plie hoik gah tix. Simaox an mawh pa kied ting heue. 5Kix laig ka daux simeeig mai yaox pui awn ju tix kaux ngawm plak khawn dawm mai ceep sibex dha pa paing mai kix yaoh kah heue. 6Nawh ah nin ka kix, “Paw yaoh paw lhat awx. Pex sawg Yesux pui veng Nazariet pa hoik tawk piang khaox lhak. Nawh Cao hoik kaoh. Nawh ang ot tin, jhak ka dee hoik een kix Nawh Cao heue. 7Viang mawh nan pex hu krai kawncau Nawh khankix mai Petrux mhong. “Nawh sang hu sivoe pex ka daux meung Galilie, pex tak sang yaox Nawh Cao tan, awm hoik krai Nawh ka pex heue.” 8Kix lih mai to hu khaing simeeig, kheu krax lhat siyaung mai krax daox deng, hoik hoek piang kix, kix ang krai tidtix ka pui tix kaux kawx, kheu kied lhat kix heue.
Yesux Jhi Tokaux Tix Ka Magadalax
(Mat 28:9-10; Yo 20:11-18)
9Yam hoik deeh kaoh im Yesux cao cao daux aliah ngaix, ngaix tix, Nawh jhi tokaux tix ka Marix Magadalax phao ka heue. Pa mawh bun pa hoik grheu Nawh phi caox aliah kaux lih khaing heue. 10Nawh hu krai kix pa hoik ot tau mai Yesux mhong, yam yiem kix mai khi rhawm. 11Yam mhong kix, grawng hoik deeh im Yesux mai grawng hoik yaox Marix ka Nawh, kix ang yum rhawm kah.
Jhi Tokaux Tix Ka Kawncau Ra Kaux
(Luk 24:13-35)
12Khaix an Nawh Cao baox jhi tokaux tix, daux riang pak peung tang ceu, yam hu kawncau Nawh krax daux tiag ra kaux heue. 13Kiex hu krai grawh grawng ceu in ka kawncau pa deuk khankix, kix ang yum rhawm ka kiex heue.
Jhi Tokaux Tix Ka Kawncau
(Mat 28:16-20; Luk 24:39-49; Yo 20:19-23)
14Khaix an Nawh Cao baox jhi tokaux tix ka kix kao tix kaux, yam ngawm neung kix ti sawm. Nawh Cao ah ka kix, kheu krax ang yum rhawm mai pa kien rhawm kix, mawh kheu kix ang yum rhawm ka pui pa hoik yaox Nawh Cao, khaix hoik deeh kaoh Nawh heue. 15Nawh Cao ah nin ka kix, “Pex hu piang haktiex khawmuik mai sidiex gau lox bwan gaux rhawm in, ka can pui pa hoik phan hoik yuh khawmuik heue. 16Pui pa yum rhawm mai cubcom, tak hoek krax taoh heue, pui pa ang yum rhawm tak hoek krax prawng ciyang heue. 17Mhai rug ceu in khankix tak mawh ka kix pa yum rhawm. Kix tak sang grheu phicaox lih ka daux ceu kaux Aux mai kix tak sang sikah daux lox pui ceu pa khraox. 18Kix tak sang pon teei ti yaog siuing mai phan kix nyaux pa awp tix ceu ceu, ang chix kieh kix saux tidtix. Kix tak sang deuh taix tix piang pui saux pui ngia mai kix tak moi heue.”
Haok Meung Raoma
(Luk 24:50-53)
19Khaix hoik krai Simiang Yesux ceu in ka kix, rieb ti teei Nawh haok ka daux meung raoma mai kieh ngawm plak taix khawn dawm Siyiex heue. 20Kix lih hu mai sidiex gau kudah dee. Siyiex yuh kaing tau mai kix, kieh lox bwan kaux cong, kheu mhai pa lih mawh daux kix khankix heue.
Nke Ahọpụtara Ugbu A:
MAKUX 16: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012