MAKUX 13
13
Grawng Sang Laux Nyiex Bwan
(Mat 24:1-2; Luk 21:5-6)
1Yam lih hu Yesux khaing nyiex bwan, kawncau Nawh tix kaux hoek ah nin, “Sara cao gau eue, jhak heue, simaox mai nyiex pa ting khankix kied si daing mhawm grang ting lhaong.” 2Yesux ah nin ka nawh, “Yaox maix nyiex pa ting an khankix lie? Viang ang yieh ti tik kawx, samaox koe tin khankix tak prung prang mai ang lai koe piang paox tix, tix lon kawx heue.”
Mhai Jhi Bawg Yam sidah
(Mat 24:3-14; Luk 21:7-19)
3Yam ngawm Nawh Cao piang gawng Sanlun, pa koe sivoe nyiex bwan, Petrux mai Yakop mai Yohan mai Andare, hoek mai chawk ka Nawh dee ang pui ot, ah nin, 4“Ceu in khankix tak sang mawh lai mawx? Yam tak sang dex mawh ceu in khankix, tak koe mhai pa yuh ka mawx? Krai ka ex liak.” 5Yesux ah nin ka kix, “Son ang pui sang pon pie lhen pex kieh lud, rien rhawm tix kah heue. 6Pui tom nie tak sang briex ti teei ceu kaux Aux mai hoek ah nin, Aux mawh Nawh heue. Tak pon pie lhen kieh pui lud tom nie heue. 7Yam tak sang mhong pex grawh grawng naing mai grawh grawng sang yuh naing, paw vi khi rhawm kah heue, ceu in tak sang mawh, viang mawh nan ang nyang bax mawh bawg yam sidah heue. 8Mawh kheu pui tix ceu mai tix ceu, tix meung mai tix meung tak cha paox tix mai kla reem tak sang tok dee haoh dee mai praix tak sang sibhawm. Ceu in khawmuik mawh pa jah krax kha rhawm tix heue. 9Rien rhawm tix kah, kheu kix tak tawx pex ka cub kuad song cao prawng ca khankix mai tak sang sivied pex ka daux nyiex dee sidiex khankix mai pex tak sang cung sivoe cao giex kaing haktiex mai simiang khankix, son Aux, sonsang mawh mhai rug ka kix heue. 10Tak sang sidiex gau lox bwan gaux rhawm ka ceu pui khawmuik phao ka. 11Yam tok kix ti tawx pex hu dee prawng ca, paw khi rhawm ka grawng lox pa sang ah sang krai pex phao ka, viang mawh nan, lox pa sang tawx ka pex daux bawg yam nari an, pex krai pex ah lox an, mawh kheu ang mawh pex pa krai pa ah, mawh Khuan Singax Singeh heue. 12Puxaik tix kaux lai tix kaux tak sang teei ti tawx puxaik tix, sonsang pah yum mai keeing kawx tak teei ti tawx kawn tix mai kawn praix khankix kawx tak kaoh ti yuh ka miex keeing tix mai kieh pah kix yum heue. 13Pui khawmuik tak koeng ka pex mawh kheu ceu kaux Aux, viang mawh nan kaw pa kaux cong tom sidah, tak sang hoek krax taoh heue.”
Ceu Pa Kha Rhawm
(Mat 24:15-28; Luk 21:20-24)
14“Yam yaox pex ceu pa greeing pa yuh laux, cung dee ang nawh khaw ti cung, kieh kaw pa phat ti yaox tawng heue, yam an kieh kix pa ot ka daux meung Yudax to hu piang gawng khankix heue. 15Pui pa ot piang prang nyiex, paw kieh nawh lih laig teei tix ceu kawx khaing daux nyiex tix. 16Pui pa ot ka daux ma, paw kieh nawh deeh ing teei kraung ceep tix heue. 17Bun pa koe kaux mai bun pa tawx kawn tix peuex, ka daux bawg yam ngaix an khankix, tak kha rhawm heue. 18Pex rawg bwan son bawg yam an, son ang caw yam kwat heue. 19Mawh kheu yam an tak sang koe pa kha rhawm, ceu pa ang sax koe, tom yam jah Siyiex ti vah ma la rawm, sidah hoek bawg yam in mai khaix an kawx tak ang lai baox koe heue. 20Phan Simiang ang kieh bawg yam ngaix an khankix dawd, tix kaux kawx ang pon ti luan, viang mawh nan mawh kheu pui pa laug Siyiex, pa hoik laug Nawh, Nawh kieh ngaix an khankix dawd heue. 21Yam an phan pui tix kaux kaux ah nin ka pex, Jhak heue, Khrit ot tin, phan ang mawh nan, ot tan, paw vi yum rhawm kah. 22Mawh kheu Khrit pa ang mawh ang meh mai cao jhai pa ang mawh ang meh khankix tak sang lih hoek mai tak sang jhi mhai ceu pa daox deng, sonsang pon pie lhen kieh lud, phan chix ka pui pa hoik laug Siyiex kawx heue. 23Viang mawh nan pex rien rhawm tix, jhak heue, Aux hoik grux krai ka pex grawng kuceu sivoe ka sang mawh heue.”
Yam Sang Hoek
(Mat 24:29-31; Luk 21:25-28)
24“Khaix pa kha rhawm daux bawg yam ngaix an khankix, singaix tak faik mai khix tak ang tawx pa riang tix, 25mai simuing khankix tak sang rau khaing raoma mai sibrawm pa koe ka daux raoma khankix tak sang yung yiang heue. 26Yam an kix tak yaox Kawn kawn pui viex sibrawm pa ting mai min plakngai mai hoek ka daux paiawm heue. 27Yam an Nawh tak sang ploi kawncau Siyiex khankix hu khrawm pui pa hoik laug cie Nawh, khaing bhaung pon plak, jah dee sidah haktiex, tom hoek dee sidah raoma kudah dee heue.
Grawng Khaox Ruh
(Mat 24:32-35; Luk 21:29-33)
28“Gau ka khaox ruh grawng lox tiag nawh. Yam awn kak nawh mai lih lhax, pex tawng bawg yam raux dex sang hoek, 29Awm an yam yaox pex ceu in khankix uik sang mawh, kieh tawng Nawh dex hoek ti ot ka praok siviex khankix heue. 30Aux krai lox tete ka pex, pui ju in tak ang bax luan, tom ceu in khankix khawmuik tak hoik mawh heue. 31Raoma mai haktiex tak sang grai, viang mawh nan gumlox Aux in tak ang grai heue.
Ang Tawng tix Kaux Kawx
(Mat 24:36-44)
32“Ang tawng singaix bawg yam nari an tix kaux kawx, viang mawh kawncau Siyiex ka daux meung raoma khankix kawx ang tawng, Kawn Cao kawx ang tawng, mawh ngie Keeing Cao pa tawng heue. 33Mawh kheu ang pex tawng bawg yam an, rien rhawm tix, pau ti jhak mai rawg bwan heue. 34Grawh grawng in tak awm pui tix kaux, pa prah nyiex tix mai hu ot tang praix klawng, khaix hoik tawx nawh sibrawm ka kawncau nawh khankix mai hoik tawx kaing ka kaux pui mawx kaux pui an mai hoik nhie pui pau siviex. 35Pau ti jhak heue, kheu ang pex tawng bawg yam sang hoek simiang cao nyiex, tak mawh yam ponbo lie, phan ang mawh nan, yam greung sawm lie, phan ang mawh nan, yam ux ia lie, phan ang mawh nan, yam ponngawb lie, pex ang lai tawng heue. 36Phan ang mawh nan, ha Nawh kox hoek yam ang pex ce mai yaox laig it pex heue. 37Pa krai Aux ka pex, Aux krai ka khawmuik, pau ti jhak heue.”
Nke Ahọpụtara Ugbu A:
MAKUX 13: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012