MAKUX 12
12
Cao Sipeem Mai Cao Vai
(Mat 21:33-46; Luk 20:9-9)
1Nawh Cao baox jah ti sidiex ka kix ka daux lox tiag heue. “Pui tix kaux nawh sum sipeem plix siiet tix dah mai sum khaox vie vung viang sipeem an mai kaong daux dee biiet rawm plix siiet mai sum nyiex lhaong tix lhang mai yaog mai tawx vai ka pui pa yuh sipeem plix siiet mai hu tang praix klawng heue. 2Yam hoek bawg yam nawh ploi kawncau tix, tix kaux hu ka pui yuh sipeem an khankix, sonsang rieb ti teei plix khaing sipeem plix siiet, ka pui pa yuh sipeem khankix heue. 3Kix teei nawh mai tap nawh mai ploi nawh ing giex, taix yi tix heue. 4Nawh baox deeh ploi kawncau tang kaux tix kaux mai kix teei simaox dheem kaing nawh saux mai yuh pa ang khaw ang jiet ka nawh mai ploi nawh ing heue. 5Nawh baox ploi kawncau tang kaux mai kix teei nawh yum. Nawh baox ploi kawncau tang kaux tom nie mai kix tap tix blah mai teei yum tix blah heue. 6Nawh kawn koe kawn pa moh tix kaux khaing mai nawh baox ghoik ti ploi kawn tix hu ka kix ah nin, kix tak yungyi ka kawn aux heue. 7Viang mawh nan pui pa yuh sipeem an khankix, ah nin ka paox tix, kaw in mawh cao sin. Hoek heue, ex teei nawh yum mai sin nawh tak mawh cie ex heue. 8Kix giex nawh mai teei nawh yum mai taing nawh khaing daux sipeem plix siiet heue. 9Mawh kheu nan cao sipeem plix siiet tak sang yuh ka mawx? Nawh tak hoek yieh mai yuh pui pa yuh sipeem an khankix laux mai tawx sipeem plix siiet an ka pui tang kaux heue. 10Ang pex sax phat phuk lai sigang khri pa ah nin lie?
Simaox pa hoik tik pui yuh nyiex,
hoik yuh kieh mawh kaing ka daog.
11In mawh pa hoek khaing Simiang,
mai mawh pa daox deng ka ngai ex heue.”
12Kix sawg ti giex Nawh Cao, viang mawh nan kix lhat ka cub pui hun, kheu tawng kix Nawh hoik sidiex lox tiag an ka grawng kix mai kix prah Nawh Cao mai hu heue.
Tawx Gha Ka Kesa
(Mat 22:15-22; Luk 20:20-26)
13Kix ploi Pharishie mai kawncau Herut tix blah hu ka Nawh Cao, sonsang pon kix ti giex, dee lud lox sikah Nawh heue. 14Yam hoek kix, kix ah nin ka Nawh Cao, “Sara Cao gau eue, ex tawng Maix mawh pa mawh meh mai ang lhat ka pui tix kaux kawx, kheu ang Maix jhak ka pakngai kawn pui mai sidiex gau grawng krax Siyiex tete heue. Khaw ti tawx mau koh ka simiang Kesa lie, ang khaw ti tawx lie? 15Ex tak tawx lie? Phan ang mawh nan, ex tak ang tawx lie?” Nawh Cao tawng grawng pie lhen kix mai ah nin ka kix, “Pex nyaw cheuk ti yaox Aux yuh ka mawx? Viex denari tix plah sonsang jhak Aux nawh,” 16kix viex mai Nawh Cao chawk ah nin ka kix, “In mawh riang mawh lai pui mawx?” kix ah nin ka Nawh Cao, “Mawh riang mai lai simiang Kesa heue.” 17Yesux baox ah nin ka kix, “Ceu pa mawh cie Kesa, tawx ka simiang Kesa heue. Ceu pa mawh cie Siyiex tawx ka Siyiex heue.” Kix kied daox deng ka Nawh Cao heue.
Kaoh Im Khaing Krax Yum
(Mat 22:23-33; Luk 20:27-38)
18Sadukie khankix hoek ka Nawh Cao, pa ah ang koe pa deeh kaoh im heue. Kix chawk Nawh Cao ah nin, 19“Sara Cao gau eue, Mose tiiem ti deuh ka ex ah nin, phan puxaik pui tix kaux yum mai prah moeng tix khaix tix mai ang koe kawn, pux nawh, tak teei moeng nawh mai eei kawn praix son puxke nawh heue. 20Koe puxaik aliah kaux, kaw phao ka teei ti koe moeng, nawh ang koe kawn mai yum heue. 21Ra kaux tix kaux kawx teei bun an, ang koe tix prah kawn khaix nawh mai yum heue, loe kaux tix kaux ka awm an heue. 22Aliah kaux tix kaux kawx ang koe kawn ti prah heue. Khaix kix khawmuik, bun an kawx yum heue. 23Mawh kheu nan yam hoek bawg yam deeh kaoh im, ka daux kix nawh tak mawh moeng kaw pa yuh ka mawx? Kheu kix khawm aliah kaux hoik to moeng bun an heue.” 24Yesux pawk lox mai ah nin ka kix “Pex lud kheu ang pex tawng phuk lai sigang khri mai sibrawm Siyiex, ang mawh lie? 25Mawh kheu yam kix tak deeh kaoh im khaing krax yum, kix ang teei mex moeng mai ang teei ti tawx ka paox tix, kix tak awm kawncau Siyiex ka daux meung raoma heue. 26Lheu khaing an grawng pui yum khankix tak sang deeh kaoh, ang pex sax phat ka daux phuk lai Mose lie? dee koe grawng yam sikah Siyiex mai nawh ka daux yeem khaox ah nin, Aux mawh Siyiex Abraham mai Siyiex Icak mai Siyiex Yakop lie? 27Nawh ang mawh Siyiex pui yum, viang mawh nan, Nawh mawh Siyiex pui im, pex kied lud heue.”
Pingnyap Pa Blon Ting
(Mat 22:34-40; Luk 10:25-28)
28Pui tiiem lai tix kaux hoek mai mhong lox pa chawk kix ka paox tix mai nawh tawng grawng Nawh Cao hoik pawk lox ka kix mhawm mhawm mai chawk Nawh Cao ah nin, “Lox pingnyap pa yuh ka mawx lheu ting khaing paox tix khawmuik?” 29Yesux baox pawk lox ah nin, “Pa lheu ting khaing paox tix mawh in, Pui Isarelax eue, nghiet heue, Siyiex ex, mawh Siyiex leeing ju tix kaux khaing. 30Maix tak moh Siyiex maix khawm rhawm tix khawmuik, khawm ju tix, khawm ka dee chix keud tix khawmuik mai khawm riang rao tix khawmuik heue. 31Pingnyap ra gum tix gum mawh in, Maix tak moh paox plawg paox nyhawm tix awm moh tokaux tix heue. Lox pingnyap pa lheu ting khaing ceu in ang koe.” 32Pui tiiem lai an ah nin ka Nawh Cao, “Mawh pa mawh meh heue. Sara Cao gau eue. Pa krai Maix mhawm, Siyiex koe tix kaux khaing mai lheu khaing Nawh Cao Siyiex tang kaux ang koe. 33Pa moh Nawh khawm rhawm khawm rhi khawmuik mai pa chix tawng khawmuik mai khawm riang rao khawmuik mai pa moh paox plawg paox nyhawm tix awm moh tokaux tix, nie lheu khaing pa tan khawmuik, pa gleeing ka ngu heue.” 34Yam yaox Yesux nawh chix keud ti pawk lox mhawm mhawm, Nawh Cao ah nin ka nawh, “Maix ang singai khaing Meung Siyiex heue.” Khaix an pui tix kaux kawx ang pon chawk Nawh Cao ka lox tidtix heue.
Lox Chawk Ka Cao Kaing
(Mat 22:41-46; Luk 20:41-44)
35Yam sidiex gau Yesux ka daux nyiex bwan Nawh ah nin, “Pui tiiem lai khankix ah Khrit mawh kawn Davit yuh ka mawx? 36Tokaux Davit hoik ah nin ka daux Khuan Singax, Simiang ah nin ka Simiang aux, ngawm plak taix khawn dawm Aux, tom kieh Aux pui pa koeng ka Maix mawh ngot dee deuh Maix caong heue. 37Tokaux Davit hoik kok Nawh mawh Simiang. Nawh chix mawh kawn nawh yuh ka mawx?” Pui hun khankix gaux rhawm ti nghiet lox Nawh Cao heue.
Ah Ka Pui Tiiem Lai
(Mat 23:1-36; Luk 20:45-47)
38Yam sidiex gau Nawh Cao, Nawh baox ah nin ka kix, “Rien rhawm tix ka pui tiiem lai khankix, pa mie tix ceep sibex dhah mai hu mai kieh pui ah lox yungyi ka daux lah daux cau khankix. 39Kix moh dee ngawm pa mhawm khaing paox tix, daux nyiex sidiex khankix mai dee mhawm khaing paox tix dee yuh pawie khankix heue. 40Kix mawh pa chix rud ti ih nyiex miexmai khankix mai sonsang chix pie lhen kix rawg bwan tom lang. Kix tak nie pon krax prawng ciyang pa ting heue.”
Mau Tan Miexmai
(Luk 21:1-4)
41Nawh Cao ngawm dex ka dee deuh mau mai jhak ka pui hun sau mau, dee sau mau tan mai cao mi tom nie sau tom nie. 42Miexmai pa hot pa sibhawm hoek tix kaux mai sau tawng ra bliah iak, pa keung been tix piak. 43Nawh Cao kok kawncau Nawh khankix hoek ka tix mai ah nin ka kix, “Miexmai pa hot sibhawm in hoik sau nie lheu khaing kix pa sau, ka daux dee sau mau khawmuik. 44Kheu kix khawmuik, hoik sau khaing pa lheu kix, viang mawh nan, bun in hoik sau khaing pa hot tix pa koe nawh khawmuik, viang mawh pa mawh sonsang im ju tix, nawh hoik sau heue.”
Nke Ahọpụtara Ugbu A:
MAKUX 12: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012