MAKUX 10
10
Sidiex Son Ang Tik Paox
(Mat 19:1-12; Luk 16:18)
1Nawh cao kaoh khaing tan mai hoek ka daux haktiex Yudax plak toi rawm Yawdan, cub pui hun baox deeh khrawm paox tix hoek ka Nawh Cao, Nawh baox deeh sidiex gau ka kix awm pa hoik sax yuh Nawh heue. 2Pharishie tix blah hoek ka Nawh mai chawk Nawh Cao ah nin, sonsang cheuk ti yaox Nawh, “Pui khaw ti tik moeng tix lie?” 3Nawh Cao baox pawk lox mai ah nin ka kix, “Mose hoik nhie pex yuh ka mawx?” 4Kix ah nin, “Mose kieh tiiem lai grawng hoik hoik lox mai kieh tik bun heue.” 5Yesux ah nin ka kix, “Mawh kheu kien rhawm pex Mose tom tiiem deuh lox tawm ka maix yuh nan heue. 6Tom yam jah vah ma la rawm dix, Siyiex yuh simex mai bun heue. 7Mawh kheu grawng in simex tak prah miex keeing tix mai ot tau mai moeng tix. 8Kiex ra kaux tak mawh nex nham tix mu khaing, mawh kheu nin, kiex ang lai deeh mawh ra kaux, mawh tix kaux khaing heue. 9Mawh kheu in pa hoik kleuk Siyiex tau paw kieh pui yieh heue.” 10Yam ot ka daux nyiex kawncau Nawh khankix baox chawk ka Nawh Cao grawh grawng ceu an heue. 11Nawh ah nin ka kix, “Pui mawx ang ah pa tik moeng tix mai baox moeng tang kaux, lud vao ka bun an heue. 12Phan bun tik mex tix mai baox mex tang kaux, nawh lud vao heue.”
Nawb Bwan Ka Kawn Iak
(Mat 19:13-15; Luk 18:15-17)
13Kix viex kawn nyawm iak khankix hoek ka Nawh Cao, sonsang teeh Nawh kix, viang mawh nan kawncau khankix ah ka pui khankix heue. 14Yam yaox Yesux song rhawm, ah nin ka kix, “Kieh kawn nyawm iak khankix hoek ka Aux, paw vi sidien kix, kheu Meung Siyiex mawh cie pa awm kix heue. 15Aux krai lox tete ka pex, pui mawx ang ah pa ang rieb ti teei Meung Siyiex awm kawn nyawm iak, tak ang tau ti pon ti laig tan heue.” 16Nawh Cao kawm kix daux taix tix mai deuh taix tix piang kix mai nawb bwan ka kix heue.
Grawng Caomi Awn Ju
(Mat 19:16-30; Luk 18:18-30)
17Yam lih hu Nawh Cao ka daux krax, pui tix kaux to hoek ka Nawh, grux ngawng tix mai chawk ka Nawh Cao ah nin, “Sara Cao gau pa mhawm eue, aux tak yuh ka mawx, sonsang pon aux ju leeing ju?” 18Yesux pawk lox ah nin ka nawh, “Kheu maix lai kok Aux mawh pa mhawm? Lheu khaing Siyiex tix kaux khaing, tix kaux kawx ang mhawm heue. 19Maix tawng lox pingnyap khankix, Paw teei ju pui yum, paw lud vao, paw briex, paw kham mhai rug pa ang mawh meh, paw lhen ti teei kraung pui, yung yi ka miex keeing tix heue.” 20Kaw an pawk lox ah nin ka Nawh Cao. “Sara Cao Gau eue, aux hoik hawt ti yuh ceu an khankix khawmuik tom yam iak aux heue.” 21Yesux jhak ka kaw an mai moh nawh mai ah nin ka nawh, “Pa taig maix kawn koe tix ceu. Hu coh pa koe maix kuceu tawx ka pui hot sibhawm khankix maix tak koe kraung khrai ka daux meung raoma mai hoek ti hawt Aux heue.”
Baox Krai Bawg Loe
(Mat 20:17-19; Luk 18:31-34)
22Nawh khi rhawm voi rhawm tix mai lih hu heue. Kheu mawh nawh pui pa koe kraung khrai tom nie heue. 23Yesux jhak ti yaox vung viang Nawh mai ah nin ka kawncau Nawh khankix, “Pui pa mawh cao mi sonsang laig ka daux Meung Siyiex nu miex ding heue.” 24Kawncau Nawh khankix kied daox deng ka lox Nawh Cao an, viang mawh nan Yesux baox deeh ah nin ka kix, “Kawn praix eue, pui pa een rhawm ka sinngao tix khankix, sonsang laig ka daux Meung Siyiex nu miex ding heue. 25Laig kala-uk daux kre nyex lheu yie khaing laig cao mi ka daux Meung Siyiex heue.” 26Viang mawh nan kix kied daox deng kah mai ah nin ka Nawh Cao, “Phan mawh nan, pui mawx tak sang pon hoek krax taoh?” 27Yesux jhak piang kix ah nin, “Grawh grawng in kawn pui ang chix yuh. Viang mawh nan ang mawh pa ang Siyiex chix yuh, kheu Siyiex chix yuh kuceu khawmuik heue.” 28Yam an Petrux ah nin ka Nawh Cao, “Jhak heue, ex hoik prah hoik tik khawmuik mai hoik hawt Maix heue.” 29Yesux ah nin, “Aux krai lox tete ka pex, ang koe pui tix kaux kawx pa hoik prah grham nyiex nawh, phan ang mawh nan, puxaik nawh, nan nawh, miex nawh, keeing nawh, kawn praix nawh mai ma kaung nawh khankix, kheu Aux mai kheu lox bwan gaux rhawm. 30Pa tak ang pon nyiex mai puxaik mai nan mai miex mai kawn praix mai ma kaung, tix yieh son ka daux bawg yam in, tau mai krax tuktiak daux ju khaix, tak pon ju leeing ju heue. 31Viang mawh nan, pui pa ot ka tom nie, tak dah khaix mai pui pa ot khaix tom nie, tak ot ka heue.”
Baox Krai Pa Sang Kham Geu
(Mat 20:17-19; Luk 18:31-33)
32Yam kawn hu kix krax, yam haok kix ka veng Yerusaliem, Yesux hu sivoe kix, kix kied daox deng kah mai pa hawt Nawh khankix die lhat heue. Nawh Cao baox teei kix kao ra kaux mai krai grawh grawng ceu pa tak sang mawh ka tokaux tix ka kix ah nin, 33“Jhak heue, ex tak sang haok hu ka veng Yerusaliem mai tak sang teei ti tawx Kawn kawn pui ka cao giex kaing li pa ting khankix, pui tiiem lai khankix, kix tak sang prawng kieh Nawh yum mai tawx Nawh ka pui tang ceu khankix, 34mai kix tak sang yuh pa ang cee ang cak ka Nawh mai baig rawm myia piang Nawh mai sivied Nawh mai teei Nawh yum heue. Khaix an loe ngaix Nawh tak deeh kaoh im heue.”
Lox Rawg Yakop Mai Yohan
(Mat 20:20-28)
35Yakop mai Yohan, pa mawh kawn Zebedie hoek dex Nawh Cao ah nin ka Nawh, “Sara Cao gau eue, yiex rawg mhaing ceu patix ka Maix ang ah, yiex simie ti kieh Maix yuh son yiex heue.” 36Nawh Cao chawk ah nin ka kiex, “Pax simie ti kieh Aux yuh ceu patix son pax?” 37Kiex baox ah nin ka Nawh Cao, “Kieh yiex ngawm plak taix khawn dawm Maix tix kaux plak taix khawn gwiex Maix tix kaux, ka daux min plakngai Maix liak.” 38Yesux ah nin ka kiex, “Pax ang tawng grawng pa rawg pax. Pax chix nyaux kawk pa nyaux Aux lie? Phan ang mawh nan, pax chix kham krax cubcom pa cubcom Aux lie?” 39Kiex baox ah nin ka Nawh Cao, “Chix tix heue.” Yesux baox ah nin ka kiex. “Kawk pa nyaux Aux, pax tak sang yaox ti nyaux heue, mai pax tak sang cubcom, ka daux krax cubcom pa cubcom Aux heue. 40Viang mawh nan, pa ngawm plak taix khawn dawm Aux mai plak taix khawn gwiex Aux, ang mawh cie Aux ti tawx, hoik cox son pui mawx ang ah, tak mawh son kix heue.” 41Yam mhong kawncau Nawh kao kaux grawng ceu an, kix song rhawm ka Yakop mai Yohan heue. 42Yesux kok kix, hoek ka tix mai ah nin ka kix, “Pex tawng grawng pa yuh simiang piang pui tang ceu khankix, giex kaing kix mai pui pa ting lhaong kix, khin ka kix heue. 43Ka daux pex tak ang mawh nan, ka daux pex pui mawx ang ah, pa mie ti ting lhaong, tak mawh kawncau pex heue. 44Ka daux pex, pui mawx ang ah, pa mie ti giex kaing pex, tak mawh siliex pui khawmuik heue. 45Grawh grawng nawh, Kawn kawn pui kawx, hoek sonsang kieh pui yuh son Nawh ang mawh. Viang mawh nan hoek sonsang yuh son pui mai tawx ju tokaux tix, sonsang taoh pui tom nie heue.”
Pai Ngai Batimie Moi
(Mat 20:29-34; Luk 18:35-43)
46Kix hoek ka veng Yerikho mai yam lih Nawh Cao khaing veng Yerikho tan, tau mai kawncau Nawh khankix, pui hun, kawn Timie, pa mawh Batimie pa dug ngai mai caung ti ih, ngawm dex krax heue. 47Yam mhong nawh grawng mawh Yesux pui Nazariet, nawh kok yo Nawh ah nin, “Yesux kawn Davit eue, caux rhawm ka aux liak.” 48Pui tom nie ah ka nawh, sonsang yawg nawh tix heue, viang mawh nan nawh nie baox yo ah nin, “Kawn Davit eue, caux rhawm ka aux liak” 49Yesux cung ti kaog ah nin, “Kok nawh hoek heue.” Kix kok pui pa dug ngai an mai ah nin ka nawh, “Gaux rhawm heue, kaoh, Nawh Cao kok maix heue.” 50Nawh tik man fua tix, ja loh ti kaoh mai hoek ka Yesux heue.” 51Yesux chawk nawh ah nin, “Maix mie ti kieh Aux yuh patix ka maix?” pui dug ngai an ah nin ka Nawh Cao, “Rabonix eue, kieh ngai aux chix yaox liak” 52Yesux baox ah nin ka nawh, “Hu heue, krax yum rhawm maix hoik kieh maix moi heue.” Dom mawx dom an nawh deeh chix yaox mai hu hawt Nawh Cao daux krax heue.
Nke Ahọpụtara Ugbu A:
MAKUX 10: WCL
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Wa Common Language Bible © Bible Society of Myanmar, 2012