Marcos 6
6
I Jesús o chila Nazaret
1Te'uri i Jesús xel putinimit chi Nazaret ub'i, junam ku' utijoxelab'. 2Are xuriq i ij sábado, i Jesús xok pa ja re i molb'al ib' xaq xok chuk'utik utzij i Dios chke i winaq chi je o chila. I uk'iyal winaq le are xkita wach kub'ij i Jesús, lik xkib'isoj xaq xkib'ij i tziji:
—¿Ipa xutijoj wi rib' i achi le che i jalajuj taq k'utunik chi ku'ano? ¿Pachin taq xyaw i nojb'al le che? Xaq ¿Wach taq usuk' chi ku'an i nimaq taq il le? 3¿Xatab'a are ti ire ile chi aj-anol mexa? Chi ralab' ati Mariy; xaq ratz a Jacobo, a José, a Judas xaq a Simón. ¿Xatab'a je jeqel ti ranab' chqaxol yoj waral? —Keje xkib'ij i winaq.
Rumali lik xkiya ti u'ij xaq lik xpe koywal che. 4Are uri i Jesús xub'ij chke:
—Xaipa koksax wi u'ij jun profeta, xwiri putinimit, chkixol i rachalal xaq chi rachoch lik koksax ti u'ij —xcha.
5Mijun nim laj il xu'an i Jesús chila, xwi keb' oxib' winaq xuya u'ab' pkiwi xaq xerutzirsaj. 6Rumali i Jesús lik xub'isoj man i winaq chila xekojon ti che. Rumali x-e pa taq komon naqaj chuk'utik utzij i Dios chke i winaq.
I Jesús xeutaq b'i utijoxelab' chupaxsaxik uwach utzij i Dios
7I Jesús xeusik'ij i kab'lajuj utijoxelab' ru' man xuya pki'ab' chi kkesaj b'i itzel taq tew chke i winaq xaq pkakab'il xeutaq b'i pa jalajuj taq komon. 8Xaq xub'ij chke chi nti kkik'am b'ik are ke'ek, mitene kiteb', mitene kiwa xaq mitene kipwaq; xwi kich'amiy kkik'am b'ik, 9xwi jumolaj kixajab' kkikoj b'ik, xwiri nti ki'u' kkik'am b'ik re kkijalb'ej, lik xwi jumolaj chi kikojom. 10Xaq xub'ij chke:
—Are kixupon che jun komon we xitz'onoj iposar ru' jun ja lik chila chix-ol wi, k'a are kixel chila che i komon le te'uri kixel ru' i ja le. 11We o jun tinimit kixkik'ulaj taj xaq we kkaj ti utayik utzij i Dios, chixel uri chila, chipupa kan ulew che iwaqan, k'utb'al re chke chi o i k'ax kpe ni pkiwi.
12Are uri i tijoxelab' xe'e chub'ixkil utzij i Dios chke i winaq, xkib'ij chke chi o uchak kkijalwachij kinojb'al chi utz taj. 13Xaq xkesaj b'i jalajuj taq itzel taq tew chke i winaq; xaq je k'i iwab'ib' xekikunaj ru' aceite.
Ukamsaxik ma Wan Ajqajsanel Ya
14I ma Herodes#6.14 I tzij Herodes ri b'iyaj taj, iri are ub'i upatan xaq rumal u'ij., chi atol tzij pkiwi aj Israel, xuta utzijol wach i nimaq taq il ktijin i Jesús chu'anik, chi enaq chub'i utzijol xaipa. I ma Herodes xuta chi kb'ixik: “Are i etz ma Wan Ajqajsanel Ya xwalij chkixol i kamnaq, rumali ktijin chu'anik i nimaq taq il le”; kecha.
15Xaq jub'an chik kkib'ij: “Chi are etz mam Elías chi profeta”.
Xaq “o i keb'iwik chi ile are jun profeta chi kachi'il kan i profeta re ujer”.
16Xwiri i ma Herodes are xuta ni'pa ile, xub'ij:
—Ile are ma Wan chi xintaq uk'atzixik ujolom, xwiri wo'or xwalij chaloq —xcha.
17Xa rumal ati Herodías, chi ma Herodes xutaq uminik ma Wan le prexil xaq xutaq uyut'ik ru' karena; i ati Herodías le rixoqil ma Felipe chi ucha' ma Herodes. Xwiri i ma Herodes le uminom rib' ru' i rixnam. 18Man ma Wan le ub'im che ma Herodes: “I kattijin chu'anik le lik utz taj man ixoq chi o awu' le lik rixoqil acha'”.
19Rumali i ati Herodías le lik tzel xril ma Wan xaq lik xraj te ukamsaxik xwiri xuriq taj wach ukamsaxik xu'ano. 20Man i ma Herodes le kuxij rib' man reta'am chi ma Wan le lik suk'ul laj winaq xaq lik ch'am uk'aslemal, rumali i ma Herodes le kuchajij uk'aslemal ma Wan, tupu are kuta utzij kuriq ti chik wach i ku'ano, xwiri lik kraj utayik utzij i ma Wan le. 21I ati Herodías lik xrechb'ej i nima'ij chi xu'an ma Herodes re u'ij ire man xuk'is chik jun junab' uk'aslemal. Are uri chi xeusik'ij i je raqan u'ab', xaq i aj-atzil chke i achiyab' chi je yij che i ch'oj, xaq xeupon i nimaq kipatan re ronojel i jyub' Galilea. 22Are ketijin konojel chwa'im i ralit ati Herodías kxajawik xok b'i chkiwach. Rumali i ma Herodes xaq konojel ni'pa ketijin chwa'im ru' lik qus xkilo wach xajawik xu'an i ali le. Rumali i ma Herodes xub'ij che ali:
—Chatz'onoj chwe wach kawaj, man kinya ni chawe —xcha.
23Lik k'iyalmul xub'ij che ali chi chutz'onoj wach i kraj man ire kuya ni che xab'iroxik, xaq xub'ij ne che chi nti k-ono we kutz'onoj nik'aj che i jalajuj taq tinimit chi o pu'ab'. 24Are uri i ali le x-e chutz'onoxik che uchuch, xub'ij:
—Nan, ¿Wach kintz'onoj che i ajawinel kab'ij yet?
Are uri i uchuch xub'ij che:
—Chatz'onoj ujolom ma Wan che, chi Ajqajsanel Ya.
25Are uri i ali le juntir xok la chub'i ru' i ajawinel, xub'ij che:
—Kwaj chi lik wo'or chaya li ujolom ma Wan chi Ajqajsanel Ya chwe chupam jun laq.
26I atol tzij are xuta ile lik xpe ub'is, xwiri rumal i sujunik chi xu'an che ali chkiwach konojel i je usik'im chwa'im le, xuya che ali wach i xutz'onoj. 27Are uri i ajawinel le xutaq la b'i jun achi chi yij che i ch'oj chrelsaxik ujolom ma Wan chila prexil xaq kuk'am li che, 28x-e i achi chi yij che i ch'oj chila prexil xuk'atzij ujolom i ma Wan te'uri xuk'am li chupam jun lik'lik laq xaq xuya che ali, te'uri i ali le xuya che uchuch.
29I utijoxelab' ma Wan, are xkita utzijol ile, are uri xe'e chuk'amik uch'akul xaq xkimuqu.
I Jesús xeutzuq lajujwinaq kab'lajujmo' (5,000) achiyab'
30Chrijil chik ronojel ile, i apostolab' re i Jesús xkimol kib' ru', are uri xkilap che ronojel ni'pa ki'anom, xaq ni'pa utzij i Dios chi xkib'ij chke i winaq. 31Are uri i Jesús xub'ij chke:
—Jo' che jun k'ijib'al tz'inilik man keje ile kojuxlan jub'i', keje xraj Ire ile man i winaq lik nti kk'isik, xaq lik k-antaj ti ne chik utijawik kiwa kumal. 32Are u'ankil uri chi Jesús xaq i rapostolab' xkimin b'i kib' chupam jun barco. 33Xwiri je k'i i winaq xeilawik xaq xketamaj chi are i Jesús xaq i utijoxelab' xe'ek. Are uri i winaq aj pa jalajuj taq tinimit xe'e pa'anem chi taq uchi' i semelik ya, nab'e ne tan chik xeupon ike chwach i Jesús. 34I Jesús are xel pa barco, xeril uk'iyal winaq chi je o tan chik chila. Are uri xpe jun nim laj k'axnab'al uk'ux chke man je keje pacha jub'an chij chi nti keyu'uwik. Rumali xujeq uya'ik jalajuj taq k'utunik chke. 35Are xqaj ij, i utijoxelab' xetejeb' pan ru' xkib'ij che:
—Lik ya xqaj ij, waral lik jun k'ijib'al tz'inilik. 36Cheataqa b'i winaq chutzukuxik kiwa chi taq ja, xaq pa taq komon naqaj chqij chqawach —xecha che i Jesús.
37Xwiri i Jesús xub'ij chke:
—Yix cheitzuqu i winaq le.
Ike xkib'ij che i Jesús:
—¿Kawaj b'ari Yet chi koj-e chulo'ik mas wa re trigo tzuqb'al ke i winaq le? Man we keje ile rajwaxik i mer chi kuch'ak jun are kchakun wuqub' ik'.
38I Jesús xutz'onoj chke:
—¿Ni'pa wa re trigo o iwu'? Jeiwila pe'.
Are xketamaj ni'pa o ku', xkib'ij che i Jesús:
—O jo'ob' wa re trigo xaq keb' kar —xecha.
39Te'uri i Jesús xeutaq utijoxelab' chi kekikub'a i winaq chwa taq k'im pa taq tzob'ajil. 40Are uri i winaq xekub'i chwa taq k'im, xkitzob'ej kib' pa taq lajuj kawinaq (50) xaq pa taq jo'winaq (100). 41Te'uri i Jesús xuk'am i jo'ob' wa re trigo xaq i keb' kar; are uri xtzun an chikaj xuk'amwaj xaq xutioxij che i Dios. Te'uri xupir i wa re trigo, xuya chke utijoxelab' kkijachb'ej re chke i winaq. Xaq keje xu'an che i keb' kar. 42Konojel i winaq xkitij kiwa lik xenojik. 43Are xkelej wa'im konojel i winaq, i tijoxelab' xkimol uchi' i wa re trigo xaq i kar chi xk'is taj, are uri xyiji kab'lajuj chikach. 44Je lajujwinaq kab'lajujmo' (5,000) achiyab' xkitij i wa re trigo.
I Jesús kb'in puwi i ya
45Chrijil chik ile i Jesús xub'ij chke utijoxelab': Chixnab'ej b'ik, man kixok b'i chupam jun barco, kix-e ch'aqa semelik ya k'a pa tinimit Betsaida. Tz'aqat yin kein-ijla b'i winaq. 46Are xutzin chki'ijlaxik b'i winaq, x-e che jun jyub' chutz'onoxik che i Dios. 47Are xok a'ab', i barco chi je enaq utijoxelab' i Jesús chupam o chik pa nik'aj che i semelik ya. I Jesús utukel o che i jyub' le, 48xrilo chi lik ketiki ti chik chuminik b'i barco ipa enam wi ke, rumal i tew chi kkik'ulaj chwach. Are xsaqirik, i Jesús x-e ku' utijoxelab', kb'in chwi ya, ktijin rik'awik chkiwach ike. 49I tijoxelab' are xkilo chi kb'in jun winaq chwi ya, xkixij kib', xkich'ob' ike chi jun xib'inel, rumali lik xesik'inik. 50Man konojel xkilo rumali xkixij kib', xwiri i Jesús xub'ij chke:
—¡Mixij iwib' man xa Yin, chikowirsaj ik'ux! —Xcha.
51Te'uri xok b'i ku' pa barco; are uri i tew xuxlanik. I utijoxelab' lik xkib'isoj rumal i nim laj il chi xkilo le. 52Man kitom ti ub'e i nim laj il re i wa re trigo, lik tz'apil kinojb'al.
I Jesús xeukunaj iwab'ib' aj Genesaret
53Are xki'axuj i semelik ya, xeupon chuchi' i jyub' Genesaret, chila xkixim wi kan ki-barco chuchi' i semelik ya. 54K'atene ktijin kelik chupam i barco i winaq chi je o chila lik juntir xkil ub'e chi are i Jesús. 55I winaq le lik juntir xe'e la pa'anem pa taq komon chuk'amik li kiwab'ib' chwa taq ch'at re kkik'am b'i chwach i Jesús. 56Xaipa kok wi Jesús, we pa taq tinimit, we pa taq komon xaq we pa taq es is kkik'am b'i iwab'ib' chwach. Xaq o ile chi xa kekiya pan kiwab' chi taq b'e xaq i iwab'ib' xkitz'onoj che i Jesús chi kya' chke chi kkiyin pan jub'i' u'u'; konojel ni'pa i xkiyin u'u' che, is xeutzirik.
Nke Ahọpụtara Ugbu A:
Marcos 6: ACHICUB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Biblia Achí de Cubulco, Derechos reservados de Sociedad Bíblica de Guatemala