Luuka 17
17
Yisu li mu ulongese mu tsobili a mbiili mu ufutaha huli Nzambi
Mataayi 18.6-7,21-22; Malako 9.42
1Yisu aleeli bayihi ba nde: «Matonyi mamalahi mali ma utahuha na Nzambi. Ka ni lingebe huli nde wuna wu uba toni yi utahusa muutu na Nzambi. 2Hufwani bubwe huli nde wuna, bakutala nde manya li linene mu likingu na ubwaha nde mu mubu. Hufwani buuna, ka a mu ubita tso mumosi mu bangebe mo baaniiba mu utahuha na Nzambi ve.
3Kebaani! Tso mwana a ngu a we buve kedi avanga lilibi, yibusa nde we bu hwafwana. Nde asobo mbiili a nde, sa nde kolo-kolo. 4Tso nde siidi we bubi tsa tsambu mu ilumbu, na tso nde ya monehele huli we monehele tsambu na uleele: “Me miitsobo mbiili a me.” Sa nde kolo-kolo.»
Hiitu mu Nzambi
5Bayihi baaleeli huli Pfumu: «Kulasa hiitu hya bisu mu Nzambi.» 6Pfumu aleeli: «Tsimaani ti hiitu mu Nzambi hili we mwa libutu la mutade. Tso benu na hiitu hya pila yina, benu utwala utuma muti we mbuyu: “Tuupama, na yamene hutso mubu.” Nde sa asiingala benu.
Mupfuna musalili
7Tsimaani ti mumosi mu benu li na ngamba wuli mu usala toto. Buve ngamba wuli mu ukeelese biboodi. Bu nde humata mangundu, nde uleele nde: “Yanga mawasa yatsahala ŋa metse?” 8Naana! Ka nde sa aleele nde: “Lamba byudya bya me, na sobo bikutu mu usalila me nate bu me umana udya na unywa. Humbisa we sa dya na unywa mu ya we tangu.” 9A hwafwana huli nde mu ufutala matondo huli ngamba mowunuwu ve, mu toni ati nde vangi ma baatumi nde. 10Ni we benu ka, ŋa benu limiivanga ma baatumi benu, leelaani: “Bisu lili bangamba ba baavele a tsoongo, bisu limiivanga mamaakuha huli bisu mu usa.”»
Yisu abeelusi kuumi la banga a bwatsi
11Bu Yisu hakayene hu musyenge a Yeruselemi, nde atangili mandilu ma bitanzi bya Samariya na Ngalili. 12Bu nde hakakoto hu bula bumosi, kuumi la baatu banga a bwatsi bayabwana na nde. Bo baatelimi hu lala. 13Bo baabwi mu ufulaha: «Yisu, Mulongisi, kwila bisu lingebe.» 14Yisu amono bo, nde aleeli: «Yamwesani nyutu a benu huli banganga ba Nzambi.» Na bu baaba mudwe huuna, bo baabeeluhi. 15Mumosi mu bo, bu hamoni ti nde miibeeloho, ayafutaha, na ayusi Nzambi na mifudi myosi. 16Nde abwidi mbalanga mu toto, ŋa busu bwa Yisu na afutili nde matondo. Muutu mowunuwu aba musi Samariya. 17Yisu aleeli: «A kuumi la baatu babeeluhi ve? Ka ipfwa hina huni bali? 18Ŋa hati la bo boosi, ndulu ni mwenyi mowunuwu tsimi uyafutaha mu ufutala matondo huli Nzambi!» 19Titswene, Yisu abweleele nde: «Teleme yene! Hiitu hya we mu Nzambi himiifuuhasa we.»
Nziili Ipfumu hya Nzambi
Mataayi 24.23-28,37-41
20Bafarisi baafuuli Yisu: «Ki tangu Ipfumu hya Nzambi hi uya?» Nde afutili bo: «Ipfumu hya Nzambi a hili we iliimbu hi bubaamono mu uya ve. 21Mu tangu moyina baatu a bu uleele ve: “Hyo hyohi ŋa!” Buve: “Hyo hyohinaa!” Mu toni ati Ipfumu hya Nzambi ŋa hati la benu hili.»
22Na nde aleeli huli bayihi: «Bilumbu bi byuya, benu luusaha umono tso ilumbu imosi mu bilumbu bya Mwana a muutu. Ka benu a luumono hyove. 23Sa baleele benu: “Nde ŋa ali!” — Buve “Nde huuna ali!” A liyene maatiinu ve! A liduukala bo ve! 24We bu muvedyavedi ubaamwedeme na uyalusa mayulu tsoso moyi nate yina, ni buuna ka bu uba mu Mwana a muutu mu ilumbu hi nde hu uya. 25Ka nde afwana umaamono pasi bulahi, na baatu ba tungi molinili sa babisa nde.
26Mambu ma mabwidi mu tangu Nowa, sa mavyoho bumosi ka we mu bilumbu bya nziili a Mwana a muutu. 27Baatu baakadya na baakanywa, baakakwele na baakakwelese baana ba bo, nate mu ilumbu hi Nowa hakoti mutso likuumbi. Humbisa, nyamba yayidi na yanyambisini bo boosi. 28Sa huba bumosi ka we mu tangu Loti: baatu baakadya na baakanywa, baakasumba na baakasumbasa, baakakuna mbutu na baakatunga manzo. 29Ka ilumbu hi Loti hapali mu musyenge a Sodoomo, mbaahu na mamanya ma mbaahu maakanoho we mvula na boosi baanyambiini. 30Sa huba ka bumosi mu ilumbu hi Mwana a muutu huyamonehele. 31Mu ilumbu mohina, woosi wu uba ŋa yulu ibanga, aba na bisiha mutso a nzo, a nyaha usutaha mu uvolo byo. Bumosi ka, wuna wu uba hutso matsyehe, avelefutaha hu nzo. 32Yibwalaani monyi mu mukadi a Loti. 33Woosi wu usaha ukeelese muvumu a nde sa anyambasana nde, na woosi wu unyambasana muvumu a nde sa akeelese nde. 34Me ndeele benu, mu butsuhu mo buuna, baatu boole ba bu uba ŋa taangi mosi, mumosi sa babita, na wuna sa basiisa. 35Bakaasu boole ba bu uba mu unyiha mbutu mu itwadi, mumosi sa babita, na wuna sa basiisa. [36#17.36 Itsudu mohi hyove mu mabuuku makima: Boole ba bu uba hutso a tsyehe, mumosi sa babita, na wuna sa basiisa. ]»
37Bayihi baafuuli Yisu: «Pfumu, maana mbadi huni mutswiha?» Nde afutili: «Ŋa hu uba mvumbi, ni huuna ka bambida bu ukuukama.»
Nke Ahọpụtara Ugbu A:
Luuka 17: TSA
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active), Wycliffe Bible Translators, Inc. All rights reserved.