Mag 14
14
Mbi yaya kə̀bə̀ icheg ni nyimi Yeso zweti
(Mat 26:1-5; Lug 22:1-2; Jɔn 11:45-53)
1Ineg ya si bùʼ ibe ne mə̀Ju biri jəg Iteri Chègun tì Iteri ngə̀ŋ mə̀kara ne chəyi àfòrì inga. Ane, itog bəd mbàn Ŋwiye tì mə̀chwitì mə̀nɔ̀ʼɔ̀ ya ko se kə̀bə̀ icheg ni chè anjìm anjìm nyìmi Yeso zweti. 2Mbi yaya kə̀bə̀ ane si chùʼri gha, “Imbə̀ʼ tì si nyìmi awa aməd anyumə̀ ne mbe jəg Iteri, nji bəd biri bùg ndum.”
Àyi mɔ̀ʼɔ ya zɔʼ Yeso ane məwud àka inun a Betanì
(Mat 26:6-13; Jɔn 12:1-8)
3Yeso ya yaʼ a Betanì inga nəb Sayimùn we ne ya kweʼì ghɔ̀n àwàrikə̀m. Anyumə̀ ne wì yaya jə̀ghə, àyi mɔ̀ʼɔ ya ghò tì məwud àka inun inga chəŋ àlàbastà. Məwud mbe ya bèrì ifɔ chɔm. Mbi ya tangi məwud mbe məyi ane nad.#14:3 Mbi ya niŋ məwud mbe ane azed nad. Azed nad ze yaya kwèghe aba ze a Indìyà. Wì ya pè sɔb atog chəŋ ze, tù məwud mbe igun atog abə Yeso. 4Bəd mɔ̀ʼɔ abɔ̀ʼ mbe ne ya yaʼi angu ya gaŋ si ghàm mbɔb mbɔb gha, “Aton ne we chìkə̀ məwud mbo̰ anìŋ kə imbə̀ʼ aghə? 5Nji mbi kə fèn məwud mbo̰ ane ikab ne che chuʼ aki atad, si nàʼ ikab we abə bəd ne chəyi àzɔb.” Mbi ya ghì ane, ghàm tɔ abə àyi we.
6Si ya gha, Yeso ya ghà inɔb gha, “Mbə̀ saŋa aməd! Aton ne mbə chə aməd àkə gha? Wì fə ghì anug chɔm inum. 7Bəd ne chəyi àzɔb mbe abɔ̀ʼ inən aghəm ajìm. Ane, mbə̰ mbe tì mbə̰ ghì ìchɔ̀mì inɔb anyumə̀ ne mbə̀ kɔŋi. Àsi mo, chəyi mə̀ biri yaʼ tì inən aghəm ajìm. 8Àyi gho̰ fə ghì anug ze ne tì wì ghi. Wì fə zɔʼ àmə nyɔd ni gha mə mə̀ ku, mbi si twə̀ŋi. 9Mə gha tesiʼ inən gha, isiŋi ijìm mbe ne mbi biri ghà ikən chɔm gho̰ inga isəg, mbi biri ghà anug ze ne àyi gho̰ ghi. Ane, bəd biri se kɔ̀ndɔ məd.”
Judàs ya bḛ ni fḛ Yeso
(Mat 26:14-16; Lug 22:3-6)
10Judàs Ikarìyɔ̀d, ne ya wə̀d mɔ̀ʼɔ abɔ̀ʼ mə̀mə̀nənùg mbe ìghum chɔ̀b ibe, ya ghò abə itog bəd mbàn Ŋwiye ni fḛ Yeso inɔb. 11Anyumə̀ ne mbɔb ya zug anug ze, mbi ya kɔ̀ŋ, si kàʼ gha mbɔb biri nàʼ ikab ibo. Ni ko ane nyùmə̀ we, wì ya ko se kə̀bə̀ apan ni ghì gha mbe gwiye Yeso.
Yeso ya jəg Iteri Chègun tì ìmbi mə̀mə̀nənùg
(Mat 26:17-25; Lug 22:7-14,21-23; Jɔn 13:21-30)
12À ya yaʼ igun aneg mbègtog ne mbi yaya jə̀ghə ngə̀ŋ mə̀kara ne chəyi àfòrì inga, ne yaʼi aneg ne mbi ya kyème Ŋwan njə̀g Iteri Chègun, mə̀mə̀nənùg Yeso ya biri ibo gha, “Àghò kə kə̀bə̀ gha tì ghò tangi asiŋi ine ne àghò biri jəg Iteri Chègun aya?”
13Anyumə̀ ne mbi ya biri ane, wì ya tɔm ìmbi mə̀mə̀nənùg məbe, ghà inɔb gha, “Mbə̀ ghò inga asiŋi ze ne yaʼi inən imbìghè. Mbaŋà mɔ̀ʼɔ ne bèʼi akwighe mənib biri kɔti awən. Mbə̀ beni abɔ̀ʼ məd. 14Mbə̀ nyi inga achan ze ne wì nyi, ghà abə wə̀d nəb gha, ‹Àchwitìnùg biri gha, Atog nəb bəd tìsɔ̀ʼ ne ze biri jəg Iteri Chègun inga tì ìmbi mə̀mə̀nənùg aza?› 15Wə̀d nəb biri chwi atog nəb kyen mɔ̀ʼɔ inən ikaŋ ne mbi fə zi ighi inga nəb inga. Mbə̀ tangi ighi ijìm ina inga angu.”
16Mə̀mə̀nənùg mbe ya ghò inga asiŋi ze, pè bàd ighi ijìm kwàʼ icheg ne Yeso kə̀ gha inɔb. Ane mbi ya tangi tijəg Iteri te inga angu.
17Ikwikwiri we, Yeso ya ghò inga asiŋi ze tì ìmbi mə̀mə̀nənùg mbe ìghum chɔ̀b ibe. 18Anyumə̀ ne mbi yaya jə̀ghə, Yeso ya ghà inɔb gha, “Mə gha tesiʼ inən gha, wə̀d mɔ̀ʼɔ abɔ̀ʼ inən biri fèn amə. Tengàŋ we jə̀ghə tì inum.”
19Mbi ya zug ane sɔ̀mnɔ̀, si ko se bìre ibo wə̀d imɔʼ imɔʼ gha, “À wa kə mo?”
20Wì ya ghà inɔb gha, “À ya wə̀d mɔ̀ʼɔ abɔ̀ʼ mbə̰ mbo̰ ìghum chɔ̀b ibe. Tengàŋ we jə̀ghə ngə̀ŋ mə̀kara inga akaŋ amɔʼ tì inum. 21Ŋwan Wə̀d biri ku icheg ne mbi ya fə ŋwàʼri imbə̀ʼ aməd, si ya gha, ngəʼ kyen biri nyi igun wə̀d we ne fḛ aməd! Àkə aghi ne chəyi mbi ya kiri gwi tengàŋ, nji ze bɔ̀ŋ.”
Icheg ne Itari ya ko
(Mat 26:26-30; Lug 22:14-20; 1Kɔ 11:23-25)
22Anyumə̀ ne Yeso tì ìmbi mə̀mə̀nənùg yaya se jə̀ghə, wì ya niŋ chiŋ ngə̀ŋ mə̀kara, chàʼra Ŋwiye, bə̀ʼri, nàʼ abə mə̀mə̀nənùg mbe, si ghà inɔb gha, “Mbə̀ niŋ, aŋa ya ìmə nyàmnyɔd.”
23Wì ya bə̀ niŋ toʼ mənoʼ, chàʼra Ŋwiye, nàʼ inɔb. Mbɔb məjìm ya niŋ no. 24Wì ya ghà inɔb gha, “Aŋa ya àmə anəm ne Ŋwiye fə niŋi sɔb ikan feg tì inən. Anəm azo̰ ya anəm ne mə̀ tuti imbə̀ʼ bəd nɔʼ nɔʼ. 25Mə gha tesiʼ inən gha, chəyi mə̀ biri ywiri no mənoʼ vayìn ghò pè ane aneg ze ne mə̀ biri no ane ighəm feg inga anug ìfɔ̀n Ŋwiye.”
26Anyumə̀ ne mbi ya fə zə̀ʼi ikyeg, mbi ya dù ghò ikaŋ iwum mə̀Olìf.
Yeso ya gha Pità biri to̰ yi aywi
(Mat 26:31-35; Lug 22:31-34; Jɔn 13:36-38)
27Anyumə̀ ne Yeso tì ìmbi mə̀mə̀nənùg ya pè ikaŋ iwum mə̀Olìf we, wì ya ghà inɔb gha, “Mbə̰ məjìm biri nòrò awən sàŋì mə. A ze inga Àŋwàʼrì Ŋwiye gha,
‹Mə biri zweti Àjənjə̀g,
njə̀g si sàkà.›
28Si ya gha, ane nyùmə̀ ne Ŋwiye fə zwemne amə, mə biri ghò inən imbìghè a Galìli.”
29Pità ya ghà ibo gha, “Ka mə̀mə̀nənùg məjìm nòrò awɔb sàŋì awe, chəyi mə̀ biri nɔ̀ʼ ghì ane.”
30Yeso ya ghà ibo gha, “Mə ghà tesiʼ ine, kwàʼ məyi izimi tèchɔ̀ŋ, bɔŋ inɔm ngub se tɔ̀ŋɔ aghəm abe, àghò biri fə to̰ awe mə aghəm atad.”
31Pità ya ywìrì ghà kwàʼ ane gì ka ka gha, “Ka ze bì chwi gha mbe zweti awe bə̀ zweti amə, chəyi mə̀ biri nɔ̀ʼ to̰ awe.”
Mə̀mə̀nənùg mbe məjìm ya bə̀ ghà ane.
Yeso ya chàʼra Ŋwiye a Gètsemanì
(Mat 26:36-46; Lug 22:39-46)
32Yeso tì ìmbi mə̀mə̀nənùg ya ghò a asiŋi mɔ̀ʼɔ ne mbe kàrà ane Gèsemanì. Anyumə̀ ne mbi ya pè angu, wì ya ghà inɔb gha, “Mbə̀ chughi aŋa, mə ghò chàʼra Ŋwiye.” 33Wì ya ghà ane, niŋ Pità tì Jem fɔrɔ Jɔn mbi fɔti ghò. Nyɔd məd ya ko se bə, fìŋ məd bə̀ ko se nàʼà ngəʼ inga. 34Ane, wì ya ghà inɔb gha, “Ibəʼ nɔ̀ʼ inum inga fìŋ, se kə̀bə̀ ni zweti amə. Mbə̀ chughi aŋa, ikyèʼi.”
35Wì ya ghà ane, yèndì ghò imbìghè iki piʼì, pè nɔ̀kì aseg kùbri ife, ko se chàʼrà Ŋwiye gha, icheg mə̀ chwi, Ŋwiye ghìyə gha imbə̀ʼ nyùmə̀ ngəʼ ze si yeʼe yi igun inum. 36Wì ya gha, “Aba,#14:36 Aba ya ìngam Àràmayìg ni gha, “Mbaʼ. ” ìmə Mbaʼ! Chəyi anug mɔ̀ʼɔ ne tì ze ka chè awe. Chiye ngəʼ ìzo̰ igun inum. Si ya gha, imbə̀ʼ àghò ghiyə awe anug ne mə̀ kəbi, ghiyə yaʼ anug ne àghò kə̀bi.”
37Wì ya bə̀ndì ghò pè bàd mə̀mə̀nənùg mbe ne mbe gwḛ awɔb. Ane, wì ya biri abə Pità gha, “Sayimùn, mbə kə gwḛ awən? Chəyi tì mbə̰ chughi ikyèʼi ane awà fìbì? 38Mbə̀ chughi ikyèʼi chàʼra Ŋwiye, ni gha imbə̀ʼ aghi mɔ̀ʼɔ kwàʼrà yi awən. Fìŋ ze jiʼè kə̀bə̀ gha mbə̀ ghiyə inug ne koʼi, si ya gha, nyàmnyɔd bɔd.”
39Wì ya ghà ane, ywìrì ghò chàʼrà Ŋwiye, ghà məyi anug ze ne wì kə̀ bi ghà. 40Wì ya bə̀ ywìrì bə̀ndì ghò pè bàd awɔb ne mbe gwḛ awɔb. Mbi yaya gwḛ imbə̀ʼ icheg ne ngwḛ ya fə se chìŋə̀ awɔb ako. Ane, chəyi mbi ya kyeri anug ni ywìtì ibo.
41Wì ya bə̀ ywìrì ghò ni chàʼra Ŋwiye ane aghəm ne pè atad. Wì ya bə̀ndì pè ghà inɔb gha, “Mbə kə kiri gwḛ bə̀ zwètè awən? Mbə̀ nɔ̀ʼɔ ane! Nyùmə̀ fə kòʼ. Mbi fə fèn Ŋwan Wə̀d abə bəd inug tibɔ̀ŋ. 42Mbə̀ nɔ̀ʼɔ tì ghò. Mbə̀ nḛ! Wə̀d ne fḛ amə gho̰ fə se aŋa.”
Inɔ̰ bəd ya gwì Yeso
(Mat 26:47-56; Lug 22:47-53; Jɔn 18:3-12)
43Icheg ne Yeso yaya kiri ghamà, Judàs ne ya wə̀d abɔ̀ʼ mə̀mə̀nənùg mbe ìghum chɔ̀b ibe ya yèʼe. Wì yaya yḛ̀ tì inɔ̰ bəd ne ya nyimi tibeg ibid bə̀ nyimi tìmbàŋì. À yaya itog bəd mbàn Ŋwiye tì mə̀chwitì mə̀nɔ̀ʼɔ̀ fɔrɔ bəd kyen mbe inga aben ya tɔmi awɔb. 44Wə̀d we ne ya fḛ Yeso ya fə nàʼ aneni inɔb gha, “Mbaŋà ze ne mə̀ biri sɔri ndə̀ʼ məd, ya wə̀d ne mbə kə̀bə̀. Mbə̀ gwiye aməd niŋ ghò taŋ kyèʼì.”
45Anyumə̀ ne Judàs ya pe, wì ya chè ghò abɔ̀ʼ Yeso kwà ati ati pè gha, “Àchwitìnùg!” Wì ya ghà ane sɔ̀ri ndə̀ʼ abə Yeso. 46Bəd mbe ne ya yaʼi tì məd ya gwì Yeso taŋ nyìmi. 47Wə̀d mɔ̀ʼɔ abɔ̀ʼ bəd mbe ne ya təmi iban ya chɔʼ ibeg ibid, kwa àtɔ̀ŋi abə wə̀d àfàʼì we atog wə̀d igun bəd mbàn Ŋwiye. 48Yeso ya ghà inɔb gha, “Mbə si yèʼe ni gwì amə tì tibeg ibid fɔrɔ tìmbàŋì icheg ni gha mo ya iji ka. 49Mə ya yaʼ tì inən chwìti inug inga mbàn Ŋwiye ineg ijìm. Anyumə̀ we chəyi mbə̀ ya gwi amə. Si ya gha, anug ze ne mbi ya ŋwàʼri inga Àŋwàʼrì Ŋwiye mənyìʼ dù ane tesiʼ.” 50Anyumə̀ ne wì ya gha ane, mə̀mə̀nənùg mbe məjìm ya sàŋì aməd nòrò awɔb.
51Ajɔŋ mɔ̀ʼɔ ne ya nibi məyi abo ndwi linèn yaya bène abɔ̀ʼ Yeso. Anyumə̀ ne mbi ya kə̀bi ni gwì aməd, 52wì ya sàŋì abo ndwi linèn ze, nòrò yi tì ìkyèri ikye.
Mbi ya niŋ Yeso ghò imbìghè abə bəd ne sàʼa aben
(Mat 26:57-68; Lug 22:54-55,63-71; Jɔn 18:13-14,19-24)
53Mbi ya niŋ Yeso ghò abə atog wə̀d igun bəd mbàn Ŋwiye. Itog bəd mbàn Ŋwiye məjìm tì bəd kyen mbe inga aben fɔrɔ mə̀chwitì mə̀nɔ̀ʼɔ̀ ya fə fete angu. 54Pità ya beni abɔ̀ʼ məd, si ya gha, chəyi wì yaya yḛ̀ kwàʼ ibo anjìm. Wì ya nyi inga ikam abə atog wə̀d igun bəd mbàn Ŋwiye we, si chughi tì sogyì mbe ne nə̀ngə mbàn Ŋwiye ni zɔ iywid. 55Itog bəd mbàn Ŋwiye tì bəd ne sàʼa aben məjìm ya ko se kə̀bə̀ bəd ne biri zì inug igun atog abə Yeso ni gha mbe zweti aməd. Mbi yaya kə̀bə̀ ane si ya gha chəyi mbi ya bàd wə̀d mɔ̀ʼɔ. 56Bəd nɔʼ nɔʼ ya ghà inug ako igun məd, si ya gha, chəyi inug mbe ne mbi yaya ghà ya gwi mənib. 57Bəd mɔ̀ʼɔ ya nɔ̀ʼ təm titighe ghà inug ako igun məd gha, 58“Tì ya zug we ghà gha, ‹Mə biri sàʼ Mbàn Ŋwiye ìzo̰ ne mbi bɔmi ane ibo, ywìrì niŋ ineg itad kɔd ìzi ndəŋ ne kayi mbi bɔmi ane ibo.›” 59Ka mbi ya bì ghà inug mbe ane, chəyi inug mbe ne mbi yaya ghà ya gwi mənib.
60Anyumə̀ ne atog wə̀d igun bəd mbàn Ŋwiye ya zughi inug mbe, wì ya nɔ̀ʼ titighe inɔb imbìghè, si bìri abə Yeso gha, “Chəyi àghò beri anug mɔ̀ʼɔ ni ywìtì? Inug mbo̰ ne mbi gha igun ine àkə kwàʼ inug tesiʼ?”
61Yeso ya chim tizi. Chəyi wì ya ywìti anug mɔ̀ʼɔ. Ane, atog wə̀d igun bəd mbàn Ŋwiye ya ywìrì bìri ibo gha, “Àghò wa kə Wə̀d we ne Ŋwiye zɔ̀ʼi, ne bə̀ yaʼ Ŋwan Ŋwiye we ne bəd mbe ghùmnə?”
62Yeso ya ywìtì gha, “Mo ya ìwiwən. Ane, mbə̰ biri bàd Ŋwan Wə̀d ne chughi aba abo jəghi Ŋwiye ne beri ika ijìm, bə̀ bàd icheg ne we swìʼe ikaŋ àbɔ̀ŋɔ inga pàʼ.”
63Anyumə̀ ne wì ya gha ane, atog wə̀d igun bəd mbàn Ŋwiye we ya nyimi ìti ndwi sètì, gha, “Tì kə ywìrè kə̀bə̀ bəd ndəŋ ni ghàm imbə̀ʼ aghə? 64Mbə̰ fə zug icheg ne wì zɔ̀mbi Ŋwiye. Isɔb anug ne mbə̀ nìŋə àkə gha?”
Mbɔb məjìm ya gha ze kòʼ gha mbe zwete Yeso. 65Bəd mɔ̀ʼɔ ya ko se ched timad igun məd. Mbi ya bə̀ kɔd aghə məd, kɔ̀m aməd ane abo, si ghà ibo gha, “Mə̀ti wə̀d ne kɔ̀mi awe!” Bəd mbe ne nə̀ngə mbàn Ŋwiye ya bə̀ niŋ aməd sɔm.
Pità ya to̰ yi Yeso
(Mat 26:69-75; Lug 22:56-62; Jɔn 18:15-18,25-27)
66Anyumə̀ ne Pità ya chughi inga ikam we aba ze aba chɔ̀ŋɔ, ŋwan àyi mɔ̀ʼɔ abɔ̀ʼ bəd àfàʼì ìmbi atog wə̀d igun bəd mbàn Ŋwiye ya ghò a asiŋi ze ne wì ya yaʼi angu. 67Anyumə̀ ne wì ya bàd Pità we zɔ iywid, wì ya nèn aməd kwàʼ inga aghə, ghà ibo gha, “Àghò bə, we kə̀ tì Yeso we a Nazarèd.”
68Si ya gha, Pità ya to̰ yi gha, “Chəyi mə̀ kyeri aməd. Chəyi mə̀ bi kyeri anug ne àghò ghà.” Anyumə̀ ne wì ya gha ane, wì ya nɔ̀ʼ ghò ichug ikam. [Kwàʼ ati ati, inɔm ngub ya tɔŋ.]
69Anyumə̀ ne ŋwan àyi we ya bàri aməd angu, wì ywìrì ko ghàm abə bəd mbe ne ya təmi iban gha, “Wə̀d gho̰ ya wə̀d mɔ̀ʼɔ abɔ̀ʼ mə̀mə̀nənùg Yeso!” 70Pità ya bə̀ ywìrì to̰ yi .
Amad ya to zɔ̀mbi, bəd mbe ne ya təmbi iban ya ghà abə Pità gha, “À ya anug tesiʼ gha àghò ya wə̀d mɔ̀ʼɔ abɔ̀ʼ mə̀mə̀nənùg mbe imbə̀ʼ icheg ne àghò nɔ̀ʼ a Galìli.”
71Pità ya zug ane, ko zɔ̀m ìwi nyɔd bə̀ ko kà̰ yi gha, “Chəyi mə̀ kyeri wə̀d ne mbə̰ ghà imbə̀ʼ aməd.”
72Kwàʼ ati ati, inɔm ngub ya ywìrì tɔŋ ane ighəm ni pè ane abe. Anyumə̀ we, Pità ya kɔndi ìngam we ne Yeso ya ghà ibo gha, “Bɔŋ inɔm ngub se tɔ̀ŋɔ aghəm abe, àghò biri fə to̰ awe mə aghəm atad.” Wì ya kɔndi ane, nə̀ŋə̀, chwḛ məsi.
Nke Ahọpụtara Ugbu A:
Mag 14: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL