Lug 5
5
Yeso kàrì mə̀mə̀nənùg mbègtog
(Mat 4:18-22; Mag 1:16-20)
1Aneg mɔ̀ʼɔ, icheg ne Yeso ya təmi iban atəŋ kyen ze a Gènesarèd, inɔ̰ bəd ya yeʼe se tḭ tḭ iban məd ni zug Ìngam Ŋwiye. 2Məd ya bàd ibaŋ igyi ibe iban atəŋ ze. À ya bəd mbe ne yaya gwìyè su ya nɔŋi ibaŋ igyi mbe dù ghò chùghi ghì sò ìtɔb kyə̀. 3Yeso ya nyi inga abaŋ igyi àze Sayimùn ghà ibo gha wì tḭ nyi inga atəŋ iki piʼì. Wì ya chughi inga abaŋ igyi ze se chwìte inug abə inɔ̰ bəd we.
4Anyumə̀ ne wì ya màni ni ghàm, wì ya ghà abə Sayimùn Pità gha, “Tindi abaŋ igyi azo̰ inga atəŋ, màʼ kyə̀, gwì su.”
5Sayimùn Pità ya ywìtì gha, “Masà, tì neghi neghi ni fàʼ chəyi tì gwi su ka imɔʼ. Icheg ne à ya àghò gha mə ywirì màʼ kyə̀, mə biri màʼ.” 6Anyumə̀ ne mbi ya màʼi ìtɔb kyə̀ igyi, mbi ya gwì su nɔʼ nɔʼ, ìtɔb kyə̀ se kə̀bə̀ ni təndə. 7Mbi ya nəpi mə̀mbin inga àzin tì abaŋ igyi gha mbe yeʼe wètì awɔb. Mbi ya ghò chì su ti sweg inga ibaŋ igyi mbe ibe. Ibaŋ igyi mbe ya nìd se kə̀bə̀ ni nyi aton igyi. 8Anyumə̀ ne Sayimùn Pità ya bàri anug azo̰, wì ya chìndì itog inwḭ aseg imbìghè abə Yeso, si ghà ibo gha, “Anɔŋisəg, nɔ̀ʼɔ awe iban inum imbə̀ʼ icheg ne mo ya wə̀d inug tibɔ̀ŋ.”
9Wì ya ghà ane imbə̀ʼ icheg ne, anug ya chè aməd tì mə̀sə̀ʼ məd imbə̀ʼ inun su ne mbɔb ya gwi. 10Anug ze ya chè Jem tì Jɔn, bɔn ìmbi Zebedì ne yaya fàʼà tì Sayimùn. Yeso ya ghà abə Sayimùn gha, “Imbə̀ʼ àghò bɔ awe, ni ko tèchɔ̀ŋ se ghò imbìghè, àghò biri se ghìyə̀ gha bəd se yèʼe abɔ̀ʼ inum.”
11Anyumə̀ ne mbi ya chi ìmbɔb ibaŋ igyi inga igyi ijìm chà asaŋ, mbi ya sàŋì ighi ijìm si bèni abɔ̀ʼ Yeso.
Yeso ghù wə̀d àwàrikə̀m
(Mat 8:1-4; Mag 1:40-45)
12Anyumə̀ ne Yeso ya yaʼi inga aben mɔ̀ʼɔ, wə̀d aghɔn àwàrikə̀m mɔ̀ʼɔ ya yeʼe. Anyumə̀ ne wì ya bàra Yeso, wì ya gùg ibo imbìghè boʼ ibo ibo gha, “Anɔŋisəg, ze mə̀ bɔ̀ŋ ine ghùyə mə, mə̀ zen.” 13Yeso ya sèm abo bètì aməd gha, “E! Ze bɔ̀ŋ inum gha àghò bɔti, zen.” Kwàʼ anyumə̀ we, àwàrikə̀m ze ya mèg igun wə̀d we. 14Yeso ya pati aməd gha, “Imbə̀ʼ àghò gha awe anug ne du abə wə̀d mɔ̀ʼɔ. Ane, ndò chwi ìwe nyɔd abə wə̀d mbàn Ŋwiye, nàʼ ighi àfàtì icheg ne mə̀nɔ̀ʼɔ̀ Muse gha, ni chwi aneni gha, àwàrikə̀m igun ìwe nyɔd fə mèg.”
15Wì ya pati aməd ane, si ya gha, bəd ya ywìrì taŋ chètì inug imbə̀ʼ Yeso isiŋi ijìm. Tinɔ̰ bəd nɔʼ nɔʼ ya fete ni zug inug ne wì yaya ghàmà fɔrɔ ni gha wì bə ghù ìmbɔb ighɔn. 16Si ya gha, Yeso yaya kɔ̀ŋɔ̀ anug ni ghò a asiŋi ne chəyi bəd angu ni ghò chàʼra Ŋwiye.
Yeso ghù wə̀d ne buʼrə
(Mat 9:1-8; Mag 2:1-12)
17Aneg mɔ̀ʼɔ, Yeso yaya chwìte inug. mə̀Farìsi fɔrɔ mə̀chwitì mə̀nɔ̀ʼɔ̀ ne ya nɔ̀ʼi a Galìli tì Jùdeyà fɔrɔ a Jèrusalèm ya yaʼ angu ichughi. Ika Anɔŋisəg ya yaʼ igun Yeso ni ghù bəd aghɔn. 18Kwàʼ anyumə̀ we, bəd mɔ̀ʼɔ ya bèʼì wə̀d ne buʼrə igun abaʼ məd ghò kə̀b inɔnjì ni nɔ̀ŋì aməd imbìghè abə Yeso tèkan. 19Chəyi mbɔb ya beri apan ni nyi nɔ̀ŋì wə̀d we imbìghè abə Yeso imbə̀ʼ inɔ̰ bəd we ne ya yaʼi angu. Ane, mbɔb ya si kɔʼ igun idɔm nəb tòʼ ibighi si swi wə̀d we igun abaʼ məd chà inga fìghàra bəd imbìghè abə Yeso. 20Anyumə̀ ne Yeso ya bàri icheg ne mbɔb ya beri ibḛfiŋ igun məd, wì gha, “Ìmə sə̀ʼ, mə waʼ ìmbe inug tibɔ̀ŋ.”
21Mə̀chwitì mə̀nɔ̀ʼɔ̀ fɔrɔ mə̀Farìsi ya zug ìngam gho̰ se bìre mbɔb mbɔb gha, “Gho̰ tì wə̀d ne chàpà Ŋwiye àkə we?” Àkə we ne tì wì waʼ inug tibɔ̀ŋ bəd chèyi ane Ŋwiye?
22Yeso ya kyeri ìtɔb tikɔndi, ane bìri inɔb gha, “Aton ne mbə̰ mbe bìre tiku inug ìto̰ inga ìtən fìŋ àkə gha?” 23“Àze ne zami àkə azeg? Àkə inum ni waʼ inug tibɔ̀ŋ wə̀d, kə̀ ni ghì gha wə̀d ne buʼrə nɔʼɔ titighe se yḛ̀?” 24Mə biri chwi inən gha Ŋwan Wə̀d bèrì ika igun isəg ni waʼ inug tibɔ̀ŋ bəd. Ane, wì ya si ghàbri ghà abə wə̀d we ne ya buʼrə gha, “Nɔ̀ʼɔ titighe, kad àze abaʼ ghò ine achan.”
25Kwàʼ ati, wə̀d we gàd nɔ̀ʼ inɔb imbìghè, kad àzi abaʼ se yḛ̀ nè ghùmnə Ŋwiye ghò yi ibo achan. 26Anug ya chè bəd məjìm. Mbi ya bɔ se ghùmnə Ŋwiye gha, “Tè bàd iyeti inug tèchɔ̀ŋ.”
Yeso kàrì Levì
(Mat 9:9-13; Mag 2:13-17)
27Yeso ya nɔ̀ʼ angu, dù isəg bàd wə̀dtag mɔ̀ʼɔ ne ikum məd ya Levì. Wì ya chughi imbìghè nəb ibo asiŋi àfàʼì. Yeso ya ghà ibo gha, “Beni abɔ̀ʼ inum.” 28Levì ya nɔ̀ʼ sàŋì ighi ijìm bèni abɔ̀ʼ məd.
29Levì ya kàʼ iteri kyen abə Yeso ibo inga nəb. Bədtag nɔʼ nɔʼ fɔrɔ bəd ndəŋ yaya jə̀ghə tì inɔb. 30Mə̀Farìsi fɔrɔ mə̀chwitì mə̀nɔ̀ʼɔ̀ ne ya yaʼi inga ìwɔb ikoʼi ya ghàmbì imbə̀ʼ Yeso abə mə̀mə̀nənùg məd gha, “Aton ne mbə̰ mbe jə̀ghə bə̀ no tì bədtag fɔrɔ bəd inug tibɔ̀ŋ àkə gha?”
31Yeso ya ywìtì inɔb gha, bəd ne chəyi mbe ghɔ̰̀, chəyi mbi ya kə̀bə̀ dɔgtà. À ya bəd ne beri ighɔn ya kə̀bə̀ dɔgtà. 32Chəyi mə̀ yeʼe ni kə̀b bəd ne təmi kòʼ. Mə yèʼe ni kə̀b bəd ne ghìyə̀ inug tibɔ̀ŋ gha mbe bəŋi ìtɔb fìŋ sìkì inug tibɔ̀ŋ.
Ibiri imbə̀ʼ anug ni chughi witì jəg
(Mat 9:14-17; Mag 2:18-22)
33Bəd mɔ̀ʼɔ ya ghà abə Yeso gha, “Mə̀mə̀nənùg ìmbi Jɔn yaya chùghə njèg chàʼrà Ŋwiye. Mə̀mə̀nənùg ìmbi mə̀Farìsi yaya bə̀ ghìyə̀ ane. Àsi ìmbe, mbi ya jə̀ghə bə̀ no awɔb.”
34Yeso ya biri inɔb gha, “Tì mbə̰ ghì gha bəd ne jə̀ghə igən mbe chughi njèg ne mbaʼ igən kiri biri tì inɔb?” 35Ineg mbe yèʼe ne mbi biri niŋ mbaʼ igən ghò. À ya inga ineg mbe ne mbɔb biri chughi njèg.
36Wì ya ghàm ìngam məgri gho̰ inɔb gha, “Chəyi wə̀d mɔ̀ʼɔ ne biri sètì asiŋi ndwi feg ni bandi ndwi anun. Wə̀d mɔ̀ʼɔ mə̀ ghì ane, chəyi asiŋi ndwi feg ze biri bɔ̀ŋ igun ndwi anun. 37Chəyi wə̀d mɔ̀ʼɔ ne biri zì mənoʼ zù inga aghi mənoʼ ne fə beghi. Wə̀d mə ghì ane, nji mənoʼ zù mbe biri zweg aghi mənoʼ ze. Mənoʼ biri tùwə̀ aseg, aghi mənoʼ ze bə̀ bə.” 38Ane, mbi ya zìyè mənoʼ zù inga aghi mənoʼ feg. 39Chəyi wə̀d ne fə no mənoʼ ka ka biri ywiri gyendi ni no mənoʼ zù imbə̀ʼ icheg ne wì biri gha mənoʼ ka bɔ̀ŋ chè mbi zù.
Nke Ahọpụtara Ugbu A:
Lug 5: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL