Lug 11
11
Yeso chwìti icheg ni chàʼra Ŋwiye
(Mat 6:9-13; 7:7-11)
1Aneg mɔ̀ʼɔ, Yeso yaya chàʼrà Ŋwiye asiŋi mɔ̀ʼɔ. Anyumə̀ ne wì ya chàʼra Ŋwiye mànì, àmə̀nənùg məd mɔ̀ʼɔ ya ghà ibo gha, “Anɔŋisəg, chwiti icheg ne mbe chàʼrà Ŋwiye ina icheg ne Jɔn ya bə chwìti abə ìmbi mə̀mə̀nənùg.”
2Yeso ya ghà inɔb gha, “Anyumə̀ ne mbə̰ mbe chàʼrà Ŋwiye, mbə̀ gha gha, ‹Ìwa Mbaʼ, ghìyə gha bəd ghumni ìwe ikum. Àze anug ìfɔ̀n ze yeʼe. 3Nàʼa ighijəg ne koʼi ina igun ineg. 4Waʼ ìmba inug tibɔ̀ŋ icheg ne te bə̀ wàʼa inug tibɔ̀ŋ abə bəd mbe ne bə̀ gùghə̀ inug ina. Imbə̀ʼ àghò bḛ awe gha, àkwàʼrì ne ka nyi igun ina.#11:4 Ìŋwàʼrì mɔ̀ʼɔ yètì gha, àghò chiye awa ikye ibo abə Wə̀d Tibɔ̀ŋ.›”
5Yeso ya ghà abə mə̀mə̀nənùg məd gha, “Mbə̀ niŋ gha, wə̀d mɔ̀ʼɔ abɔ̀ʼ inən ghò inga nəb ìsə̀ʼ məd ane àngɔŋ tizimi pè ghà ibo gha, ‹Ìmə ìsə̀ʼ, chɔʼ chiŋ ngə̀ŋ titad inum. 6Ìmə ìsə̀ʼ mɔ̀ʼɔ ne chè yi che we inum inga nəb. Chəyi mə̀ beri tijəg ni nàʼ ibo.› 7Mbə̀ bə̀ ywìrì niŋ gha, ìsə̀ʼ we ywìtì inga nəb gha, ‹Imbə̀ʼ àghò naʼa awe ngəʼ inum. Mə fə feni ìmə inuʼ akɔŋi. Mo tì ìmbum bɔn fə nɔ̀kì awa. Chəyi mə̀ biri nɔ̀ʼ ni nàʼ aghi mɔ̀ʼɔ ine.› 8Mə ghà inən gha, ka chəyi wì kə̀bi ni nɔ̀ʼ nàʼ aghi mɔ̀ʼɔ ibo, wì mənyìʼ nɔ̀ʼ nàʼ aghi ze ne wì kə̀bi imbə̀ʼ icheg ne ìsə̀ʼ we bèrì fìŋ ni biri ywìrì bìri.
9Ane, mə ghà inən gha, mbə̀ biri, Ŋwiye biri nàʼ inən. Mbə̀ kəbə, Ŋwiye biri ghì mbə bàd. Mbə̀ gɔngi, Ŋwiye biri fìʼì inuʼ nəb inən. 10Tesiʼ ya gha, wə̀d ijìm ne biri, Ŋwiye biri nàʼ ibo. Wə̀d ne kə̀bi, Ŋwiye biri ghì wì bàd. Wə̀d ne gɔngi, Ŋwiye biri fìʼì inuʼ nəb ibo. 11Wə̀d mɔ̀ʼɔ abɔ̀ʼ inən ne ŋwan məd mə biri su ibo, wì nàʼ yaʼ jo awən, àkə we? 12Kə̀, wì mə bìri ibɔm ngub, wì nàʼ yaʼ tìkafoʼ awən, àkə we? 13Mbə̰ bəd inug tibɔ̀ŋ kə mə̀ kyèri icheg ni nàʼ ighi chɔm chɔm abə ìmbən bɔn, mbə̀ si kɔ̀ndi icheg ne Mbaʼ we ikaŋ àbɔ̀ŋɔ biri nàʼ Azwighi Ŋwiye abə bəd mbe ne bìre ibo.”
Bəd mɔ̀ʼɔ gha, à ya Bezebɔ̀b we nàʼà ika abə Yeso
(Mat 12:22-30; Mag 3:20-27)
14Yeso ya chì azwighi tibɔ̀ŋ inga wə̀d mɔ̀ʼɔ ne chəyi wì yaya ghàmà. Anyumə̀ ne azwighi tibɔ̀ŋ ze ya du inga wə̀d we, wì ya ko se ghàmà. Anug ya chè inɔ̰ bəd we ne ya yaʼi angu. 15Si ya gha, bəd mɔ̀ʼɔ ya gha, à ya Bezebɔ̀b ne yaʼi ifɔn izwighi tibɔ̀ŋ we nàʼà ika abə Yeso gha wì se chìyè izwighi tibɔ̀ŋ inga bəd.
16Bəd mɔ̀ʼɔ ya kwàʼrì Yeso. Mbi ya gha wì faʼa ayeti anug ni chwi gha, à ya Ŋwiye nàʼi ika ibo. 17Yeso ya kyeri ìtɔb tikɔndi. Ane, wì ya nɔ̀ʼ gha, “Aben ne ghapa se zɔ̀ŋɔ̀ mbɔb mbɔb, ze biri nim. Bəd inga inəbi ifibì mə̀ bə̀ ko se zɔ̀ŋɔ̀ mbɔb mbɔb, kyeri gha, inəbi we biri ghàpà. 18Ane, anug ìfɔ̀n Sàtàn kə mə̀ ghàpà akoʼi akoʼi se zɔ̀ŋɔ̀ awɔb mbɔb mbɔb, ze kə bə si təm kà iye? Mbə̰ gha, à ya Bezebɔ̀b we nàʼà ika inum ni chì izwighi tibɔ̀ŋ inga bəd. 19Mbə̀ kə gha, à ya Bezebɔ̀b we nàʼà ika inum ni chì izwighi tibɔ̀ŋ inga bəd, àkə we we bə̀ nàʼà ika abə ìmbən mə̀mə̀nənùg ni bə chì izwighi tibɔ̀ŋ inga bəd? Ìmbən mə̀mə̀nənùg ya bəd ne chwi gha mbə̰ ya bəd inug ako. 20Àmə yaʼ aghi ne mə̀ ya chìyè izwighi tibɔ̀ŋ ane ika ne Ŋwiye nàʼi inum, àze chwi gha, anug ìfɔ̀n Ŋwiye fə yeʼe se abɔ̀ʼ inən. 21Inɔm mbaŋà ne beri aziŋ bə̀ bèrì ighi ibid ijìm mə̀ ya kyèʼrè àzi achan, chəyi aghi məd mɔ̀ʼɔ ze nìme. 22Si ya gha, inɔm mbaŋà ndəŋ ni beri ika chè aməd mə zɔ̀ŋ chè aməd, wì ya nìŋə ighi ibid məd mbe ne wì zi ìzi fìŋ igun, bə̀ ghàpì ighi mbe ne wì ya ghum pàŋì.
23Wə̀d ne chəyi wì ya zɔ̀ŋɔ̀ amə, tengàŋ we abɔ̀ʼ inum. Wə̀d ne chəyi we tàʼà, tengàŋ we wètè ni feti.”
Azwighi tibɔ̀ŋ ne bəndi
(Mat 12:43-45)
24Yeso ya chè imbìghè gha, “Azwighi tibɔ̀ŋ ya mə̀ dù inga wə̀d, ze ya ghò kə̀b asiŋi ni chughi inga isiŋi zɔbi ijìm. Ze mə̀ kə̀b asiŋi ni chughi tèkan, ze ya gha, ‹Mə biri bə̀ndì ghò inga nəb ze ne mə̀ ya du inga.› 25Ze mə̀ yèʼe pè bàd nəb ze ne mbi fə zə bə̀ tàngi icheg chɔm, 26ze ya ghò niŋ izwighi tibɔ̀ŋ ndəŋ ìsàmbe ne ka chè aməd. Izwighi tibɔ̀ŋ mbe ijìm si yèʼe nyi chùghi inga nəb ze. Anyumə̀ ne mbi bəndi yèʼe nyi inga wə̀d we, tengàŋ biri bə chè icheg ne wì ya bi yaʼ a mbègtog.”
Àbɔrɔ̀bɔd tesiʼ
27Icheg ne Yeso yaya ghà inug mbe, àyi mɔ̀ʼɔ ne ya yaʼi inga inɔ̰ bəd ya ghàm ane gì ka ka gha, “Ŋwiye zì àbɔrɔ̀bɔd igun àyi we ne ya gwi awe bə̀ nèg awe.”
28Yeso ya ywìtì gha, “Ŋwiye zì àbɔrɔ̀bɔd yaʼ igun wə̀d we ne zùghə Ìngam Ŋwiye bə̀ ghìyə̀ inug mbe ne we ghà.”
Bəd ya kə̀bə̀ iyeti inug
(Mat 12:38-42)
29Icheg ne inɔ̰ bəd we yaya yètè, Yeso ya chè imbìghè ni gha, “Aŋa ya ikəri bəd tibɔ̀ŋ. Mbi ya kə̀bə̀ ni bàd ayeti anug. Ane, chəyi aneni ndəŋ ne mə̀ biri chwi inɔb chèyi ane ayeti anug ne ya du abə Jonà. 30Kwàʼ icheg ne Jonà ya yaʼi aneni abə bəd mbe a Ninivè, à ya bə̀ icheg ne Ŋwan Wə̀d biri bə yaʼ aneni abə ikəri bəd gho̰. 31Igun aneg ze ne Ŋwiye biri saʼ bəd, ifɔn àyi we a Sebà biri nɔ̀ʼ zì isaʼi igun ikəri bəd gho̰ imbə̀ʼ icheg ne, məd ya nɔ̀ʼ kwàʼ ibo aben yèʼe ni zug iwe ne ifɔn Solomùn yaya ghàmà. Mə gha tesiʼ inən gha, wə̀d mɔ̀ʼɔ ne che Solomùn we aŋa. 32Igun aneg ze ne Ŋwiye biri saʼ bəd, bəd mbe a Ninivè biri nɔ̀ʼ zì isaʼi igun ikəri bəd gho̰ imbə̀ʼ icheg ne, mbi ya to̰ awɔb inug tibɔ̀ŋ anyumə̀ ne Jonà ya ghàmi Ìngam Ŋwiye inɔb. Mə gha tesiʼ inən gha, wə̀d mɔ̀ʼɔ ne che Jonà we aŋa.”
Ighə ya anam abə nyàmnyɔd
(Mat 5:15; 6:22-23)
33Yeso ya ywìrì chè imbìghè gha, “Chəyi wə̀d mɔ̀ʼɔ ne che anam nə̀mə̀, kə kùbrə aton akwighe. Mbi ya che anam nɔ̀ŋɔ̀ asaŋ, imbə̀ʼ bəd ya bàrà isiŋi anyumə̀ ne mbi nyi inga nəb. 34Ìwe ighə ya anam abə ìze nyàmnyɔd. Àze aghə mə̀ yaʼ icheg chɔm, ìze nyàmnyɔd biri bèrì ìzḛzḛ. Àsi ne chəyi àze aghə yaʼi icheg chɔm, ìze nyàmnyɔd ijìm biri yaʼ afub. 35Mbə̀ kirə ika ni gha, imbə̀ʼ ìzḛzḛ we ne yaʼi inga inən si nɔ̀ʼ bə̀ŋə̀ ane afub. 36Ane, ìze nyàmnyɔd ijìm mə yaʼ inga ìzḛzḛ ne chəyi aba mɔ̀ʼɔ ne yaʼi inga afub, nji ìze nyàmnyɔd ijìm biri yaʼ inga ìzḛzḛ icheg ne anam ya ghìyə̀ isiŋi zḛ inən.”
Ngəʼ kyen biri nyi igun mə̀Farìsi tì mə̀chwitì mə̀nɔ̀ʼɔ̀
(Mat 23:1-36; Mag 12:38-40)
37Anyumə̀ ne Yeso ya ghàmi mànì, Farìsi mɔ̀ʼɔ ya kàʼ aməd gha wì yeʼe mbɔb jəg. Yeso ya ghò nyi ibo inga nəb, pè chùghi aseg ni jəg. 38Anug ya chè Farìsi we anyumə̀ ne wì ya bàri gha Yeso we jə̀ghə witì wì so ibo icheg ne ìmbɔb mə̀nɔ̀ʼɔ̀ chwi. 39Anɔŋisəg ya si ghà ibo gha, “Mbə̰ mə̀Farìsi ya sò ìtən itoʼ fɔrɔ ìmbən ikaŋ anjìm isəg. Si ya gha, inug tibɔ̀ŋ fɔrɔ inug izəg sweg inən inga fìŋ. 40Inen icheg inən! Chəyi mbə̀ kyeri gha, wə̀d we ne tangi njìm isəg, à ya məd bə tàngi njìm inga? 41Ane, mbə̀ naʼa ighi ijìm ne yaʼi inga ìtən itoʼ fɔrɔ inga ìmbən ikaŋ abə bəd ne chəyi àzɔb. Mbə̰ mə̀ ghì ane, ìmbən ighi ijìm biri si zen icheg ne mə̀nɔ̀ʼɔ̀ chwi.
42Ngəʼ kyen biri nyi igun inən, mbə̰ mə̀Farìsi imbə̀ʼ icheg ne, mbə̰ mbe nàʼà aba amɔʼ inga iba ìghum abə Ŋwiye ane ighi a mben icheg; agyen jəghi fɔrɔ ane titeti ijìm icheg finɔm tì ateti tì aku agyen jəghi ndəŋ ajìm. Si ya gha, mbə̰ fə waʼ icheg ni ghì inug ne koʼi. Chəyi mbə̰ mbe bə̀ kɔ̀ŋɔ̀ Ŋwiye. Aŋa ya abɔ̀ʼ ighi ne mbə̀ koʼi ni fàʼ bə̀ kiri nàʼ aghi amɔʼ inga iba ìghum. 43Ngəʼ kyen biri nyi igun inən, mbə̰ mə̀Farìsi imbə̀ʼ icheg ne, mbə kɔ̀ŋ ni chughi igun itən bəd kyen inga ichamì Ŋwiye. Mbə̰ ya bə̀ kɔ̀ŋɔ̀ anug ni gha bəd ya chàʼrà awən ane ighumni inga iywin. 44Ngəʼ kyen biri nyi igun inən imbə̀ʼ icheg ne, mbə̰ ya icheg itog iseg ne chəyi mbi beri ineni. Bəd ya yḛ̀ igun inən ne chəyi mbi kyeri.”
45Àchwitì mə̀nɔ̀ʼɔ̀ mɔ̀ʼɔ ya ywìtì abə Yeso gha, “Àchwitìnùg, inug mbo̰ ne àghò we ghà anìŋ ya àghò we zɔ̀mbɔ̀ awa bə.”
46Yeso ya ywìtì ibo gha, “Ngəʼ kyen biri bə nyi igun inən, mbə̰ mə̀chwitì mə̀nɔ̀ʼɔ̀ imbə̀ʼ icheg ne, mbə̰ mbe zìyè mbèʼ ni nìri igun bəd ne chəyi tì mbi bèʼì. Chəyi mbə̰ mbe bə̀ zìyè abo ni wètì awɔb. 47Ngəʼ kyen biri nyi igun inən imbə̀ʼ icheg ne, mbə bɔm itog iseg chɔm abə bədkə̀n Ŋwiye mbe ne ìmbən mə̀mbaʼ aneg ya zweti. 48Aŋa ya ni chwi gha, mbə̰ bḛ àzən aghi gha, ìmbən mə̀mbaʼ aneg ya fàʼ anug chɔm, bə̀ chwi gha, mbə̰ kɔ̀ŋ anug ze ne ìmbən mə̀mbaʼ aneg ya ghi. Mbɔb ya zweti bədkə̀n Ŋwiye, mbə̰ si bɔm ìmbɔb itog isèg. 49Ŋwiye ya fə we yi ni ghà imbə̀ʼ anug azo̰ gha, ‹Mə biri chà bədkə̀n tì bədtɔm inɔb. Mbi biri zweti ìmbi mɔ̀ʼɔ bə̀ chɔʼ ibɔʼì ighog abə mə̀mbin.› 50Ane, Ŋwiye biri biri anəm ze bədkə̀n məd məjìm mbe ne mbi ya zweti, nɔ̀ʼ ane isəg ya ko pè ane ikəri bəd gho̰. 51Ane, anəm ze biri ko kwàʼ ane àzi Abè ghò pè ane àze Zàkàriyà we ne mbi ya zweti kwàʼ inga ìsàn ikwijə̀ŋ àfàtì tì asiŋi zḛ zḛ. E! Mə ghà inən gha, anəm ze biri yaʼ igun atog abə ikəri bəd gho̰.
52Ngəʼ kyen biri nyi igun inən mbə̰ mə̀chwitì mə̀nɔ̀ʼɔ̀ imbə̀ʼ icheg ne mbə̰ ya icheg mbì ngɔb gwi inuʼ akad. Mbə nyìmi afeni, chəyi mbə nyḭ̀yḛ inga nəb ni bèrì iwe. Chəyi mbə̰ mbe bə̀ sàŋà gha bəd ndəŋ nyi bèrì iwe.”
53Anyumə̀ ne Yeso ya nɔ̀ʼi asiŋi ze, mə̀Farìsi tì mə̀chwitì mə̀nɔ̀ʼɔ̀ ya ko tàŋì inug mbe ne məd yaya ghà. Mbi ya biri inug ndan ndàn ni swèghì aməd. 54Inug mbo̰ yaya itam ni swèkì aməd gha wì ghàmà anug mɔ̀ʼɔ ne chəyi ze koʼi, mbi si chè igun gwì aməd.
Nke Ahọpụtara Ugbu A:
Lug 11: MBTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019 CABTAL