एहुना 21
21
ईसू आँयग चेलाकू एचेरेय एचे ञेलनेना
1हना तयोमरे ईसू तिबिरियास समुंदर#21:1 गलील हुडिंग समुंदरराः एटाः ञाव दोहोना तिबिरियास। धरीरे चेलाकू मड़ंगरेय एचे ञेलयान। अरू हाँय नाःआ इयाय एचे ञेलनेना। 2सिमोन पतरस, दिदिमूस माःआनकू कतावाया हाँयग तोमा, गलील छतरराः काना सहररीग नतनएल, जबदीरिकिनाः बेटाकिन, अरू बार होड़ एटाः चेलाकिन हों मिनीरेकू जुमावनेना। 3दो सिमोन पतरस हँकू एचेरेय कतातेड, “ईंग हकूकू दाः लगायिंग सलाःतना।”
दो हँकू कतातेड, “अले हों आम सुदाले सेनता।” हनते हँकू सेनेडखन हकूकू दाः लगा डोंगारेकू दुड़ुःयान। मनदो हना रइत हँकू मीटोंगीग हों मेनेरकू दाः अवेगाडकू।
4अनंगुः मेला ईसू समुंदर धरीरेय सेने चड़ाँनेना। मनदो हँकुःआ चेलाकू नाँय ईसू हवे माःआन मेरकू सिनहा अवेगडीग।
5दो ईसू हँकूय होंबोरतेड, “ने बोपोहकूतिंग, अपे एचेरे तुमिन हकूकू इदा?”
दो हँकू कतातेड, “मीटोंगीग हों कोवान।”
6दो हाँय हँकूय कतावाड, “डोंगाराः खउना गतर जालपे तेकेगोड, दो अपे तोनोंग मिनपे पवाःता।” हँकू हनन इया जालकू तेकेगोतेड। दो मुरुक हकूकू दाःयान अरू हना अते हँकू जाल मेरकू ओर अवेगेःआ।
7दो ईसू मुरुके दुलारगेया हाँयग चेला, पतरस एचेरेय कतातेरा, “नाँय दो परबू हवे, माःआन।” हनमेला डेंड़लेय दोहोना हाँयग सिमोन पतरस नाःआ कताय अयूमतेरा दो, आँयगराः सेरमोराः सोनहे तुसिंगतेडखन दाःरेय डेगा बोलोयान। 8हना डोंगा समुंदर धरीराः लेसान अंदांजरे मी सव गाजरे दोहोना अरू एटाः चेलाकू डोंगारे हकूकू ओर ओरकू अगूतेडकुःआ। 9हँकू धरीरेकू उतरावनेन दो हंडा हकूकू रपाःतो अरू रुटी लाडतोकू ञेलतेरा।
10दो ईसू हँकू एचेरेय कतातेरा, “अपे नुँहूपे साबकेडकुःआ हँकुःआ हकूकू अते अदोमकू अगूकूपे।”
11दो सिमोन पतरस डोंगारे देगनेनखन मी सव तिरपनगोटोंग मरंग मरंग हकूकू जालरे पेरेगतोय ओर उडुंगतेडकुःआ। नाःआमिन हकूकू दोहोना हों हना जाल मेर हिराःगान।
12हनते ईसू हँकू एचेरेय कताया, “दबूपे नसतान गो।” हँकू सुनुदीगोतेडकू नाँय परबू हवे। मनदो, आम इये हवे माःआनकू होंबरे लगा हँकुःआ चेलाकू अते तोनोंगीग मेरकू डीड़गाड। 13ईसू हँकू लगा रुटी अरू हकूकूय हटिंगवातेडकुःआ।
14नाःआ इया ईसू गोएगतो अते जियाव रेमनेनखन चेलाकू एचेरे पेय तुरहाय एचे ञेलनेना।
ईसू अरू पतरस
15हँकू जोम उरियावनेन दो ईसू सिमोन पतरस एचेरेय होंबोरतेरा, “ने एहुनारीग बेटात सिमोन, आम नँकुःआ होड़कू अते ईंग बगराम दुलारगींगता जा?”
दो हाँय ईसू एचेरेय कतातेड, “हाव परबू, आम सुदीयतना ईंग आमिंग दुलारतना।”
दो ईसू कतातेड, “ईंगरिकुःआ भेड़ाकू सराव हड़ाःकूमे।”
16ईसू हाँय एचेरे अरूय कतातेरा, “ने एहुनारीग बेटात सिमोन, आम ईंगमे दुलारगींगता जा?”
दो सिमोन ईसू एचेरेय कतातेड, “हाव परबू, आम सुदीयतना ईंग आमिंग दुलारतना।”
दो ईसू कतातेड, “ईंगरिकुःआ भेड़ाकू तिहा हड़ाःकूमे।”
17दो ईसू पेय तुरहा हाँय एचेरेय कतातेड, “ने एहुनारीग बेटात सिमोन, आम ईंगमे दुलारगींगता जा?”
ईसू हाँय एचेरे पेय तुरहाय होंबोरतेरा, आम ईंगमे दुलारगींगता जा, माःआन। हनालगा पतरसराः जीव मुरुक हुडिंगयान। अरू हाँय कतातेड, “परबू आम दो जमा बरानाःम सुदीयता अरू आम सुसुदीतना ईंग आमिंग दुलारतना।”
दो ईसू कतातेड, “ईंगरिकुःआ भेड़ाकू सराव हड़ाःकूमे। 18आम ईंगमे अयूम! आम डिंघाम दोहोन मेला अनम सपड़ावकियानखन आम चहाःआ हनन अगीम सेना। मनदो आम डोकरान दो आम तिःईम लंबावता अरू तोनोंगीग एटाः होड़ आम सपड़ावकेडमेखन आम सेन लगा मेरेम चहाःता हना अगी आमकू गोःयामता।” 19(पतरस आँयगराः गुजुःते#21:19 होड़कू बिसवासगेतना परतसराः गुजुः नाःआ इया होयानेना। हातपात होड़कू पतरस कुरूसरेकू ठोंकाव गोएगतिरिया अरू हाँयराः गुजुःते हाँय भगवाने मान मरजइततेरा। करा इया भगवाने मान मरजइतता, हना उदुःगे लगा नाःआ इया ईसू कतातेरा।)
हनते ईसू पतरस एचेरेय कतातेरा, “ईंग दूरमे सनालावगोड ञवन।”
ईसू अरू दुलारीग चेला
20हनते पतरस उलटावनेनखने ञेला दो ईसू मुरुके दुलारगेया, हाँयग चेला आँयगराः तयोम तयोम वेगतोय ञेलतिरिया। (हनाँयग चेला मड़ंगरे बियाड़ी जोम मेला ईसूराः कुड़ोम अगी तेंदारनेनखने होंबरेःआ, ने परबू, इये आमे एचे साबमेता, माःआन।)
21पतरस हाँय ञेलतेडखन ईसू एचेरेय होंबरेःआ, “ने परबू, दो नाँय करा इयाय गुजुःता?”
22दो ईसू हाँय एचेरेय कतातेड, “नाँय ईंग कुदा वेग वरी जिनियते दोहोन लगायिंग चहाः दो आम लगा चिला होयाःता? मनदो आम ईंग दूरमे सनालावगोड ञवन।”
23नाःआ कता बिसवासी होड़कू एचेरे सितरावयान, नाँयग चेला ओरोय गोएगनेना, माःआन। ईसू हाँय बदीरे मेरेय कतागाड, ओरोय गोएगनेना, माःआन। मनदो ईंग कुदा वेग वरी जिनियते दोहोन लगायिंग चहाः दो आम लगा चिला होयाःता, माःआने कतातेरा।
24नाःआ कताकून बदीरे हिदइते उदुःकेरा अरू नाःआ कताकूने ओजाःकेरा हाँयग चेला ननाँय हवे। अबू सुदीयतना हाँय ओजाःकेरा हना जमाकून सताय हवे।
25नाःआ कागदरे ओजाःतो अते अरू मुरुक बगरा बुताकून ईसू एचेतेरा। हना जमा मेमेडटोंग मेमेडटोंग ओजाःकेः दो, ईंग ओंगलेतना हना कागदकून नाःआ जमा चउंदीसरे हों ओरो सयोबकुःआ।
Nke Ahọpụtara Ugbu A:
एहुना 21: kfp
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active) Wycliffe Bible Translators, Inc. All rights reserved.