एहुना 20
20
ईसू गोएगतो अतेय जियाव रेमकिया
(मती 28:1-8; मरकूस 16:1-8; लूका 24:1-12)
1हपताराः मड़ंग एतवार दिनरे, आंग फइड़साःआ मेला, मगदलियायिन मरियम हना मड़गटरेय सेनेडा अरू लात दुवारराः दिरि, चलाःतोय ञेलतेरा। 2दो हाँय बतकाव सेनेडखन सिमोन पतरस अरू ईसू मुरुके दुलारगेया हाँयग चेला#20:2 ईसू मुरुके दुलारगेया हाँयग चेला नंडा नाःआ कागद ओजाःतेरा हाँयग एहुना अनँयग बदीरेय कतायतना।, हँकिन एचेरेय कता उदुःतेरा, “ने वगीयाकिन, तोनोंगीग परबू ईसूराः मुरदा हना लात अते उडुंगकेडखने गोःयडा अरू अले मेरले सुसुदीतना, हना करेय मंडावगोतेडा।”
3दो पतरस अरू हाँयग एटाः चेला लात अगी तोराकिन। 4हँकिन बना होड़किन बतकाव सेनेडा। मनदो हाँयग एटाः चेला पतरस अते मड़ंग, लातरेय सोदोरनेना। 5अरू हाँय बंगानेनखने कोबोःतेरा दो, लातरे सोनहे एकला दोहोना। हनते हों हाँय मेरेय बोलोगान। 6हना तयोमते सिमोन पतरस सोदोरनेन अरू लातरेय बोलोयान अरू सोनहे एकलाय ञेलतेरा। 7अरू ईसूराः बोःरे तोल पतात दोहोना, हना कफन सेतरा, कफन सोनहे अते एटाःरे मोड़हावकेडखन मंडावतोय ञेलतेरा। 8हना तयोमरे मड़ंगरेय सोदोरनेना हाँयग चेला हों लात पेंदारेय बोलोयान अरू ञेलतेडखने बिसवासतेरा। 9(ईसू गोएगतो अतेय जियाव रिमुःता हना कता भगवानराः कागद अते हँकिनाः होड़किन हना वरी मेरकिन सुदी अवेगाड।) 10हनते हँकिनाः चेलाकिन ओड़ाः अगीकिन कुदायान।
मगदलियायिन मरियम एचेरे ईसू एचे ञेलनेना
(मती 28:9-10; मरकूस 16:9-11)
11हनते मरियम हना लात अगीय कुदा सेनेडा अरू हना लातराः बहरी चड़ाँनेनखने इयामा। अरू हाँय इयाम घड़ीन हना लात पेंदा अगी बंगानेनखने ञेला। 12दो हंडा उजड़ सोनहे तुसिंगतो बार होड़ सेरमो देसरिकिनाः बराहीलकिन, ईसूराः मुरदाकू मंडावतेरा हंडा मी होड़ बोः अगी अरू मी होड़ काट अगी दुड़ुःतोकिन दोहोना।
13दो हँकिन हाँय एचेरेकिन होंबोरतेड, “ने दिदी, आम चिला लगाम इयामतना?”
दो हाँय कतातेड, “तोनोंगीग ईंगरीग परबूराः मुरदा तोनोंग होरे गोःयडा, अरू ईंग मेरिंग सुदीयतना हना करेय मंडावगोतेडा।” 14नाःआ इया कतातेडखन तयोम अगीय ञेलतेरा दो ईसू चड़ाँते दोहोना, मनदो नाँय ईसू हवे माःआन मेरेय सिनहा अवेगडीग।
15दो ईसू कतातेड, “ने दिदी, आम चिला लगाम इयामतना अरू इयेम ञामतना?”
बगइचारीग बुता होड़ हवे माःआन ओंगोलकेडखन हाँय कतातेड, “ने साहेब, आम हाँयराः मुरदा करेम इदी अटूडा, ईंग उदुःवायिंगमे दो ईंग सेनेकियानखन हनायिंग गोःयाता।”
16दो ईसू हाँय एचेरेय कताया, “ने मरियम।”
हनते हाँय ईसू अगी उलटावनेनखने कतातेरा, “ने रबूनी!” (इबरानी भासीरे रबूनी लबदराः मतलोब, ने ईंग गुरुजी, माःआन हवे।)
17हनते ईसू कतातेड, “ईंग अपांग भगवान एचेरे अरीनिंग सेना। हनालगा आम ईंग अहम साब रहावकायिंग। मनदो आम ईंगरिकुःआ वपक बोपोहकूतिंग#20:17 वपक बोपोहकूचेलाकू एचेरे सेनेकियानखन हँकू एचेरेम कता उदुःगोड, ईंगरीग अरू अपेरीग अपांग अरू ईंगरीग अरू अपेरीग भगवान एचेरे सेरमोयिंग सलाःतना, माःआन।” 18हनते मगदलियायिन मरियम सेनेकियानखन चेलाकूतेने कता उदुःवातेरा, “ईंग परबूयिंग ञेलतेरा।” हनते हाँय होयानेना हना जमाकून हँकू एचेरेय कता उदुःतेरा।
ईसू चेलाकू एचेरेय एचे ञेलनेना
(मती 28:16-20; मरकूस 16:14-18; लूका 24:36-49)
19हनानाः एतवार दिन सिंगाड़ मेला, चेलाकू एहूदाकूरिकुःआ मूक होड़कूराः बोतोरते ओड़ाःरे सींग रेडतोकू दोहोना। दो ईसू हंडाय वेजेडा अरू हँकू तलारे चड़ाँनेनखने कतावाकुःआ, “भगवान अपेराः जीवे सलसतगे।” 20नाःआ इया कतातेडखन हाँय आँयगराः तिःई अरू पंजर हँकूय उदुःवातेरा। दो हँकू ईसू सिनहातेडखन मुरुककू अहाल-बहालयान।
21दो ईसू अरूय कतातेरा, “भगवान अपेराः जीवे सलसतगे। अपांग ईंगे वारकेरा, हनन इया ईंग अपे होयिंग वारपेतना।” 22नाःआ इया कतातेड तयोमरे हाँय हँकू ओंगतेडखने कताया, “सुद बिरुवा नापे। 23अपे तोनोंगीग होड़राः कसूरपे बराव एंडागोड दो, हाँयराः कसूर भगवान बराव एंडागोडता। मनदो तोनोंगीग होड़राः कसूर अपे मेरपे बराव एंडाय, हाँयराः कसूर भगवान ओरोय बराव एंडातेरा।”#मती 16:19; 18:18
ईसू तोमा एचेरेय एचे ञेलनेना
24मनदो बारहगोटोंग चेलाकू अते मी होड़ दिदिमूस माःआनकू कतावाया हाँयग तोमा, ईसू वेगनेना हनमेला हँकू सुदा मेरेय दोहोगान। 25तयोमरे एटाः चेलाकू हाँय एचेरेकू कतातेड, “अले ईसूले ञेलतेरा।”
मनदो हाँय हँकू एचेरेय कताया, “ईंग हाँयराः तिःईरे काटीराः दुलूयिंग ञेल अरू हना दुलूरे ईंगराः अंगरी मेरिंग सोलोंगे अरू हाँय पंजररे ईंगराः तिःई मेरिंग सोलोंगे वरी ईंग ओरोयिंग बिसवासतेरा।”
26आठ दिन तयोमरे ईसूरिकुःआ चेलाकू ओड़ाः पेंदारेकू दोहोना। अरू हँकू सुदा तोमा होंय दोहोना। हना ओड़ाःराः दुवार सींगतो दोहोना। हननमेला ईसू वेगनेना अरू हँकू तलारे चड़ाँनेनखने कतातेरा, “भगवान अपेराः जीवे सलसतगे।” 27हनते हाँय तोमा एचेरेय कतातेरा, “आमराः अंगरी ईंग तिःईरे सोलोंग सोयमे अरू आमराः तिःई ईंग पंजररेम सोलोंगगे। आम बार जीव ओंगोल होड़ अहम होयाः अरू ईंग एचेरेम बिसवासगे।”
28दो तोमा कतातेड, “ने ईंगरीग परबू अरू भगवान।”
29हनते ईसू हाँय एचेरेय कतातेड, “आम ईंगमे ञेलकेरा, हनालगाम बिसवासकेरा जा? बेगर ञेलतेकू बिसवासगेता हँकुःआ होड़कूराः जीव भगवान ननपायगेता।”
नाःआ कागदराः मतलोब
30ईसू आँयग चेलाकू मड़ंगरे मुरुक बगरा बयाव जुवाः इयाःआ बुताकूने एचेतेरा। मनदो हना जमाकून नाःआ कागदरे ओजाःतो कोवानेःआ। 31मनदो ईसू, भगवानरीग बेटात, मसी हवे माःआन अपे बिसवासगोड ञवन घड़ीन हाँयराः ञावते जीवपे पवाः लगा नाःआ जमा कताकून ओजाःतो इदा।
Nke Ahọpụtara Ugbu A:
एहुना 20: kfp
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© (Active) Wycliffe Bible Translators, Inc. All rights reserved.