Yoosuwa 5
5
1Tikki 'ya Amoorah yooboke maray Ordonuk ayrô-culma le kabut raaqahiyya kee, Kanqaan amoytittey Maditraaniyah badih dariifal tanihiyya takkeemiik YALLI Ordon weeqaytu Israayil mari akak tabam fanah kafsem yoobben. Tohuk gexxaamah kaxxa meysi ken tibbixeeh, niya keenik radde.
GILGALAL YEKKE SALOOTU
2Too saaku YALLI Yoosuwak iyyemii, «Af le xeet bicissa haay, Israayil mara edde salootis» kaak iyye. 3Yoosuwa YALLI kaa akah amrissa hee innah abeeh; «Salot Kooma» deqsita aracal Israayil mara salootise. 4-6YALLI toh akah iyyem, Israayil mari yakkeemiik Masrik yewqe saaku, labha inkih solot keenik luk ten. Sarrak morootom liggida woo bacarih tan baaxol sugen saaku, urru solootiseenih manannon. Too morootom liggidak ellecabot Masrik yewqen saaku qeebi caddo gufte labha Yallih amri cinteemih sabbatah inkih raben. YALLI dumah yan daban ken kaxxa abbobtik, «Siinih aceeyyo» axcuk xagana akah cule baaxoy mango leelwa kee qayso leeh kullim elle taabukehiyya, qeebi caddo gufte labhak, «Sin culi mahaa» 'yaanamal xiibiteh yen. Akah xiibite innah, culi ken mahanna. 7Ken aftok ken xaylo culse. Too mari salot luk mananna'mmay, YALLI Yoosuwak, «Labha salootisa» akah iyyem tohu.
8Salootuk gaba kaleenik sarra, tikki 'ta labha inkih salootuk urtam fan elle yinfiddigen aracal elle yeeden. 9Sarrak YALLI Yoosuwak annah iyye. «A saaku Masril luk sugten qaybik sin kaleh» iyye. Too arac a saaku fan Gilgal deqsita. (Gilgal iyyaanam kalti iyyaanama.)
10Israayil mari Yerikô-magaalah garil tan booxal Gilgal deqsita aracay elle yinfiddigeenil yanin waqdi, woo saaku edde sugen alsak taban kee fereyhaytoh ayrot carri waqla Elle-Tatriyyi-Qiid aben. 11Ciggilta ayro qimbook Kanqaan baaxol tooboke daro yokmen. Too ayrot alen alo kee kamiir maleh bicsen gaqambo yokmen. 12Manna deqsitta maaqo too ayrook wadir qaraanak oobak maraaqinna. Tohuk wadir Israayil mari manna akamuk maraaqinna. Too ayrook xabba haanam Kanqaan baaxol tooboke daro akamuk raaqen.
YERIKÔ-MAGAALA AKAH YIBBIXEN INNA
13Ayrok teena Yoosuwa Yerikô-magaalak xayih yan aracal yan waqdi, garciik seef gabat le num isik foocal soolah yuble. Too waqdi Yoosuwa kaal yemeeteeh, «Atu ni qaskarih num kinnitoo, ni naqboytiitih num kinnito?» kaak iyye.
14Woo numuuy, «Woo marak num hinniyo. Anu akkel YALLIH qaskarih abbah an» kaak iyye.
Too waqdi Yoosuwa kay massakaxxah moyya baaxol xagga heeh, iyyemii, «Anu yi abbaw, ku naqasu kinniyok, maca yok aba intaah?» iyye.
15YALLIH qaskarih abba kaak iyyeemih, «Naharak ama elle soltam taahirik yan aracak, ibak kabel eyyeq» kaak iyye. Yoosuwa too waqdi usuk kaak aba iyyem abe.
Nke Ahọpụtara Ugbu A:
Yoosuwa 5: NKM
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye