Fuɗɗoode 3
3
No neɗɗo arandeejo luttiri Laamɗo
1Ley kulle ladde ɗe Laamɗo Joomiraaɗo tagi ɗeen fuu mboddi ɓuri ƴoyre. Ndi wi'i debbo oon:
— Yalla wo goonga, Laamɗo wi'i taa nyaamon ɓiɓɓe leɗɗe ngesa ɗeen fuu naa?
2Debbo oon jaabii ndi, wi'i:
— Miɗen mbaawi nyaamude ɓiɓɓe leɗɗe ngesa ngaan. 3Ammaa ɓiɓɓe lekki ngonki hakkunde ngesa kiin kaa, Laamɗo wi'i taa min nyaama ɗe, taa min meema ɗe fey, de min maaya.
4Mboddi ndiin wi'i debbo oon:
— A'aa, on maayataa. 5Laamɗo ina anndi nyannde nyaamuɗon ɓiɓɓe makki fu, gite mooɗon peertoto, laatoɗon hono Laamɗo, anndon ko wooɗi e ko boni.
6Ndeen debbo oon yi'i ɓiɓɓe lekki kiin ina muuyni ndaarude, ina mbeli nyaamude, iɗe ɓeyda suuno heɓude hakkillo. O itti ɓinngel makki, o nyaami. O hokki goriiko gondunooɗo e makko oon, kam du nyaami. 7Ɓe ɗiɗo fuu gite maɓɓe peertii, ndeen ɓe annditi ɓalli ɓoli ɓe ngoni. Ɓe itti haako ƴibbi, ɓe canyi, ɓe taadii.
8Nde henndu kiiral naange wifunoo ndeen, ɓe nani sawtu Laamɗo Joomiraaɗo. Imo yiiltoo ley ngesa leɗɗe ngaan. Ndeen gorko oon e deekum cuuɗii Laamɗo Joomiraaɗo ley leɗɗe magga. 9Laamɗo Joomiraaɗo noddi gorko oon, wi'i:
— Toy ngonɗaa?
10Gorko oon jaabii, wi'i:
— Mi nanu sawtu maa ley ngesa, de kulumi, cuuɗiimi sabo ɓanndu ɓoldu ngonumi.
11Laamɗo Joomiraaɗo wi'i:
— Mooy haalani ma ɓanndu ɓoldu ngonɗaa? Ndelle a nyaamii ɓiɓɓe lekki ki mbiimi taa nyaamaa kiin naa?
12Gorko oon jaabii, wi'i:
— Debbo mo kokkuɗaa kam faa wonda e am oon, wo kam hokki kam ɓii lekki kiin, de nyaamumi.
13Laamɗo Joomiraaɗo wi'i debbo oon:
— Ɗume woni ko ngaɗuɗaa ɗuum?
Debbo oon jaabii, wi'i:
— Wo mboddi hiili kam de nyaamumi ɗum.
14Laamɗo Joomiraaɗo wi'i mboddi ndiin:
Saabe ko ngaɗuɗaa ɗuum,
a huɗaama hakkunde daabaaji e kulle ladde fuu.
A daasoto dow reedu maaɗa,
a nyaaman colla ley nguurndam maaɗa fuu.
15Mi waɗan nganyaandi hakkunde maaɗa e debbo oon,
e hakkunde ƴuwdi maaɗa e ƴuwdi makko.
Ƴuwdi debbo oon fusan hoore maa,
aan du, a soppan mo teppere.
16Laamɗo wi'i debbo oon:
Mi waɗan torra naawuka ley ɓeyngu maaɗa,
a tampan e ŋatawere.
A muuyan gondal gora, ammaa wo kam dawrante.
17Laamɗo wi'i gorko oon:
— Saabe ko njaɓuɗaa haala deeka de nyaamuɗaa ɓiɓɓe lekki ki kaɗumaami nyaamude ɗuum:
leydi huɗaama saabe maa.
E tampiri keɓirtaa nyaamdu ley nguurndam maa fuu.
18Ndi funnante gi'e e huɗo bonko.
Wo ɓii jalo laatotoo nyaamdu maaɗa.
19E nguli maaɗa keɓirtaa nyaamdu,
faa nde njeccoyɗaa e leydi ndi ittaɗaa e muuɗum ndiin.
Sabo wo a sollaare,
ley mayre du njeccotoɗaa.
20Gorko bi'eteeɗo Aadama oon inndiri deekum Hawwaa, (ɗum na fiirta «nguurndam») sabo kam laatii inna yimɓe fuu. 21Laamɗo Joomiraaɗo moƴƴinani Aadama e deekum kaddule guri, ɓorni ɗum'en.
22Laamɗo Joomiraaɗo wi'i:
— Inan, neɗɗo laatake hono gooto meeɗen e anndude ko wooɗi e ko boni. Joonin kaa taa o foorta junngo makko o itta ɓiɓɓe lekki nguurndam kiin du, o nyaama de o wuura faa abada.
23Ndeen Laamɗo Joomiraaɗo yaltini neɗɗo ley ngesa leɗɗe Eden faa rema leydi ndi nokkaa e muuɗum ndiin. 24Nde o riiwunoo neɗɗo oon, o wurtini ɗum ndeen, o darni doomooɓe wi'eteeɓe keruba'en faro lettugal ngesa leɗɗe Eden ngaan na tiigii kaafaahi njiilotooki ki ɗemle yiite faa dooma laawol lekki nguurndam kiin.
Nke Ahọpụtara Ugbu A:
Fuɗɗoode 3: FBF
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© SIM International 2012, 2022