A Luk koe‑noogo 21
21
Pʋg‑kõor kõo kũuni
(Mark 12.41-44)
1A Zeezi zẽka b neng n ges arzegsã rãmb sẽn da ningd b kũunã ligdã ningr zĩigẽ. 2Bãmb yãnda pʋg‑kõor a yembr me sẽn yaa naong soab t'a ningd tãma a yiib beenẽ. 3La a Zeezi yeelame yaa: Mam yeta yãmb sɩd-sɩd tɩ pʋg‑kõ-kãngã sẽn yaa naong soabã ningame n yɩɩd neb a taabã fãa. 4Bala, nin-kãensã ned kam fãa tʋm n yãka a paoong a sẽn tar tɩ loogã pʋgẽ n ning ligdã ningr zĩigẽ, la pʋg‑kõorã ninga a sẽn tarã fãa, hal baa a rɩɩbã ligd zãnga.
Wẽnnaam doog sãoongo
(Mat 24.1-2, Mark 13.1-13)
5La neb kẽer sẽn dag n gomd wẽnd doogã yell n wilgd tɩ b nags-a-la ne kug-neebã, la teedã neb sẽn tall n wa n kõ Wẽnnaamã, a Zeezi yeelame yaa: 6Day n wate, tɩ bũmb ningã yãmb sẽn ne wã, kugr baa a yembr kõn pa a to zug b sẽn kõn leeb n lub ye.
Bãn sẽn wilgd dũni saabo
(Mark 13.3-8)
7Bãmb soka a Zeezi yaa: Karen-saamba, dẽ, bõn-kãens na n waa dabʋre, la bõe bãnd n na n wilg bõn-kãens waoongo?
8A Zeezi leokame yaa: Gũus-y tɩ ned ra belg yãmb n tõog ye. Bala, neb wʋsg n na n dɩk mam yʋʋr n wa n yeel tɩ bãmb la Kirisi, la tɩ wakat kolgame. Da tũ-y-b ye. 9La yãmb sã n wa wʋm tɩ b gomd zabre, la tẽn-dãmbg yelle, bɩ y ra zoe rabeem ye. Bala, bõn-kãens tog n deng n waame, la ka dũniyã saab nand ye. 10Dẽ, a Zeezi yeel-b lame: Tẽng a yembr na n yika zabr ne tẽng a to, la rĩung a yembr na n yika ne rĩung a to. 11Tẽn-digimdg kãsems na n zĩndame, la bã-longds ne kom na n zĩnda zĩig-zĩiga, la yel-kãsems sẽn kẽesd rabeem ne bõn-bãn sẽn yit yĩngr na n zĩndame. 12La sẽn deng bõn-kãens fãa, b na n yõga yãmba, n nams-yã. B na n yõga yãmb n tall n kẽng karen-dotẽ, b na n kẽesa yãmb bi-bees roto, b na n tall-y lame n kẽng rĩm-dãmb ne Gʋvɛrneer dãmb taoor mam yʋʋrã yĩnga. 13Na n tũu ne rẽnda tɩ yãmb kɩs bãmb mam kaseto. 14#Luk 12.11,12Dẽ wã, ning-y y yamẽ, n da reng n tags y sẽn na n tɩ gom bũmb ning n fãag y meng ye. 15Bala, mam na n ninga goam y noorẽ, la m kõ-y yam, la yãmb bɛɛbã fãa baa a yembr kõn tõog n kɩɩs wall b wẽ nokoeemd ye. 16Baa yãmb ba-rãmba, la y ba-biisi, la y roagdba, la y zo-rãmb mens na n yõga yãmb n kɩse, la b na n kʋʋ yãmb neb kẽere. 17Nebã fãa na n kisga yãmb mam yʋʋrã yĩnga. 18La yãmb zug zoobg baa a yembr kõn menem ye. 19Yãmb sã n yals kãenkãe, y na n fãaga y mense.
20Dẽ, yãmb sã n wa n yãnd sodaas sẽn gũbg Zeruzalɛm, bɩ y bãng t'a sãoongã kolgame. 21Dẽ, bɩ neb nins sẽn na n be Zʋʋde wã zoe n dʋ tãmse, tɩ neb nins sẽn be Zeruzalɛm tẽngã pʋgẽ wã zoe n yi, la tɩ neb nins sẽn na n be-b wetẽ da kẽ tẽngã pʋgẽ ye. 22#Ooz 9.7Bala, ra-kãens na n yɩɩ sũ-dokr rayã, tɩ bũmb nins fãa b sẽn gʋlsã na paam pidsgu. 23Pagb nins sẽn tʋtã, la sẽn yẽsemd kamb ra-kãens daarã na n paama toogo. Bala, to-kãseng n na n zĩnd soolmã pʋgẽ, la Wẽnnaam sũ-puugr na n lʋɩɩ nin-kãens zutu. 24Zabr sʋʋg n na n kʋ bãmba, la b na n yõga bãmb n maan yembse, n tall n kẽng buudã fãa sʋka. La bu-zẽms na n sooga Zeruzalɛm ne pãng hal tɩ b wakatã pidi.
Ninsaal Bi-riblã waoongo
(Mat 24.29-35, Mark 13.24-37)
25 #
Eza 13.10, Eze 32.7, Zow 3.4, Vẽn 6.12,13 Bãn na n zĩnda wĩndgẽ, la kiuugẽ, la ãdsẽ, la tẽngã zugu, ko-kãsengã bʋrgã, la a ko-pɛmã na n yɛɛsa buud toay-toayã tɩ b ka mi b sẽn na n maan bũmb ning ye. 26Rabeem na n kʋʋ ninsaalba, bãmb sẽn gũud bũmb ning sẽn na n wa dũni zugã yĩngã. Bala, yĩngr pãens na n digimdame. 27#Dãn 7.13, Vẽn 1.7Dẽ, b na n yãnda Ninsaal Bi-riblã sẽn zao sawadg n wat ne pãnga, la ne ziiri. 28La bõn-kãens sã n sɩng n watẽ, bɩ y roog la y nak n gese, bala, yãmb fãagrã kolgame.
29La a Zeezi wẽe bãmb yel-bũnd n yeele: «Ges-y kankanga, la tɩɩsã fãa. 30Yãmb sã n yãnd b sẽn tobdã, yãmb mens miime tɩ sigr zoe n kolgame. 31Woto me, yãmb me sã n wa n yãnd tɩ bõn‑kãensã maandame, bɩ y bãng tɩ Wẽnnaam soolmã kolgame. 32Sɩd-sɩdã, mam yeta yãmb tɩ neb nins sẽn vɩ moasã wã fãa kõn ki tɩ bõn-kãensã ka pids ye. 33Yĩngr la tẽng na looge, la mam goamã kõn tol n loog ye.
34Gũus-y y mens tɩ rɩ-n-tɩk wall rã-tɩgre, la vɩɩmã yɛl yɩɩr da wa n zɩsg yãmb sũyã ye, la tɩ ra-kãng ra wa n ling yãmb 35wa zĩm-gãmbre, bala, ra-kãng na n waa n linga neb nins fãa sẽn be tẽn-gãongã fãa zugã. 36Dẽ yĩnga, bɩ y neend la y pʋʋs wakat fãa, tɩ yãmb tõe n paam pãng n põs bũmb nins fãa sẽn tog n wa wã, la y tõog n yals Ninsaal Bi-riblã taoore.»
37 #
Luk 19.47
A Zeezi rag n zãmsda nebã wẽnd doogẽ wã wĩndga, la yʋngo, bãmb kẽnd n gãee tãng ning b sẽn boond tɩ oliiv tɩɩs tãngã zugu. 38La nebã fãa kẽngda bãmb nengẽ wẽnd doogẽ wã, sẽn sɩng ne yibeoogo, n na n tɩ kelg bãmba.
Nke Ahọpụtara Ugbu A:
A Luk koe‑noogo 21: MPBU
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Moore Bible © Bible Society of Burkina Faso, 2014.