Tẽn‑tʋmdbã tʋʋmã 7
7
1La maan-kʋʋdbã kãsem soka a Etɛn tɩ sɩd yaa a woto la? 2#Sɩng 12.1A Etɛn leokame n yeel yaa: M ba-bi‑raop la m ba-rãmba, kelg-y-yã. Tõnd yaab a Abrahaam sẽn dag n be Mezopotami n nan ka kẽng Kaarã nandã, Wẽnnaam sẽn tar ziirã vẽnega b meng ne bãmba. 3La Wẽnnaam yeel-b lame tɩ: «Yi n bas f tẽngã ne f buudã n kẽng tẽng ning mam sẽn na n wilg foomã.» 4#Sɩng 11.31, Sɩng 12.4Dẽ, a Abrahaam yi n basa Kalde-rãmbã tẽng n kẽng n tɩ zĩnd Kaarã. La bãmb ba wã kũum poore, Wẽnnaam kɩtame tɩ b yi be n wa tẽn-kãngã yãmb sẽn be moasã wã pʋgẽ. 5#Sɩng 12.7, 13.15, 15.18, 17.8La Wẽnnaam ka kõ a Abrahaam zĩig ba sẽn sekd naoor rɩglg tɩ yɩ a pʋɩɩr tẽn‑kãngã pʋgẽ ye. La Wẽnnaam kãabame tɩ b na n kõo bãmb ne b yagensã tẽngã tɩ b soog-a, a Abrahaam loogr poore. La rẽ t'a Abrahaam nan ka tar biig ye. Wẽnnaam da gomame n yeel a Abrahaam a woto: 6#Sɩng 15.13,14«Fo yagensã na n zĩnda tẽng a to, tɩ b kẽes-b yembdo, la b na n namsa bãmb hal tɩ ta yʋʋm kobs naase.» 7#Yik 3.12Wẽnnaam yeelame yaa: «La mam na n sɩbga buud ning sẽn na n kẽes-b yembdã, la bõn-kãng zugẽ b na n yaool n yii be n waoog maam tẽn-kãngã pʋgẽ.» 8#Sɩng 17.10-14, Sɩng 21.2-4, Sɩng 25.26, Sɩng 29.31—35.18Dẽ, Wẽnnaam maana zood lagem-n-taar ne a Abrahaam n kõ-a bãong kẽesg tɩ yɩ bãnde. La a Abrahaam doga a Izake. La rasem a nii sẽn ta, b kẽesa a Izak bãongo, la a Izak sẽn dog a Zakoobe, a kẽesa yẽnda me bãongo. La a Zakoob sẽn dog Zʋɩf-rãmbã yaab-rãmb piig la a yiibã, a kẽes-b-la bãongo.
9 #
Sɩng 37.11,
Sɩng 37.28,
Sɩng 39.2,21 La Zʋɩf-rãmbã yaab-rãmb maana sũ-kiir ne a Zozɛf n koos-a tɩ b tall-a n kẽng Ezɩpte. 10#Sɩng 41.39-41La Wẽnnaam dag n bee ne a Zozɛfe, la b fãaga yẽnda a yel-pakrã fãa pʋgẽ. La Wẽnnaam kɩtame t'a Zozɛf tar yam la bark Ezɩpt rĩm a Faarõ nifẽ. La rĩm a Faarõ kɩtame t'a Zozɛf lebg Gʋvɛrneer n soog Ezɩpt ne a Farõ na-yirã neb fãa.
11 #
Sɩng 42.1,2 La kom-kãseng n kẽ Ezɩpt soolmã fãa ne Kana tẽngã gilli, la namsgã yɩɩ wʋsgo, la tõnd yaab-rãmbã ra ka tar dɩɩb sẽn na n dɩ ye. 12A Zakoob sẽn wʋm tɩ kood bee Ezɩpt tẽnga, b tʋma tõnd yaab-rãmbã be dẽenem. 13#Sɩng 45.1, Sɩng 45.16La a Zakoob sẽn tʋm-b naoor a yiib soaba, a Zozɛf vẽnega a meng ne a ba-biisã. La Faarõ bãnga a Zozɛf sẽn yaa buud ninga. 14#Sɩng 45.9,10,17,18, Sɩng 46.27Dẽ, a Zozɛf tʋmame tɩ b tɩ peeg a ba a Zakoob ne b yirã rãmb fãa, b sõorã taa bãmb pis-yopoe la a nu. 15#Sɩng 46.1-7, Sɩng 49.33A Zakoob kẽnga Ezɩpt la b kii be. La tõnd yaab-rãmbã me kii be. 16#Sɩng 23.3-16, 33.19, 50.7-13, Zoz 24.32La b tʋka a Zakoob kũumã n kẽng Sɩkɛm n tɩ mum yaoog ninga a Abrahaam sẽn dag n da ne ligd a Hamoor kambã nengẽ sẽn be Sɩkɛmã pʋgẽ.
17 #
Yik 1.7,8 La wakatã sẽn kolgd tɩ Wẽnnaam sẽn dag n maan kãabg ningã ne a Abrahaamã tog n pidsi, nebã fɩɩgame n lebg wʋsg Ezɩpt tẽngã pʋgẽ, 18hal tɩ Ezɩpt rĩm a to sẽn ka bãng a Zozɛf reeg naam. 19#Yik 1.10,11, Yik 1.22Rĩm‑kãng maana sɩlem n zãmb tõnd buudã n maan tõnd yaab-rãmbã pãng n kɩt tɩ b bas b kom-peels tɩ b ki.
20 #
Yik 2.2
La yaa wakat-kãng la b rog a Moyiisi. A rag n yaa bi-neere n ta Wẽnnaam yam. La yẽnda zĩnda a ba wã zakẽ kiis a tãabo. 21#Yik 2.3-10La b sẽn yiis a Moyiis n base, a Faarõ bi-pugla rɩka yẽnda n wub-a wa a biiga. 22B zãmsa a Moyiis Ezɩpt-rãmbã yamã fãa. La a goamã ne a tʋʋmã ra tara pãnga.
23 #
Yik 2.11-15
La a Moyiis sẽn ta yʋʋm pis-naase, a tags‑a sũurẽ n dat n ges a ba-biisã sẽn yaa Israyɛll yagensã. 24A Moyiis yãnda b sẽn maand Israyɛll ned a yembr pãnga, la a sõnga Israyɛll nedã n dok a sũur n kʋ Ezɩpt nedã. 25A Moyiis ra tẽedame t'a ba-biisã na n bãngame tɩ Wẽnnaam na n talla yẽnda n fãag‑ba. La b ka bãng ye. 26La vẽkembeoogo, a Moyiis yãnda Israyɛll neb a yiib sẽn zabd taaba. La yẽnda rat n paasa zabrã n yeel yaa: «Yaa bõe tɩ y maan taab pãnga? Yãmb yaa ba-biisi.» 27Ned ning sẽn maand a to wã pãngã tusa yẽnda n yeel-a tɩ ãndã n yãk-a t'a yɩ bãmb naab la b bʋ-kaooda, 28t'a Moyiis rat n kʋʋ yẽnda wala a sẽn kʋ Ezɩpt nedã zaamẽ wã la? 29#Yik 18.3,4A Moyiis sẽn wʋm gom-kãngã, a zoeeme n kẽng n tɩ zĩnd Madiyã tẽng n dog kom-dibli a yiib beenẽ.
30 #
Yik 3.1-10
La yʋʋm pis-naas rẽ zugẽ, malɛɛk puka a meng ne a Moyiis tuug sẽn wit bugum pʋgẽ weoog sẽn pẽ Sinayi tãngã. 31A Moyiis sẽn yã tuugã sẽn wit bugmã a yɛɛsame. La b sẽn kolgd n na n gese, bãmb wʋma Zu-soabã koɛɛg sẽn yeel yaa: 32«Mam yaa fo yaab-rãmbã Wẽnnaam. A Abrahaam la a Izak ne a Zakoob Wẽnnaam.» La rabeem yõka a Moyiis t'a sɩng n digda, n ka saag n na n ges ye. 33La Zu-soabã yeela a Moyiis yaa: «Piid f neooda wã, bala fo sẽn be zĩig ningã yaa zĩ-sõngo. 34Mam yãnda m nebã sẽn be Ezɩptã namsgã, la m wʋma b wõosgã. La m sigame n na n fãag-ba. Moasã, wa tɩ m na n tʋm-f la Ezɩpte.»
35 #
Yik 2.14
Moyiis ningã Israyɛll kambã sẽn dag n yeel tɩ ãnda n yãk-a t'a yɩ bãmb naab-la, b bʋ-kaoodã, yaa Moyiis‑kãng la Wẽnnaam tʋm yã, t'a yɩ naaba la fãagda, ne malɛɛk ningã sẽn dag n puk a meng ne bãmb tuugã pʋgẽ wã sõngre. 36#Yik 7.3, Yik 14.21, Sõd 14.33Yaa a Moyiis n maan bõn-yɛɛsds la bãn Ezɩpt tẽngã n yiis Israyɛll kambã Ezɩpt soolmã pʋgẽ la mog-miuugã ne weoogã pʋgẽ yʋʋm pis-naasã. 37#Tõ 18.15,18Leb n yaa a Moyiis‑kãng n dag n yeel Israyɛll kambã yaa: «Wẽnnaam na n yãka b no-rɛɛs sẽn wẽnd maam yãmb ba-biisã sʋk n kõ yãmba.» 38#Yik 19.1—20.17, Tõ 5.1-33La yaa yẽnda n zĩnd ne Israyɛll nebã weoogẽ wã, n dag n be ne malɛɛkã sẽn gomd ne yẽnda Sinayi tãngã. La a zĩnda ne tõnd yaab-rãmbã n deeg tõog sẽn kõt vɩɩmã n kõ yãmba. 39Tõnd yaab-rãmbã rag n ka tʋlg n na n sak a Moyiis ye. Bãmb basa a Moyiis kɛɛnga n baood n lebg n leb Ezɩpte. 40#Yik 32.1B yeela a Aarõ yaa: «Maan wẽnnaam-dãmb n kõ tõnd tɩ b lʋɩ d taoore. Bala, a Moyiisi, soab ning sẽn yiis-a tõnd Ezɩpt tẽngã, tõnd ka mi bũmb ning sẽn maan-a ye.» 41#Yik 32.2-6Dẽ, badaare b maana nag-bila, n maan maoong n kõ wẽnd-naandgã, la b maana sũ-noog ne bũmb ning b mens nus sẽn maanã. 42#Amo 5.25-27La Wẽnnaam wẽnemda b neng n bas-b tɩ b pʋʋs yĩngr ãds wa sẽn gʋls Wẽnnaam no-rɛɛsdbã sebr pʋgẽ wã:
«Israyɛll nebã, yãmb sẽn zĩnd weoogã pʋgẽ
yʋʋm pis-naasã,
yãmb kʋʋ rũms la y maan maand n kõ maam sɩda?
43La yãmb zẽka y wẽnnaam a molok fu-roogo,
ney wẽnnaam a ramfã ãdga.
Yãmb maana wẽnd-naands kãens
n na n waoogd-ba.
Woto yĩnga, mam na n yiisa yãmb
tɩ y kẽng hal n zãag ne Babilonde.»
44 #
Yik 25.9,40 Weoogẽ wã tõnd yaab-rãmbã dag n tara kaset fu-roogã. Fu-roogã wẽnda mamsg ningã a Moyiis sẽn dag n yãndã, tɩ sẽn gomd-a ne yẽnda wã yeel-a t'a tilg n wẽneg a woto wã. 45#Zoz 3.14-17Rẽ zugẽ, tõnd yaab-rãmbã reega fu-ro-kãng n tall-a n kẽ tẽng ningã pʋg a Zozoe sẽn lʋɩ bãmb taoor n zab tɩ Wẽnnaam dig buud a taabã tɩ b reeg n soogã, la fu-roogã paa be hal tɩ ta a Davɩɩd zamaanẽ. 46#2Sãm 7.1-16, 1Kib 17.1-14A Davɩɩd paama bark Wẽnnaam nifẽ, n kos bãmb noor n dat n me roog n kõ a Zakoob Wẽnnaam. 47#1Rĩm 6.1-38, 2Kib 3.1-17La baoosgo yɩɩ a Salmo n me roogã n kõ Wẽnnaam. 48La Wẽnnaam Sẽn-Ka-To ka kẽed rot sẽn me ne ninsaalb nus ye. Wala Wẽnnaam no-rɛɛsã sẽn yeelã:
49 #
Eza 66.1,2 Zu-soabã yeelame:
«Saasẽ yaa mam geere,
dũni yaa mam nao roagendga.
Ro-bʋg buud la yãmb na n me n kõ maam?
La mam vʋʋsg zĩig bee yɛ?
50Ka mam meng n naan bõn-kãens fãa la?»
51 #
Eza 63.10
Yãmb yaa kɩɩsdba. La yãmb sũyã ne y tʋbã pagame n ka wʋmd Wẽnnaam boaalã ye. Yãmb kɩɩsda Sɩɩg-sõng daar fãa wala y yaab-rãmbã sẽn da maanã. 52Wẽnnaam no-rɛɛs bʋg la y yaab-rãmbã ka namse? B kʋʋ neb nins sẽn da pĩnd n togs tɩrlem soabã waoongã. La moasã, yaa yãmb n zãmb tɩrlem soabã n kʋ-a. 53Malɛɛk-rãmbã kõo yãmb Wẽnnaam tõogã la yãmb ka sak-a ye.
54Kaoreng yɛl-bʋ-kaoodbã sẽn wʋm gom-kãensã, b sũyã yika ne a Etɛn tɩ b wãb b yẽna. 55La a Etɛn sẽn pid ne Sɩɩg-sõngo, yẽnda gesa yĩngri, la a yãnda Wẽnnaam ziirã, la a Zeezi sẽn yas Wẽnnaam dɩtgo. 56La a Etɛn yeelame yaa: Kelg-y yã, mam nee yĩngr sẽn pake la Ninsaal Bi-riblã sẽn yas Wẽnnaam dɩtgo. 57Dẽ, bãmb kelma ne pãng n yẽd b tʋba. La b fãa wudgame n yõk a Etɛn. 58La b talla yẽnda n yi tẽngã n sɩng n lob-a ne kug n na n kʋ. La kaset dãmbã rʋʋga b fut bi-bɩɩg a yembr yʋʋr sẽn boond t'a Soll taoore. 59La b sẽn da lobd a Etɛn ne kugã, a ra pʋʋsdame n yetẽ: Zu-soab a Zeezi, reeg-y m sɩɩgã. 60Dẽ, a Etɛn yĩgimda a rũm zug n kelem ne pãng n yeel yaa: Zu-soaba, da ning-y b taal yel-wẽn-kãngã yĩng ye. La a sẽn yeel a woto n sɛ, a gũsame.
Nke Ahọpụtara Ugbu A:
Tẽn‑tʋmdbã tʋʋmã 7: MPBU
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Moore Bible © Bible Society of Burkina Faso, 2014.