MATEO 5
5
Aashicha weiñä jäcä ecammajäätö’jödö Jesuuquidiito wwä
1Ñanno jooja’como soto eneea’jäcäiñe Jesuuquidiito wwä, töwö cönaatajiimai jöö de’wä. Ñoowanoomadö cöne’jummaicho yaawä dhawoodhecääcä. 2Yääje mma yaawä Jesuuquidiito cönaajäntäi owaanomaadöcoomo; cönä’döaacä:
Ñanno ta’cwaiñe töweiyaamo
3—Ta’cwaiñe eijai ñaato ñanno a’ca’como tö’tadö, Wanaadi töcaajichaanaichomooje yeijäcä.
4“Ta’cwaiñe eijai ñaato ñanno töwaamo’como; tönwanno nä’wa’däjaato’de.
5“Ta’cwaiñe eijai ñaato ñanno o’jodhe chö’tajä’jöncomo; Wanaadi necaama’jödö nono chäwäiñe nä’tua’de.
6“Ta’cwaiñe eijai ñaato ñanno chäänönge töwei’sha’como, töwoocödö enö’se weiñä naichöje, ämiije weiñä naichöje mmaja; chäänönge yeicho’como chäwwäiñe nä’tua’de.
7“Ta’cwaiñe eijai ñaato ñanno wentumje änennamo; tönwanno daja wentumje näänejaato’de.
8“Ta’cwaiñe eijai ñaato ñanno masuuduijemjöncomo tö’tajäätödö; tönwanno Wanaadi neneeaato’de.
9“Ta’cwaiñe eijai ñaato ñanno äätu’dedööje’da weiñä jäcä soto yäätuujannamo; tönwanno Wanaadi nnacoomoje nätä’täjaato’de.
10“Ta’cwaiñe eijai ñaato ñanno chäänönge töweichöcoomo jo’tadööja’como wäntunamjödö, Wanaadi töcaajichaanaichomooje yeijäcä.
11“Ta’cwaiñe eijai maato änwanno soto wwäiñe adheetana’ta’comjäcä, amaamincha’comjäcä mmaja, jönaawä adheementa’comjäcä mmaja, sootoije aweichöcoomo jo’tädööje. 12Adha’cwainchatääcä’de yaawä; ä’wa’dätääcä’dede, adheejemaato’como jooje yeijäcä caju ña. Mädääje dea tömmaminchaiñe töweiye cönä’ja’to odhoowajoodo’como Wanaadi wa’deuwödö ecammannamo.
Saayu nönge Wanaadi sotoi yeichöcoomo, adhaawa nönge mmaja
13“Änwanno maato saayu nönge edä nono de’woncomo wwäiñe. Yaawääne’, saayu a’cwötöödö wataamea’jäcä, ¿aaquene ma’cwötöömaiyede yaawä? ¿Ane’cotoojoje eichöde’ yaawä? Tämamje mma na yaawä, sotoocomo neta’jätöödöcoomoje.
14“Änwanno maato adhaawa nönge, edä nono de’woncomo yeijonnamooje. Jata jöö de’wono ootone’tojoojai’cha na. 15Adhaawa emjannaajä wöwa o’nä ännö’da weiñä nai. Dha’täi ye’wääne tödöödö, tameedä yää maa tacancomo yeijodööcomo wetä. 16Mädääje mmaja soto yeijojai maato änwanno, aashichaato tödöödö äwwäiñe eneiyeto, aashicha a’deuwöiyeto yaawä Oomotoncomo caju ñano jäcä.
Jesuuquidiito necammajäätö’jödö waanontänä jäcä
17“Waanontänä e’nomjajo we’aatäi maneecanö’täi’che, Wanaadi wa’deuwödö ecammannamo a’deddu e’nomjajo jeiñe mma. E’nomjajo’daane we’ne, chäänönge tödöödö wetääne. 18Chäänönge yääje wä’döa äwwäiñe, tameedä chäänönge yä’dödö wa’cä tooni waanontänä imennajä’cä täma’da na’de, nono wataamedö jonaane, caju wataamedö jonaane mmaja. 19Yääje yeijäcä ñäädä tooni waanontänä emaanei, she’caasa’cä yeichaame, yääje soto owaanoma’jäcä mmaja, dho’näiñe na’de Wanaadi sotoi antawäiñe. Ñäädä waanontänä tödöönei mmaane, yääje soto owaanoma’jäcä mmaja, ñäädä täneejuque na’de Wanaadi sotoi antawäiñe. 20Edääje wä’döa äwwäiñe, judhío owaanomannamo e’jodheiñe jeene’da aweiya’comjäcä, aashicha aweichöcoomo, jaadiseeo e’jodheiñe’da aweiya’comjäcä mmaja, Wanaadi sotoije eijai’cha maato.
Töwäätäuwö’se weiñä jäcä Jesuuquidiito nowaanoma’jödö
21“Änwanno metaatäne adhaadai’choncomo wwä yääje yä’dö’jocoomo jenaadä: “Soto maneemai; ñäädä soto emaanei’jödö nätäämaja’de;” quee yä’dö’jocoomo naadö. 22Öwö mmaane yääje wä’döa äwwäiñe: Ñäädä töweichacoono euwö’sato, nätääcamma’jaja’de. Näädä töweichacoono chiimajä’nei nätääcamma’jaja’de äcamma’jonnamo wwä. Ñäädä töweichacoono eunei wa’to nwaca töötädö nijumma.
23“Yääje yeijäcä saaquidijiisiyo dötoojo wwadäädä Wanaadi wwä tu’emö ene’a’jäcä äwwä, yaawä äwwä chö’ta’jäcä aweichacoono äjääcä cone’da yeichö, 24yäätäädä ummichaacä yää ännejöödö, saaquidijiisiyo dötoojo o’wawä. Adheeconeecata aweichacoono acä, yaawääne meejöiye, Wanaadi wwä mutuiye yää ännejöödö.
25“Äjääcä cone’da anejja weiya’jäcä, äcamma’jonei wwadäädä adhaadää’jäcä yaawä, yaawä dea mma adheeconeecatääcä’de dhacä, ääma tai äätädaawäiñe dea mma, äcamma’jonei wwä ayuutu’no yaawä. Ñäädä äcamma’jonei ayuutujai ña yaawä jedeesoje dönnamo wwä; jedeesoje ayöödöaato’de yaawä. 26Chäänönge yääje wä’döa äwwä, jedeeso ewöötö tacanno eja’ca’da ma’de tameedä ejeemadö wa’cä äwwä.
Masuuduichanä jäcä Jesuuquidiito nowaanoma’jödö
27“Änwanno metaatäne yääje yä’dö’jocoomo jenaadä: “Mä’masuuduijai;” quee yä’dö’jocoomo naadö. 28Öwö mmaane yääje wä’döa äwwäiñe: Ñäädä ijummancädä wodi ene’manei, conemjönö nödööa chääjäcä tötö’tajäätödö ai.
29“Yääje yeijäcä adheenudu ämu’demjönö nene’madö woije asaadijanga’jäcä, u’cacä, memaiye yaawä. Aashicha mmaja tooni äjääcono wäämadö, yä’jödöödä aweichaame mma wa’to nwaca mätäämajo’no. 30Adhaamädö ämu’demjönö nödöödö woije asaadijanga’jäcä, acä’cä, memaiye yaawä. Aashicha mmaja tooni äjääcono wäämadö, yä’jödöödä aweichaame mma wa’to nwaca mätäämajo’no.
Töjiiñamo e’nomjadö jäcä Jesuuquidiito nowaanoma’jödö
31“Edääje mmaja töwä’döe cönä’ja’to dea jenaadä: “Ñäädä töjiiñamo e’nomjanei, jajeeda näntu’ñojo chäwwä, töwääto’nomja töweichöcoomo ene’ju’tojo;” quee töwä’döe cönä’ja’to. 32Öwö mmaane yääje wä’döa äwwäiñe: Ñäädä imaasuduicha’jödö jäcäinchädä’da töjiiñamo e’nomjanei, conemjönö nödööja töjiiñamo wwä. Ñäädä e’nomjaajä dö’tono wä’dödö mmaja conemjönö nödööa dea.
Jäduuje wääcammanä jäcä Jesuuquidiito nowaanoma’jödö
33“Änwanno metaatäne dea adhaadai’choncomo wwä yääje yä’dö’jocoomo jenaadä: “Tödööeene tödööcä’de Wanaadi wwä aneecamma’jödö, mämja’do’joi’che;” quee yä’dö’jocoomo naadö. 34Öwö mmaane yääje wä’döa äwwäiñe: Jäduuje mma määcammatäi’che. Caju ñano jäcä määcammatäi’che, Wanaadi a’täije yeijäcä. 35Edä nono jäcä mmaja määcammatäi’chede, i’judu a’täije yeijäcä. Jeduusadén ñano jata jäcä mmaja määcammatäi’chede, Cajiichaana täneejucaato jataadöje yeijäcä. 36Aju’jä jäcä mmaja jäduuje määcammatäi’chede, juduume aju’jädö tödööjai aweichöjöönö, tajääde’de tödööjai aweichöjöönö mmaja. 37Sa’donnaane adha’deutäcä. “Ee;” quee caichäcä’de; “Ng’jn;” quee jeiñe mma. Yää de’wono wa’deunä mmaane odo’sha dö’senno ne’a.
Woojo’tänä jäcä Jesuuquidiito nowaanoma’jödö
38“Änwanno metaatäne yääje yä’dö’jocoomo jenaadä: “Änu cone’ma’jödö, änu que mmaja ejeemadö. Dhedö cone’ma’jödö, dhedö que mmaja ejeemadö;” quee yä’dö’jocoomo naadö. 39Öwö mmaane yääje wä’döa äwwäiñe: Conemjönö äjääcä tödöönei’jödö töweiye yeiya’jäcä, chääjäcä moojo’täi’che. Anejja wwä ajoojeta’ma’jäcä, ijaato daja eneejocääde chäwwä. 40Wejiiñaje owoomö e’ca’a’jäcä anejja wwä, asaawanai mmaja u’cäde chäwwä. 41Anejja wwä tamiiñato adääja’jäcä äwwä tooni shii wääsecaadö, aacä shii wääsecaadö adääcä. 42Äwwä e’ca’nei wwä u’cä. A’dhatooje ännödö eiñei wwä mma maneewontäi’che.
Tutu’de’tänei ijummadö
43“Änwanno metaatäne dea yääje yä’dö’jocoomo jenaadä: “Aweichacoono ijummacä; ätu’de’tänei mmaane chiiñeme’ca;” quee yä’dö’jocoomo naadö. 44Öwö mmaane yääje wä’döa äwwäiñe: Ätu’de’tännamo jadä’jödöödä ijummatääcä. Adheunenaamo wwäiñe aashicha adha’deutäcä. Aashicha tödöötäcä aquiiñeme’nnamo. Wanaadi wwä adha’deutäcä adheetana’tännamo jäcäiñe, amaaminchannamo jäcäiñe mmaja. 45Mädääje Oomotoncomo caju ñano nnedööje eijai maato. Töwö shii tömja’canö’jo weneene tameedä soto weiyuuducoomoje, aashicha’como weijoneichomooje, conemjöncomo jadä’jödöödä. Yääje mmaja conoojo tönne’jo weneene dea aashicha’como jäcäiñe, conemjöncomo jäcäiñe mmaja. 46Ajummannamo mma ijumma’jäcä äwwäiñe, ¿aaquene ääjemaajai ñai yää? Mädääje acu’shänä jödaatai i’jummanei nijumma tujummanei chea mma. 47Ajimmotoncomo dea mma a’dejja’jäcä äwwäiñe, weiñä töweiye naichö e’jodhe’da mödööato. Mädääje mmaja Wanaadi dhowaanojöncomo tönnöe weneeneto. 48Aashichaane eichäcä, Oomotoncomo caju ñano aashicha naadöje mmaja.
Nke Ahọpụtara Ugbu A:
MATEO 5: MCH
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2014 Reservados todos los derechos