Jɛnɛsis 20
20
Ebraam Mek Abimɛlɛk
1Ebraam muf kɔmɔt Mamrɛ ɛn go sawt fɔ go na Nɛgɛv pat ful ɛn tap bitwin Kedɛsh ɛn Shɔ na wan ples we nem Gɛra. 2I lay tɛl di pipul dɛn se in wɛf Sera nain sista. So Kiŋ Abimɛlɛk mek dɛn kɛr Sera go to am. 3Wan nɛt PAPA GƆD apia to Abimɛlɛk na drim. I se, “Abimɛlɛk, bikɔs na pipul wɛf yu dɔn tek yu go day.”
4Bɔt Abimɛlɛk nɔ bin gɛt biznɛs wit Sera yet, so i se, “PAPA GƆD, duya, a beg, a nɔ bin no. Nɔ mek inosɛnt pipul dɛn sɔfa fɔseka dat. 5Na Ebraam insɛf sɛf tɛl mi se Sera nain sista, ɛn Sera insɛf kɔnfam se Ebraam nain brɔda. Duya a nɔ du am bay wilful, a nɔ bin no.”
6PAPA GƆD ansa am bak na di drim se, “Yɛs, a si se yu kɔnshɛns klia, ɛn na dat mek a nɔ mek yu tɔch am sɛf, fɔ lɛ yu nɔ go kɔmit sin. 7So naw, sɛn di uman go bak to in man. Na prɔfɛt, i go pre fɔ yu, ɛn yu nɔ go day. Mek a wɔn yu. If yu nɔ sɛn am go bak, no se yu wangren nɔ go day, yu ɛn ɔl yu pipul dɛn go day.”
8So Abimɛlɛk grap ali mɔnin, i kɔl in ɔfisa dɛn ɛn tɛl dɛn ɔl, ɔl wetin apin na nɛt. We dɛn yɛri dat i mek dɛn fred bad. 9Afta dat Abimɛlɛk sɛn kɔl Ebraam ɛn aks am se, “Wetin du yu du wi so? Us bad a dɔn du yu we mek yu briŋ dis kayn waala pan mi ɛn mi pipul dɛn? Nɔbɔdi nɔ ɛva du wetin yu du so to mi. 10Wetin mek yu du so?”
11Ebraam ansa se, “A bin fil se nɔbɔdi nɔ de ya we de fred PAPA GƆD, ɛn sɔntɛm dɛn bin fɔ kil mi ɛn tek mi wɛf na mi an. 12Usay tru de fɔ tɔk na mi sista, bikɔs wi na wan dadi pikin, bɔt nɔto di sem mami bɔn wi, ɛn a mared am. 13So we PAPA GƆD pul mi kɔmɔt na di kɔntri usay a bin de, a tɛl am se, if i lɛk mi, i fɔ se mi nain brɔda ɛnisay we wi go.”
14So Abimɛlɛk gi ship, kaw ɛn man ɛn uman slev dɛn to Ebraam, dɔn i gi am in wɛf bak. 15I tɛl Ebraam se, di wanol kɔntri nain yon, i kin tap ɛnisay we i fil fɔ tap. 16Dɔn i tɛl Sera se, “A de gi yu brɔda wan tawzin silva kɔpɔ#20:16 Wan Tawzin Silva Kɔpɔ Na lɛkɛ twɛnti fayv pawn wet silva fɔ sho se yu nɔ gɛt blem pan natin.”
17Ebraam pre fɔ Abimɛlɛk, in wɛf ɛn ɔl di ɔda uman dɛn nain os we mek dɛn bigin bɔn pikin. 18Bifo dat PAPA GƆD bin dɔn mek in wɛf ɛn ɔl di ɔda uman dɛn nain os nɔ ebul bɔn bikɔs Abimɛlɛk bin dɔn tek Sera as in wɛf.
Nke Ahọpụtara Ugbu A:
Jɛnɛsis 20: KRIO13
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Krio Bible © The Bible Society of Sierra Leone, 2013.