MATIUS 19
19
Tintiro-Ngi Yesus hal᷊i u pusasindo
(Mrk. 10:1-12)
1Su tempo-Ngi Yesus nasue bou nuhabaru kaul᷊i e'e, i Sie nanintang u Galilea bou e'e nakoa sarang Yudea su simbuka ngu sal᷊uhi Yordan. 2Maul᷊i taumata nutumuhu si Sie, dang i Sie nupakaul᷊engi sire su se'e.
3Bou e'e manga tau Farisi nusumongo guna ngu mangakal᷊i si Yesus. I sire nukina, “Tumuhu atorang u agama ngi kite, apa botonge manindo kawinge dingang u haghingu alasang?”
4 #
Kej. 1:27, 5:2 I Yesus nusumimbahi, “Apa i kumu mborong ta nubasa su l᷊al᷊ungu Buki Susi himoneu Mundariadi taumata seng bou titae nundiadi si sire koese dingang u kowawine? 5#Kej. 2:24Dang bou e'e I Sie nangul᷊i, ‘E'e sabapie koese manintangi mama papange dang masimbau dingang u kawinge, bou e'e i sire rua makoa simbau.’ 6Inau I sire wal᷊inge l᷊ai duang katau, kateho simbau. E'e sabapie apang ko seng nipukauhu Mawu Ruata ta botonge i putal᷊ei ngu taumata.”
7 #
Ul. 24:1-4; Mat. 5:31 Bou e'e manga tau Farisi nukina si Sie, “Boko kere'e apa sabapie i Musa nangoro taumata punggile surat talaki su kawing ko nisindonge?”
8I Yesus nusumimbahi, “I Musa nupakawala ngi kumu panindo kawing i kumu ual᷊ingu i kumu tumaniu susa panintironge. Tumuhu hinonge wal᷊inge we kere'e bou titae. 9#Mat. 5:32; 1Kor. 7:10-11Daringihete i'i: I sai manindo kawinge – sumbali tau wawine e'e ta nou koese kowal᷊inge – bou e'e nusau nukawing dingang u kowawine ko wal᷊inge, i sie seng nawuang.”
10Manga tumatuhu I Yesus nangul᷊i si Sie, “Boko pural᷊ahikingu singkawingang kere'e, mapiang kuhae mukawing.”
11I Yesus nusumimbahi, “Wal᷊inge kaul᷊i u taumata makatarima didato e'e, kitang taumata ko seng nitantu u Mawu Ruata. 12Watu u pia taumata ko tamukawing, ual᷊ingu i sie seng nipahana kere'e, pia l᷊ai ta makapukawing ual᷊ingu kakakoau taumata ko wal᷊inge. Pia l᷊ai ual᷊ingu kaoe sisane ta mukawing, tadeau makapuhal᷊i hal᷊i u Mawu Ruata. Taumata ko makatarima tintiro i'i, balate i sie panarima.”
I Yesus nangal᷊amati manga rario
(Mrk. 10:13-16; Luk. 18:15-17)
13Pia taumata numbawa manga rario sarang koa I Yesus tadeau I Sie mamilo l᷊ima-Nge su timbo i sire dingang u makikaliomaneng i sire. Kute manga tumatuhu I Yesus nuwawal᷊uang si sire e'e. 14I Yesus nudidato su manga tumatuhu-E, “Balatekere manga rario e'e pasongo su koa-Ku! Ariwe panahaghe si sire, watu u taumata kere i sire e'e makoa umat u Mawu Ruata.”
15Bou e'e I Yesus namilo l᷊ima-Nge su timbo u manga rario e'e dang nangal᷊amati si sire. Mbuhue i Sie nurumal᷊eng bou e'e.
Tau umbaseng ko kala
(Mrk. 10:17-31; Luk. 18:18-30)
16Pia su silou singkatau koese nusumongo sarang koa I Yesus. “Tuang Guru,” angkunge, “Kakanoa mapia kira ko hino ngu daku koateng tadeau makatarima puwawiahi kahingang dang kakal?”
17Yesus nusumimbahi “Nakurawe i kau mukina si Sia hal᷊i ko mapia? Kitang pia simbau ko mapia. Boko i kau mo muwiahi, i kau mambeng tuhu manga parenta ngu Mawu Ruata.”
18 #
Kel. 20:13-16; Ul. 5:17-20 “Parenta sude e'e?” kakinau tau e'e.
I Yesus nusumimbahi, “Kumbahang mamate, kumbahang mawuang, kumbahang manako, kumbahang mul᷊eo, 19#Kel. 20:12; Im. 19:18; Ul. 5:16pangadati si papangu dingang si mamangu, dang kindaghite sinsul᷊ungu taumata, kere i kau mukumindaghi watangengu sisane.”
20“Kaul᷊iu parenta e'e seng daku nituhukang,” nisimbahu tau ko makuda e'e. “Apa l᷊ai mborong?”
21I Yesus nangul᷊i si sie, “Boko i kau mo wiahu matimu, dakoko wal᷊u apang rarotongu. Pahia doi e'e su tau ko susa, dang i kau sarung makahombang kakakala su sorga. Bou e'e, maite tuhu si Sia!”
22Nakaringihi didato e'e, tau umbaseng e'e nurumal᷊eng dingang u susangu naunge watu u i sie napene rarotonge.
23Bou e'e I Yesus nangul᷊i su manga tumatuhu-E, “Ia mangul᷊i si kumu, tumaniu masusa su tau ko kala makoa umat u Mawu Ruata. 24Dang i'i l᷊ai ko Daku i uli si kumu, mborong magampangeng simbau onta sumu su l᷊ohangu rarahung, bou singkatau ko kala sumu su Kararatuangu Mawu Ruata.”
25Suapang manga tumatuhu-E nakaringihi didatong I Yesus e'e, i sire naherang. “Boko kere'e,” angkungi sire, “Koi sai wue botonge masalamati?”
26I Yesus nutuhung si sire, mbuhue nangul᷊i, “Su taumata, e'e tamariadi! Kitang su Mawu Ruata, kaul᷊ie mariadi.”
27Bou e'e i Petrus nangili, “Tuhungete i kami seng nanintangu kaul᷊ie watu u tumuhu si Tuang. Dang apa ko sarung i karea i kami?”
28 #
Mat. 25:31; Luk. 22:30 I Yesus nangul᷊i si sire, “Pangimangte: Su Dunia ko Wuhu, Ahusu Taumata sarung kumangiang su kadera komawantughi. Su tempo e'e i kumu manga tumatuhu-Ku sarung kumangiang su kadera komawantughi mapul᷊o dua dang mangadili si sire mapul᷊o dua hintoungu Israel! 29Dang manga taumata ko seng nanintangu wal᷊e arako ana usingkataunge koese arako kowawine, arako i mama papange, arako anae arako awuhe ual᷊ingu Ia, taumata e'e sarung makarea pakamahasu su sulenge. Dang i sie sarung manarima l᷊ai puwawiahi tutunge dang kakal. 30#Mat. 20:16; Luk. 13:30Kateho maul᷊i taumata su orasi i'i kahimotongange sarung makoa ko kasamuriange dang ko su orasi i'i kasamuriange sarung makoa ko kahimotongange.”
Nke Ahọpụtara Ugbu A:
MATIUS 19: LAISXN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2014 Indonesian Bible Society (Lembaga Alkitab Indonesia)