Markus 12
12
'Ade-'ade mangale ngowa'a munara toma guḏa
(Mat. 21:33-46; Luk. 20:9-19)
1Togumu i'a, Yesus mulaingi pula'a 'ade-'ade i'a toma 'imam-'imam ma sae'e, guru-guru 'agama re Yahudi-Yahudi manga sae'e. Yesus 'o kanau, “ 'Age matengo 'o otomo 'anggur tai guḏa ḇotu moi. Ḏua unanga 'a hisa sigoloḏi. Gena ḏua, unanga 'o paiti tana'a ma duso'o di'a 'anggur ma sowo'o ma jo-jo'o re 'o side'oso wala teru di'a ngowa'a jaga. Togumu i'a, unanga 'o sisewa toma ngowa-ngowa'a munara toma guḏa kara unanga 'o tagi toma giḏanga.#Yes. 5:1-2 2Wakutu ma 'orasa 'utu'u enanga 'i ngadolo, unanga gena-ge 'o siḏingoto 'ai budaka matengo 'o tagi toma ngowa-ngowa'a munara toma guḏa di'a ya 'oro 'ai balangu. 3Mada'a ngowa-ngowa'a munara toma guḏa 'u cako'o 'ai budaka gena-ge re 'u ca'olo kara 'aḏi soma'a unanga 'o maḏibo ma nga-ngawere. 4Ḏua unanga dadunu 'o siḏingoto 'ai budaka ma lelegu matengo 'o tagi toma ngowa-ngowa'a munara toma guḏa. Mada'a ananga 'u ca'olo 'ai sae'e re 'u dusu'u unanga.
5Ḏua guḏa ma dutu dadunu 'o siḏingoto 'ai budaka ma lelegu moju 'o tagi toma ngowa-ngowa'a munara toma guḏa gena-ge. Mada'a ananga 'u sengene unanga. So'o gena, ananga 'a'a tau-taunu rai budaka ma lelegu ma repe: Ma mamuni'a sanga ca'olo re ma mamuni'a ḏi'i 'aḏi sisengene. 6'A guna moju guḏa ma dutu 'o siḏingoto? Ḏuga-ḏuga soi'i tala 'ai ngowa'a nau'u masiretene, ga'a 'a dadalara. Dadi, unanga 'o siḏingoto 'ai ngowa'a nau'u gena-ge 'o tagi toma ngowa-ngowa'a munara toma guḏa gena-ge. Unanga 'o fikiri so'o ne: ‘Tantu ḏua ngowa-ngowa'a munara toma guḏa, ananga 'aḏi silamo'o 'ai ngowa'a nau'u.’ 7Mada'a ngowa-ngowa'a munara toma guḏa 'aḏi ma'u kanau matengo re matengo, ‘Unanga nena-ne 'o warisi ma gu-gu'u. Ino ngene wu sisengene unanga, la ngene wa sanga 'ai warisi!’ 8Dadi guḏa ma dutu 'ai ngowa'a nau'u, ananga 'u cako'o re 'u sisengene unanga; 'ai maiyeti ya upa'a toma guḏa ma di'anga.”
9Yesus 'o sano, “Guḏa ma dutu 'o 'a'a 'oru?! Tantu ḏua, unanga 'o sapolo re 'o sisengene ngowa-ngowa'a munara toma guḏa gena-ge, re 'o pula'a 'ai guḏa 'anggur toma ngowa-ngowa'a munara toma guḏa ma lelegu.
10Ngini mo-moini ni baca ḏua toma Boku 'Ofi-'Ofi ma dara so'o ne:
‘Maḏi gena-ge tukanga-tukanga 'a'a wala ya upa'a ḏua,
ma nyonyata maḏi gena-ge ri dadi maḏi ma re'u i'a di'a wala ma bangini.#Nya. 118:22-23
11Nena-ne Ma Jou'ongu Madutu 'ai munara,
ninga momina 'i rousu masala!’ ”
12Wakutu 'o Yahudi manga bi-biri'i ya 'isene 'ade-'ade gena-ge, ananga 'aḏi disa ngo'omo 'u cako'o Unanga. Sababu ananga ya waro 'ade-'ade gena-ge Yesus simeta-meta ra ananga (ananga ma tero sa'olo ngowa-ngowa'a munara toma guḏa re tukanga-tukanga 'a'a wala ya upa'a maḏi). Mada'a ananga 'aḏi mojongo ngowa'a repe. Dadi ananga 'aḏi tagi sisoi'i tala Yesus.
Yahudi manga bi-biri'i disa Yesus 'ai sala mangale fangu balastengi
(Mat. 22:15-22; Luk. 20:20-26)
13Ngowa'a Farisi nga muḏuo i'a re ngowa'a Herodes nga muḏuo i'a, 'aḏi sanga soma'a disa Yesus 'ai sala remanga so-sano—so-sano. 14Ananga 'aḏi sapolo ra Yesus re 'aḏi kanau, “Guru, ngomi mawaro Jou ngowa'a loasa re banari re no mete'e ua 'a guna ḇato 'ai mau, sababu no oḏi'i manusia ma tero. Mada'a Jou no doto'o rena sitaḇela'a i'a mangale Ma Jou'ongu Madutu 'ai 'akala ma mau. Na'o so'o gena, Jou siajele ra ngomi, ‘Na'o ngene wo mete'e nanga 'agama ma 'atoranga, ngene balasu wo fangu balastengi ra Kaisar bolo ua?’ ”
15Yesus 'a waro ananga gena-ge ngowa'a munafiki. Dadi 'a sangoro, “I'a sa'olo ngini mau ni disa Ngoi 'ari sala? Ino, ni sibaiti 'o pipisi salaka ngai moi.”
16Ḏua ananga 'aḏi pula'a 'o pipisi salaka ngai moi ra Yesus. Unanga 'o sano, “ 'A guna 'ai biono? Re lomanga 'a guna?”
Ananga ya sangoro, “Kaisar.”
17Yesus dadunu 'o kanau, “Na'o so'o gena, ta Kaisar pula'a di'a Kaisar; ta Ma Jou'ongu Madutu pula'a di'a Ma Jou'ongu Madutu.”
Ananga 'aḏi heranga ya 'isene Unanga 'ai sa-sangoro.
Mangale ngowa'a dadunu 'aḏi 'ahu moju toma ngowa'a senge-sengene manga sigolona
(Mat. 22:23-33; Luk. 20:27-40)
18'Age ngowa'a Saduki nga muḏuo i'a 'aḏi sapolo ino ra Yesus re 'aḏi mau sano. (Ananga 'aḏi ngaku ua ngowa'a dadunu 'aḏi 'ahu moju toma ngowa'a senge-sengene manga sigolona).#Som. 23:8 19Ananga 'aḏi sano ra Unanga, “Guru, 'a Musa 'o lefo hukumu di'a ngene so'o ne: ‘Na'o nau'u matengo 'o sengene kai ngowa'a ua; 'ai ioro bolo 'ai nongoḏu balasu 'a molo'ara balo gena-ge, la ngowa'a sengene nange-ge 'ai ju'uda 'i iranga awa.’#Dad. 25:5 20'I dadi ḏua, toma ngowa'a nau'u gena-ge gia nongoḏu nga tumudingi. Ma ioro ro molo'ara re 'o sengene kai ngowa'a ua. 21-22Gena ḏua, ma nongoḏu tala 'a molo'ara 'ai ioro ma balo, mada'a singadolo unanga 'o sengene kai ngowa'a ua ḏi'i. Gena-ge 'i dadi ḏi'i tai no-nongoḏu tala ma reta-reta'a singadolo nga tumudingi. Ma ḏo-ḏogumu tala, were'a gena-ge mo sengene ḏi'i. 23Toma 'orasa ngowa'a senge-sengene dadunu 'aḏi 'ahu moju, we-were'a gena-ge 'a guna 'ai were'a? Sababu munanga ma'u molo'ara mo-moini ananga nga tumudingi!”
24Yesus 'a sangoro, “Ngini ni rapu masala. Sababu ngini ni sahe ua do-doto'o toma Boku 'Ofi-'Ofi ma dara. Re so'o gena-ge ḏi'i, ni sahe ua Ma Jou'ongu Madutu 'ai kuasa. 25Sababu wakutu ngowa'a senge-sengene dadunu 'aḏi 'ahu moju, ananga manga 'ahu ma tero sa'olo mala'ekata toma soroga: bae na-nau'u bolo we-were'a, ananga 'aḏi molo'ara riwara. 26Ngini ni sahe ua 'a Musa 'ai boku 'i silefo pasala ḏua, toma balangu muḏuo i'a gena-ge 'i siajele mangale ngowa'a senge-sengene dadunu 'aḏi 'ahu moju. Wakutu 'a Musa oḏi'i goroa 'i leja-lejanga 'age Ma Jou'ongu Madutu 'ai iḏingi ma betongo ra Musa so'o ne: ‘Ngoi nena-ne Ma Jou'ongu Madutu ga'a Abraham, Ishak re Yakub 'aḏi silamo'o re siḏubuso.’ #Sup. 3:6 27Ngowa'a sengene 'aḏi silamo'o re siḏubuso yoḏu'u Ma Jou'ongu Madutu, pa'i ngowa'a 'ahu-'ahu ḇato nyengara 'aḏi silamo'o re siḏubuso Unanga.#12:27 Gena-ge ma ngale: Kalaha 'a Abraham, 'a Isak, 'a Yakub, ananga mo-moini raḏi sengene, ananga gena-ge 'aḏi 'ahu-'ahu moju ra Ma Jou'ongu Madutu 'ai biono! Ngini rapu masala!”
Parenta ma la-lamo'o ma re'u i'a
(Mat. 22:34-40; Luk. 10:25-28)
28Wakutu Yesus re Saduki manga bi-biri'i 'aḏi ma'u sano i'a re ino, guru 'agama ma lelegu matengo 'o 'isene i'a Yesus 'a sangoro tero-tero. Ḏua unanga 'o sano ra Yesus, “Parenta le'a lebe la-lamo'o ma re'u i'a reo parenta mo-moini?”#Luk. 10:25-28
29Yesus 'o sangoro, “Parenta ma la-lamo'o ma re'u i'a so'o ne: ‘Hei ngowa'a Israel na 'isene! Ma Jou'ongu Madutu, nanga Jou. Ma Jou'ongu Madutu pa'i matengo ḇato.#Dad. 6:4-5 30Dadalara Ma Jou'ongu Madutu, ninga Jou, reninga 'akala re sinyingara mo-moini, reninga nyawa mo-moini, reninga fikirana mo-moini, reninga de-de'e mo-moini.’#Dad. 6:4-5 31Parenta ma soi ḏiḏi, ‘Balasu ni dadalara ngowa'a lelegu ma tero sa'olo ni dadalara ninga diri masiretene.’ Parenta romoḏiḏi gena-ge, lebe la-lamo'o ma re'u i'a reo parenta ma lelegu.”#Im. 19:18
32Ḏua guru 'agama gena-ge 'o kanau i'a ra Yesus, “Tero mode'e: Ma Jou'ongu Madutu pa'i matengo ḇato; ma lelegu 'i cua.#Dad. 4:35 33Re balasu ni dadalara Ma Jou'ongu Madutu reninga 'akala re sinyingara mo-moini, reninga fikirana mo-moini, reninga de-de'e mo-moini. Re ḏi'i balasu ni dadalara ngowa'a lelegu ma tero sa'olo ni dadalara ninga diri masiretene. Enanga gena-ge lebe la-lamo'o i'a reo ngini ninga tau'u jou-jou re ni gasa jou-jou ma lelegu.”#Hos. 6:6
34Wakutu Unanga 'o 'isene guru 'agama gena-ge 'o sangoro 'i tero-tero, Yesus 'o kanau i'a ra unanga, “Ngana sa'i re no co-cori no osama Ma Jou'ongu Madutu 'ai Pareta.”
Dadi toma 'orasa gena-ge matengo i'a mai ua 'aḏi barani singadolo manga so-sano moju ra Yesus.#Luk. 10:25-28
Yesus 'o sano: 'O Kristus 'ai 'asala ra guna ino?
(Mat. 22:41-46; Luk. 20:41-44)
35Wakutu Yesus 'o doto'o ra Ma Jou'ongu Madutu 'ai Wala ma soana, Unanga 'o sano, “I'a sa'olo guru-guru 'agama, ananga 'aḏi kanau mangale 'O Kristus#12:35 bolo “ 'O Mesias” ne, 'Olana Daud 'ai ju'uda.
36Momongolo ua, Ma Ngagara 'Ofi-'Ofi 'i sigaraki 'Olana Daud singadolo unanga masiretene 'o kanau so'o ne:
‘Ma Jou'ongu Madutu 'o kanau Tari Jou#12:36: 'ari Jou ma tero sa'olo 'O Kristus:
No tegoro Tari giama ma kuwiḏa i'a
singadolo Ngoi ta 'a'a 'Ani lawa-lawana 'aḏi ta'aloko ra Jou.’#Nya. 110:1
37Dadi na'o 'O Kristus gena-ge 'Olana Daud 'ai ju'uda, i'a sa'olo 'Olana Daud masiretene 'o kanau 'O Kristus gena-ge, ‘ 'Ari Jou’?”
Ma'istiari taninga guru-guru 'agama
(Mat. 23:1-36; Luk. 20:45-47)
Ngowa'a repe ra Ma Jou'ongu Madutu 'ai Wala 'aḏi sanangi 'isene Yesus 'ai do-doto'o. 38Unanga 'o kanau ra ananga, “Ma'istiari ino taninga guru-guru 'agama. Ananga 'aḏi nyanyaḏi tagi-tagi mapake juba kiḏanga#12:38 Gena-ge, la ngowa'a ya'u waro ananga ngowa'a la-lamo'o. re 'aḏi nyanyaḏi ḏi'i ngowa'a ya'u silamo'o toma pasara. 39Ananga 'aḏi nyanyaḏi tegoro toma biono na'o toma wala puji re toma laya-laya. 40Ananga 'aḏi sihaga balo-balo, re ya'u ra-rabasa ananga manga 'ori i'a rana tamanga wala ma dara. Re ananga 'aḏi manyiata lai kiḏa-kiḏanga di'a ya damunu manga kajahatana.
Sababu gena-ge, Ma Jou'ongu Madutu ḏuanga i'a 'o sihukumu lai tubuso madutu ra ananga!”
Were'a balo ma dinga'unu ua matengo 'ami jou-jou
(Luk. 21:1-4)
41Wakutu Yesus 'o tegoro ra Ma Jou'ongu Madutu 'ai Wala ma dara 'o talaḏi i'a jou-jou ma burua, Unanga 'o tailako ananga 'aḏi pula'a manga jou-jou. Ngowa'a rema-enanga manga repe 'aḏi singosama pipisi lai lamo'o toma burua gena-ge. 42Ḏua were'a balo matengo mo sapolo ḏi'i, munanga ngowa'a ma dinga'unu ua. Munanga mo singosama 'ami pipisi pa'i seng ngai ḏiḏi. 43Mada'a Yesus 'o 'aro'o 'Ai me-mete'e re 'O kanau i'a ra ananga, “Ni ngaku mode-mode'e 'Ari demo-demo nena-ne: Were'a balo matengo ngowa'a ma dinga'unu ua, munanga mo singosama 'ami jou-jou lebe lamo'o i'a reo ananga mo-moini. 44Ananga mo-moini 'aḏi pula'a ra manga 'ori i'a rana pai-pai'i. Mada'a were'a balo gena-ge 'ami 'ahu 'i ma dinga'unu ua. 'Ami pipisi di'a munanga 'ami 'ahu masiretene mai mo pula'a ma simoini.”
Nke Ahọpụtara Ugbu A:
Markus 12: SNT
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
2015 © Indonesian Bible Society