Matius 12
12
Ye ndobot ye Yahudi bi kam sye, kam Sabat
(Mrk. 2:23-28; Luk. 6:1-5)
1Kam Sabat dik yo, ye Yahudi bi kam sye, Yefun Yesus muket os mo nggwe gandum mit. An do muket nggwe ne sa, An bi pakon on de ete do gandum bo, orete pakon git. 2Ye Farisi me suk gato Yefun Yesus bi pakon ben ne sa, án ki nai Yefun Yesus do, ”Nan me suk gato Nan bi pakon ben ne et. Án ben suk su kam sye kam Sabat gato siri kadit men bi sukduno-i ne.”
3Yefun Yesus ki do, ”Suk gato yeraja Daud si ye gato sisu Daud ben sugato án sino on de ne te, nin baca mó bado, nde e? 4Daud sok mo Yefun Allah bi nu, ete an si ye gato sisu an git roti gato yé grem kwop wa som Yefun Allah mone. Daud git roti ne, sarewo suk gato an ben ne siri kadit men ye Yahudi bi sukduno-i, we men bi sukduno ki do, yesu gato ben suk mo Yefun Allah bi nu ne sor ete git roti ne. {Sarewo Yefun Allah yo maskwa Daud mo suk gato an ben ne nde.} 5Sane dom kam sye kam Sabat bok ne sino, yesu mo Yefun Allah bi nu ben suk mo nu ne, sarewo je u anato ki do án ben suk siri kadit sukduno subot kam sye ne? Yo mo nde. Nin baca subot sukduno ne mo Musa bi sukdu mo nde bado? 6Wo Ji ki sare do, su ré Ji dakai, gato gum kok sye wai kadit Yefun Allah bi nu sisu nin kem more re. 7Yefun Allah bi sukdu ki do, ’Ji iwa nin dakai jimnotku ye yi neya ete ós an mone, Ji bariwa nin gre suge mo bot wa som Ji su.’ Nin do jam sukdu ne, bere nin yo ki pakon gane gum ibit nde, pa yo ben suk siri mo nde, 8we sare, Yetu bi Pa to Ji ré gum Yekwesu wa kam Sabat, sane suk gato Ji ki do, ndo wa yetu ben su kam sye, kam Sabat ne, kem mone it.”
Ye gato syim deyo út
(Mrk. 3:1-6; Luk. 6:6-11)
9Yefun Yesus mu kadit nat ne, ete An mu sok mo ye Yahudi bi nu ari. 10Mo nu ari ne yetu ge dik yo syim deyo út sok mone dom. Ye Farisi ge bok yo mone iwa syeret os wa ki Yefun Yesus gum ibit mo suk gato An ben ne, sane ye Farisi ne ki do, ”Men ben ye gato i ne ge su kam Sabat, gato ye Yahudi bi kam sye ne anato tepsu men bi sukduno-i, bado, siri kadit e?”
11Yefun Yesus ki nai án do, ”Men ge dik yo bi suksi ges mo bur wak su kam sye ne te, bere men bes kadit bur wak ne bado, nde, e? 12Men ós suksi, sarewo yetu anato ndo wai kadit suksi, sane men ós yetu su kam sye ne anato tepsu men bi sukduno re.” 13Orete Yefun Yesus ki nai ye gato syim deyo út ne do, ”Nan ron nan syim et!”
Ye ne ron an syim sa, an syim gato út ne ndo satu, tepsu an syim deyo ne. 14Wo ye Farisi maskwa, án mu kadit nat ne, ete án ku yu, án fro os wa gu Yefun Yesus kwop wé.
Yefun Allah bes Yefun Yesus tepsu bi pakwerut
15Yefun Yesus jam sukdu subot suk gato ye Farisi fro ne sa, An mu kadit nat ne. Yé mwa boribot An, An ben yé mwa ne sino gato i ne ge re. 16An syogat yé mwa ne do, ”Nin ki sukdu subot Ji nai ye yi jam nde.” 17Sane suk gato Yefun Allah tarubot yenabi Yesaya ne bor mone re. Yesaya krom do,
18”Ji bi pakwerut gato Ji bes anare.
Ji jimnotku An, Ji mit iwa An
Ji Gen bere bok nggwa mo An,
bere An ki sukdu subot os ndo gato Ji fro ne nai yewis mwa ne mo bur ré sino jam.
19Bere An yo duwer nje nde, An yo saiye ret nde,
Bere An yo ki sye mo pe gato yé mwa ti nde.
20Bere An ben An bi suk-i njep su ye gato yo nggi nde, An yo syat es mis gato tu nde.
Sukru gato yo ru nggi nde, An yo te nde.
An ben sukndo sane sor os ri-roi gato An kak ne fro re,
21ete bere yewis mwa ne mo bur ré sino bi sukjimnut kem pe mo An.”
Sukdu subot Yefun Yesus si Beelzebul
(Mrk. 3:20-30; Luk. 11:14-23)
22Ye gwat yetu ge dik yo ma mo Yefun Yesus. Ye ne gro ndu, an mbut, an yo ki suk ndo nde, we semda bok nggwa mo an re. Sane Yefun Yesus ben ye ne ge, an gro ndo satu, an ki suk ndo dom re. 23Yé mwa mone yeket suk gato Yefun Yesus ben ne. Yé mwa ne ndo mo yu do, ”Ye gato bi amui mo yeraja Daud, gato Yefun tom do, An syogat ma wa ós men ne te, anato ma it ré, bado?”
24Sarewo ye Farisi jam sukdu gato yé mwa ki ne sa, ye Farisi ki do, ”Beelzebul gen pet mo Ye ré anato An nggiwa syun semda wé kadit nje. Beelzebul gato biris bi yekwesu ne anato syo suktinggi nai An.”
25Yefun Yesus jam ye Farisi bi sukjimnut ne sa, An ki nai ye Farisi ne do, ”Yé gato kem mo bur dik yo, maskwa ket yu, ete gu yu yo, bere án yo kem ndo su yu o nde, bere án ibit or re. Sane dom, yetu mo kota dik yo si yé mo rus dik yo do maskwa ket yu, ete duwer yu yo, bere yé mo kota si rus ne yo kem ndo su yu o nde, bere án ibit or re. 26Sane dom, mo biris bi yekwesu bi rus-i, semda e, aboksye e, yerom e ne duwer yu ete deyo syun deyo, bere biris bi yekwesu si an bi rus-i yo kem ndo su yu o nde, wo bere án sino ibit mo koirut or re. 27Nin ki do, Ji syun semda su Beelzebul bi suktinggi, sarewo ye gato simo nin syun semda su suktinggi kadit u ne? Men me suk gato ye gato simo nin ben ne, anato men jam do, sukdu gato nin ki ne, siri re. 28Ji syun semda su Beelzebul bi suktinggi nde, wo Yefun Allah Gen gato mo Ji mit ne anato ben Ji nggiwa Ji syun semda, sane anato nin jam do, Yefun Allah bi suktinggi tepsu Yekwesu gato nggi wai bor it anare. Yefun Allah ma jowa yetu mo bur ré it.”
29Sane Yefun Yesus gwat sukamno do, ”Men ku os wa men sok mo ye gato kaim nggi ne bi nu, ete syimsi an bi suk sa u ne? Men but an, ete men rai an krat su jamtu nyim wé yo, bere men ku os wa men syimsi an bi suk mwa mone.
30Ye gato mit dik su Ji nde anato tepsu ye gato bariket Ji re. Ye gato yo si Ji ben Yefun Allah bi suk-i nde anato tepsu ye gato ben suk gato Ji ben ne ibit or re. 31Sane Ji ki sare do, sukibit gato men ben si sukibit gato men kiket Yefun Allah gum ne bere Yefun Allah yo maskwa men mo suk ne o nde, Yefun yo nutbot o nde, wo sukibit gato ye kiket Yefun Allah Gen, bere Yefun Allah yo misyar nde, wo Yefun Allah maskwa ket ye ne pe sor. 32Ye gato ki sukdu kwa yo ibit ket Yetu bi Pa yo, bere Yefun Allah misyar sukibit ne, An yo nutbot o nde, wo ye gato ki sukdu kwa yo ibit ket Yefun Allah Gen yo, bere Yefun Allah yo misyar nde, wo An napawa pe sor su kapre mato kapyo.”
Kwe si i-bo
(Luk. 6:43-45)
33Yefun Yesus ki nai ye Farisi bok ne o sare do, ”Men me kwe gato i-bo ne ndo yo, men jam do, kwe ne ke dom ndo. Sane dom, men me kwe gato i-bo ibit yo, men jam do, kwe ne ke dom ibit. Sane men jam kweke ne kadit i-bo gato men do ne. 34Nin anato kidar suk tepsu kwis jan, nin mit si nin onyar ibit, sane bere nin ki suk gato ndo sa u ne? Suk gato men ki ne bere syesyar kadit men mit si men onyar fe! 35Ye gato mit si onyar kwo ndo ne, kadit sukndo mwa gato an sum mo an mit ne, suk gato an ki ne ndo dom, wo ye gato mit si onyar ibit ne, kadit sukibit mwa gato an sum mo an mit ne, suk gato an ki ne ibit dom re.
36Ji ki sare do, su kam gato Yefun Allah ndobot yetu mwa ne sino, bere Yefun Allah ndo men subot sukdu kwayo-kwayo gato men ki daret ne sino re. 37We sare, bere Yefun Allah watbot sukdu mwa gato men ki ne. Sukdu gato men ki ne ndo yo, bere An iwa men mo sukdu ne, wo sukdu gato men ki ne ibit yo, bere men ku sukye mo sukdu ne.”
Yé Farisi ndekwa Yefun Yesus ben suk gato ben yé yeket
(Mrk. 8:11-12; Luk. 11:29-32)
38Yeguru ge bok yo si ye Farisi bok ne ki nai Yefun Yesus do, ”Yeguru, men iwa Nan ben suk gato ben Yefun Allah bi suktinggi ne bor wa men me et.”
39Yefun Yesus ki do, ”Mban! Nin yé gato ben nin bi suk-i ibit wai, gato kem mo bur su ré te, nin werwa Ji ben suk yo wa ben Yefun Allah bi suktinggi bor e? Ji yo ben suk sane mo nin gwem nde. Sarewo tepsu Yefun Allah ben An bi suktinggi bor wa yenabi Yunus, bere An waii ben sane o wa nin me et. 40Tepsu Yunus kem mo boge sye on mit kom mo noru gri yo, kam gri yo, bere Yetu bi Pa waii kem mo bur ré desnak kom mo noru gri yo, kam gri yo. {Sane bere nin me Yefun Allah bi suktinggi bor mone.} 41Su kam gato bere Yefun Allah ndobot yetu mwa ne sino, bere ye Niniwe si nin sun sino ete ki nin gum ibit, we án jam Yunus bi sukdu-i sa, án brek kadit os ibit ete án jammo Yefun re. Ji gum-i kok sye wai kadit Yunus gum-i ne, sarewo nin yo jammo Ji bi sukdu nde. 42Su kam gato bere Yefun Allah ndobot yetu mwa ne sino, nggon pasye kadit bur nden si nin sun sino. Bere nggon ne ki nin gum ibit sare do, ’Ji ma kadit os syu mu ku yeraja Salomo subere ji jam Salomo bi sukdu-i gato kru. Sarewo Ye gato jam suk mwa wai kadit Salomo si nin kem sino, ete nin misyar An re.’ ”
Semda satu ma o
(Luk. 11:24-26)
43”Ye do syun semda titi wé kadit yetu ge dik yo it yo, semda ne mu meret nat wa an kem mó. Semda ne mubot pe gato syur yo mo nde, semda meret nat yo ndo wa an sem mó. An yo ku nat yo tep nde yo, 44an nut mo an syidem do, ’Ji satu mu mo ye gato tomga u ye syun ji kadit ne et.’ Semda do mu kom mone sa, an me ye ne tepsu nu gato ye fre kwo, ete ye fro suk mwa mone sisu ndo it. 45Sane semda ne kendo semda ge mufit yo o gato mise wai kadit an sisu an mu kem mone dom. Semda bok ne ma, án sino bok nggwa mo ye ne. Sane kom mo rut sa, ye ne ibit wai kadit ketke ne o re. Sane dom, nin yé gato ben sukibit bu gato kem mo bur su ré, kam sari ne ma bere nin ibit wai kadit ketke ne o re.”
Yefun Yesus bi im si bi nji
(Mrk. 3:31-35; Luk. 8:19-21)
46Yefun Yesus si nje mone nuk sukdu saresa, Yefun Yesus bi im si bi nji ne ma. Yefun bi im si bi nji ti mo nu de nden, án iwa nuk sukdu su Yefun Yesus. 47Sane yé mwa mone, ge dik yo ki nai Yefun do, ”Nan bi im si Nan bi nji ti mo nden, án iwa nuk sukdu su Nan.”
48Yefun Yesus ki do, ”Je u anato tepsu Ji bi im ne? Je u anato tepsu Ji bi nji ne?” 49Sane Yefun Yesus kadum An bi pakon su An syim ete An ki do, ”Ji bi im anare. Ji bi nji anare. 50Ye to ben an bi suk-i tepsu Ji bi Ai mo gu mit anato tepsu Ji bi nji e, Ji bi nyanggon e, Ji bi im e ne.”
Nke Ahọpụtara Ugbu A:
Matius 12: KGR
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
@LAI 2004, 2014