MATIUS 15
15
Uku nga hadha ama-appu
(Mrk. 7:1-13)
1Hekewolo do Farisi nga do parri ddau guru aigama ngati Yerusalem ta dakka ke la nga Yesus. Ta kebhali ke ro pa Yesus, 2”Ta nga ne ana hekola Au he, hakku jhalle-kerupe ne uku nga hadha ama-appu di? Ki dhai ro ta nga'a, adho do lonye raui uru jhara pedutu nga hadha ama-appu di!”
3Ta bhale ke ri Yesus, ”Jhe ta nga lema mu hakku jhalle-kerupe ne lipareda Deo, rowi do ddhei mu ta pedute ne uku nga hadha ama-appu mu? 4#Kel. 20:12, 21:17; Im. 20:9; Ul. 5:16 Rowi do lii Deo, ’Takka we pekerihi ama nga ina mu’, jhe, ’Nadu do kara nga menihi ama nga ina no, do jhamma ta wole pemade no.’ 5Tapulara wie ri mu ne liajha: kinga lii ddau pa ina nga ama no, ’Ne nga ne do jhamma ta wie ri ya pa ama nga ina, alle ke ri ya pe jhole pa Deo,’ 6moko ne ddau do na po anne adho ke do tenge ri ta takka pekerihi ina nga ama no. Hakku uku nga hadha ama-appu mu ta pehewa'o ke ri mu ne lipedao Deo. 7Mu hedhe do potedo appi tarra! Do petu tarra ke ne do pedare ri Yesaya ne jhara lua mu, do mina hedhe,
8 #
Yes. 29:13
’Mina hedhe ke ne ane Deo:
Ddau-ddau do na hedhe ne wie hu nga mejura pa Ya
wata ke pa kuri-nyoro he we,
tapulara ne ade ro do jjhau ngati Ya.
9Parahuma he we ro ne wie hu nga mejura pa Ya,
rowi lai do peato ri ddau raiwawa we ne do ajha ri ro
jhe ne na poharre do ege ta mii lai do peato ri Ya ke.’ ”
Lai-lai do perue-petaru ddau
(Mrk. 7:14-23)
10Ta pedoa ke ri Yesus ne ddau-ddau do na harre, jhe lii pa ro, ”Dhanno kowe ri mu, mita ie mu ta tada. 11Ne do maho la dhara ubha, nara dho ta perue-petaru ddau, titu wata ke do mahhu ngati dhara ubha ne we ne do nara ta perue-petaru ddau.”
12Moko ta dakka ke ne ana hekola Yesus he, jhe lii pa Yesus, ”Toi ri Ama ne do Farisi he hhei do hala pa dhara, ta dhai ta rangnge ri ro ne lipedai Ama ne do mina harre?”
13Ta bhale ke ri Yesus, ”Naajhu do nami do adho do halle ri Ama Ya do era pa era do mmau do megala ne do ta bhete. 14#Luk. 6:39 Bhole pedhuli nga do Farisi he. Ro hidhe kattu-kattu do bhaddu, jhe ki do bhaddu pera'u do bhaddu, moko do ta bunu la dhara ro'a.”
15Ta lii ke Petrus, ”Ruba ko we ne dhara Ama ta peteleo ko ne lipehakku do naanne pa jhi.”
16Ta bhale ke ri Yesus, ”Tada dae dho mu? 17Ta do dho toi dae ri mu, ta ne do maho la dhara ubha, jhe dalle la dhallu, do ta mahhi-anni la kejhunga? 18#Mat. 12:34 Tapulara do mahhu-anni ngati dhara ubha, do dubhu ngati dahra ade, napoanne ke ne do ta perue-petaru ddau. 19Rowi ngati dhara ade ke dubhu ne lua-lua penge do woapa, do pedidi ddau ta pemade ddau, kenyo-langa-huka, ta tao ne lai-lai do woapa, loi-mena'o, wie ne lilolo do pote do appi nga kara menihi ddau. 20Lai-lai do na harre ke ne do perue-petaru ddau, addho taga tari nga'a ri ruai do dho lonye ne.”
Lua manno heddau mobanni do Kanaan
(Mrk. 7:24-30)
21Ta alla pemina harre ta pekaddhi ke Yesus ngati era do naanne, jhe kako la ihi rai do peumu nga rae Tirus nga Sidon. 22Heddau mobanni do Kanaan ngati ihi rai do naanne, ta dakka ke la nga Yesus nga peka, ”Wo Ana Daud, ruba kowe ne dhara Au nga ya! Nnei ne ana ya do mobanni, do lakka ri wujhu. Nnei do dhai hedui tarra no.”
23Bhale dho ri Yesus ne liami mobanni do naanne. Ta dakka ke ne ana heko Yesus he la nga Yesus, jhe ame No, ”Ama, lii kowe pa mobanni do na nidhe ta langnga ti dhe. Wata ke no ta pee nga toli we pa kejhunga di!”
24Ta bhale ke ri Yesus, ”Ya dhe ne pepue wata ke ma nga do Israel we miha, rihi-rihi ma nga ro do huli do teballi he.”
25Ta dakka ke ne mobanni do naanne la nga Yesus jhe mejura pa hedhapa No jhe lii, ”Ruba ko we nga ya Muri yaee.”
26Ta bhale ke ri Yesus, ”Jhamma dho ta aggu nga'a unu naiki jhe ligo wie ngaka.”
27Ta bhale ke ri mobanni do naanne, ”Do petu Muri yaee, tapulara ngaka lema do jhamma ta nga'a ne tebui do ngati meja muri no.”
28Moko ta lii ke Yesus pa no, ”Ina, do dhai tarra ne mone-ae lua manno nga kaho au! La'a we no, jadhi we mina mii ne do ddhei au ma!” Pa dhara we naanne dhangnge ta ie ke ne ana mobanni do naanne.
Ae ddau do paddha do peie ri Yesus
29Ta pekaddhi ke Yesus ngati era do naanne, jhe narru No ore ngidi Eilobo Galilea. Ta ha'e ke No la kolo bhojo jhe mejaddhi No paanne. 30Ae ddau do dakka la nga No, nga aggu ddau do padha kai, do bhaddu, do made heatta, do bhangnga nga ae ri ko do paddha do wala he ri. Ta la takka ke ri ro ne ddau-ddau do paddha he la hedhapa Yesus. Ta peie ke ri Yesus ne ddau-ddau do na harre. 31Ne ddau lowe do era pa anne, ta madalae tu-tu ke, ta ngaddi ri ro, do bhangnga nara ke ta pedai lii, do kai ie ke, do made heatta nara ke ta kako, do bhaddu nara ke ta ngaddi. Ri do mina harre ke ta wue-waje ke Deo do Israel ri ro.
Yesus penga'a do appa tabbha ddau
(Mrk. 8:1-10)
32Ta alla pemina harre ta pedoa ke ri Yesus ne ana hekola No he, jhe lii No pa ro, ”Ta alle we ne dhara ya penaja nga ddau lowe do na hedhe. Tallu lodho ke ro ne hela'u-la'u nga Ya, jhe pa dhara awe nadhe bhule dho ke ro nga nga'a nginu. Dhae dho ri ade ya ta pebhale ro nga menganga, meda'u ya ta keloli ro pa rujhara kako.”
33Ta kebhali ke ne ana he pa Yesus, ”Pa mii ke di ne nara nga'a-nginu pa era do keliu-kejidho nadhe tu ddau do mina hedhe ne worawwu ae?”
34Ta kebhali ke Yesus pa ro, ”Henga ne ae roti do era pa mu?”
”Hee pidu bhue, nga parri ngi'u nadu'u naiki,” ne bhale ri ana hekola he.
35Moko ta lii ke Yesus pa ddau lowe he ta mejaddhi pa worai. 36Moko ta aggu ke ri Yesus ne roti do pidu bhue he nga nadu'u he, jhe peha'e No kolo lii ie-ae pa Deo. Ta alla pemina harre ta pipi-pipi ke ri No ne roti nga na du'u he, jhe wie pa ana hekola he. Ta la pebhagi-bhagi ke ri ro pa ddau lowe he. 37Ta nga'a ke ne ddau-ddau do na harre ta bbahhu le. Ta alla ro penga'a, ta pekupu ke ri ana hekola he, ne do rihi he, tobo pidu bhue hope. 38Ne ae ddau do nga'a he, momone ko we do appa tabbha ddau, adho dae do kire mobanni nga naiki.
39Ta alla pemina harre ta lii ke Yesus pa ddau lowe he ta bhale. No miha ta ha'e ke la hewue kowa jhe pekaddhi la ihi rai Magadan.
Nke Ahọpụtara Ugbu A:
MATIUS 15: LAIHVN
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye