MATIUS 22
22
Conto ra ibara mab̄oha ndiha nika
(Luk. 14:15-24)
1Ruma Isa nuntu walina d̄i dou mamboto kai conto ra ibara, 2nggahi-Na, ”Karaja'an Saroga, ka'ada'ana b̄une conto ra ibara ake: Sab̄ua dou sangaji katu'una ndiha nika d̄i ru'u ana monena. 3Sangaji ede kauna ada d̄ohona lao weha ao dou-dou ra'unda mai d̄i ndihakai ede. Pala dou-dou ra'unda ede wati ngawana mai. 4Edempara sangaji ede kauna lao wali adad̄ohona ma kalai. Nggahina d̄i siad̄oho: ’Ngoapu d̄i dou-dou ra'unda ede: Ngaha ra nono aka ndihakai wa'ura sadia. Capi, ro ana-ana capi nahu ma wancu mpore wa'ura sambele. Sara'ana wa'ura sadia. Santab̄e tamaipu aka ndiha nikakai!’ 5Pala dou-dou ra'unda ede wati kade'ena. Siad̄oho nalaoku aka karawi ndai menana. Ma sab̄ua douna lao aka omana, makalai nalao aka rawi ra'usaha ndaina, 6ro ma kalai walina wa'ura letoku ada sangaji ede, edempara b̄oe ra hadena siad̄oho. 7Wakatu ringa b̄a sangaji lampa rawi ede, sangaji ede nawancuku mbanina. Sangaji ede nggaduna tentarana d̄imahade dou-dou ma rahade adad̄ohona ede, ro ka'ana kota siad̄oho. 8Sawa'u b̄a ede ou b̄a sia adad̄ohona, edempara nggahina, ’Ndiha nika wa'ura sadia, pala dou-dou ra'unda wati patuna d̄i ru'u ake. 9Ake laopu aka ncai-ncai bari, ro unda kamboto podapu dou d̄imamai ara ndiha nikakai ake.’ 10Edempara adad̄ohona ede laona. Siad̄oho laona aka ncai-ncai bari, edempara kab̄orona samenana dou rarumpana ta aka, dou ma taho ro dou ma dab̄ae. Edempara b̄ini b̄a dou ma mai d̄i hid̄i ndiha nikakai ede.
11Sawa'u b̄a ede sangaji ede lu'u tio-tiona dou-dou mamai ede. Eda b̄a sia sab̄ua dou d̄iwoha ndiha ede ma wati kani b̄aju ndihakai. 12Edempara sia sod̄ina d̄i dou ede, ’Cina, b̄uneku loamu lu'u ta ake nggomi kai wati kanimu b̄aju ndihakai?’ Dou ede wati loana nggahi au-au. 13#Mat. 8:12, 25:30, Luk. 13:28 Edempara sangaji ede nggahina d̄i adad̄ohona, ’letopu ed̄i ra rima dou ake, ro paki ca'aripu sia d̄i hid̄i ma rindi, ta aka d̄imawara nangi ro susa ra ncoki.’ ”
14Edempara Ruma Isa kanggorina conto ra ibara ede ndake, ”Mboto d̄i ou, pala sato'impa rakad̄ale.”
Mab̄oha cola bea
(Mrk. 12:13-17, Luk. 20:20-26)
15Edempara dou-dou Farisi lao mafaka sama-samana b̄uneku siad̄oho loakaina kamab̄u Ruma Isa kai cara sod̄i-sod̄impa. 16Edempara siad̄oho kauna lao anamori d̄ohona d̄i Ruma Isa ro pila-pila dou anggota golonga Herodes. Dou-dou ede nggahina d̄i Ruma Isa, ”Pa Guru, madad̄oho b̄ade, Ita dou marombo, Ita ma tei kai mantiri ra rombo kane'e b̄a Ruma Hatalla d̄i ru'u b̄a manusia. Kai wati kade'emu fiki ra kananu dou makalai. B̄ara Ita wati ntanda kalaita dou. 17B̄ara ndedena, tanggahipu b̄a Ita d̄i madad̄oho: Rakaukai b̄a agama ndaita, sab̄ua loaku cola bea d̄i Kaisar atao wati?”
18Ruma Isa nab̄adeku makasu siad̄oho ma dab̄ae ede, ndad̄i Sia nggahina, ”Oe dou-dou ma ca'u coro-coro! B̄ab̄auku nggomid̄oho ne'ekaimu b̄ab̄u Nahu? 19Teijapu d̄i Nahu piti rakani b̄a nggomid̄oho d̄i colakaimu bea?”
Edempara siad̄oho mbeina d̄i Ruma Isa sab̄ua piti salaka. 20Sod̄i b̄a Ruma Isa d̄i siad̄oho, ”Gamba ra ngara cou ake?”
21”Kaisar,” cambe b̄a siad̄oho.
Edempara nggahi Ruma Isa d̄i siad̄oho, ”Nggara ndedesi, mbeipu Kaisar au rantau kaisar, ro mbeipu Ruma Hatalla au rantau Ruma Hatalla.”
22Wakatu siad̄oho ringana nggahi ra eli ede siad̄oho ndad̄i mbora akana. Edempara siad̄oho lao tu'u wi'ina Ruma Isa.
Masa'ala mori mbali sawa'u b̄a made
(Mrk. 12:18-27, Luk. 20:27-40)
23 #
Kis. 23:8
D̄i ainaina ede wa'u, mai pila-pila dou Saduki d̄i Ruma Isa. Siad̄oho eded̄u kalompo dou-dou ma nggahi b̄a one dou mawa'ura made wati d̄imamori mbali. 24#Ul. 25:5 ”Pa Guru,” nggahi siad̄oho, ”Musa ngoa ra teina b̄une ake: Nggara dou mone namadesi, ro sia wati ntauna ana, ari atao sa'e sia pab̄uaku nikana lab̄o dou siwe mbaru mboha ede, loakud̄u wara londo ra maina d̄i ru'u dou ma wa'ura made ede. 25Wara ntoina pidu dou sa'e lab̄o arina ma ngge'e ta ake. Ma sasa'e nika edempara madena wati ntauna ana. Edempara weina mambaru mboha ede tu'u wi'ina d̄i ru'u arina. 26Arina ede made rau wati ntauna ana. Lampa rawi ma sama ndad̄i rau lab̄o arina ma katolukaina. Ndede ncau-ncau sampe d̄i arina ma kapidukaina. 27Cumpukaina dou siwe ede rau made. 28D̄iwakatu dou ma made d̄ikamori mbali, wei couku dou siwe ede? B̄ara wekina piduna ede nawa'ura nika lab̄o dou siwe ede.”
29Cambe b̄a Ruma Isa, ”Nggomid̄oho makaliru poda, b̄ara nggomid̄oho wati loamu ka'ao Alkitab, ro kuasa Ruma Hatalla. 30B̄ara nakamori mbalisi dou mamade peade, siad̄oho wati d̄imanika wali, malaisi siad̄oho d̄imamori b̄une santika mala'eka aka saroga. 31Sab̄ua watipu iumu baca b̄a nggomid̄oho au ranggahi b̄a Ruma Hatalla mab̄oha dou mamade d̄ikamori mbali? Nggahi Ruma Hatalla, 32#Kel. 3:6 ’Nahuku Ruma Hatalla la Ibrahim, Ruma Hatalla la Ishak ro Ruma Hatalla la Yakub.’ Ruma Hatalla ede laina Ruma Hatalla dou mamade, Sia Ruma Hatalla dou mamori!”
33Wakatu ringa b̄a dou mamboto ede nggahi ra eli Ruma Isa, siad̄oho nawancuku sana adena d̄i ngoa ra tei b̄a Sia.
Parenta ma penti poda
(Mrk. 12:28-34, Luk. 10:25-28)
34D̄i wakatu dou-dou Farisi ringana b̄a one Ruma Isa nawa'ura ndawi dou-dou Saduki wati loana nggahi au-au wali, siad̄oho kab̄orona weki. 35#Luk. 10:25-28 Sab̄ua dou d̄i ade weki siad̄oho, eded̄u guru agama, nacobaku kamab̄u Ruma Isa kai sampu'umpa sod̄ina. 36”Pa Guru,” nggahina, ”parenta mab̄eku ma penti poda d̄i ade Hukum Taurat?”
37 #
Ul. 6:5
Cambe b̄a Ruma Isa, ”Meci ra ca'upu Ruma Hatalla Rumamu kai sapoda-sapodana ademu, kai samenana nawa ra sarumbumu, ro kai sara'a fiki ra kananumu. 38Edeku parenta ma wancu na'e ro mapenti poda! 39#Im. 19:18 Parenta ma kad̄uakaina masama lab̄o parenta sarambakaina ede: Meci ra ca'upu sasama manusia b̄une nggomi meci ra ca'umu sarumbu ndaimu. 40Sara'a Hukum Taurat rambei b̄a la Musa ro rangoa ra tei b̄a samenana nabi fu'una d̄i d̄ua mbua parenta ede.”
Masa'ala Sangaji Mambei salama
(Mrk. 12:35-37, Luk. 20:41-44)
41Wunga dou-dou Farisi mbuipu kab̄oro wekina ta ede, sod̄i b̄a Ruma Isa d̄i siad̄oho, 42”B̄uneku kananu b̄a nggomid̄oho mab̄oha Sangaji Mambei salama? Londo ra mai couku Sia?”
”Londo ra mai la Daud,” cambe b̄a siad̄oho.
43”Nggara ndedesi,” sod̄i b̄a Ruma Isa, ”B̄ab̄auku Roh Allah ngoana la Daud kauna pehe Sangaji Mambei salama ’Ruma’? B̄ara Daud manggahi,
44 #
Mzm. 110:1
’Ruma Hatalla manggahi d̄i Rumaku:
dohopu d̄ikompe wana-Ku,
sampe Nahu mandawi dou-dou ma musu Nggomi d̄ima'oko d̄i Nggomi.’
45Ndad̄i, nggara la Daud mapehe Sangaji Mambei salama ede ’Ruma’, b̄uneku loana Sia londo ra mai la Daud?”
46Wati wara kone sab̄ua dou maloa cambe nggahi Ruma Isa. Ro tampu'u ainaina ede, wati wara ma disa wali sod̄i au-au d̄i Ruma Isa.
Nke Ahọpụtara Ugbu A:
MATIUS 22: LAIBHP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
@LAI 2001