Malko 8
8
Yesu wayapa vyakulya antu ielfu zini
(Mt 15:32-39)
1Um-manda yalye fino iumba lyali ikulu kaili, nalyo lyaula ichakulya, wita alondeshi yaakwe, ayanena, ati: 2“Nakumbukila iumba, kuno yawa manda yatatu yatensi ponga nene na yatakwite ichakulya. 3Nene ngi nanti njalambalike yapite uku mang'anda yao, nayo yauzilizya vyakulya, yakukalila un-nzila, kuno yamwi yafumile ukutali.” 4Alondeshi yaakwe yaati: “Uwini angayapa ichulya cha kuti yalye yikute yoshi ya, na pa tuli apa nyika?” 5Wayatondosya, waati: “Muli ni mikate yinga?” Yaati: “Saba”. 6Wayanena iumba likale apansi. Nga pano yikala, atola mikate saba ilye, asamalizya aikunyola, apa alondeshi yaakwe, yayape. Nga yapa iumba. 7Yali ninswi nche; azipepelela, walanda, waati: “Yapini nazyo kwene.” 8Yalya yikuta; yakonganika ivikunyolwa vya mikate, iviyo saba. 9Na antu yano yalile yali elfu zini. Nga ayalambalika. 10Liyo kwene akwela um-wato ponga na alondeshi yaakwe, aya ku wilaya ya Dalmanuta.
aFaliseo yalusita ichilangizyo. Insasyo zya aFaliseo na Yelode
(Mt 16:1-4)
11Nga aFaliseo yafuma, yatampa ukupazyana nawe. Yasita kunali ayalange chilangizyo ukufuma umwiyulu, angi yalumwezya. 12Awayika um-mweso wakwe, ati: “Ku chani uluko lu lulusita ichilangizyo? uMwenemo ndumunena: uluko lu lutalulola ichilangizyo!” 13Wayasya wakwela kaili um-wato, ayu kumbalama. 14Yalatila kusenda mikate num-wato kwene musi, leelo wonga sile. 15Ayasunda, ati: “Lolini, chenjelelini insasyo zya aFaliseo ni nsasyo zyi Yelodi.” 16Yatondosyana akola na akola, kuno yasi ni mikate. 17Na Yesu amanya, ayanena, ati: “Uku chani mulutondosyana, kuno musi ni mikate? Muchili mumanye nanti kumanya? Chene! imyenzo yino imikomu? 18Mukwite amanso, mutalulola? Mukwite makutwi, mutalupulika? Nantu kwelengula? 19Pano nakunyozile imikate isano ilye nu kuyapa yalye elfu zisano, mwatozile iviyo vinga vizyuzile ivikunyolwa?” Yannena, yaati: “Ikumi na viili.” 20“Na ilye saba ukuyapa yalye elfu zini, mwasenzile iviyo vinga vivizyula ivikunyolwa?” Yannena, yaati: “Saba.” 21Wayanena, waati: “Muchili mumanye na li kwene?”
Yesu wapozya umpofu wa ku Betsaida
22Nga yaya uku Betsaida; yannetela umpofu, yampapata, kuti amwemye. 23Walema umpofu wiyo ikasa, wamfumya umunsi, answila mati um-manso, wamwikila makasa, wamtondosya, waati: “Walola chimwi?” 24Walolekesya mwiyulu, waati: “Nalola antu kanti viti vilupita.” 25Apano wamwikila kaili makasa yaakwe apa maaso yaakwe, nawe walola ningo, wawu mpuma, walola vyonsi ningo. 26Annena aye ku ng'anda kwakwe, alanda, ati: “Nantu umunzi utachipitana.”
Petlo wataka Yesu fino i Klisto
(Mt 16:13-20; Lk 9:18-21)
27Yesu afuma na alondeshi yaakwe, yaya uku mizi ya Kaisalia Filipi; nun-nzila atondosha alondeshi yaakwe, ati: “Antu yakuluntaka, yaati: nene wini?” 28Yannena, yaati: “We Yoane Kabatisha; yamwi yaati: We Elia, na yamwi: wewe unnina wi yakalausha.” 29Nawe wayatondosya, waati: “Nemwe mukuluntaka nene, muti: nene wini?” Petlo wannena, waati: “Wewe ulu Klisto.” 30Wayasunda yatanena untu amaswi yaakwe.
Yesu walanda machulo, infwa na kututuluka kwakwe
(Mt 16:21-28; Lk 9:22-27)
31Watampa ukuyasambilizya fino uMwana-ntu aluchula nu kukanwa na ikolo na ayikolo iyakapela na yakaandika, nu kumolwa; ichisila cha manda yatatu alututuluka. 32Nawe walanzile iswi liyo apatiswe. Petlo amsenda ukumbali, atampa kunnesya. 33Nga asenuka, alolekesya alondeshi yaakwe, achenzela Petlo, ati: “Yanga ku chisila chane, Shetani, kuno utalwelengula ayi Leesa, leelo aya antu.”
34Awita iumba ponga na alondeshi yaakwe, ayanena, ati: “Untu wensi wino alusita ukundondela, aukana unkola, autwike unsalaba wakwe, andondele. 35Kuno untu wino alusita ukufyusya upuma wakwe, aluulovya, nuntu wacha walovya upuma waakwe ukwizina lyane, niswi-zipe, wiyo aluufyusya. 36Kuno chingamwazwilizya chani untu ndi wapata insi yoshi na kaili alovye upuma wakwe? 37Nanti untu angafima chani aukulule upuma wakwe? 38Kuno untu wensi uwacha wandolela insoni nene na maswi yane, apa luko lu ulwa upundu na maifyo, uMwana-ntu alunnolela insoni untu wiyo, pano wacha wiza um-ukulu wi Tata ponga na yamalaika yaswepe.”
Nke Ahọpụtara Ugbu A:
Malko 8: FNT1988
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
New Testament in Fipa © United Bible Societies, 1988. Bible Society of Tanzania.