Dalaana 16
16
Saaray a Agaar : Límí Ismayel
1-3Abraam a Saaray homute Kanaan kíil sabboo yi ɓelaa lahray ri koy. Ndaa Saaray húmú lahte ñaami coosaanaꞌ Ésíp hínú Agaar. Saaray antee won ƴaali tih : « Fu otte biti Koo-Yahwee teeɓay soꞌ koy. Kon ɓeye ñaami soꞌ ɓeleɓ. Ɗi lah koy raa, mi hen yaafa book ! » Abraam tahte yee won Saaray ra. Ɗaaha, Saaray ɓeɓpe ñaami, yeɗte ri Abraam ɓeleɓ. 4Abraam ñéerëꞌté a Agaar, ɗi pokke loo. Yúhëꞌ Agaar biti pokke loo ra, ɗi wonlilay yin Saaray na.
5Tígí daaha, Saaray won Abraam tih : « Mi solute, te mi kelaay ro fu wonte yin doom. Daa mi yeɗ ɗo ñaami soꞌ ɓeleɓ fu ɓoppe ri ; ndaa yúhëꞌ rí biti ɗi pokke loo níinén, ɗi tíklílëy sëꞌ ow. Gété ! Yahwee ot yen na. » 6Abraam won Saaray tih : « Daa fu lahaꞌ ñaamu. Page ri yee neɓaꞌ ro ra. » Kolaꞌte baaha, Saaray mokil Agaar moklo níi Agaar hegohte saañce luufin.
7Malaakii Yahwee ɗeef ri luufa, hëbís culi mulaa hom waali Súur rë, 8meelte ri won tih : « Agaar ñaami Saaray, fu kolaꞌ di a fu saañ dih ? » Ɗi tahte won tih : « Mi hegoh hegoo faam Saaray yíkíi sëꞌ. »
9Malaakii Yahwee won ɗi tih : « Nimile faam yíkúu te lah ñeye woni. 10May roo keñil níi ow ii mín kín ɓëy talu. 11Fu pokke loo te fay lahee koy ƴaal ; lah dëekée rí Ismayel (daa ri : Koo keloh na), ndée homaꞌ fu súfúñ fú rë, Yahwee kelohte ro. 12Koohu ay made mbaam luuf nen wooñnjaꞌ. Ɗi ay tíkëꞌ af a ɓëewë ɓéeɓ, te ɓëewë ɓéeɓ ay rii haaꞌ. Di ay pesee a afi, ɗúh mboko yi na ɓéeɓ. » 13Agaar won nufi tih : « Kaah biti mi ot Koope tígí deh, ɗi na ot soꞌ a ? » Ɗi antee dëekëꞌ Yahwee fa won ɗii na ra El Roy (daa ri : Koope fa na ot soo na ra). 14Yii baa daa tah yéemë hom hanndal ki Kades a Beret ra na wonuu yéemí Lahaay Roy (daa ri : yéemë Koope fa na pes ɗa olaꞌ soꞌ na ra). 15Filoon fe, Agaar lahte koy ƴaal, Abraam boffa dëekëꞌté koy ka Ismayel. 16Abraam húmú lahaꞌ kíil sabay peeye a kíil pëenë (86) na lahu ɓani Agaar koy ki baa ra.
Nke Ahọpụtara Ugbu A:
Dalaana 16: NDV
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© Wycliffe Bible Translators, Inc. All rights reserved.