John 13
13
1O̱ki. A̱i̱tamaakitoʼtsstsiiwa amo̱ya o̱mahksiksistsikoyiia otsi̱tohkanaʼpssatoohpiaawa iihtsito̱ʼtsikamotsi̱i̱piaahpiaawa Egypt issko̱o̱htsika. Ki Jesus a̱kaissksini̱ma oka̱o̱ʼtsataʼpissi otsi̱taksiistapa̱atoohpi anno̱o ksa̱a̱hkoi, ma̱a̱hksskitapoohsi o̱nni.
O̱ki. Jesus iika̱komimmiiwa otsitapi̱i̱mataiksi anno̱o ksa̱a̱hkommi, ki a̱nnimayi otsopokamomi̱mmahsaiksi iihta̱i̱stamatsiiwaiksi ota̱nisttsiihpi. A̱nnohkai a̱kohtsitsinikioʼpa.
2O̱ki. Ki a̱nnikskaoʼkiaawa anni̱i̱ksiska annaahka Jesus, a̱ota̱ksoyiiyaawa. O̱ki. Oma̱a Judas, amoohka Simon Iscariot ohko̱yi, oka̱i̱ksimssta̱ttsooka Maka̱ʼpatoʼsiiyi ma̱a̱hksisimiomatskaahsii Jesusi.
3O̱ki. Jesus issksini̱nima otohko̱yissi o̱nni A̱ʼpistotookiiyi kana̱ʼpaisiistsi, ki issksini̱ma o̱mohtoʼtoohsi A̱ʼpistotookiiyi ki ota̱yaaksskitapoohsayi. 4Ki a̱nniayii sota̱mitsipo̱aoowa otsi̱ta̱aoyihpiaawa. Osa̱o̱tatsiisokaʼsiimistsi sota̱msaoʼtsimaistsi. Sota̱moʼtakiwa inna̱i̱ʼpisstsi, iihta̱i̱ssisskiohsoʼpi ki iihtsitsi̱ʼpssiwayi. 5Ki sota̱mitsapaʼsoyinnakiwa aohki̱i̱yi omi̱i ita̱i̱sapssisskiohsoʼpi. Sota̱momatapssiikaawaatsimiiwa oma̱nikapiimiksi ohka̱toawaistsi kii omi̱i otsi̱ʼpssatayi na̱i̱ʼpisstsi, a̱nniayii iihtssi̱i̱nomoyiiksi ohka̱toawaistsi omi̱i otsi̱ʼpssatayi na̱i̱ʼpisstsi.
6Kii ki ai̱toʼtoowa omi̱i Simon Peter. Oso̱tamanikkayi, “Kiisto̱wa kita̱i̱naaimato. Kiistowa kita̱kohkottsaissiikaawatsimoki.” 7Jesus itani̱stsiiwayi, “Kima̱tomaotsistapiʼtsiihpa nita̱waanisttsiihpi. I̱ssoohtsika kita̱kitohkottotsistapiʼtsiihpa.” 8Peter itani̱i̱wa “Ki kima̱tako̱noaissiikaawaatsimokihpa.” Jesus itani̱i̱wa, “Ikka̱msaissiikaawaatsimoiniki, kima̱tamihpa amo̱ksiska iihta̱i̱sapooyikska niisto̱i̱.” 9Oma̱a Simon Peter itani̱i̱wa, “Nitsi̱naaim, a̱nnohkayii sota̱mssiikaawaatsimokit. Ki mattsi̱tsstsimi̱yinnokit. Ki noʼtoka̱a̱ni.” 10A̱a̱niiwa Jesus, “Ki oma̱a a̱kayissiistsiwa na̱i̱sopoksiksikkaʼpssiwa. A̱ksikakssiikaawaatsimawa. Kiisto̱aawa kika̱i̱ksistsikkaahkaanistotootspoaawa. Itsstsi̱wa niʼtsita̱piiwa kiisto̱aawa ma̱tsiksikkaʼpistotoawa.” 11O̱ki, a̱a̱mohka iihtani̱i̱wa oma̱a Jesus otsi̱tsi̱kayissksinoahsi anniiska ota̱ksisimiomatskaokiska. A̱nnihkayii iihtani̱i̱wa, “Itsstsi̱wa niʼtsita̱piiwa ksiisto̱aawa ma̱tsiksikkaʼpistotoawa.”
12O̱ki. Ki a̱i̱ʼksistssiikaawaatsimiiwaiksi, kii itsska̱aksapsskaohsatooma osa̱o̱tatsiisokaʼsimistsi, ki itsi̱tsska̱akaoʼpiiwa omii ita̱i̱so̱oyoʼpi. Ina̱i̱ʼtanistsiiwa oma̱nikapiimiksi, “Kika̱taoʼtsistapiʼtsiihpoaawa a̱a̱mohka kima̱niksistaistama̱ttsoohpoaayihka?” 13O̱ki ki itso̱pooyaʼpanistsiiwaiksi ota̱nisttsiihpi. A̱a̱niiwa “O̱ki. Kita̱i̱sksanistainihkakkihpoaawa ‘a̱i̱ssksinimaatstohki’ ki ‘nitsinaaim’. Ki kitsi̱i̱ksoksinihkakkihpoaawa. A̱nniai tanista̱pssi. 14Issa̱ʼtsik. Kita̱i̱naimakkihpoaawa, ki niisto̱wa kita̱i̱ssksinimaatsoohpoaawa. Ki kimi̱skitssiikaawaatsimohpoaawa. Ki a̱nniai kanista̱i̱stamaatsoohpoaawa kita̱koohkattssiikaawaatsimotsiiyihpooawa. 15A̱a̱mohka kita̱i̱stama̱atsoohpoaawayihk ko̱mohtaistamaatsoohpoaawa ka̱a̱hkohtsawaisspimmohsattsiʼsoaayi 16Kitakanistohpoaawa niitsi̱i̱yi. Omo̱a a̱ʼpaoʼtomohkiwa ma̱toʼtsitsksspssiimiwa ami̱i ota̱ʼpaoʼtomoai. Ki ama̱a otohka̱ʼtaana ma̱toʼtsitsksspssiimiwa ami̱i otsi̱i̱ʼtohkakki. 17A̱nnoohka kika̱otsistapiʼtsiihpa amoohka kita̱i̱stamaatsoohpoayihka. Iika̱ksiʼta̱a̱maʼpiiwa kiisto̱aawa ikkama̱nistsipoʼtotoiʼtsikattsiiyinoainiki kanista̱i̱stainaatsoohpoaawayi. 18A̱nnohka anna̱a̱hkayii itsstsi̱i̱hpa nima̱tohtaiʼpoyiihpa. Ni̱tssksinoayaawa ni̱tssiikoʼtoaiksi. Ki ina̱o̱ʼkaya̱kanistsiiwa manistsi̱kayissiinaapsskohkatoohpi naato̱i̱si̱naakiaʼtsiistsi issko̱o̱htsika. A̱kstsinaaʼnistaisiwa. Itssi̱naiʼpa ‘Annaahka ni̱tohpo̱ksoyiimookahka nitsipo̱ʼtapa̱akka.’
19A̱nnohka kita̱a̱nistohpoaawa a̱a̱mohka a̱nnohka otsi̱tsoomaanistaisiihpi. Ki a̱nnimayii a̱nniika i̱ssoontsika aiksista̱nistsiisi ki kitsiitaʼpomaiʼtsiihpoaawa niisto̱akaoʼka anna̱a̱hka.
20O̱ki. Kita̱kanistohpoaawa niitsi̱i̱yi. Kana̱i̱tapiiksi i̱ksimatsimmiiksi nita̱ka̱niitskoaiksi nitsi̱i̱miksistaiksimatsimmokiaawa. Ki a̱a̱mokska nitsi̱i̱miiksistsiksimatsimmokiksi, annaahka nito̱ʼtsskookahka, A̱ʼpistotookiwahka a̱nniskaoʼkinai oni̱ʼtapiksimatsimmoaawayi.”
21O̱ki. Jesus, ota̱i̱ʼksistanistoohsi a̱a̱mohka sota̱mstonnatsikihki̱niʼtakiwa. Ki sota̱maniiwa “O̱ki. Kita̱kanistohpoaawa niitsi̱i̱yi. Iitsspi̱i̱htsiihpa kiisto̱aawa nita̱ksisimioma̱tskaoki.”
22O̱ki. A̱nniayii oma̱nikapiimiksi itoma̱tapahtoissammotsiiyaawa. Niita̱ʼpohtaʼpsskoohsiiyaawa taka̱a̱htaoʼtsi̱ksina̱yi.
23O̱ki. Jesus otsska̱a̱ʼkomimmayi oma̱nikapiimi, itapa̱pitsskaohsiiyinai. 24Ki oma̱a Simon Peter ita̱ʼpsstoyiiwa̱yi; itani̱stsiiwa̱yi “Anistsi̱sa Jesus tsika̱a̱htaoʼtsinai o̱mohtaiʼpoyihpi.” 25Kii ki ita̱akikaopiiwa sa̱a̱kiaitapapitsskaohsiwa omi̱i Jesusi. A̱a̱nistsiiwa̱yi, “Nitsi̱naaimi, taka̱a ko̱mohta̱i̱ʼpoyiihpa?” 26Jesus itanstsiiwa̱yi “Nita̱kitsapihtaki napayi̱ iihpa̱ooyoʼpi. Ki oma̱a nita̱yaakohkota̱wa, a̱nnaoʼka.” Ki a̱iʼtsapihtakiwa. Sota̱mohkotsiiwayi ami̱i Judas. A̱nniskaoʼkinai Simon Iscariot ohko̱yi.
27O̱ki. Oma̱a Judas opi̱i̱tsoohkoʼtsissi amo̱ya iihko̱tahpi, itsisto̱matsiiwa Maka̱ʼpatoʼsiwa. Otsi̱naiʼtanikka omi̱i Jesus, “Ni̱ʼtakianisttotsit.”
28O̱ki. Ma̱tsitsstsiihpa itsino̱piiwaiksi ma̱a̱hkssksinimi Jesus o̱mohtanistahpi Judas a̱a̱mohka. 29Ki anni̱i̱ksi niitsiksi̱msstaayaawa Jesus a̱a̱hkanistsiiwayi, “Mato̱o̱hpommaat a̱a̱hkohtsitohkooyoʼsi amo̱ya o̱mahksiksistsikoyia.” Ki mattsstsi̱kiiksi niitsiksi̱msstaayaawa a̱a̱hkanistsiiwa̱yi ma̱a̱hkotoohkotsiiwa ki̱mmatapssiksi. O̱mohtanistsiksimsstaahpiaawa takaa oma̱a Judas osto̱yi a̱o̱toitsikatoma otsi̱taisapinaanihpoaawayi ataksa̱a̱ksi. A̱nnihkayii iihtani̱stsiksimsstatoomiawa a̱a̱mostska.
30O̱ki. Oma̱a Judas a̱ʼohkotahsi omiihka naapayi̱nihka, sota̱msaksiwa. A̱kaikoʼkowa.
31Kii ki ota̱i̱ʼsakssi Judas Jesus itani̱i̱wa “O̱ki. A̱nnohkayii nita̱ksspipoʼtookoo; niisto̱akaoʼka annaahka Mata̱piiwahka. Ki A̱ʼpistotookiwa a̱kohta̱i̱sspipoʼtoawa niisto̱yi nita̱yaakanisttsiihpi. 32Ki a̱nnihkayii nita̱kohtsspipoʼtooka aa̱o̱ʼtootsiiniki. A̱nnohka a̱kayaakanisttotsima.
33O̱ki, no̱koʼsaki. Kita̱kattsiʼnaksisamohpokaʼpawaawahkaamohpoaawa, ki ta̱kitsiistapoo. Anni̱i̱hka nita̱a̱nistahpiaawa omi̱i̱ksi isto̱ʼtotamaʼpssiiksi Jews, a̱nnohkai kita̱koohkattanistohpoaawa. Kita̱kaʼpaissammokihpoaawa, ki kima̱takohkottsitoʼtoohpoaawa nita̱yaakitapoohpi.
34Ki a̱nnohka ki̱tohkotohpoaawa manoka̱kihtsimaani ka̱a̱hkanistaiʼtsissoaayi. A̱wakomimmotsiiyik. Kanista̱komimmohpoaawayi kita̱waanistohpoaawa ka̱a̱hkitotoisapakomimmotsiiyihpoaawa. 35Ikkama̱komimmotsiiyinoaainiki kana̱i̱tapiiwa a̱kohtoʼtssksinima kiisto̱aawa a̱nnikskaoʼkiaawa omi̱i̱ksiska tsi̱i̱maiʼtookiksi.”
36O̱ki. A̱nnika Simon Peter sota̱manistsiiwa Jesus, “O̱ki nitsi̱naaimi. Tsima̱a kita̱yaakitapo̱o̱hpa?” Ota̱a̱nikkayi, “Kiisto̱wa kima̱takohkottohpoʼkiiwoohpa a̱nnoohka. I̱ssoohtsika kita̱kitamitohkottohpoʼkiiwoo nita̱yaakitapoohpi.” 37Ki itani̱i̱wa Peter, “Ki, nitsi̱naaimi, nima̱ʼksaohkottohpoʼkiwoo a̱nnohka. Niisto̱wa nima̱taksstsimohtahtsowaiʼnihpa kiisto̱wa.” 38Jesus itani̱stsiiwa̱yi, “Kita̱i̱pahtaʼpssi. Kita̱kanisto niitsi̱i̱yi. Saoma̱o̱hkomisi ni̱naiʼtawa̱aki kita̱ki̱tsoohksskaanii kitsa̱i̱ʼssksinookssi.”
Nke Ahọpụtara Ugbu A:
John 13: BLA1979
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Translated by Wycliffe Bible Translators. Published by the Canadian Bible Society 1979.