VPHAUNGC VYAUNGC 9
9
Noa rulc Vtaq Tishox Bomkhvrc
1Tishox rueq Noa nac sahez muex ruimruimx kuq vtueq vkhoc jungx tueq, “Nuimshiq sahez paunghvlc pux paung kuinz, kvkaq nuimshiq suiuz vsaz htenc ghaq htauk baung ruip saz nuex httax wvnc wuez tuinx.#V.V 1:28 2Ngvmx saz, wushawx, ngaq lotlaz kuex nuimshiq muex hiyaz wuez tuex. Kvruex yungsuiuz yawxsaz htenc kuex nuimshiq luimc kawc khung nuex rvtueq. 3Majuiuc pulx thuey namx yauk htenc phauk saq vshuinx kvkhoc, nuimshiq rueq kvhtenc kvruex phuiuz svy mvy yaq; kvhtenc kvruex lotlaz kuex nuimshiq rueq phuiuz svy tvkoc ngaz rueq kuq vphaungx. 4Nuimshiq rueq phuiuz svy mvy muq phvnx phvnshiz httax yaq, kvruex kuex tvguiy rvshot yaq ngvmx rvtueq; yvmx khoc lac ngoz ruiux lec tvguiy nuex thuiuzthuic httax yaq ningkhvnc nuex rvtueq.#Lew 7:26,27; 17:10-14; 19:26; Tvrac 12:16,23; 15:23 5Washiz shiz rueq miq thuiuzthuic thvt gay ruiux yuq piq kuex murx gurx shuex, miq thvy gay jix ngvmx saz kuex ngaz rueq vthueyc tvrvhumc shaungx. 6Miqsaz kuex Tishox ikhoc tvdung sung taq tueq ningkhvnc nuex, miq thvy gay jix ukhaq yuq muinz miq rueq thvy gay rvhumc tuex.#Dw 20:13; V.V 1:26
7“Nuimshiq rueq nuingc vnox paunghvlc lvp shuinx, kvkhoc rvtueq nuimshiq suiuz vsaz htenc kuex ghaq htauk baung ruip saz nuex httax wvnc wuez tuinx,” ngoz tueq jungx tueq.#V.V 1:28
8Tishox rueq Noa nac sahez muex ngoc, 9“Ngaz rueq majuiuc ngvy bomkhvrc tvhungx vshaungx vruex kuex nuimshiq muex muinz, nuimshiq suiuz vsaz muex muinz, 10svngpholix mungx wawc nuimshiq rulc vdvmz dung kaz naungx tueq, tvraungx httax yaq phvnx lotlaz, wushawx htenc nuiyc ngvmx saz lotlaz tvkoc muinz rvtueq. 11Vruex bomc htenc vrulc vdvmz nuex ngvy bomkhvrc kuex nuimshiq rulc ngaz rueq taq vshaungx: kvruex kuex yuix htuip yuix nyuing ningkhvnc nuex tvraungx httax yaq phvnx lotlaz tvbac gay kuex mkaq muinz rvhumc muq shex nuiyc yuix htuip yuix nyuing maq ghaq kuex mkaq muinz tvbac yek mauk shex ngoz tueq bomkhvmc kuq vshaungx. 12Mnoz rulc vdvmz tvraungx httax yaq phvnx lotlaz rulc ngaz rueq taq vshaungx pattup nuex seng yaq bomkhvrc tvtsuingc juing kuex, 13phuemx htenc nuex ngaz rueq mvlx thuingx taq shec vshaungx. Kvruex kuex mungkawx vyuq taq shec vshaungx ngvy bomkhvrc tvtsuingc juing rvtueq. 14Ngaz rueq raungx tvbuingc vtueq mvlx thuingx kuex phuemx nuex dung tuex nuex, 15tvraungx httax yaq phvnx lotlaz kuex yix maq laukshiz yuix rueq luimz vtueq batac yek muq shex ngoz tueq, nuimshiq nuiyc ngvmx saz phvnx htenc muex ngaz rueq taq vshaungx bomkhvmc kuex rvwvl lvp shaungx. 16Phuemx nuex mvlx thuingx dung ruiux yuq, kvruex ngaz rueq lawc vtueq, ngaz nuiyc ghaq htauk wawc tvraungx httax yaq phvnx lotlaz rulc vtaq pattup nuex seng yaq bomkhvrc kuex rvwvl lvp shaungx. 17Vruex kuex vtvraungx httax yaq phvnx lotlaz rulc ngaz rueq vtvtsuingc juing vtaq bomkhvmc rvtueq,” ngoz tueq jungx tueq.
Noa nuiyc Vsaz Miqwaz Sahez
18Svngpholix wawc dung kaz tueq Noa sahez kuex Shem, Ham, Japhet rvtueq. (Ham kuex Kanaan muex vwaz rvtueq.) 19Noa sahez wathuimx kuex ghaq htauk nuex httax yaq miqphvnx lotlaz muex vjix vwaz tamx rvtueq.
20Noa kuex wuik yauk shuimc svy jix washiz rvtueq ningkhvnc nuex svpiq sunc kuex vphaungc shauk shauk khic yuingc jix waz rvtueq. 21Piq rueq svpiq tix kuex nuingx ruiux pawx vtueq vkhoz vkhvy htenc puk gay ruiux tap nuex sawkumx maq woalc tueq. 22Kanaan muex vwaz Ham rueq vwaz sawkumx woalc yaq kuex khiz tueq, piq kuex kanphic nuex dung kaz vtueq vphuz nuiyc muex jungx kaz tueq. 23Kvkaq Shem nuiyc Japhet rueq khvyhtumc vshiz kuex miqmac phauk luimx nuex tvdaungc lvmz wvnc tueq. Tsuingnueyc kuex tap mungx kvyuq yix tv-nungx kox maq nyuip vtueq, vwaz muex khvy kuex tvsvmc kuq tueq, vwaz sawkumx woalc yaq kuex khiz muq tvkoc htvlx phawc wek wvnc wuez tueq. 24Noa vpawc shiz vtueq tsuing wvnc koq tueq, vsaz noyix waz rueq piq muex guirguenz tueq kuex tuiuz vtueq, 25piq rueq,
“Kanaan kuex mvnhttonc mrvhumc kueq!
Piq kuex vphuz hez kox nuex dax muex m-yaungx kueq.
26Shem Tishox Yehowa kuex mtvtsvmc wuez shueq!
Kanaan kuex Shem dax muex m-yaungx kueq.
27Tishox rueq Japhet#9:27 Japhet: Vruex muingc kuex Hebre maq “mpux paung wvnc kueq” ngoc kvjaz rvtueq. muex mtvpaungc yaungc kuq shueq!
Piq suiuz vsaz kuex Shem miqsaz rulc vdvmz nuex mhttax naungx kueq!
Kanaan kuex Japhet dax muex m-yaungx kueq,” ngoz kuq tueq.
28Yuix htuip yuix nyuing yix maq Noa kuex wawc 350 httax yek vtueq, 29piq rullungx 950 nuex thueyc tueq.
Nke Ahọpụtara Ugbu A:
VPHAUNGC VYAUNGC 9: HNOT01
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Hawa Naga Bible © Bible Society of Myanmar, 2014.