VPHAUNGC VYAUNGC 7
7
Yuix Htuip Yuix Nyuing tueq
1Yehowa rueq Noa muex ngoc, “Nuimshiq yuimx wuinz lotlaz kuex svngpholix nuex nyuip wuez kuinz; mungkawx vyuq vlvmx yauk shuimc jix mnoz washiz dvyx rvtoq kuex ngaz rueq khiz vphaungx. 2Mnoz rulc vdvmz vsawc ngvmx saz phvnx htenc phvnx shiz wawc rvguip mvshix shix kuex htawc shuiuz, sawc muq phvnx ngvmx saz kuex phvnx shiz wawc vkuiux vlaz rvguip shiz phok dvyx htawc shuiuz. 3Wushawx phvnx ruip saz wawc rvguip mvshix shix htawc shuiuz. Kvkhoc shuimx shuiuz, ghaq htauk vyuq pux paung wvnc tvkoc ngvmx saz phvnx ruip saz nuiyc wushawx phvnx ruip saz htenc kuex tvraungx httax tuex. 4Majuiuc vmaq raungx mvshix httax ruiux yuq, raungrok bvlic tup raungnuiyq raungwvrx ghaq htauk vyuq ngaz rueq raungx tvyunc shaungx, kvkhoc raz tueq tvdungc sungc vruez tvraungx httax yaq phvnx lotlaz kuex tvbac gay shaungx,” ngoz tueq jungx tueq. 5Noa rueq muinz Yehowa rueq nvr tueq rulc rv-ngvlc phvnx ruip saz shuimx kaz tueq.
6Ghaq htauk nuex yuix htuip yuix nyuing waung tueq nuex Noa kuex vrullungx wawc 600 shex rvtueq. 7Noa nuiyc vtaungx nyuiuz, vsahez nuiyc vnvmx nyuiuz hez kuex yuix htuip yuix nyuing mungx kvwawc dungc wvnc tvkoc svngpholix nuex nyuip waung wuez tueq.#Mat 24:38,39; Luk 17:27 8Tishox rueq nvr tueq rulc rv-ngvlc, vsawc nuiyc sawc muq ngvmx saz phvnx ruip wawc muinz, 9wushawx htenc wawc muinz, vkuiux vlaz vnueyc phok Noa rulc vdvmz svngpholix nuex nyuip waung wuez tueq. 10Raungx mvshix httaz yix maq yuix htuip yuix nyuing waung tueq.
11Noa rullungx wawc 600 mvrc tueq raungwawc, lex nueyc yapix raungx rokshiz rac raungx mvshix raungnuiyq, ghaq khung nuex httax yaq yuix nyuiuz jungx wawc yuix htenc phuk tueq, raungwawc yuix kaluix htenc muinz lotlaz kvdaz vtueq,#2Pet 3:6 12ghaq htauk nuex raungx 40 tup raungnuiyq raungwvrx raungyunc duiz htuiuz yunx tueq. 13Kvruex raungnuiyq kvkaq Noa nuiyc vtaungx nyuiuz, vsaz wathuimx rvtueq Shem, Ham, Japhet nuiyc tsuingshiq taungnyuiuz hez kuex svngpholix nuex nyuip waung wuez tueq. 14Ngvmx saz vnaungc vtsvy, vyungx vruinx phvnx ruip saz nuiyc wushawx phvnx ruip saz muinz tsuingshiq rulc vdvmz svngpholix nuex nyuip waung wuez tueq. 15Tvraungx httax yaq phvnx lotlaz phvnx shiz wawc vkuiux vshiz vlaz vshiz kuex Noa rulc svngpholix nuex nyuip wuez tueq, 16kvruex kuex Tishox rueq nvr tueq. Noa svngpholix nuex nyuip waungc yix Yehowa rueq kaluix kuex shauk gay tueq.
17Raungx 40 tup yuix htuip yuix nyuing wvnc koq tueq svngpholix kuex ghaq wawc yuix htauk nuex kvtenc wvnc tueq. 18Yuix thuiuz hvlc rvwvnc koq tueq svngpholix kuex yuix htauk nuex phuiz wvnc tueq. 19Yuix kuex mvrx tueq htauk nuex muinz mvrx wvnc yek vtueq johvlc kanx htenc muinz yuix rueq luimz wvnc wuez tueq, 20kankhux htauk nuex meter mvshix nuex httuiuc laz yuix rueq luimz wvnc tueq. 21Kvkaq ghaq htauk wawc tvraungx httax yaq phvnx rvtueq wushawx phvnx ruip, ngvmx saz phvnx ruip, miqsaz lotlaz kuex thueyc mvy wvnc wuez tueq. 22Ghaq htauk nuex tvraungx httax yaq phvnx htenc lotlaz thueyc kaz tueq. 23Yehowa rueq ghaq htauk nuex tvraungx httax yaq phvnx rvtueq miqsaz, ngvmx saz nuiyc wushawx lotlaz kuex tvbac gay tueq. Svngpholix mungx nuex Noa rulc vdvmz httax yaq htenc kvruex dvyx shex thuiuzthuic tvraungx kvjungx wuez tueq. 24Kvruex yuix kuex vnuiyq 150 nuex httuiuc laz ruic muq rvtueq.
Nke Ahọpụtara Ugbu A:
VPHAUNGC VYAUNGC 7: HNOT01
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Hawa Naga Bible © Bible Society of Myanmar, 2014.