Mataayo 3
3
Ʉkʉlʉmbɨlɨla kwa Yohana ʉMwotsi
(Maliko 1:1-8; Luuka 3:1-18; Yohana 1:19-28)
1ɄYɨɨsʉ wʉ apitsiige alɨ kʉ Nazaleti, aahʉmye ʉmuunu mpamato ʉvɨ ɨlitaawa lya mwene aale vɨ Yohana ʉMwotsi. Ʉmuunu ʉjwa aalʉmbɨlɨlaga mu lʉkɨnga lwa kʉ Yuuda. Aavavʉʉlaga avaanu alɨkʉta, 2“Laatagi imbiivi tsiinyo ʉlwakʉva ʉLʉdeeva lwa Kʉkyanya lʉhegelye.” 3ɄYohana vɨ mwene ʉvɨ aatsovilwe nʉ nyamalago ʉYesaya ʉpwʉ aatye,
“Ʉmuunu ikwɨlanga mu lʉkɨnga iita,
‘Munotsaage ɨnzɨla jya Ntwa,
mugolosaage ʉmwakʉlʉta ʉmwene.’ ”#Yesaya 40:3
4ɄYohana aaswalaga ʉnsabwa ʉgʉhonilwe nʉ lwage lwa ngamila#3:4 Ngamila Ʉvʉganulu wa limenyu ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. nʉ kwɨpinya mu kɨvino ʉnkanda gwa ngwembe. Ɨkyakʉlya kya mwene kyale ɨkɨvale nʉ wʉʉke wa mu nsitu. 5Avaanu vaamwitsilaga ʉkʉhʉma kʉ vʉtsenge wa Yelusalemu, nɨ kɨlʉnga kyoni ɨkya Yuuda na kʉ mbasu tsyoni tsa lʉgasi ʉlwa Yolodani. 6Valɨkʉpela imbiivi tsa veene. Pwʉ baaho ʉYohana ʉMwotsi alɨkʉvootsa mu lʉgasi ʉlwa Yolodani.
7ɄYohana wʉ alolile ʉwongosu wa Vafalisayo#3:7 Vafalisayo Ʉvʉganulu wa litaawa ɨlɨ lola kʉ lʉtʉngʉ lwa mamenyu amahenza agalɨ kʉ vʉmalɨlo wa kɨtabu ɨkɨ. na Vasadukayo avaamwitsilaga pakʉta avootse, aavavʉʉlile akata, “Ʉnyie nyɨ vaana va nzoka! Namulaapone ʉvʉhɨgi ʉkʉhʉma kwa Ngʉlʉve mungave mwipela imbiivi kɨvʉnuasi. 8Lɨno vombagi ʉgwʉ givonia ʉkʉta mupelile imbiivi tsiinyo tsyoni. 9Muleke ʉkwɨginia ʉkʉta, ‘Ʉkʉkʉjiitu vɨ Abulahamu!’ Ndikʉvavʉʉla ʉkʉta ʉNgʉlʉve iweesa ʉkʉmpa ʉAbulahamu avaana ʉkʉhʉma mu maganga aga! 10Lɨno, ʉvʉhɨgi wa Ngʉlʉve vʉsiike, ndʉ muunu ʉvɨ ibiite ɨnzuunu, ɨsaawe ʉkʉdumula amabɨkɨ. Pwʉ ʉmʼbɨkɨ ʉgwʉ naguhʉʉpa iseke inonu, gudumulwa nʉ kʉtaagwa mu mwoto. 11Ʉne ndikʉvootsa na magasi pa kʉvonia ʉkʉta mupelile imbiivi tsiinyo, apeene ikwitsa ʉnya maka ʉkʉlʉtɨɨlɨla kwane, ʉvɨ nandɨnogiili nakʉ kʉva mbanda va kʉhʉdʉla ɨmilegehe ɨgya silaatu sya mwene,#3:11 Mbanda va kʉhʉdʉla ɨmilegehe ɨgya silaatu sya mwene Kʉ Vayahudi ɨmbombo jya kʉvasuula avaanu isilaatu jyavombwagwa na vavanda evo na vaanu avibedwa. ʉmwene ʉjwa jiikʉvootsaaga ʉnyie nʉ Mepo ʉMbalatse nʉ mwoto. 12Lɨno ibiite ʉlʉhelo pakʉta apeete ɨngano pa kɨkʉvatɨlo. Ɨngano jiilʉndamania ivɨɨka mu kɨbaana kya mwene, ʉmweleelo jiinyianya mu mwoto ʉgwʉ nagwitsima lʉsiku.”
Ʉkwotsiwa kwa Yɨɨsʉ
(Maliko 1:9-11; Luuka 3:21-22)
13Isigono isyo ʉYɨɨsʉ akahʉma mu kɨlʉnga ɨkya Galilaya, akiitsa kʉ lʉgasi lwa Yolodani pakʉta ootsiwe nʉ Yohana. 14ɄYohana aagelile ʉkʉta abeele, akatsova kwa Yɨɨsʉ akata, “Lɨno tsiveetsaga ndeeti pakʉta ʉve wiitse kwane? Ʉne neene ndɨnogye ʉkwotsiwa nʉʉve.” 15ɄYɨɨsʉ akamwanda akata, “Ʉlwalɨno, ɨdɨka wʉ tsivombeke, manya tʉnogye tʉvombe ɨlweli jyoni.”#3:15 Ɨlweli jyoni Ʉvʉlʉvʉlʉ wa kɨtsovo ɨkɨ ipange kwʉ kʉta ʉkwotsiwa kwa Yɨɨsʉ kwale kʉvonia ʉkʉta ɨmbombo jya Yohana ɨjya kwotsa avaanu jyale nonu, nʉ Ngʉlʉve aajyɨdiike, evo kwʉ kʉta kɨlya kyale kɨmanyilo kya Yɨɨsʉ kya kʉtengʉla ɨmbombo ndʉ Mesiya. Pwʉ ʉYohana akɨɨdɨka, akamwotsa ʉYɨɨsʉ.
16ɄYɨɨsʉ wʉ amalile ʉkwotsiwa, baaho akahʉma mu lʉgasi. Akasɨkɨ kaako, kʉkyanya kʉkadɨndʉka, akambona ʉMepo va Ngʉlʉve ikwika pakyanya pa mwene mu kɨhwani kya ngʉndya. 17Ɨlimenyu lɨkapʉlɨkɨka ʉkʉhʉma kʉkyanya lɨkata, “Ʉjʉ vɨ Mwana vango, ʉnʼgane, ʉvikʉnnyovosa ʉne.”
Nke Ahọpụtara Ugbu A:
Mataayo 3: zga
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
© 2019, Wycliffe Bible Translators, Inc. All rights reserved.