Mak 7
7
A Sããkommine Yeltuuri Yɛlɛ
(Mat 15:1-9)
1A Faraziimine ane a Naaŋmen bege wulwulibo naŋ da yi Gyɛruzɛlɛm a wa ŋmaagyili a Yeezu, 2ba da nyɛ la a O potuuribo mine ka ba dire ne nudɛgɛ, bonso, ba da ba pɛge ba nuuri kyɛ dire. 3(A Faraziimine ane a Gyuumine daŋ koŋ sage di bonzaa ka ba naŋ ba daŋ pɛge ba nuuri velaa, aŋa ba sããkommine naŋ wuli ba lɛ; 4ba da koŋ sage di bonzaa ba naŋ yi ne daa wa ne ka ba naŋ ba daŋ pɛge o sɛre; a ba sããkommine yeltuuri yaga mine meŋ bebe la ka ba da maŋ tuuro, ŋmanbilii pɛgebo, dogre pɛgebo ane zɛdogebilii pɛgebo.) 5A lɛ la ka a Faraziimine ane a Naaŋmen bege wulwulibo da soore a Yeezu, “Bonso ka a fo potuuribo ba tuuro a sããkommine yeltuuri kyɛ dire ne nudɛgɛ?” 6Ka a Yeezu da yeli ko ba, “A Ŋmen-yelmanna Azaaya da yeli la a bogriŋ a kyaare ne yɛ, yɛnee bampuori-kombampoɔ mine, a seŋ ba naŋ sɛge lɛ:
‘A noba bama eŋnɛ ma la ne ba nɔɛ,
kyɛ a ba sukyie waa la tɔɔre ne ma;
7ba puoro ma la weɛlɛ,
a wullo nensaala begɛ aŋa a naŋ waa Naaŋmen begɛ.’
8Yɛ zagre la a Naaŋmen nɔɛ bare kyɛ nyɔge nensaala wuluu taa kpeɛŋaa.”
9Lɛ la ka a Yeezu da yeli ko ba, “Yɛ bɔ la sori na yɛ naŋ na tu a zagre a Naaŋmen nɔɛ, ka ka yɛ na toɔ̃ tuuro a yɛ sããkommine yeltuuri! 10Bonso, Moozul da yelee la, ‘Eŋnɛ fo saa ane fo ma; ka neɛzaa wa yeli o saa bee o ma yelfaa, a ferɛɛ la ka ba ko o soba.’ 11Kyɛ ka yɛnee yeli ka ka neɛzaa wa yeli o saa bee o ma, ‘Bonna zaa sommo fo naŋ da na nyɛ n zie waa la Koban’ (a tɛgɛ la, a sommo leɛ la Naaŋmen kyɔɔtaa), 12ka a lɛ vɛŋ ka yɛ maŋ sage ka a ba la fere ka neɛ e soŋ ko o saa bee o ma, 13a pãã maŋ e ka a Naaŋmen yelbiri ba la taa tɔnɔ a yɛ sããkommine yeltuuri zuiŋ. A yɛlɛ ama taaba yaga la ka yɛ erɛ.”
14Lɛ la ka a Yeezu da la boɔle a nembeɛoŋ a yeli ko ba, “Yɛ zaa, yɛ kyɛlle woŋ a baŋ a tɛgɛ: 15bonzaa kyebe naŋ na sigi nensaala poɔ a e ka o soba dɛge, kyɛ boma na naŋ yire o poɔŋ la maŋ e ka o dɛge.” 16[“Vɛŋ ka soba na zaa naŋ taa tobo na woŋ, kyɛlle woŋ.”]
17A Yeezu naŋ da wa bare a noba kyɛ kpɛ die, a O potuuribo da wa soore O la a sekpɔgre tɛgɛ. 18Ka a Yeezu yeli sɔge ba, “Ka lɛ yɛ meŋ naŋ ba baŋ a tɛgɛ be? Yɛ ba nyɛ ka bonzaa naŋ yire yeŋe a sigre nensaala poɔ kontoɔ̃ e ka o soba dɛge, 19bonso, a ba maŋ kpɛ o soba sukyiri poɔ, kyɛ a maŋ kpɛ la o soba puori ka o nyɛ bare.” (A Yeezu yeluu ŋa wulee la ka bondiraa zaa eɛɛ soŋ). 20Ka O da yeli, “Bon naŋ yi a nensaala poɔ la maŋ dɛge a nensaala. 21Bonso, a neɛ sukyiri poɔ la ka teɛre-faare maŋ yire: peɛ̃mo toma, nannyigri, neŋko, 22moɔrɔ toma, bombɔ-gaŋne, potuoloŋ, taaba bɛlloo, nemboŋyɛlɛ, nyuuri, yosãã, pɔloo, damboluŋ. 23A yelfaare ama zaa la yire a nensaala poɔ kyɛ ana la maŋ e ka o soba dɛge.”
Pɔge Kaŋ Yeldeebo Yɛlɛ
(Mat 15:21-28)
24A Yeezu da yi la a zie ŋa a gaa Taaya paaloŋ. O da te kpɛ la yiri kaŋ poɔ a ba boɔrɔ ka neɛzaa baŋ O yɛlɛ. Kyɛ O da kontoɔ̃ sɔgle O meŋɛ a noba zie. 25A daadaalɛ, pɔge kaŋ pɔg-yalee naŋ da taa sefaa da woŋ la O yɛlɛ, a da wa le gbi dumo O niŋesogɔŋ. 26A pɔge da waa la a Nemboore-yobo#7:26 Nemboore-yobo: Noba na zaa naŋ da ba waa Gyuumine la a Nemboore-yobo. neɛ kaŋ a yi Sarofonisiya paaloŋ neɛ. O da wa sɔre la a Yeezu ka O digi a sefaa ka o yi a o pɔg-yalee eŋɛ. 27Ka a Yeezu yeli ko o, “Vɛŋ ka a bibiiri daŋ di sɛre, bonso, a ba soma ka ba de a bibiiri bondirii lɔɔ eŋ baare.” 28Ka a pɔge da yeli sɔge O, “Neŋkpoŋ, kyɛ a baare maŋ di la a bibiiri bondi-purimo naŋ maŋ le.” 29Ka a Yeezu yeli ko a pɔge, “Fo naŋ yeli a ŋaa zuiŋ, kulo, a sefaa yi la a fo pɔgeyaa eŋɛ.” 30Lɛ la ka a pɔge kuli te nyɛ a bie ka o gaŋ a gado zu, ka a sefaa yi kyɛ bare o.
Yeezu Naŋ Saŋ Dɔɔ Kaŋ Naŋ Da E Woŋ Kyɛ La Waa Muu Meŋ
31Lɛ la ka a Yeezu da leɛ yi a Taaya paaloŋ, a tu Sedɔŋ teŋɛ sobiri, a tori gɛrɛ Galili Mane naŋ be a Dekapoli paaloŋ. 32Ba da taa la woŋ kaŋ naŋ da kontoɔ̃ yeli yɛlɛ wa ne a Yeezu zie, a wa sɔre ka O de O nu pare o zu. 33Lɛ la ka a Yeezu da taa o gyɛŋ yi ne a noba poɔ, a da te de O nubie toŋ o tobo poɔ, kyɛ toore nentaare tɔ ne a o zele. 34Lɛ la ka O da gbole kaara sazu, a voore fãã a kyɛ yeli ko o, “Efata,” a tɛgɛ la, “Yuo.” 35A daadaalɛ ka a dɔɔ tobo deɛ yuore, kyɛ ka o zele meŋ lori ka o yele yɛlɛ weliweli. 36Lɛ la ka a Yeezu da kpãã a noba ka ba ta wa yele a yɛlɛ ŋa korɔ neɛzaa; kyɛ a lɛ O naŋ da kpãã ba yaga seŋ, lɛ gba ka a noba da maaleŋ ŋmeɛrɛ a yɛlɛ yaara. 37A noba nɔɛ da maaɛ la te zuo, ka ba yele, “O e la a yɛlɛ zaa velaa; O gba eɛɛ la ka a wonni wono kyɛ ka a muuni yele yɛlɛ.”
Nke Ahọpụtara Ugbu A:
Mak 7: DNTTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
First New Testament in Dagaare Language © The Bible Society of Ghana, 2013.