Mat 27
27
Ba Naŋ Taa Yeezu Wa Ne Pilato Zie
(Mak 15:1; Luk 23:1-2; Gyn 18:28-32)
1Zie naŋ da wa nyaa, a Naaŋmen bagmaalkare ane a teŋɛ nembɛrɛ zaa da laŋ la taa a bo sori na ba naŋ na tu a bɔ yɛlɛ dɔgle a Yeezu a toɔ̃ ko O. 2Ba da leŋ la a Yeezu a taa O gaa te ko Pilato naŋ da waa a paaloŋ na gɔbena.
Gyudase Naŋ Leŋ O meŋɛ Daseelɛ
(Tom 1:18, 19)
3A Gyudase na naŋ da iri a Yeezu tere naŋ da wa nyɛ ka ba di la a Yeezu sɛrɛɛ a yeli ka O lee la ka a seŋ ka ba ko O, o da leɛ la o teɛroŋ a taa a warbie lezare ne pie wa ko a Naaŋmen bagmaalkare ane a nembɛrɛ. 4O da yelee la, “N e la yelbieri ne N naŋ iri neɛ naŋ ba baŋ yeli tere ka ba ko.” Ka a noba leɛ yeli ko o, “Ana te boŋ yeli la bebe. Taa fo yɛlɛ.” 5O naŋ da wa lɔɔ a warbie bare a Naaŋmen die poɔ, o da yi gaa te leŋ la o meŋɛ daseelɛ. 6Ka a Naaŋmen bagmaalkare nyɔge a warbie de kyɛ yeli, “A libie ama ba seŋ ka te de a eŋ a libie daga poɔ, a naŋ e zẽẽ libie zuiŋ.” 7Ba naŋ da wa nyɛ taa baare, ba zaa da sagɛɛ la ka ba de a libie da ne a dogmeɛrɛ weɛ, ka ba na uuno ne saama. 8A ŋaa zuiŋ la ka ba boɔlɔ a weɛ ŋa Zẽẽ Weɛ a naŋ wa te tɔ zenɛ. 9A ŋaa da eɛɛ la ka ka a Ŋmen-yelmanna Gyɛremaaya naŋ da yeli lɛ na tu a tuubu, “Ba da de la a warbie lezare ne pie na, naŋ da waa a soba na daaroŋ, a lɛ a Izerayɛl noba mine naŋ da sage ka a e O daaroŋ, 10ka ba de da ne a dogmeɛrɛ weɛ, aŋa lɛ a Daana naŋ da yeli ka N e.”
Pilato Naŋ Soore A Yeezu Soorebie
(Mak 15:2-5; Luk 23:3-5; Gyn 18:33-38)
11A Yeezu da are la a gɔbena niŋesogɔ, ka a gɔbena soore O, “Fõõ la a Gyuumine Naa be?” Ka a Yeezu yeli ko o, “Fõõ la yeli a lɛ.” 12Kyɛ a Naaŋmen bagmaalkare ane a nembɛrɛ naŋ da de yɛlɛ duori ne a Yeezu, O da ba yeli yelzaa sɔge ba. 13Lɛ la ka a Pilato yeli ko O, “Fo ba woŋ a saanaa ba naŋ duoro fo seŋ lɛ be?” 14Kyɛ a Yeezu da ba yeli yelzaa sɔge o, ka a lɛ da e a gɔbena nɔmaa yaga zaa.
A Baraba Bee Yeezu Baroo Yɛlɛ
(Mak 15:6-15; Luk 23:13-25; Gyn 18:39—19:16)
15A tigri saŋ a gɔbena da maŋ iri la a nempɔgre kaŋ a noba naŋ boɔrɔ bare. 16A saŋ na ba da taa la bawono kaŋ a nempagdie poɔ ka ba boɔlɔ Yeezu Baraba. 17Ba naŋ da wa lantaa baare, Pilato da soore ba la, “Aŋ la ka yɛ boɔrɔ ka N iri bare, Yeezu Baraba bee a Yeezu na ba naŋ boɔlɔ a Mɛzaaya?”#27:17 Mɛzaaya: A Mɛzaaya tɛgɛ la a ‘Kirista.’ 18Bonso a Pilato da nyɛɛ la ka nyuuri la da so ka ba nyɔge a Yeezu wa tere. 19A Pilato naŋ da naŋ zeŋ a sɛredi kogi zu la ka o pɔge da toŋ neɛ o zie a yeli ko o, “Ta wa de fo nu eŋnɛ a dɔɔ ŋa naŋ ba baŋ yeli yɛlɛ poɔ, bonso, N di la dɔgɛɛ yaga zenɛ n zannoo poɔ a O yɛlɛ eŋɛ.” 20Kyɛ a Naaŋmen bagmaalkare ane a nembɛrɛ da tɔ la a noba zaa eŋ ka ba sɔre a Pilato ka o iri Baraba bare kyɛ e ka ba ko a Yeezu. 21A gɔbena da laboreŋ soore ba la, “A bama bayi, buo la ka yɛ boɔrɔ ka N iri ko yɛ?” Ka a noba yeli, “Baraba.” 22Ka a Pilato soore ba, “Boŋ ka N pãã na e ne a Yeezu ba naŋ boɔlɔ a Mɛzaaya?” Ka a noba zaa yeli, “Vɛŋ ka ba kpa O dagaraa zu.” 23Ka a Pilato leɛ soore ba, “Wola, boŋ yelfaa ka O e?” Ka ba la tanne ne kɔkɔkpeɛne yaga zaa a yele, “Vɛŋ ka ba kpa O dagaraa zu!”
Pilato Naŋ De A Yeezu Tere Ka Ba Te Kpa Dagaraa Zu
24A Pilato naŋ da wa nyɛ ka o ba taa lɛ zaa o naŋ na e, kyɛ ka dɔɔne da piili ka o kpɛ a noba poɔ, O da de la koɔ̃ pɛge o nuuri a noba niŋesogɔ, a yele, “N ba baŋ yelzaa a dɔɔ ŋa kũũ eŋɛ; yɛ taa yɛ yɛlɛ.” 25Lɛ la ka a noba zaa pabo laŋ yeli, “Ka a Yeezu zẽẽ do te ne te biiri.” 26Lɛ ka a Pilato iri Baraba ko ba, kyɛ e ka ba feɛ a Yeezu, kyɛ pãã de O ko ba ka ba te kpa O dagaraa zu.
A Sogyɛre Naŋ E Yeezu La
(Mak 15:16-20; Gyn 19:2-3)
27Lɛ la ka a gɔbena sogyɛre pãã da de a Yeezu kpɛ ne a gɔbena zage poɔ, a boɔle ba taaba zaa ka ba wa ŋmaagyili O. 28Ba da nyɔge la a Yeezu kparoo yage bare, kyɛ de kpareze-kpoŋ kaŋ a su O. 29A lɛ puoriŋ ba da de la goore ŋmeɛle maale ne zupili a de vɔgle O zu. Kyɛ de mupilaa eŋ O nuduluŋ poɔ, kyɛ pãã maŋ gbi dumo O niŋeŋ a erɛ O laara, a yele, “Yaane, Gyuumine Naa!” 30Ba da toore la nentaare waare O, kyɛ de mupilaa ŋmɛ ne O zu. 31Ba naŋ da wa e O la baare, ba da yage la a kpareze-kpoŋ na bare kyɛ de O meŋɛ kparoo a leɛ su O. A pãã da taa O gaa ne ka ba te kpa O dagaraa zu.
Ba Naŋ Kpa Yeezu Dagaraa Zu
(Mak 15:21-32; Luk 23:26-43; Gyn 19:17-27)
32Ba naŋ da wa yi kyɛnɛ gɛrɛ, ba da tuori la dɔɔ kaŋ naŋ yi Saarin, ka ba boɔlɔ Saamon, ka ba da fere o ka o tuo a Yeezu dagaraa. 33Ba naŋ da wa te ta zie kaŋ ba naŋ boɔlɔ Golgota (a Golgota tɛgɛ la Zukoɔre Zie) 34a noba da de la tĩĩ naŋ na e ka O eŋɛ dare a pulli ne dãã a de ko a Yeezu ka O nyu, kyɛ O naŋ da wa lɛnne a nyɛ, O da zagrɛɛ la ka O nyu. 35Ba naŋ da wa kpa O a dagaraa zu baare, ba da de la O kparre ŋmɛ gbaŋ a poŋ taa; 36kyɛ pãã da zeŋ a be guuro O. 37A O zusogɔŋ, a dagaraa zu, ba da sɛge la O yelsaanaa, “Yeezu A Gyuumine Naa La A Ŋa.”
38Ba da kpa la fafareba mine bayi ne a Yeezu, kaŋ a O duluŋ seŋ, kaŋ meŋ O gɔɔ seŋ. 39Noba naŋ da waana tɔlɔ, da toorɔ O la kyɛ gɔgrɔ ba zuri, 40kyɛ yele, “Fõõ naŋ yeli ka fo na toɔ̃ ŋmore la a Naaŋmen die, kyɛ la leɛ mɛ o beri ata poɔ, faa fo meŋɛ wɛ! Ka Fõõ wa waa Naaŋmen Bie, wa sigi a dagaraa zu.” 41A lɛ ne o zu ka a Naaŋmen bagmaalkare a laŋne a Naaŋmen bege wulwulibo ane a nembɛrɛ meŋ da erɛ O laara a yele: 42“O faa la ba mine, kyɛ kontoɔ̃ faa O meŋɛ. Ka O naŋ wa sereŋ waa a Izerayɛl deme Naa, vɛŋ ka O wa sigi a dagaraa zu pampana ŋa, kyɛ ka te sage de O yɛlɛ. 43O dɛle la Naaŋmen, O e ka a Naaŋmen wa faa O a pampana ŋa zaa, ka O naŋ wa boɔrɔ, bonso, O yelee la, ‘N waa la Naaŋmen Bie.’ ” 44A lɛ ne o zu ka a fafareba na ba naŋ da laŋ ne O kpa a dagarre zu meŋ da to O zoma.
A Yeezu Kũũ Yɛlɛ
(Mak 15:33-41; Luk 23:44-49; Gyn 19:28-30)
45A ŋmenaa naŋ wa do pozentaa gɛrɛ, ligruŋ da luri pɔge la a tendaa zaa, a te ta a ŋmenaa gbelli ata saŋ. 46A naŋ da wa ta ŋa ŋmenaa gbelli ata saŋ, Yeezu da ŋmɛ la kpɛlle yaga zaa a yele, “Eli Eli lema sabatani?” A yeluu ŋa tɛgɛ la, “N Naaŋmen, N Naaŋmen, bonso, ka fo gyɛ ma bare?” 47A noba mine naŋ da are a be a woŋ a lɛ, da yelee la, “Elaagya la ka a dɔɔ ŋa boɔlɔ.” 48Lɛ la ka ba kaŋ da zo a paretɛloŋ lɛ a te de lɔrɔ naŋ nyu dããmiiruŋ paale o zaa, a kyage daa eŋɛ a wa turi O ka O nyu. 49Kyɛ ka ba mine yeli, “Yɛ vɛŋ ka te kyɛlle nyɛ ka a Elaagya na wa faa O la be.” 50Lɛ la ka a Yeezu laboreŋ ŋmɛ kpɛlle ne kɔkɔkpeɛŋaa, kyɛ ŋmaa vooroŋ. 51A paretɛloŋ na poɔ, a Naaŋmen die patiisa deɛ da kyeɛ̃ la ziiri ayi, a yi o zu a kyɛ sigi te tɔ o pareŋ, kyɛ ka a teŋɛ da gbigri, ka piiri puro wɛlɛ. 52A yaare meŋ da yuoree la ka a nensonne na naŋ da kpi leɛ-iri a kuuni poɔ. 53Ba naŋ da wa yi a yaare poɔ, a Yeezu kũũ leɛ-iruu puoriŋ, ba da gaa te kpɛ la a teŋkpoŋ poɔ ka neŋyaga da nyɛ ba. 54A sogyɛre kɔɔ neŋkpoŋ ane banaŋ naŋ da be o zie guuro a Yeezu, naŋ da nyɛ a teŋɛ naŋ gbigri ane a yɛlɛ zaa naŋ e, dabeɛ̃ da kpɛ ba la yaga, ka ba yeli, “Serɛzaa, a dɔɔ ŋa da waa la Naaŋmen Bie.”
55Pɔgeba yaga meŋ da be la a be, a da te are tɔɔre zaa kyɛ kaara. Ba da tu la a Yeezu a yi Galili, a da soŋnɔ O. 56A pɔgeba mine naŋ da poɔ ba poɔ la, Mareya Magdalina, ane Mareya, Gyimisi ne Yuzɛb ma, ane a Zɛbɛdii biiri ma.
A Yeezu Ũũmu Yɛlɛ
(Mak 15:42-47; Luk 23:50-56; Gyn 19:38-42)
57Zie naŋ da wa te maa, dɔɔ bondaana kaŋ naŋ yi Aremateya, ka o yuori di Yuzɛb, o meŋ da waa la a Yeezu potuuro kaŋ. 58O da gaa la a Pilato zie a te sɔre ka o de a Yeezu eŋɛ ko o. Lɛ la ka a Pilato da tere noɔre ka ba de a Yeezu eŋɛ a ko o. 59A Yuzɛb pãã da de la pɛmpelaa a pilli ne a Yeezu eŋɛ, 60a de O te ũũ o meŋɛ ya-paalaa poɔ o naŋ nyɛ piiri zu. A pãã billi kukpoŋ pɔge a yaa noɔre kyɛ leɛ gɛrɛ. 61Mareya Magdalina ane a o yo-tɔ Mareya da be la a be, a zeŋ tori a yaa niŋe.
A Yeezu Yaa Guguribo
62Zie naŋ da wa nyaa, a pɛnnoo bebiri yɛlɛ Naroo naŋ da wa tɔle, a Naaŋmen bagmaalkare ane a Faraziimine da laŋ la taa a Pilato yiri poɔ, 63a yeli, “Neŋkpoŋ, te leɛ-teɛre la a yeli na a zirŋmaara ŋa naŋ da yeli O vore saŋ, ‘N na leɛ-iri yi la a kuuni poɔ a beri ata puoriŋ.’ 64Azuiŋ, e ka ba te gu a yaa velaa, a te ta a beri ata daare, ka lɛ naane, a O potuuribo na te zu iri O la a yaa poɔ, kyɛ yeli ko a noba, ‘O leɛ-iri yi la a kũũ poɔ,’ ka a puori bɛllɛ ŋa pãã na waa faa yaga gaŋ a dɛndɛŋ bɛllɛ na.” 65Ka Pilato yeli ko ba, “Yɛ taa la sogyɛre ka ba e guguribo, yɛ gaa te e ka ba gu a zie velaa a seŋ lɛ yɛ naŋ na toɔ̃.” 66Lɛ la ka ba gaa ne a guguribo, a te bɛ a kuuri naŋ furi a yaa noɔreŋ, kyɛ e ka a noba gu a zie velaa.
Nke Ahọpụtara Ugbu A:
Mat 27: DNTTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
First New Testament in Dagaare Language © The Bible Society of Ghana, 2013.