Mat 10
10
Apostoliimine Pie Ne Bayi Yɛlɛ
(Mak 3:13-19; Luk 6:12-16)
1Lɛ la ka a Yeezu da boɔle O potuuribo pie ne bayi lantaa, a ko ba kpeɛ̃õ sefaare zu, ka ba digre a bara, kyɛ saŋna baaloŋ boorɔ zaa. 2A apostoliimine pie ne bayi na yoe la ama: a dɛndɛŋ soba la Saamon, ka o yuori kaŋ di Piita ane o yɔɔ Anduru, Gyimisi ane o yɔɔ Gyɔɔn, a Zɛbɛdii bidɔbɔ; 3Filipi ane Batolomi, Tɔmaase ane Matio naŋ da waa zuyɔɔ-derɛ, Gyimisi a Alfeo bidɔɔ ane Tadiyo; 4Saamon naŋ da poɔ Zɛlɔte laŋne noba poɔ ane Gyudase Ezekarɔte, a soba na naŋ da yi a Yeezu puori.
A Potuuribo Pie Ne Bayi Tonnoɔre
(Mak 6:7-13; Luk 9:1-6)
5Yeezu da toŋ la a pie ne bayi bama a ko ba noɔre ŋa, “Yɛ ta wa gɛrɛ a Nemboore-yobo#10:5 Nemboore-yobo: Noba na zaa naŋ da ba waa Gyuumine la a Nemboore-yobo. tenne. Yɛ ta gaa a Samareya noba meŋ teŋɛ kanzaa, 6kyɛ yɛ gaa a Izerayɛl peere naŋ bɔre na zie. 7Ka yɛnee wa gɛrɛ, yɛ manna a Ŋmen-yelnoore a yele, ‘A tenvelaa#10:7 Tenvelaa: A Kiristabiiri mine maŋ boɔle la a yelbiri ŋa ka ‘Dapare.’ naaloŋ peɛlɛɛ la.’ 8Yɛ saŋna baalba, a sennɛ kuuni, a saŋna kɔnkɔnne kyɛ digre sefaare bara. N ko yɛ la a kpeɛ̃õ ŋa weɛlɛ, yɛ meŋ de saŋna ne noba weɛlɛ. 9Yɛ ta de libie eŋnɛ yɛ ganlɔgre poɔ. 10Yɛ ta de woore, bee kparre ayi, bee nɔɔteɛ, bee dabɔle na gu ne yɛmenne; bonso, a seŋɛɛ la ka tontonɔ zaa nyɛ o noɔre bondiraa. 11Ka yɛnee wa kpɛ teŋkpoŋ bee tembile zaa poɔ, yɛ maŋ daŋ bɔ neɛ naŋ na baŋ de yɛ saanoŋ, ka yɛ kpeɛrɛ a be a te ta saŋ na yɛ naŋ na yi a teŋɛ poɔ. 12Ka yɛnee wa kpɛ yiri zaa poɔ, yɛ maŋ puori a yideme. 13Ka a yideme wa sage de yɛ saanoŋ, yɛ vɛŋ ka yɛ maaroŋ be ba zie. Kyɛ ka ba naŋ ba wa de yɛ saanoŋ, yɛ leɛ ne a yɛ maaroŋ. 14Ka neɛzaa ba wa de yɛ saanoŋ bee a sage ka o kyɛlle woŋ a yɛ yelbie, ka yɛnee wa yire a yiri bee a teŋɛ na poɔ, yɛ piŋ piŋ yɛ gbɛɛ uuruŋ bare a be. 15Yelmeŋɛ zaa ka N yele korɔ yɛ, a sɛrɛɛdiibu daare, Naaŋmen na zo la Sodom ane Gomora tenne nembaaloŋ a gaŋ a teŋɛ na poɔ ba naŋ zagre yɛ bare.”
Dɔgroŋ Naŋ Waana Yɛlɛ
(Mak 13:9-13; Luk 21:12-17)
16Yɛ nyɛ, N tonɔ yɛ la aŋa peere a eŋnɛ gboŋgboe poɔ, azuiŋ yɛ taa yɛŋ aŋa weere, kyɛ e baaloŋ aŋa ŋmama. 17Yɛ baŋ ne ba yɛlɛ, ba na taa yɛ la gaa ne sɛrediribe zie, a feɛ yɛ a ba puoruuderi pooreŋ; 18ba na taa yɛ la gaa ne a gɔbena mine ane namine zie N zuiŋ, ka a e danseɛ ko ba ane a Nemboore-yobo. 19Ka ba naŋ wa taa yɛ gaa ne sɛrediribe zie, yɛ ta wa miine lɛ yɛ naŋ na yeli, bonso, ka a saŋ wa ta, ba na wuli yɛ la lɛ yɛ naŋ na yeli; 20a ba e ka yɛnee la na yeli a yɛlɛ, kyɛ a yɛ Saa Naaŋmen Vooroŋ la na tu a yɛ zie a yeli a yɛlɛ. 21Neɛ na maŋ de la o yɔɔ tere ka ba ko. Ka saa de o bie tere ka ba ko, ka bibiiri iri zɔɔrɔ ne ba dɔgrebɔ, a e ka ba ko ba; 22kyɛ ka a noba zaa kyiiri yɛ a N yuori zuiŋ. Kyɛ soba na naŋ di kannyiri te ta a baaraa saŋ na nyɛ la faabo. 23Ka ba naŋ wa dɔgrɔ yɛ teŋɛ kaŋ poɔ, yɛ zo gaa teŋyuo. Yelmeŋɛ ka N yele korɔ yɛ, yɛ koŋ baŋ kyɔle a Izerayɛl tenne zaa sɛre kyɛ ka a Nensaala Bie leɛ wa.
24“Zanzanna ba ganna o wulwullo, bee ka gbaŋgbaa ganna soba naŋ so o. 25A seŋɛɛ la ka zanzanna boɔrɔ ka o zanne te ta o wulwullo, ka gbaŋgbaa meŋ boɔrɔ ka o waa ŋa o daana. Ka ba naŋ pãã boɔle a yidandɔɔ Bɛlezɛbu#10:25 Bɛlezɛbu: A Bɛlezɛbu waa la a sefaare zaa naa, ba koŋ boɔle a yideme yofaare gaŋ a lɛ bee!”
Neɛ A Naŋ Seŋ Ka Te Zoro O Dabeɛ̃
(Luk 12:2-7)
26“Azuiŋ yɛ ta zoro ba dabeɛ̃; bonso, bonzaa ba kyebe a sɔgle ka ba koŋ yuo ka o sãã. Yelsɔglaa zaa meŋ kyebe ka ba koŋ yeli ka noba baŋ. 27A yɛlɛ na zaa N naŋ yele korɔ yɛ lige poɔ, yɛ yeli a kyaane poɔ. Yɛlɛ na zaa meŋ yɛ naŋ woŋ ka N waale yeli, yɛ do peere zu a te moɔle a gboligboli. 28Yɛ ta zoro banaŋ naŋ na toɔ̃ iri a nensaala nyɔvore kyɛ kontoɔ̃ ko o seɛ. Kyɛ yɛ zoro onaŋ naŋ na toɔ̃ iri a nensaala nyɔvore kyɛ naŋ toɔ̃ de o seɛ meŋ eŋ dazugovũũ poɔ. 29Ba ba maŋ koɔre daviime ayi pɛsewa yenaa be? Kyɛ a kanzaa koŋ baŋ kpi ka a yɛ Saa ba baŋ ne a. 30Haali gba a yɛ zukɔɔloŋ zaa noɔre ka O baŋ. 31Azuiŋ yɛ ta zoro dabeɛ̃. Yɛ taa la tɔnɔ yaga zaa a gaŋ a daviime.”
32“Soba na zaa naŋ sage ka o baŋ ma la neŋyaga poɔ, N meŋ na sage ka N baŋ o la N Saa naŋ be tenvelaa poɔ niŋeŋ; 33kyɛ onaŋ soba zaa naŋ na zagre ma neŋyaga poɔ, N meŋ na zagre la o soba N Saa naŋ be tenvelaa poɔ niŋeŋ.”
N Ba Wa Ne Emmaaroŋ, Zɔɔre La Ka N Wa Ne
(Luk 12:51-53; 14:26-27)
34Yɛ ta wa teɛrɛ ka N wa ne la maaroŋ a teŋɛzu; N ba wa ka N tere maaroŋ, kyɛ zɔɔre la ka N wa ne.
35N waɛ la ka N tɔ zɔɔre eŋ bie ane o saa,
a tɔ zɔɔre eŋ pɔgeyaa ane o ma,
a tɔ zɔɔre eŋ naapɔge#10:35 Naapɔge: A Dagaaba mine maŋ yeli ka ‘Bie pɔge’ ane o serɛ ma;
36ka neɛ dɔndɔnne na waa o meŋɛ yideme.
37Soba na zaa naŋ nɔŋ o saa bee o ma yaga a gaŋ ma, ba seŋ ne N tuubu. Soba na zaa meŋ naŋ nɔŋ o bidɔɔ bee o pɔgeyaa yaga a gaŋ ma ba seŋ ne N tuubu; 38ka soba na zaa naŋ ba de o dagaraa tuo tuuro ne ma, meŋ ba seŋ ne N tuubu. 39Banaŋ zaa naŋ boɔrɔ bamenne nyɔvoɛ, na kɔŋ la ba nyɔvoɛ, kyɛ banaŋ zaa meŋ naŋ kɔŋ ba nyɔvoɛ N zuiŋ, na leɛ nyɛ la ba nyɔvoɛ.
San-yɔɔ Yɛlɛ
(Mak 9:41)
40“Soba na zaa naŋ de yɛ saanoŋ, de ma la saanoŋ, ka soba na zaa meŋ naŋ de ma saanoŋ, de a soba na naŋ toŋ ma saanoŋ. 41Soba na zaa naŋ de Ŋmen-yelmanna saanoŋ o naŋ e Ŋmen-yelmanna zuiŋ, na nyɛ la Ŋmen-yelmanna san-yɔɔ. Soba na zaa meŋ naŋ de nemmeŋɛ saanoŋ o naŋ e nemmeŋɛ zuiŋ, na nyɛ la nemmeŋɛ san-yɔɔ. 42Yelmeŋɛ ka N yele korɔ yɛ; soba na zaa naŋ na ko a bibile ŋa kanzaa kɔmmaaroŋ ka o nyu, o naŋ waa N potuuro zuiŋ, na nyɛ la o san-yɔɔ.”
Nke Ahọpụtara Ugbu A:
Mat 10: DNTTP
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
First New Testament in Dagaare Language © The Bible Society of Ghana, 2013.