Piligu 35
35
Naawuni niŋ alibarika niŋ Yaakubu ni Bɛtɛl
1 #
Pil 28.11-17
Ka Naawuni daa yɛli Yaakubu, “Yiɣisim’ chaŋ ti ʒini Bɛtɛl, ka me sara maligu bimbini zali man’ Naawuni ŋun daa yi a zuɣu saha shɛli a ni daa yi a biɛli Iso sani zɔri la.”
2Di saha ka Yaakubu daa yɛl’ o yiŋnim’ mini bɛnkam zaa daa be o sani, “Yihimiya tinzun tiŋ’ wuna din be yi sani bahi, ka mali yimaŋa, ka taɣi binyɛra ye, 3ka ti yiɣisi chaŋ Bɛtɛl. M bɔri ni m mɛla bimbini nimaani zali Naawuni so ŋun daa deei n suhigu n nandahima nyabu dali, ka be n sani n ni chaŋ luɣ’ shɛlikam la.” 4Ka bɛ daa zaŋ tinzun tiŋ’ wuna din be bɛ sani zaa mini bɛ ni daa kpa tibikpar’ shɛŋa ti Yaakubu, ka Yaakubu daa zaŋ li sɔɣi ti’ shɛli din nyɛ oki tia din miri Shɛkɛm la gbini.
5Bɛ ni daa yiɣisi chana, ka dabiɛm gbaai tiŋ’ shɛŋa din daa gili ba nim’ pam, ka bɛ daa bi kari doli Yaakubu bihi maa. 6Ka Yaakubu mini bɛnkam zaa daa be o sani la daa ka Luz (pumpɔŋɔ bɛ boonila nimaani Bɛtɛl) din be Keenan tiŋgbɔŋ ni la na. 7Ka o daa me sara maligu bimbini zali nimaani, ka boli di yuli Ɛlbɛtɛl,#35.7 ƐLBƐTƐL: Hiburuli ni yuli ŋɔ gbinni nyɛla, “Bɛtɛl Naawuni”. Naawuni ni daa kahig’ omaŋ’ wuh’ o saha shɛl’ o ni daa yi o biɛli sani zɔri la zuɣu. 8Ka Dɛbɔra ŋun daa nyɛ Ribɛka yiŋ’ dabipaɣ’ la daa kpi, ka bɛ sɔɣ’ o oki ti’ shɛli din daa be Bɛtɛl tiŋli la gbini. Ka bɛ daa boli di yuli “Kumsi tia.”
9Yaakubu ni daa yi Mɛsopoteemia na maa nyaaŋa, ka Naawuni daa lan ka o sanna ti niŋ alibarika niŋ o ni. 10#Pil 32.28 Naawuni daa yɛl’ o, “A yuli Yaakubu, amaa a yuli ku lan boli Yaakubu; a yuli yɛn boonila Izraɛl.” Dinzuɣu ka o yuli booni Izraɛl maa. 11#Pil 17.4-8 Ka Naawuni daa lan yɛl’ o, “Mani n-nyɛ Naawuni Kpiɔŋlan’ Naa, dɔɣim’ bihi ka yi nabi; ka zuliya pam yi a ni na; ka nanim’ pam gba ti yi a zuliya ni na. 12N ni daa zaŋ tiŋgbɔn shɛli ti Ibrahimma mini Yisahaku la, n ni zaŋ li ti a, ka ni lan zaŋ li ti a zuliya a kalinsi nyaaŋa.” 13Di saha ka Naawuni daa ŋmalig’ o sani o ni daa tɔɣis’ o yɛtɔɣa luɣ’ shɛli maa n-lab’ alizanda ni. 14#Pil 28.18-19 Ka Yaakubu daa pihi kuɣa m-me bimbini zali Naawuni ni daa tɔɣis’ o yɛtɔɣa luɣ’ shɛli maa, ka booi wain mini kpam bahi di zuɣu ti Naawuni. 15Dinzuɣu ka Yaakubu daa boli Naawuni ni tɔɣis’ o yɛtɔɣa luɣ’ shɛli maa yuli Bɛtɛl.#35.15 BƐTƐL: Hiburuli ni yuli ŋɔ gbinni nyɛla, “Naawuni yiŋa”.
Reechɛl kum yɛla
16Di nyaaŋa ka bɛ daa yi Bɛtɛl chani ti miri Ɛfirat ka Reechɛl piligi wolisibu ka o wolisibu maa daa kpɛm’ pam. 17Ka di ni daa ti miig’ o pam saha shɛli ka paɣidɔɣisɔtɔɣinda yɛl’ o, “Di chɛ ka a suhu zɔhira, bidibiga n-lan bala.” 18Amaa ka o daa lee kpalim dɔɣibu maa ni. O ni daa ti yɛn bahi saha shɛli ka o daa boli bia maa yuli Bɛnɔni,#35.18 BƐNƆNI: Hiburuli ni di gbinni nyɛla “N suhugarigu saha bia”. amaa ka o ba mi daa bol’ o yuli Bɛnjamin.#35.18 BƐNJAMIN: Hiburuli ni di gbinni nyɛla “Nudirigu bia”.
19Reechɛl ni daa kpi maa, bɛ daa sɔɣ’ o la so’ shɛli din daa kuni Ɛfirat la sokpaŋa, nimaani ka bɛ booni Bɛtilihɛm pumpɔŋɔ ŋɔ. 20Ka Yaakubu daa pihi kuɣa laɣim sɔŋ o gballi maa zuɣu, ka di nyɛ Reechɛl gballi maa kuɣiduli, ka di na kul do nimaani hal ni zuŋɔ. 21Ka Izraɛl daa lan gbaai chandi n-kana ti ti o suɣa zali Ɛda pii tooni.
Yaakubu bidibisi
(1 Yɛlikura 2.1-2)
22 #
Pil 49.4
Izraɛl ni daa be tiŋgbɔŋ maa ni saha shɛli maa ka Rubin daa zaŋ ŋun’ o ba dabipaɣa Biliha dɔni, ka ŋun’ Izraɛl wum li.
Yaakubu bidibisi daa nyɛla pinaayi. 23Liya bihi daa nyɛla Rubin ŋun daa nyɛ Yaakubu bituuli la mini Simiɔn ni Lɛvi ni Juda ni Isaka ni Zɛbulɔn. 24Ka Reechɛl bidibisi daa nyɛ Yisifu mini Bɛnjamin. 25Ka Biliha ŋun daa nyɛ Reechɛl dabipaɣ’ la bidibisi daa nyɛ Dan mini Naftali. 26Ka Zilipa ŋun daa nyɛ Liya dabipaɣ’ la mi bidibisi daa nyɛ Gaad mini Asha. Yaakubu ni daa dɔɣi bidib’ shɛb’ Mɛsopoteemia m-bala.
Yisahaku kum yɛla
27 #
Pil 13.18
Ka Yaakubu daa kul’ o ba Yisahaku sani Mamri bee Kiriatariba luɣ’ shɛli bɛ ni daa booni Hiburɔn ka di nyɛ Ibrahimma mini Yisahaku ni daa be shɛl’ la. 28Yisahaku daa niŋla yuun’ kɔbiga ni pihinii dunia yili. 29O daa kurigimi zaa, ka daa ti kpi, ka o bidibisi, Iso mini Yaakubu sɔɣ’ o.
Nke Ahọpụtara Ugbu A:
Piligu 35: DBwDB
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
Dagbani Bible with Deuterocanonical Books © Bible Society of Ghana, 2011.