Actes 3
3
Ufaliŋfaan ubɔ ká dicáaǹdi
1Dalba ní Peetroo nì Yoowaneesi nìn nóó ki jɔ́ḿ kunimbɔtidiin tikúti tita wimmeem yuntiŋu. 2Kunimbɔtidiiyee nìn cáá kipunyɔkɔ kin bi nìn yíì yii Kipunyɔkɔnyaaŋŋee. Uninja ubɔ, u nìn sá ufaliŋfaan doooo u-biyatin, ní bi nìn cāabìń-u ki kàantí kutaa sá kamaa Kipunyɔkɔnyaaŋŋee nyɔkɔpu, ú nīn mèé bin jītí ki kóò kunimbɔtidiinee animbil. 3Uninjee ká Peetroo nì Yoowaneesi cá kí kɔ́ee, ní u bíi mèé-bi animbil. 4Ní bi dū bi-nimbikpeeŋu ki báaǹ u-pu, ní Peetroo bí yii: «Kpèè doo!» 5Niinee ní u bíi kpèé-bi címmm, ki bàà cí kí fōō tiba bi-cee. 6Ní Peetroo bí-u yii: «Maa cáá animbil kaa cáá sindaariya, ama tin m cááyee, m làá tīī-si kudɔŋu. Nì Yeesu Kriisitoo Naasaareeti yɔu yindi puee, yīkìí còom̀!» 7Ní Peetroo cúú u-ŋaŋgiil ki dúkutì-u yilpu. Dicilpu niinee, u-taaŋi ŋin fàl̄ee tāntì ki ŋáŋkì, 8ní u yùkū ki yúl̀, ní ki kíǹ ki bíi còom̄. U nì bi kɔkɔ táá ki kɔ́ kunimbɔtidiin, ní u còom̄ ki yùkufī ki tìintí ki nyɔ́ŋkí Unimbɔti. 9Kunipaau kɔkɔ nín ká u còomìń ki nyɔ́ŋkí Unimbɔtee, 10bi béè-u yii úǹ di nìn kàal̀ kunimbɔtidii punyɔkɔnyaaŋkee nyɔkɔpu ki mèé animbilee. Ní an ŋá-bi maamaaci, bi bākatì kijapaayee nín ká dicáaǹdi puee.
Peetroo sòon̄ kunimbɔtidiin
11Uninjee gbíntìi ŋúb́ Peetroo nì Yoowaneesi ki nóó-bee, binib kɔkɔ bākatì ki sáǹní ki dɔ́miń bi-cee kadantiku un bi yíì Saloomɔn kadantikuuee taapu#3.11 Dūú ŋmàntī nì 5.12, Yoow 10.23.. 12Peetroo ká mimmee, ní ki bí samaayee yii: «Nimbi Isirayeel yab, ba ŋá ní tin bí nee ŋá-ni maamaaci? Ba ŋá ní ni dū ni-nimbikpeeŋu ki báaǹ ti-pu míǹ, a lì kii timbi ti-ba pɔŋŋu àá ti-deedeeu Unimbɔti nimbiin di yāntì uninja nee ká dicáaǹdee? 13Di sá Abraam nì Isaaki nì Jaakɔb Nimbɔtiu, ti-naanjab Nimbɔtiuee#3.13 Kpèè Disa 3.15. di ŋá míǹ kí tīī u-tɔntɔnliu Yeesu tinyool. Úǹ ní ni cúú ki tīī Piilati yii naa là-u, bí kpɔ̀-u, ŋyunti ŋun Piilati u-ba bàà nìn là kí gíiǹ-u kí lííyee. 14Ni yíì yii naa là Yeesu un sá circir ki bí deedeeyee, ama ní ki gbāam̀ yii ú gíiǹ unikpɔl kí tīī-ni#3.14 Kpèè Maat 27.15-23, Maar 15.6-14, Luuki 23.13-23, Yoow 18.38-40, 19.12-15., 15ní ki kūū dimaŋfal Dindaan. Ama Unimbɔti fīkitì-u ditaŋkpiilin, timbi kɔkɔwoooo nìn ká ki sá biseeradambi. 16Uninja un ni wāĺ ki nyí nee, Yeesu un ti fōō ki kííyee yindi pu ní kijapaai nee ká dicáaǹdi. Ti nín fōō-u ki kííyee di yì-tì ní uninja nee pɔ́ɔkì tiŋan ni-kɔkɔ nimbiin nee.
17«Kɔŋkɔnnee, m-nabiyaamu, m nyí yii naa nìn nyí ní ki ŋáaǹ tin bí nee, ki kpáaǹ ni-yidambi mun. 18Ama Unimbɔti nín nìn dī u-bɔnaatiliibi kɔkɔ nyɔmmu pu ki sòon̄ puee, yii Meesiya làá dāá jī falaayee, an lafun ŋá míǹ#3.18 Dūú ŋmàntī nì Luuki 24.26-27.. 19Míǹ puee, fámaan ni-kpitii kí gítímaan Unimbɔti cee kí wàatī ní ú kpìtī ni-kpitii kɔkɔ. 20Niinee, ti-Dindaan làá tīiń-ni diŋuŋfil yuntiŋu, kí tɔ̄ń Yeesu un u lēē yii ú nīn sá Meesiya ki tīī-nee. 21Kun puee u dáá kā Unimbɔti cee kí nīn cí ŋyunti ŋun Unimbɔti làá dāá kpántí tikɔkɔ mpɔm, kii u nín nìn yāntì u-circir bɔnaatiliibi sòon̄ dooooyee puee. 22Mooyiisi nìn lī yii: <Ti-Dindaan ni-Nimbɔtiu làá dāá lēē ni-nabiyaamu kansikin ubɔ, ú nīn sá Unimbɔti bɔnaatiliu kii mamee. Ní dāá pīlifì tin kɔkɔwoooo u làá sòoǹ nì nee. 23Un sá kamaa yaa kaa dāa pílifiǹ Unimbɔti bɔnaatiliu gbantee, bi làá dāá nyāntí-u Unimbɔti samaau kansikin kí kpɔ̀-u#3.23 B. 22-23: kpèè Ditee 18.15,18,19..>» 24Ní Peetroo nìkī ki bí yii: «Unimbɔti bɔnaatiliibi kɔkɔ, bin nìn sòon̄ doooo Samiyeel yuntiŋu ki kpáaǹ bin dāa páaǹní u-boonee, báà ŋma nìn nāatì tibɔti gbanti wiiŋyi pu. 25Nimbi di sá bin jíń tin Unimbɔti nìn pōoǹ ki tīī u-bɔnaatiliibee, ki fōō u nín nìn pūtì ki pōoǹ tin kí ŋá kí tīī ti-naanjabee mun. Dipoondi gbanti poon ní u lī Abraam yii: <A-dicaŋku pu ní m làá dāá dī kí bìin̄ duulinya timbuliŋ kɔkɔ pu#3.25 Diny 22.18..> 26Nimbi pu ní Unimbɔti fīkitì u-tɔntɔnliu Yeesu. U dū-u ki túnní ni-cee mpeepeekaam, ú dāan̄ kí ŋá-ni tiŋan kí nyāntí báà ŋma u-tuŋkpitiŋ poon.»
Nke Ahọpụtara Ugbu A:
Actes 3: BASSARDC
Mee ka ọ bụrụ isi
Kesaa
Mapịa
Ịchọrọ ka echekwaara gị ihe ndị gasị ị mere ka ha pụta ìhè ná ngwaọrụ gị niile? Debanye aha gị ma ọ bụ mee mbanye
BIBLE EN N'TCHAM (Bassar) © Alliance Biblique du Togo, 2013.